Cricket

‘കളിക്കാൻ വിളിച്ചാൽ പോയി കളിക്കും, ഇല്ലെങ്കിൽ കളിക്കില്ല’: സഞ്ജു സാംസൺ

‘വേൾഡ് കപ്പ് ജയിച്ചപ്പോഴാണ് ഇന്ത്യൻ ക്രിക്കറ്റർ എന്നത് ചെറിയ കാര്യമല്ലെന്ന് മനസ്സിലായതെന്നും ഇന്ത്യയുടെ സഞ്ജു സാംസൺ പറഞ്ഞു

Published

1 month ago

August 9, 2024

webdesk14

കൊച്ചി: കളിക്കാൻ വിളിച്ചാൽ പോയി കളിക്കുമെന്നും അല്ലെങ്കിൽ കളിക്കാൻ വിളിക്കുന്നതിന് വേണ്ടിയുള്ള പണി നോക്കുമെന്നും സഞ്ജു സാംസൺ. ‘മൂന്ന് ഫോർമാറ്റിലേക്കും മാറാനാണ് ശ്രമം, ഐപിഎല്ലും ശേഷം നടന്ന ടി 20 ലോകകപ്പും ശേഷം നടന്ന രണ്ട് പരമ്പരകളും വലിയ അനുഭവങ്ങളായിരുന്നു. അവസാന മത്സരങ്ങളിൽ തിളങ്ങാനായില്ല, എന്നാൽ എപ്പോഴും മികച്ച നിലയില്‍ കളിക്കാൻ ശ്രമിക്കും’, കേരള ക്രിക്കറ്റ് അസോസിയേഷൻ സംഘടിപ്പിക്കുന്ന കേരള ക്രിക്കറ്റ് ലീഗിന്റെ വാർത്താ സമ്മേളനത്തിൽ മാധ്യമങ്ങളുടെ ചോദ്യങ്ങളോട് പ്രതികരിച്ച് ഇന്ത്യയുടെ മലയാളി ക്രിക്കറ്റ് താരം പറഞ്ഞു.

ടീം സെലക്ഷനിൽ മിക്കപ്പോഴും പരിഗണന കിട്ടാതെ പോകുന്നുണ്ടോ എന്ന ചോദ്യത്തിന്, “കളിക്കാൻ വിളിച്ചാൽ പോയി കളിക്കും, ഇല്ലേൽ കളിക്കില്ല, എല്ലാം പോസിറ്റീവ് കാണാനാണ് ഞാൻ ആഗ്രഹിക്കുന്നത്”എന്ന് സഞ്ജു പറഞ്ഞു. കരിയർ മുന്നോട്ടുകൊണ്ടുപോകാനുള്ള കാര്യങ്ങളിലാണ് താൻ ഫോക്കസ് ചെയ്യുന്നത്. അതിന് വേണ്ടിയുള്ള പരിശീലനങ്ങളും ശ്രമവും നടത്തുന്നുണ്ട്. മുന്നോട്ടുപോകുന്തോറും കളിയിൽ ഏറെ മെച്ചപ്പെടാൻ കഴിയുന്നുണ്ടെന്നും സഞ്ജു പറഞ്ഞു.

‘വേൾഡ് കപ്പ് ജയിച്ചപ്പോഴാണ് ഇന്ത്യൻ ക്രിക്കറ്റർ എന്നത് ചെറിയ കാര്യമല്ലെന്ന് മനസ്സിലായതെന്നും ഇന്ത്യയുടെ സഞ്ജു സാംസൺ പറഞ്ഞു. രഞ്ജി ട്രോഫിയിൽ കളിക്കണമെന്ന് ചെറുപ്പത്തിൽ വലിയ ആഗ്രഹമുണ്ടായിരുന്നെന്നും ആ ആഗ്രഹം വേൾഡ് കപ്പ് നേടുന്ന ടീമിലെത്തിച്ചുവെന്നും സഞ്ജു പറഞ്ഞു. ആ യാത്ര സ്വപ്ന തുല്യവും അവിസ്മരണീയവുമാണെന്നും സഞ്ജു കൂട്ടിച്ചേർത്തു. ‘ന്യൂസിലാൻഡ് മുതൽ വെസ്റ്റ്ഇൻഡീസ് വരെ പോകുമ്പോഴും അവിടെ കളി കാണാനും പിന്തുണ നൽകാനും മലയാളികളുണ്ടാകും, കേരളത്തിന്റെ ഈ പിന്തുണ ഡ്രസിങ് റൂമിൽ വരെ ചർച്ചയായിരുന്നു. ‘എടാ മോനെ കളിയടാ’ എന്ന ഗ്യാലറിയിൽ നിന്നുള്ള ഒറ്റ ഡയലോഗിൽ പേടിയും ടെൻഷനുമെല്ലാം പോയി കിട്ടും, സഞ്ജു കൂട്ടിച്ചേർത്തു.

