കൊച്ചി: കേരള ബ്ലാസ്‌റ്റേഴ്‌സ് ആരാധകര്‍ക്ക് സന്തോഷ വാര്‍ത്തയുമായി കായിക മാധ്യമമായ ഖേല്‍ നൗ. ബ്ലാസ്‌റ്റേഴ്‌സ് ചര്‍ച്ച നടത്തുന്ന അര്‍ജന്റീനന്‍ അറ്റാക്കിംഗ് മിഡ്ഫീല്‍ഡര്‍ ഫാക്കുണ്ടോ പെരേരയുമായി കരാര്‍ ഒപ്പിട്ടതായാണ് ഖേല്‍ നൗ റിപ്പോര്‍ട്ട് ചെയ്യുന്നത്. കഴിഞ്ഞ ദിവസം മറ്റൊരു പ്രമുഖ കായിക മാധ്യമായ ഗോള്‍ ഡോട്ട് കോമാണ് ഫാക്കുണ്ടോയുമായി ബ്ലാസ്‌റ്റേഴ്‌സ് ചര്‍ച്ച നടത്തുന്നതായുളള വാര്‍ത്ത പുറത്ത് കൊണ്ട് വന്നത്.

ഒരു വര്‍ഷത്തേക്കാണ് 32കാരനായ ഫാക്കുണ്ടോയുമായി ബ്ലാസ്‌റ്റേഴ്‌സ് കരാര്‍ ഒപ്പിട്ടിരിക്കുന്നത്. ക്ലബിനും താരത്തിനും സമ്മതമാണെങ്കില്‍ കരാര്‍ ഒരു വര്‍ഷത്തേക്ക് കൂടി നീട്ടാനും കരാറില്‍ ഓപ്ഷനുണ്ട്. ഏകദേശം 75 ലക്ഷം രൂപയ്ക്കാണ് ഫാക്കുണ്ടോ ബ്ലാസ്‌റ്റേഴ്‌സുമായി കരാര്‍ ഒപ്പിട്ടിരിക്കുന്നത്. കൂടാതെ താരത്തിന് ബോണസും ലഭിക്കും.

ബ്യൂണസ് ഐറിസ് ക്ലബായ എസ്തൂഡിയന്‍സില്‍ ഫുട്‌ബോള്‍ കളിച്ചാന് ഫാക്കുണ്ടോ പ്രൊഫഷണല്‍ ഫുട്‌ബോളിലേക്ക് കാലെടുത്ത് വെച്ചത്. 2006 മുതല്‍ 2009 വരെ ഫാക്കുണ്ടോ എസ്തൂഡിയന്‍സിന് വേണ്ടിയാണ് കളിച്ചത്. അവിടെ നിന്നും ചിലിയന്‍ ക്ലബായ പാലസ്തീനോയിലേക്ക് താരത്തെ ലോണിന് കൈമാറുകയായിരുന്നു. പിന്നീട് നിരവധി യൂറോപ്യന്‍ ലാറ്റിമേരിക്കന്‍ ക്ലബുകള്‍ക്കായി താരം പന്ത് തട്ടി. യൂറോപ്പ ലീഗില്‍ 16 മത്സരങ്ങള്‍ ബൂട്ടണിഞ്ഞിട്ടുളള ഈ അര്‍ജന്റീനന്‍ താരം ഒരു ഗോളും ഒരു അസിസ്റ്റും സ്വന്തമാക്കിയിട്ടുണ്ട്.