തിരുവനന്തപുരം: കരുത്തുറ്റ തീരുമാനങ്ങളിലൂടെ സിവില്‍ സര്‍വീസ് രംഗത്ത് സജീവ സാന്നിധ്യമായ നളിനി നെറ്റോ ചീഫ് സെക്രട്ടറി സ്ഥാനമൊഴിഞ്ഞു. ധനകാര്യവകുപ്പ് അഡീഷണല്‍ ചീഫ് സെക്രട്ടറി കെ.എം എബ്രഹാമിന് ചീഫ് സെക്രട്ടറിയുടെ അധിക ചുമതല നല്‍കി. നളിനി നെറ്റോ കഴിഞ്ഞാല്‍ കേരള കേഡറിലെ ഏറ്റവും സീനിയറായ ഉദ്യോഗസ്ഥനാണ് കെ.എം എബ്രഹാം.
അതേസമയം, വിരമിച്ചെങ്കിലും നളിനി നെറ്റോയെ മുഖ്യമന്ത്രിയുടെ ഓഫീസിന്റെ ചുമതലയുള്ള പ്രിന്‍സിപ്പല്‍ സെക്രട്ടറിയായി നിയമിച്ചു. 1981 ബാച്ച് ഐ.എ.എസ് ഓഫീസറായ നളിനി നെറ്റോയുടെ സേവനം സര്‍വീസില്‍ നിന്ന് വിരമിച്ചാലും ആവശ്യമാണെന്ന് സര്‍ക്കാര്‍ നേരത്തെ അറിയിച്ചിരുന്നു. കേരളത്തിന്റെ 42-ാമത് ചീഫ് സെക്രട്ടറിയായി ചുമതലയേറ്റ അവര്‍ നാലാമത്തെ വനിതാ ചീഫ് സെക്രട്ടറിയാണ്. 11 വര്‍ഷത്തോളം മുഖ്യ തെരഞ്ഞെടുപ്പ് കമ്മീഷണറായി സേവനമനുഷ്ഠിച്ച നളിനി നെറ്റോ ഗതാഗത സെക്രട്ടറിയായും ടൂറിസം ഡയറക്ടറായും പ്രവര്‍ത്തിച്ചിട്ടുണ്ട്.