More
സംവരണം റദ്ദാക്കാന് വീണ്ടും കരുനീക്കി ആര്.എസ്.എസ്

ന്യൂഡല്ഹി: സര്ക്കാര് ഉദ്യോഗങ്ങളിലും ഉന്നത വിദ്യാഭ്യാസ രംഗത്തും താഴ്ന്ന ജാതിക്കാര്ക്കും മറ്റു പിന്നാക്ക വിഭാഗങ്ങള്ക്കും നല്കി വരുന്ന സംവരണം സംബന്ധിച്ച ചര്ച്ചകള്ക്ക് വീണ്ടും കളമൊരുക്കി ആര്.എസ്.എസ് തലവന് മോഹന് ഭഗവത്. സംഘ് പരിവാറിന്റെ സംവരണ വിരുദ്ധ നിലപാടിന് പിന്തുണ നേടിയെടുക്കുന്നതിന്റെ ഭാഗമായാണ് ആര്.എസ്.എസ് തലവന്റെ നീക്കമെന്നാണ് വിലയിരുത്തല്.
നേരത്തെ ഇതുസംബന്ധിച്ച് മോഹന് ഭഗവത് നടത്തിയ പരാമര്ശം വലിയ വിവാദത്തിന് കളമൊരുക്കിയിരുന്നു. 2015ലെ ബിഹാര് നിയമസഭാ തെരഞ്ഞെടുപ്പില് ഭഗവതന്റെ പരാമര്ശം ബി.ജെ.പിക്ക് വന് തിരിച്ചടി നല്കുകയും ചെയ്തിരുന്നു. ഈ സാഹചര്യത്തിലാണ് സംവരണ വിരുദ്ധ നിലപാട് നേരിട്ട് അവതരിപ്പിക്കാതെ വിഷയം ചര്ച്ചയായി ഉയര്ത്തിക്കൊണ്ടു വരാനുള്ള ആര്.എസ്.എസ് തലവന്റെ നീക്കം. സൗഹാര്ദ്ദത്തിന്റെ അന്തരീക്ഷത്തില് സംവരണം സംബന്ധിച്ച് വീണ്ടും ചര്ച്ചകള് ഉയര്ന്നുവരണമെന്നാണ് ആര്.എസ്.എസ് തലവന്റെ പുതിയ വാദം. സംവരണത്തെ അനുകൂലിക്കുന്നവര് അതിനെ എതിര്ക്കുന്നവര്ക്ക് പറയാനുള്ളത് കേള്ക്കാന് തയ്യാറാവണം. സംവരണത്തെ എതിര്ക്കുന്നവര് അതിനെ അനുകൂലിക്കുന്നവര്ക്ക് പറയാനുള്ളതും കേള്ക്കാന് തയ്യാറാവണം. അങ്ങനെ സൗഹാര്ദ്ദത്തിന്റെ അന്തരീക്ഷത്തില് ഈ വിഷയത്തില് വീണ്ടും ചര്ച്ചകള് ഉയര്ന്നുവരട്ടെ – ആര്.എസ്.എസ് തലവന് പറഞ്ഞു.
ദളിത് – പിന്നാക്ക വിഭാഗങ്ങള്ക്ക് ഭരണഘടനാ ദത്തമായി അനുവദിച്ചു നല്കിയിട്ടുള്ള സംവരണാവകാശങ്ങളെ അടച്ചെതിര്ക്കുക എന്ന വരേണ്യവര്ഗ നിലപാടാണ് സംഘ്പരിവാര് സംഘടനകളും ആര്.എസ്.എസും എക്കാലത്തും സ്വീകരിച്ചിട്ടുള്ളത്. ഇതിന്റെ പരസ്യപ്രകടനമായിരുന്നു 2015ലെ മോഹന് ഭഗവതിന്റെ പരാമര്ശം.
രാജ്യത്ത് നിലനില്ക്കുന്ന സംവരണം സംബന്ധിച്ച് പുനഃപരിശോധന വേണമെന്നായിരുന്നു അന്നത്തെ വിവാദ പരാമര്ശം. ബിഹാര് നിയമസഭാ തെരഞ്ഞെടുപ്പില് ബി.ജെ.പിക്ക് വലിയ തിരിച്ചടി നേരിട്ടതോടെ അദ്ദേഹം പിന്നീട് നിലപാട് മയപ്പെടുത്തിയിരുന്നു. സാമൂഹ്യമായ അസമത്വം നിലനില്ക്കുന്നിടത്തോളം കാലം സംവരണം എടുത്തു കളയാനാവില്ലെന്ന് നിലപാട് തിരുത്തുകയായിരുന്നു. എന്നാല് ഒരു ഇടവേളക്കു ശേഷം വിഷയം വീണ്ടും പിന്വാതില് വഴി ഉയര്ത്തിക്കൊണ്ടുവരാനാണ് ആര്.എസ്.എസ് നീക്കമെന്ന് വ്യക്തമാക്കുന്നതാണ് പുതിയ പരാമര്ശം.