Related Topics:cricket India Sanju Samson

Up Next

വയനാട് മുണ്ടക്കൈ ദുരന്തം: പ്രധാനമന്ത്രി പ്രത്യേക പാക്കേജ് പ്രഖ്യാപിക്കണം: വി.ഡി സതീശന്‍

Don't Miss

യുവനടിയുടെ പരാതി; യൂട്യൂബർ സൂരജ് പാലാക്കാരനെ കസ്റ്റഡിയിലെടുത്ത് പൊലീസ്

Click to comment

Cricket

ഇംഗ്ലണ്ട് ക്രിക്കറ്റ് താരം മൊയീന്‍ അലി അന്താരാഷ്ട്ര ക്രിക്കറ്റില്‍ നിന്ന് വിരമിച്ചു

ഇപ്പോൾ അടുത്ത തലമുറയ്ക്ക് വഴിമാറി കൊടുക്കേണ്ട സമയമായിരിക്കുന്നു. ഇതാണ് ക്രിക്കറ്റിൽ നിന്ന് വിരമിക്കാൻ ശരിയായ സമയമെന്ന് തോന്നുന്നു

Published

1 week ago

September 8, 2024

webdesk13

ഇംഗ്ലണ്ട്ക്രിക്കറ്റ് ടീം ഓൾ റൗണ്ടർ മൊയീൻ അലി അന്താരാഷ്ട്ര ക്രിക്കറ്റിൽ നിന്ന് വിരമിച്ചു. 37കാരനായ മൊയീൻ അലിയെ ഓസ്ട്രേലിയയ്ക്കെതിരെ ഈ മാസം തുടങ്ങുന്ന ട്വന്റി 20 പരമ്പരയ്ക്കുള്ള ടീമിൽ ഉൾപ്പെടുത്തിയിരുന്നില്ല. ‘താൻ ഇംഗ്ലണ്ട് ക്രിക്കറ്റിനായി ഒരുപാട് മത്സരങ്ങൾ കളിച്ചു.

ഇപ്പോൾ അടുത്ത തലമുറയ്ക്ക് വഴിമാറി കൊടുക്കേണ്ട സമയമായിരിക്കുന്നു. ഇതാണ് ക്രിക്കറ്റിൽ നിന്ന് വിരമിക്കാൻ ശരിയായ സമയമെന്ന് തോന്നുന്നു.’ മൊയീൻ അലി വിരമിക്കൽ തീരുമാനം പ്രഖ്യാപിച്ചുകൊണ്ട് പറ‍ഞ്ഞത് ഇങ്ങനെ.

ഇംഗ്ലണ്ടിന് വേണ്ടി കളിച്ചതിൽ ഏറെ അഭിമാനമുണ്ട്. ആദ്യമായി ഇംഗ്ലണ്ടിന് വേണ്ടി കളിക്കാനിറങ്ങിയപ്പോൾ താൻ എത്രകാലം ക്രിക്കറ്റിൽ ഉണ്ടാകുമെന്ന് അറിയില്ലായിരുന്നു. ദേശീയ ടീമിനായി 300നടുത്ത് മത്സരങ്ങൾ കളിക്കാൻ കഴിഞ്ഞു. ടെസ്റ്റ് ക്രിക്കറ്റ് കളിക്കാനാണ് തുടക്കകാലത്ത് താൻ ആഗ്രഹിച്ചത്. എന്നാൽ ഇയാൻ മോർഗൻ തന്നെ ഏകദിന ടീമിലേക്കും വിളിക്കുകയായിരുന്നു. അത് മികച്ച അനുഭവമായിരുന്നു. എങ്കിലും ടെസ്റ്റ് ക്രിക്കറ്റാണ് ഏറ്റവും മികച്ച ഫോർമാറ്റെന്ന് ഞാൻ കരുതുന്നു. മൊയീൻ അലി പറയുന്നു.

2014ലാണ് അന്താരാഷ്ട്ര ക്രിക്കറ്റിലേക്ക് മൊയീൻ അലി കടന്നുവന്നത്. 68 ടെസ്റ്റുകളും 138 ഏകദിനങ്ങളും 92 ട്വന്റി 20യും അലി ഇംഗ്ലണ്ടിനായി കളിച്ചു. 6,678 റൺസാണ് മൂന്ന് ഫോർമാറ്റുകളിലുമായി അലി അടിച്ചുകൂട്ടിയത്. എട്ട് സെഞ്ച്വറിയും 28 അർധ സെഞ്ച്വറിയും 366 വിക്കറ്റുകളും താരത്തിന്റെ കരിയറിന്റെ ഭാഗമാണ്. 2024ലെ ട്വന്റി 20 ലോകകപ്പിൽ ഇന്ത്യയ്ക്കെതിരെയായിരുന്നു മൊയീൻ അലി ഇംഗ്ലണ്ടിനായി അവസാനം കളിച്ചത്.

