ഫലസ്തീനിലെ പോരാട്ട സംഘടനയായ ഹമാസിനെ സിപിഎം നേതാവും മുൻമന്ത്രിയുമായ കെ. കെ ശൈലജ ടീച്ചർ ഭീകരർ എന്ന് വിശേഷിപ്പിച്ചത് വിവാദമാ കുന്നു .ഇന്നലെ കെ കെ ശൈലജ ടീച്ചറുടെ ഫേസ്ബുക്ക് പോസ്റ്റിലാണ് ഹമാസ് ഭീകരർ ഇസ്രയേലിലേക്ക് ആക്രമണം നടത്തിയതായി വിശേഷിപ്പിക്കുന്നത്.

ആദ്യം ഹമാസ് നടത്തിയ ആക്രമണം എന്ന് എഴുതിയതും പിന്നീട് ഭീകരർ എന്ന് തിരുത്തിയതും സമൂഹമാധ്യമങ്ങളിൽ വൈറലായി. ഇടതുപക്ഷം ഫലസ്തീനിനും ഹമാസിനും ഒപ്പം നിലകൊള്ളുമ്പോഴാണ് സിപിഎം നേതാവിന്റെ ഈ വിശേഷണം. സിപിഎമ്മിന്റെ ദേശാഭിമാനി അടക്കമുള്ള മാധ്യമങ്ങൾ പോരാളികൾ എന്നാണ് ഹമാസിനെ വിശിപ്പിക്കുന്നത്.

കേരളത്തിലെ മാധ്യമങ്ങളെല്ലാം ഇങ്ങനെ വിശേഷിപ്പിക്കുമ്പോഴാണ് സിപിഎം നേതാവിന്റെ പക്ഷത്തുനിന്ന് ഭീകരവിശേഷണം ചാർത്തപ്പെട്ടിട്ടുള്ളത്. ഇതിനെ ട്രോളി ബിജെപിയും സംഘപരിവാറും സമൂഹ മാധ്യമങ്ങളിൽ നിറഞ്ഞിട്ടുണ്ട്.

ശൈലജയുടെ പോസ്റ്റ് :

അധികാരഭ്രാന്തിന്റെയും പണക്കൊതിയുടെയും
അനന്തരഫലമാണ് യുദ്ധങ്ങൾ.നിഷ്കളങ്കരായ
അനേകം മനുഷ്യർ ഓരോ യുദ്ധത്തിലും കുരുതി
കൊടുക്കപ്പെടുന്നു.ബോംബാക്രമണത്തിൽ പൊള്ളിക്കരിഞ്ഞ കുഞ്ഞുടലുകൾ നമ്മുടെ ഉറക്കം
കെടുത്തുന്നു.ഇസ്രയേലിന്റെ ജനവാസ മേഖലയിൽ
ഹമാസ് ഭീകരർ നടത്തിയ ആക്രമണത്തെ മന:സ്സാക്ഷിയുള്ളവരെല്ലാം അപലപിക്കും.
അതോടൊപ്പം 1948 മുതൽ പലസ്തീൻ ജനത
അനുഭവിച്ചുകൊണ്ടിരിക്കുന്നത് ഇതേ തോതിലുള്ള
ഭീകരതയാണെന്നും അതിനു കാരണക്കാർ ഇസ്രയേലും
അവർക്ക് പിന്തുണ നൽകുന്ന സാമ്രാജ്യത്വ ശക്തികളു
മാണെന്ന യാഥാര്ഥ്യം മറച്ചുവെക്കാൻ കഴിയില്ല.
മുതലാളിത്ത ലാഭക്കൊതിയുടെ സൃഷ്ടിയായ
യുദ്ധങ്ങളിൽ പിടഞ്ഞുവീഴുന്ന മനുഷ്യരെ നോക്കി
നെടുവീർപ്പിടുക മാത്രമല്ല പ്രതിഷേധിക്കുക കൂടി
ചെയ്യുകയാണ് നമ്മുടെ ഉത്തരവാദിത്വം’