ട്രെയിനിനുള്ളില്‍ പാമ്പുകളെ തുറന്നുവിട്ട് ഭയാനക അന്തരീക്ഷം സൃഷ്ടിച്ച് പാമ്പാട്ടികള്‍. ബംഗാളിലെ ഹൗറയില്‍നിന്നു മധ്യപ്രദേശിലെ ഗ്വാളിയാറിലേക്കു പുറപ്പെട്ട ചമ്പല്‍ എക്‌സ്പ്രസിന്റെ ജനറല്‍ കോച്ചിലാണ് സംഭവം.
ട്രെയിനില്‍ സഞ്ചരിച്ചിരുന്ന 5 പാമ്പാട്ടികള്‍, മറ്റു യാത്രക്കാരില്‍നിന്നു സംഭാവന ചോദിച്ചിരുന്നു. എന്നാല്‍ ചില യാത്രക്കാര്‍ പണം നല്‍കാന്‍ തയാറായില്ല. ഇതില്‍ ക്ഷുഭിതരായ പാമ്പാട്ടികള്‍ ഉത്തര്‍പ്രദേശിലെ മഹോബയ്ക്ക് സമീപം ട്രെയിന്‍ എത്തിയപ്പോള്‍ പാമ്പുകളെ കൂടയില്‍നിന്നു തുറന്നുവിടുകയായിരുന്നു.
ഇതോടെ യാത്രക്കാര്‍ പരിഭ്രാന്തരമായി. ഉടന്‍ റെയില്‍വേ കണ്‍ട്രോള്‍ റൂമില്‍ വിവരം അറിയിച്ചെങ്കിലും അടുത്ത സ്‌റ്റേഷന്‍ എത്തുന്നതിനു മുന്‍പ് ഇവര്‍ ട്രെയിനില്‍നിന്നു ചാടി രക്ഷപ്പെട്ടു. ഝാന്‍സി സ്‌റ്റേഷനില്‍വച്ച് യാത്രക്കാരെ മറ്റൊരു ബോഗിയിലേക്ക് മാറ്റി. എല്ലാവരും സുരക്ഷിതരാണെന്ന് റെയില്‍വേ അധികൃതര്‍ വ്യക്തമാക്കി. പാമ്പുകള്‍ക്കായി കോച്ചിനുള്ളില്‍ തിരച്ചില്‍ നടത്തിയെങ്കിലും കണ്ടെത്താനായില്ല. തിരിച്ചറിയാന്‍ സാധിച്ചിട്ടില്ലെങ്കിലും പാമ്പാട്ടികള്‍ക്കെതിരെ പൊലീസ് കേസ് രജിസ്റ്റര്‍ ചെയ്തു. ഇവരെ കണ്ടെത്താനുള്ള ശ്രമത്തിലാണ്.