തിരുവനന്തപുരം: യൂട്യൂബിലൂടെ അശ്ലീല വീഡിയോ പങ്കുവെച്ച് സ്ത്രീകളെ അധിക്ഷേപിച്ച വിജയ് പി നായരെ ഇന്ന് കോടതിയില്‍ ഹാജരാക്കും. യൂട്യൂബ് വീഡിയോയിലൂടെ അധിക്ഷേപിച്ചെന്ന ശ്രീലക്ഷ്മി അറയ്ക്കലിന്റെ പരാതിയിലാണ് ഇയാളെ അറസ്റ്റ് ചെയ്തത്. ഐടി ആക്ടിലെ 67, 67 (a) വകുപ്പുകള്‍ പ്രകാരം ജാമ്യമില്ലാ വകുപ്പുകള്‍ ചുമത്തിയാണ് ഇയാള്‍ക്കെതിരെ കേസെടുത്തത്.

അതേസമയം, വിജയുടെ പരാതിയില്‍ ഭാഗ്യലക്ഷ്മിയ്ക്കും ഒപ്പമുണ്ടായിരുന്നവര്‍ക്കും എതിരെ കേസെടുത്തിട്ടുണ്ടെങ്കിലും ഇവര്‍ മുന്‍കൂര്‍ ജാമ്യാപേക്ഷ നല്‍കിയിട്ടുള്ളതിനാല്‍ അറസ്റ്റ് ഉടന്‍ ഉണ്ടാകില്ല.

സൈക്കോളജിസ്റ്റാണെന്ന വ്യാജേന ആയിരുന്നു യൂട്യൂബിലൂടെ ഇയാള്‍ സ്ത്രീകളെ അധിക്ഷേപിച്ചിരുന്നത്. ചെന്നൈ ആസ്ഥാനമായി പ്രവര്‍ത്തിക്കുന്ന ഗ്ലോബല്‍ ഹ്യൂമന്‍ പീസ് സര്‍വകലാശാലയില്‍ നിന്നും ഡോക്ടറേറ്റ് ഉണ്ടെന്ന് ആയിരുന്നു വിജയുടെ അവകാശവാദം. എന്നാല്‍, ചെന്നൈയില്‍ ഇത്തരത്തില്‍ ഗ്ലോബല്‍ ഹ്യൂമന്‍ പീസ് സര്‍വകലാശാലയുടെ ഓഫീസ് പ്രവര്‍ത്തിക്കുന്നില്ല.