ലണ്ടന്‍: സ്പാനിഷ് ഭീമന്മാരായ റയല്‍ മാഡ്രിഡിന്റെ ശനിശദ തുടരുന്നു. യുവേഫ ചാമ്പ്യന്‍സ് ലീഗില്‍ റയല്‍ ടോട്ടനം ഹോട്‌സ്പറിന്റെ തട്ടകത്തില്‍ ഒന്നിനെതിരെ മൂന്നു ഗോള്‍ വഴങ്ങി. ലാലിഗയില്‍ ജിറോണയോടേറ്റ അട്ടിമറി തോല്‍വിയുടെ ആഘാതത്തില്‍ നിന്ന് കരകയറും മുമ്പാണ് പ്രസിദ്ധമായ വെംബ്ലി സ്റ്റേഡിയത്തില്‍ സിദാനും കൂട്ടരും തിരിച്ചടി നേരിട്ടത്. മറ്റൊരു മത്സരത്തില്‍ മാഞ്ചസ്റ്റര്‍ സിറ്റി ഇറ്റാലിയന്‍ കരുത്തരായ നാപോളിയെ അവരുടെ തട്ടകത്തില്‍ ചെന്ന് രണ്ടിനെതിരെ നാലു ഗോളിന് തോല്‍പ്പിച്ചപ്പോള്‍ ലിവര്‍പൂള്‍, സെവിയ്യ,എഫ്.സി പോര്‍ട്ടോ, ഷാഖ്തര്‍ ഡോണസ്‌ക് ടീമുകളും ജയം കണ്ടു.

ഇംഗ്ലീഷ് താരം ഡെലെ അല്ലിയുടെ ഇരട്ട ഗോളുകളാണ് ടോട്ടനത്തിന് സ്വപ്‌നതുല്യമായ ജയമൊരുക്കിയത്. 27, 56 മിനുട്ടുകളില്‍ അല്ലി ലക്ഷ്യം കണ്ടപ്പോള്‍ 65-ാം മിനുട്ടില്‍ ക്രിസ്റ്റിയന്‍ എറിക്‌സണ്‍ ടീമിന്റെ മൂന്നാം ഗോളും നേടി. 80-ാം മിനുട്ടില്‍ ക്രിസ്റ്റിയാനോ റൊണാള്‍ഡോയിലൂടെയാണ് റയല്‍ തോല്‍വിഭാരം കുറച്ചത്. ചാമ്പ്യന്‍സ് ലീഗില്‍ ആറ്‌ ഗോള്‍ നേടിയ ക്രിസ്റ്റിയാനോ ആണ് ടോപ് സ്‌കോറര്‍.

ഇറ്റാലിയന്‍ ലീഗില്‍ മിന്നും ഫോമിലുള്ള നാപോളിയെ, ഇംഗ്ലണ്ടിലെ കരുത്തരായ മാഞ്ചസ്റ്റര്‍ സിറ്റി മറികടന്നത് ടീം വര്‍ക്കിന്റെ ബലത്തിലാണ്. 21-ാം മിനുട്ടില്‍ ലൂകാസ് ഇന്‍സിന്യെയിലൂടെ നാപോളി ലീഡ് നേടിയെങ്കിലും 34, 48 മിനുട്ടുകില്‍ നിക്ലാസ് ഒറ്റമെന്‍ഡിയും ജോണ്‍ സ്‌റ്റോണ്‍സും സന്ദര്‍ശകരെ മുന്നിലെത്തിച്ചു. 62-ാം മിനുട്ടില്‍ ജോര്‍ജിഞ്ഞോയുടെ പെനാല്‍ട്ടിയില്‍ നാപോളി ഒപ്പമെത്തി. എന്നാല്‍ 69-ാം മിനുട്ടില്‍ സെര്‍ജിയോ അഗ്വേറോയും 90-ാം മിനുട്ടില്‍ റഹീം സ്റ്റര്‍ലിങ്ങും വിജയം റാഞ്ചിയെടുത്തു.

117-ാം ഗോളോടെ മാഞ്ചസ്റ്റര്‍ സിറ്റിക്കു വേണ്ടി ഏറ്റവുമധികം ഗോള്‍ നേടുന്ന താരമെന്ന റെക്കോര്‍ഡ് അഗ്വേറോ സ്വന്തം പേരിലാക്കി. 79 വര്‍ഷം പഴക്കമുള്ള എറിക് ബ്രൂക്കിന്റെ റെക്കോര്‍ഡാണ് അര്‍ജന്റീനക്കാരന്‍ പഴങ്കഥയാക്കിയത്.

