ചണ്ഡീഗഡ്: ഷമി അടക്കമുള്ള മികച്ച ബൗളര്‍മാരെയെല്ലാം ടീമില്‍ ഉള്‍പ്പെടാത്താത്തതില്‍ ഇന്ത്യന്‍ ടീം മാനേജ്‌മെന്റിനെതിരെ രൂക്ഷ വിമര്‍ശനങ്ങളുമായി് ഹര്‍ഭജന്‍ സിംഗ്.  ദക്ഷിണാഫ്രിക്കക്കെതിരായ രണ്ടാം ഏകദിനത്തില്‍ കൂറ്റന്‍ സ്‌കോര്‍ നേടിയിട്ടും അത് പ്രതിരോധിക്കാനാവാതെ ഇന്ത്യ തോല്‍വി വഴങ്ങിയതോടെ ടീം മാനേജ്‌മെന്റിനെതിരെ വിമര്‍ശനങ്ങള്‍ ഉയര്‍ന്നിരുന്നു.

പ്രധാനമായും ബൗളിംഗ് നിരക്കെതിരെ ആണ് വിമര്‍ശനം. ഹര്‍ഷിത് റാണയും പ്രസിദ്ധ് കൃഷ്ണയും അര്‍ഷ്ദീപ് സിംഗുമാണ് ദക്ഷിണാഫ്രിക്കക്കെതിരായ ഏകദിന പരമ്പരയില്‍ ഇന്ത്യക്കായി പന്തെറിയുന്നത്. സ്പിന്നര്‍മാരായി കുല്‍ദീപ് യാദവും രവീന്ദ്ര ജഡേജയും വാഷിംഗ്ടണ്‍ സുന്ദറുമാണ് ടീമിലുള്ളത്.

എന്നാല്‍ രണ്ട് മത്സരങ്ങളിലും ബാറ്റര്‍മാര്‍ കൂറ്റന്‍ സ്‌കോര്‍ നേടിയെങ്കിലും ഇന്ത്യന്‍ ബൗളിംഗ് നിരയെ സമ്മര്‍ദ്ദത്തിലാക്കാന്‍ ദക്ഷിണാഫ്രിക്കക്കായി. ഈ പശ്ചാത്തലത്തിലാണ് ഇന്ത്യന്‍ ടീം മാനേജ്‌മെന്റിനെതിരെ രൂക്ഷ വിമര്‍ശനവുമായി താരം രംഗത്തെത്തിയിരിക്കുന്നത്.

മുഹമ്മദ് ഷമി അടക്കമുള്ള മികച്ച ബൗളര്‍മാരെയെല്ലാം ടീം മാനേജ്‌മെന്റ് ഒതുക്കിയെന്ന് ഹര്‍ഭജന്‍ ആരോപിച്ചു. മുഹമ്മദ് ഷമി എവിടെ, എന്തുകൊണ്ടാണ് ഷമിയെ കളിപ്പിക്കാത്തതെന്ന് എനിക്ക് മനസിലാവുന്നില്ല. പ്രസിദ്ധ് കൃഷ്ണ ടീമിലുണ്ടെങ്കിലും അവന്‍ ഇനിയും ഏറെ മെച്ചപ്പെടാനുണ്ട്.

മികച്ച ബൗളര്‍മാരുണ്ടായിട്ടും അവരെയെല്ലാം പതുകെ ഒതുക്കാനാണ് ടീം മാനേജ്‌മെന്റ് ശ്രമിച്ചത്. ബുമ്രയുള്ളപ്പോള്‍ ഇന്ത്യയുടെ ബൗളിംഗ് നിരക്ക് മൂര്‍ച്ചയുണ്ടാകും. ബുമ്രയില്ലെങ്കില്‍ ഇന്ത്യയുടെ ബൗളിംഗ് പരിതാപകരമാണ്. ജസ്പ്രീത് ബുമ്രയില്ലാതെയും മത്സരങ്ങള്‍ ജയിക്കാന്‍ നമ്മള്‍ പഠിക്കേണ്ടിയിരിക്കുന്നുവെന്നും ഹര്‍ഭജന്‍ പറഞ്ഞു.

