ഗസ്സയില്‍ 732 ദിവസമായി ഇസ്രാഈല്‍ തുടരുന്ന വംശഹത്യയില്‍ കൊല്ലപ്പെട്ട കുട്ടികളുടെ എണ്ണം 20,000 കടന്നു. ഗസ്സയിലെ ആകെ ജനസംഖ്യയുടെ രണ്ട് ശതമാനത്തോളം വരും ഇത്. പരിക്കേറ്റ കുട്ടികളുടെ എണ്ണം 42,011 ആണ്. ഇതില്‍ 21,000ത്തോളം കുട്ടികള്‍ സ്ഥിരമായി അംഗവൈകല്യം സംഭവിച്ചവരായി മാറിയെന്ന് യൂ എന്‍ കണക്കുകള്‍ പറയുന്നു. ഇതില്‍ ഏറ്റവും സാരമായി ബാധിക്കപ്പെട്ട വിഭാഗം ഒരു വയസിന് താഴെയുള്ള 1,009 കുട്ടികളാണ്. ഇസ്രാഈലിന്റെ വംശഹത്യ ആരംഭിച്ചതിന് ശേഷം ജനിച്ച 450 കുട്ടികള്‍ക്ക് പട്ടിണിയും സ്‌ഫോടനങ്ങളുമില്ലാതെ മറ്റൊന്നും അറിയില്ല. ആയിരക്കണക്കിന് കുഞ്ഞുങ്ങളെ കാണാതായിട്ടുണ്ട്. ഇവരില്‍ പലയും കെട്ടിടാവശിഷ്ടങ്ങള്‍ക്കിടയില്‍ കുടുങ്ങിപ്പോയതാവം എന്നാണ് കണക്ക് കൂട്ടുന്നത്.
ഗസ്സയില്‍ നടക്കുന്നത് ഭാവി ഫലസ്തീന്‍ ജനതയെ ഉന്‍മൂലനം ചെയ്യാനുള്ള മനപ്പൂര്‍വമായ യുദ്ധ കുറ്റകൃത്യമാണെന്ന് സേവ് ചില്‍ഡ്രന്‍ സംഘടനയുടെ ഫലസ്തീന്‍ റിജണല്‍ ഡയറക്ടര്‍ അഹമ്മദ് അല്‍ഹെവി പറയുന്നു. ഗസ്സയില്‍ നിലവില്‍ അവശേഷിക്കുന്ന കുട്ടികള്‍ക്കു പോലും ഭാവി ഇരുളടഞ്ഞതാണ്. സ്‌കൂളുകള്‍ അടഞ്ഞു കിടക്കാന്‍ തുടങ്ങിയിട്ട് മൂന്നു വര്‍ഷത്തിനടുത്തായി. 165 സ്‌കൂള്‍ കെട്ടിടങ്ങളും കോളജുകളും യൂണിവേഴ്സിറ്റികളുമെല്ലാം നാമാവശേഷമായി 12,000 വിദ്യാര്‍ത്ഥികളും 130 അധ്യാപകരും 193 അക്കാദമിക് വിദഗ്ധരും കൊല്ലപ്പെട്ടു. ഇതിനു പുറമെ പോഷകാഹാരക്കുറവും ഭക്ഷ്യദൗര്‍ലെവും കാരണം പട്ടിണി കിടന്ന് മരിച്ച കുഞ്ഞുങ്ങളുടെ എണ്ണം 115 കടന്നു. അഞ്ചു വയസിന് താഴെയുള്ള 132.400 കുട്ടികള്‍ കൊടും പട്ടിണിയെ അഭിമുഖീകരിക്കുകയാണെന്ന് യൂ.എന്‍ പറയുന്നു.

ഗസ്സയിലെ ഭൗതിക സംവിധാനങ്ങളില്‍ 90 ശതമാനവും നശിപ്പിക്കപ്പെട്ടു. ഗസ്സയുടെ 80 ശതമാനത്തിന്റേയും നിയന്ത്രണം നിലവില്‍ ഇസ്രാഈല്‍ സേനക്കാണ്. 97 ശതമാനം സ്‌കൂളുകളും 94 ശതമാനം ആശുപത്രികളും തകര്‍ന്നു. 18 അശുപത്രികള്‍ 21 ആരോഗ്യ കേന്ദ്രങ്ങള്‍. 200 ആബുലന്‍സുകള്‍ എന്നിവ തകര്‍ക്കപ്പെട്ടു. 12,000 ഗര്‍ഭിണികള്‍ക്ക് പട്ടിണിയും ആരോഗ്യ പരിരക്ഷയും ലഭിക്കാത്തത് കാരണം ഗര്‍ഭം അലസി പ്പോയതായി കണക്കുകള്‍ വ്യക്തമാക്കുന്നു.