Cricket

രാജസ്ഥാന്‍ റോയസിന്റെ മുഖ്യപരിശീലകനായി രാഹുല്‍ ദ്രാവിഡ്‌

നിലവിലെ പരിശീലകന്‍ കുമാര്‍ സംഗക്കാര ഡയറ്കടര്‍ ഓഫ് ക്രിക്കറ്റ് ആകും.

Published

2 weeks ago

September 4, 2024

webdesk13

രാഹുല്‍ ദ്രാവിഡ് ഐ.പി.എലില്‍ രാജസ്ഥാന്‍ റോയല്‍സിന്റെ മുഖ്യ പരിശീലകനാകും. ഇന്ത്യയുടെ പരിശീലക സ്ഥാനം ഒഴിഞ്ഞതിന് പിന്നാലെയാണ് പുതിയ ദൗത്യം. നേരത്തെ 2011-2013 സീസണുകളില്‍ ദ്രാവിഡ് രാജസ്ഥാനെ പരിശീലിപ്പിച്ചിരുന്നു. നിലവിലെ പരിശീലകന്‍ കുമാര്‍ സംഗക്കാര ഡയറ്കടര്‍ ഓഫ് ക്രിക്കറ്റ് ആകും. 2011 മുതല്‍ 2013 വരെ റോയല്‍സിനായി ഐ.പി.എല്ലില്‍ കളിച്ച ദ്രാവിഡ്, 2014- 2015 വര്‍ഷങ്ങളില്‍ ടീമിന്റെ മെന്ററായും പ്രവര്‍ത്തിച്ചു.

2021 നവംബറില്‍ ഇന്ത്യന്‍ ദേശീയ ടീമിന്റെ പരിശീലക ചുമതല ഏറ്റെടുത്ത ദ്രാവിഡ് ലോക ടെസ്റ്റ് ചാമ്പ്യന്‍ഷിപ്പിലും, 2023ലെ ഏകദിന ലോകകപ്പിലും ടീമിനെ ഫൈനലിലേക്ക് നയിച്ചിരുന്നു. രണ്ട് തവണയും കലാശപ്പോരാട്ടത്തില്‍ വീണ ഇന്ത്യ പക്ഷേ ടി20 ലോകകപ്പില്‍ മുത്തമിട്ട് ദ്രാവിഡിന്റെ വിടവാങ്ങല്‍ അവിസ്മരണീയമാക്കി.

Cricket

പാക്കിസ്ഥാന് ഇതിലും വലിയ നാണക്കേട് ഇനി സംഭവിക്കാനില്ല, രണ്ടാം ടെസ്റ്റിലും വിജയിച്ച്‌ ബംഗ്ലാദേശ്

185 റൺസ് വിജയലക്ഷ്യവുമായി രണ്ടാം ഇന്നിങ്സിൽ ബാറ്റിങ്ങിനിറങ്ങിയ ബംഗ്ലാദേശ് 4 വിക്കറ്റ് മാത്രം നഷ്ടത്തിൽ വിജയത്തിലെത്തുകയായിരുന്നു.

Published

2 weeks ago

September 3, 2024

webdesk13

പാകിസ്ഥാനെ തകർത്ത് അവരുടെ മണ്ണിൽ ടെസ്റ്റ് പരമ്പര വിജയിച്ച് പുതുചരിത്രമെഴുതി ബംഗ്ലാദേശ്. രണ്ടാമത്തെയും അവസാനത്തെയും ടെസ്റ്റിൽ 6 വിക്കറ്റിനാണ് സന്ദർശകരുടെ വിജയം. 185 റൺസ് വിജയലക്ഷ്യവുമായി രണ്ടാം ഇന്നിങ്സിൽ ബാറ്റിങ്ങിനിറങ്ങിയ ബംഗ്ലാദേശ് 4 വിക്കറ്റ് മാത്രം നഷ്ടത്തിൽ വിജയത്തിലെത്തുകയായിരുന്നു.

40 റൺസെടുത്ത ഓപ്പണർ സാകിർ ഹസൻ ടോപ് സ്കോററായി. നായകൻ നജ്മുൽ ഹുസൈൻ ഷാന്റോ (38), മോമിനുൽ ഹഖ് (34), ഷദ്മാൻ ഇസ്ലാം (24) എന്നിവരാണ് പുറത്തായ മറ്റു ബാറ്റർമാർ. 22 റൺസുമായി മുഷ്ഫിഖുർ റഹീമും 21 റൺസുമായി ഷാകിബുൽ ഹസനും പുറത്താകാതെനിന്നു.