ഇംഗ്ലണ്ടില്‍ ബുമ്രയുടെ അഭാവത്തില്‍ മുഹമ്മദ് സിറാജ് അവസരത്തിനൊത്തുയര്‍ന്നിരുന്നു. ബുമ്രയില്ലാതെ ഇറങ്ങിയ എല്ലാ ടെസ്റ്റും ഇന്ത്യ ജയിക്കുകയും ചെയ്തു. എന്നാല്‍ വൈറ്റ് ബോള്‍ ക്രിക്കറ്റില്‍ സ്ഥിതി വ്യത്യസ്തമാണ്. വൈറ്റ് ബോള്‍ ക്രിക്കറ്റില്‍ ഇന്ത്യ മത്സരം ജയിപ്പിക്കാന്‍ കഴിവുള്ള ബൗളര്‍മാരെ കണ്ടെത്തേണ്ടിയിരിക്കുന്നു.

അത് പേസര്‍മാരായാലും സ്പിന്നര്‍മാരായാലും ഒരുപോലെയാണ്. സ്പിന്‍ നിരയില്‍ വിക്കറ്റെടുക്കാന്‍ കെല്‍പുള്ള ഒരു കുല്‍ദീപ് മാത്രമാണുള്ളത്. വരുണ്‍ ചക്രവര്‍ത്തിയെ ഏകിദനങ്ങളില്‍ കളിപ്പിച്ചാല്‍ മധ്യ ഓവറുകളില്‍ വിക്കറ്റെടുക്കാന്‍ കെല്‍പുള്ള ഒരു ബൗളറെ കൂടി ഇന്ത്യക്ക് കിട്ടുമെന്നും ഹര്‍ഭജന്‍ പറഞ്ഞു.

സാംബാന്യത്തം കുണ്ട മഞ്ചേരി പയ്യനാട്ടെ ആയിരങ്ങള്‍ക്ക് സമാധാനത്തോടെ ഉറങ്ങാം. ബ്രസിലിയന്‍ താരം ജോണ്‍ കെന്നഡിയുടെ ഹാട്രിക്ക് കരുത്തില്‍ (33,45,48), മലപ്പുറം എഫ്.സിക്ക് സൂപ്പര്‍ ലീഗ് കേരളയില്‍ സെമി ടിക്കറ്റ്. രണ്ടു ഗോളുകള്‍ക്ക് പിറകില്‍ നിന്ന ടീമാണ് നാലു ഗോളുകള്‍ നേടി സെമി ഫൈനലിലേക്ക് ആധികാരി കമായി മാര്‍ച്ച് ചെയ്തത്. പകരക്കാരനായി വന്ന ഇന്ത്യന്‍ താരം ഇഷാന്‍ പണ്ഡിത (88) പട്ടിക പൂര്‍ത്തിയാക്കി.

കൊച്ചിക്കായി അഭിത്ത് കെ.ബി (9), അലക്‌സാണ്ടര് റൊമാരിയോ (26) എന്നിവര്‍ ഗോള്‍ നേ ടി. 14 പോയിന്റ് നേടി മൂന്നാം സ്ഥാനത്തോടെയാണ് മലപ്പുറം സെമിയിലെത്തുന്നത്. എട്ടു ഗോളോടെ സൂപ്പര്‍ ലീഗിലെ ഗോളടിക്കാരില്‍ ഒന്നാമതെത്തി കെന്നഡി ഏഴിന് തൃശൂരിനെതിരെ തൃശൂര്‍ കോര്‍പറേഷന്‍ സ്റ്റേഡിയത്തിലാണ് മലപ്പുറത്തിന്റെ സെമി ഫൈനല്‍. 10ന് കോഴിക്കോടും കണ്ണൂരും കോഴിക്കോട് കോര്‍പറേഷന്‍ സ്റ്റേഡിയത്തില്‍ രണ്ടാം സെമി ഫൈനലില്‍ ഏറ്റുമുട്ടും.