സ്ലോവേനിയന്‍ ക്ലബ്ബ് മാരിബോറിനെതിരെ മുഹമ്മദ് സലാഹ്, എംറെ കാന്‍, ഡാനിയല്‍ സ്റ്ററിഡ്ജ് എന്നിവരുടെ ഗോളിലാണ് ലിവര്‍പൂള്‍ ജയം കണ്ടത്. ക്ലെമന്റ് ലെങ്‌ലെറ്റ്, എവര്‍ ബനേഗ എന്നിവരുടെ ഗോളില്‍ സെവിയ്യ സ്പാര്‍ട്ടക് മോസ്‌കോയെ വീഴ്ത്തിയപ്പോള്‍ മാര്‍ലോസ് റൊമേറോയുടെ ഇരട്ട ഗോളിന്റെ കരുത്തില്‍ ഷാഖ്തര്‍, ഡച്ച് ക്ലബ്ബ് ഫെയനൂര്‍ദിനെ വീഴ്ത്തി. സ്വന്തം തട്ടകത്തില്‍ എഫ്.സി പോര്‍ട്ടോ ഒന്നിനെതിരെ മൂന്നു ഗോളിനാണ് ജര്‍മന്‍ കരുത്തരായ ആര്‍.ബി ലീപ്‌സിഗിനെ കീഴടക്കിയത്.

അതേസമയം, റയല്‍ മാഡ്രിഡിന്റെ തോല്‍വി മുതലെടുക്കാന്‍ ജര്‍മന്‍ ക്ലബ്ബ് ബൊറുഷ്യ ഡോട്മുണ്ടിന് കഴിഞ്ഞില്ല. സ്വന്തം തട്ടകത്തില്‍ അപോലിനെതിരെ അവര്‍ 1-1 സമനില വഴങ്ങി.

നാല് മത്സരം പിന്നിട്ടപ്പോള്‍ ഗ്രൂപ്പ് ഇയില്‍ ലിവര്‍പൂള്‍ എട്ട് പോയിന്റോടെ ഒന്നാം സ്ഥാനത്താണ്. സെവിയ്യ (7), സ്പാര്‍ട്ടക് മോസ്‌കോ (5) ടീമുകള്‍ പിന്നാലെയുള്ളതിനാല്‍ ഇനിയുള്ള മത്സരങ്ങള്‍ ഇംഗ്ലീഷ് ക്ലബ്ബിന് നിര്‍ണായകമാണ്.

എഫില്‍ നാലാം ജയത്തോടെ മാഞ്ചസ്റ്റര്‍ സിറ്റി നോക്കൗട്ട് യോഗ്യത ഉറപ്പിച്ചു. മൂന്ന് ജയം നേടിയ ഷാഖ്തറിന് ഒരു സമനില കൂടി നേടാനായാല്‍ മുന്നേറം. നാപോളിക്ക് ഇനിയുള്ള രണ്ട് മത്സരങ്ങളില്‍ ജയിച്ചാല്‍ മാത്രം പോരാ, ഷാഖ്തര്‍ തോല്‍ക്കുകയും വേണം.

ഗ്രൂപ്പ് ജിയില്‍ പത്ത് പോയിന്റോടെ തുര്‍ക്കി ക്ലബ്ബ് ബേസിക്തസ് ആണ് ഒന്നാം സ്ഥാനത്ത്. ഒരു പോയിന്റ് കൂടി നേടാനായാല്‍ അവര്‍ക്ക് രണ്ടാം റൗണ്ട് ഉറപ്പാക്കാം. പോര്‍ട്ടോ (6) ആണ് രണ്ടാമത്.

ഗ്രൂപ്പ് എച്ചില്‍ ടോട്ടനം ഹോട്‌സ്പര്‍ (10) യോഗ്യത ഉറപ്പാക്കി. റയല്‍ (7) രണ്ടാം സ്ഥാനത്താണ്. റയല്‍ ഇനിയുള്ള രണ്ട് മത്സരങ്ങള്‍ തോല്‍ക്കുകയും തങ്ങളുടെ രണ്ട് മത്സരവും ജയിക്കുകയും ചെയ്താലേ ബൊറുഷ്യ ഡോട്മുണ്ടിന് മുന്നേറാന്‍ സാധ്യതയുള്ളൂ.