പാകിസ്ഥന് വേണ്ടി മിർ ഹംസ, ഖുറം ഷഹ്സാദ്, അബ്റാർ അഹ്മദ്, സൽമാൻ ആഗ എന്നിവർ ഓരോ വിക്കറ്റ് വീതം നേടി. ആദ്യ ടെസ്റ്റിൽ 10 വിക്കറ്റ് ജയവുമായി ചരിത്രത്തിലാദ്യമായി പാകിസ്ഥാനെതിരെ ടെസ്റ്റ് ജയം സ്വന്തമാക്കിയ ബംഗ്ലാദേശുകാർ രണ്ടാം ടെസ്റ്റിലും ജയം പിടിച്ചെടുത്ത് അവർക്കെതിരെ ആദ്യ ടെസ്റ്റ് പരമ്പരയും നേടിയിരിക്കുകയാണ്.

2009ൽ വെസ്റ്റിൻഡീസിനെതിരെ മാത്രമാണ് വിദേശത്ത് ബംഗ്ലാദേശിന് നേരത്തെ ടെസ്റ്റ് പരമ്പര സ്വന്തമാക്കാനായിരുന്നത്.

വിക്കറ്റ് നഷ്ടപ്പെടാതെ 42 റൺസെന്ന നിലയിൽ അഞ്ചാം ദിനം കളി പുനരാരംഭിച്ച ബംഗ്ലാദേശിന് സ്കോർ ബോർഡിൽ 58 റൺസായപ്പോൾ സാകിർ ഹസന്റെ വിക്കറ്റ് നഷ്ടമായി. 12 റൺസ് കൂടി ചേർത്തപ്പോഴേക്കും ഷദ്മാൻ ഇസ്ലാമും വീണു. പിന്നാലെ നജ്മുൽ ഹുസൈൻ ഷാന്റോയും മോമിനുൽ ഹഖും പിടിച്ചുനിന്നതോടെ പാക് ബൗളർമാർ കുഴങ്ങി. 127 റൺസുള്ളപ്പോൾ ഷാന്റോയും 153ലെത്തിയപ്പോൾ മോമിനുൽ ഹഖും വീണെങ്കിലും മുഷ്ഫിഖുർ റഹീമും ഷാകിബും ചേർന്ന് അവരെ സ്വപ്ന വിജയത്തിലേക്ക് നയിക്കുകയായിരുന്നു.

രണ്ടാം ഇന്നിങ്സിലെ കൂട്ടത്തകർച്ചയാണ് പാകിസ്ഥാന് തിരിച്ചടിയായത്. ടോസ് നഷ്ടപ്പെട്ട് ആദ്യ ഇന്നിങ്സിൽ ബാറ്റിങ്ങിനിറങ്ങിയ പാകിസ്ഥാൻ 274 റൺസിന് പുറത്തായി. എന്നാൽ, മറുപടി ബാറ്റിങ്ങിനിറങ്ങിയ ബംഗ്ലാദേശിനെ ആറ് വിക്കറ്റ് നേടിയ ഖുറം ഷഹ്സാദിന്റെ മികവിൽ പാകിസ്ഥാൻ 262 റൺസിന് തിരിച്ചുകയറ്റി. 12 റൺസ് ലീഡ് വഴങ്ങിയ ബംഗ്ലാദേശിനായി രണ്ടാം ഇന്നിങ്സിൽ ബൗളർമാർ വീണ്ടും ആഞ്ഞടിക്കുന്നതാണ് പിന്നെ കണ്ടത്.

5 വിക്കറ്റുമായി ഹസൻ മഹ്മൂദും 4 വിക്കറ്റുമായി നാഹിദ് റാണയും തകർത്താടിയപ്പോൾ ആതിഥേയർ വെറും 172 റൺസിന് പുറത്തായി. 47 റൺസുമായി പുറത്താകാതെനിന്ന സൽമാൻ ആഗയും 43 റൺസെടുത്ത മുഹമ്മദ് റിസ്‍വാനുമാണ് അവരെ വൻ നാണക്കേടിൽനിന്ന് കരകയറ്റിയത്. അബ്ദുല്ല ഷഫീഖ് (3), സയിം അയൂബ് (20), ഖുറം ഷഹ്സാദ് (0), ഷാൻ മസൂദ് (28), ബാബർ അസം (11), സൗദ് ഷകീൽ (2), മുഹമ്മദ് അലി (0), അബ്റാർ അഹ്മദ് (2), മിർ ഹംസ (4) എന്നിങ്ങനെയായിരുന്നു മറ്റു ബാറ്റർമാരുടെ സംഭാവനകൾ.