തോറ്റാല്‍ പുറത്താകുമെന്ന അവസ്ഥയില്‍ സ്വന്തം കാണികള്‍ക്ക് മുന്നിലിറങ്ങിയ മലപ്പുറം തുടക്കം തന്നെ ആക്രമിച്ചാണ് കളിച്ചത്. ഒമ്പതാം മിനുറ്റില്‍ മലപ്പുറത്തെ ഞെട്ടിച്ച് കൊച്ചി വല കുലുക്കി. ഇടത് വിംഗില്‍ നിന്നും അഭിജിത്ത് നീട്ടിയടിച്ച പന്ത് എം.എഫ്.സി പ്രതിരോധ താരം ഇര്‍ഷാദിന്റെ കാലില്‍ തട്ടി ഫസ്റ്റ് പോസ്റ്റിലേക്ക് കയറി. ഗോള്‍ മലപ്പുറത്തെ തളര്‍ത്തിയില്ല. കൊച്ചി ഹാഫിലേക്ക് തുരു തുരാ ആക്രമണം. 18-ാം മിനു റ്റില്‍ ജോണ്‍ കെന്നഡിക്ക് വിണ്ടുമൊരു സുവര്‍ണാവസരം. മധ്യഭാഗത്തുനിന്നും നീട്ടി ലഭിച്ച പന്ത് ആദ്യ ടച്ച് മനോഹ രമാക്കി ബോക്‌സിലേക്ക് കുതിച്ച കെന്നഡിക്ക് രണ്ടാം ടെച്ച് പിഴച്ചു. പ്രതിരോധ താരം സഞ്ജുവിന്റെ ഭീമന്‍ പിഴവില്‍ നിന്നും കൊച്ചി രണ്ടാമത്തെ ഗോളും നേടി.

ബോക് സിലൂടെ പുറത്തേക്ക് പോവുന്ന പന്ത് സഞ്ജു ക്ലിയര്‍ ചെയ്യാതെ നോക്കി നിന്നു. വലതു വിംഗിലൂടെ പ്രതിരോധ താരങ്ങളെ വകഞ്ഞു മാറ്റി ഫസലു നടത്തിയ സോളോ മുന്നേറ്റത്തില്‍ നിന്നാണ് മലപ്പുറം കൊച്ചിയുടെ ലീഡ് കുറച്ചത്. 33-ാം മിനുറ്റിലാണ് മലപ്പുറത്തിന്റെ ഗോള്‍ വന്നത്. ആദ്യ പകുതിയുടെ ഇഞ്ച്വറി സമയത്താണ് ഗ്യാലറിയില്‍ പൊട്ടിത്തെറി സൃഷ്ടിച്ച് കെന്നഡി തന്റെ രണ്ടാം ഗോളോടെ മലപ്പുറത്തിന് സമനില സമ്മാനിച്ചത്. മൊറോക്കന്‍ താരം എല്‍ഫോഴ്‌സി മധ്യ ഭാഗത്തുനിനിന്നും നീട്ടി നല്‍കിയ പന്ത് പ്രതിരോധ താരങ്ങളെയെല്ലാം നിഷ് പ്രയാസം കബളിപ്പിച്ചാണ് കെന്നഡി വല കുലുക്കിയത്. മധ്യ നിരയില്‍ നിന്നും ഇഷാന്‍ പണ്ഡിത നടത്തിയ ഒറ്റയാന്‍ മുന്നേറ്റമാണ് മലപ്പുറത്തിന് ലീഡും കെന്നഡിക്ക് ഹാട്രിക്കും സമ്മാനിച്ചത്.

ഇഷാന്‍ പണ്ഡിത നല്‍കിയ പാസുമായി മുന്നേറിയ ടോണി ബോക്‌സിലേക്ക് നല്‍കിയ ബാള്‍ ഓടി വന്ന കെന്നഡി വലയിലേക്ക് തിരിച്ചു. മലപ്പുറം ലീഡില്‍. 88-ാം മിനുറ്റില്‍ പകരക്കാരനായി വന്ന ഇഷാന്‍ പണ്ഡിത മലപ്പുറത്തിനായി ആദ്യ ഗോള്‍ നേ ടി പട്ടിക തികച്ചു. രണ്ടു പ്രതിരോധ താരങ്ങളെയും ഗോളിയെയും കമ്പളിപ്പിച്ചാണ് പണ്ഡിത വലകുലുക്കിയത്.

മുംബൈ: ഇന്ത്യന്‍ ക്രിക്കറ്റ് മുന്‍നിര താരംയും മുന്‍ നായകനുമായ രോഹിത് ശര്‍മ്മ വീണ്ടും ട്വന്റി20 ക്രിക്കറ്റിലേക്ക് തിരിച്ചെത്തുന്നു. കഴിഞ്ഞ വര്‍ഷം കുട്ടിക്രിക്കറ്റില്‍നിന്ന് വിരമിക്കല്‍ പ്രഖ്യാപിച്ച രോഹിത്, ആഭ്യന്തര ട്വന്റി20 ടൂര്‍ണമെന്റായ സയ്യിദ് മുഷ്താഖ് അലി ട്രോഫി കളിക്കാനുള്ള താല്‍പര്യം മുംബൈ ക്രിക്കറ്റ് അസോസിയേഷനെ അറിയിച്ചിട്ടുണ്ട്.

ഡിസംബര്‍ 12 മുതല്‍ 18 വരെ ഇന്‍ഡോറില്‍ നടക്കുന്ന ടൂര്‍ണമെന്റിന്റെ നോക്കൗട്ട് ഘട്ടത്തിലാണ് രോഹിത് മുംബൈയ്ക്കായി കളിക്കാന്‍ സാധ്യത. ദക്ഷിണാഫ്രിക്കക്കെതിരായ ഏകദിന പരമ്പരയ്ക്കുശേഷം ഇന്ത്യ അടുത്ത മത്സരമായ ന്യൂസിലന്‍ഡിനെതിരെ ജനുവരി 11ന് ഇറങ്ങും. തുടര്‍ച്ചയായി ഇന്ത്യന്‍ ടീമില്‍ ഇടം നിലനിര്‍ത്താന്‍ ആഭ്യന്തര ക്രിക്കറ്റ് നിര്‍ബന്ധമാണെന്ന് ബി.സി.സി.ഐ വിരാട് കോഹ്ലിക്കും രോഹിത്തിനും നിര്‍ദേശിച്ചിരുന്നു. ഇതിന്റെ ഭാഗമായാണ് കോഹ്ലിയും വിജയ് ഹസാരെ ട്രോഫിയില്‍ കളിക്കാന്‍ ഒരുങ്ങുന്നത്.

201112 സീസണിനുശേഷം ആദ്യമായാണ് രോഹിത് ആഭ്യന്തര ട്വന്റി20 ടൂര്‍ണമെന്റില്‍ ഇറങ്ങുന്നത്. മത്സര ക്രിക്കറ്റില്‍ വലിയ ഇടവേള തുടരുന്നത് തിരിച്ചടിയാകുമെന്ന വിലയിരുത്തലിന്റെ അടിസ്ഥാനത്തിലാണ് താരം ടൂര്‍ണമെന്റില്‍ പങ്കെടുക്കാന്‍ തീരുമാനിച്ചത്. നിലവില്‍ ഗ്രൂപ്പ് ഘട്ടത്തില്‍ അഞ്ചില്‍ നാലു മത്സരങ്ങളും ജയിച്ച മുംബൈക്ക് നോക്കൗട്ട് സാധ്യത ശക്തമാണ്.

രാജ്യാന്തര ക്രിക്കറ്റില്‍ ടെസ്റ്റും ട്വന്റി20യും അവസാനിപ്പിച്ച രോഹിത്തും കോഹ്ലിയും ഇപ്പോള്‍ ഏകദിനത്തില്‍ മാത്രമാണ് ഇന്ത്യക്കായി കളിക്കുന്നത്. ദക്ഷിണാഫ്രിക്കക്കെതിരായ പരമ്പരയില്‍ ഇരുവരും മികച്ച ഫോമിലാണ് പ്രോട്ടീസിനെതിരെ കളിച്ച രണ്ടും ഏകദിനങ്ങളിലും കോഹ്ലി സെഞ്ചുറി നേടിയപ്പോള്‍, രോഹിത് റാഞ്ചിയിലെ ആദ്യ മത്സരത്തില്‍ അര്‍ധസെഞ്ചുറി നേടി.

ശനിയാഴ്ച വിശാഖപട്ടണത്താണ് ഇന്ത്യദക്ഷിണാഫ്രിക്ക പരമ്പരയിലെ നിര്‍ണായക മത്സരം. ഇതിന് പിന്നാലെ രോഹിത് ഇന്‍ഡോറില്‍ നടക്കുന്ന സയ്യിദ് മുഷ്താഖ് അലി ട്രോഫിയില്‍ പങ്കെടുക്കാനാണ് സാധ്യതയെന്ന് റിപ്പോര്‍ട്ടുകള്‍ സൂചിപ്പിക്കുന്നു.