പ്രത്യക്ഷത്തില് സംവരണത്തെ എതിര്ക്കുന്നതാണെന്ന് തോന്നില്ലെങ്കിലും ഇത്തരമൊരു വിഷയം ചര്ച്ചയായി ഉയര്ത്തിക്കൊണ്ടുവരിക എന്നതിലൂടെ തന്നെ ആര്.എസ്.എസിന്റെ താല്പര്യം പ്രകടമാണ്. മത്സരപരീക്ഷകളുമായി ബന്ധപ്പെട്ട് ആര്.എസ്.എസ് സംഘടിപ്പിച്ച വിജ്ഞാന് ഉത്സവ് എന്ന പരിപാടിയില് സംസാരിക്കവെയായിരുന്നു ഭഗവതിന്റെ പുതിയ പരാമര്ശം.
കേന്ദ്ര സര്ക്കാറിന്റെ അജണ്ട നിശ്ചയിക്കുന്നത് ആര്.എസ്.എസ് ആണെന്ന വിമര്ശനങ്ങള് ശരിയല്ലെന്ന് മോഹന് ഭഗവത് പ്രസംഗത്തില് പറഞ്ഞു. സംഘ് പരിവാറും ബി.ജെ.പി നേതൃത്വത്തിലുള്ള കേന്ദ്ര സര്ക്കാറും രണ്ട് വ്യത്യസ്ത വേദികളാണ്. ഒരു കൂട്ടരുടെ പ്രവര്ത്തനങ്ങള്ക്ക് മറ്റുള്ളവര് പങ്കുകാരോ ഉത്തരവാദികളോ അല്ല. കേന്ദ്ര സര്ക്കാറില് സംഘ്പരിവാര് അണികളുണ്ട്. സംഘ് പരിവാറിന് പറയാനുള്ളത് അവര് കേള്ക്കുന്നുണ്ടാകാം. എന്നാല് അത് അംഗീകരിക്കണമെന്നില്ല. വിയോജിക്കാന് അവര്ക്ക് കഴിയുമെന്നും ഭഗവത് കൂട്ടിച്ചേര്ത്തു.
അതേസമയം സംഘ്പരിവാറിന്റെ ദളിത് വിരുദ്ധ – പിന്നാക്ക വിരുദ്ധ നിലപാടാണ് മോഹന് ഭഗവതിന്റെ വാക്കുകളില് പ്രതിഫലിക്കുന്നതെന്ന് കോണ്ഗ്രസ് വക്താവ് രണ്ദീപ് സുര്ജേവാല പ്രതികരിച്ചു. ദളിത് – പിന്നാക്ക വിഭാഗങ്ങള്ക്ക് നല്കി വരുന്ന സംവരണം അവസാനിപ്പിക്കുന്നതിനുള്ള ആസൂത്രിത നീക്കത്തിന്റെ ഭാഗമാണ് ഇപ്പോഴത്തെ പരാമര്ശമെന്നും സുര്ജേവാല ആരോപിച്ചു.
Education
യു.ജി.സി നെറ്റ് 2025 പരീക്ഷ ഫലം ഉടന് പ്രസിദ്ധീകരിക്കും
നാഷനല് ടെസ്റ്റിങ് ഏജന്സി (എന്.ടി.എ) 2025 ജൂണില് നടത്തിയ യു.ജി.സി നെറ്റ് പരീക്ഷാഫലം ഉടന് പ്രസിദ്ധീകരിക്കും.

നാഷനല് ടെസ്റ്റിങ് ഏജന്സി (എന്.ടി.എ) 2025 ജൂണില് നടത്തിയ യു.ജി.സി നെറ്റ് പരീക്ഷാഫലം ഉടന് പ്രസിദ്ധീകരിക്കും. പരീക്ഷ നടത്തി 33 മുതല് 42 ദിവസത്തിനകം ഫലം പ്രസിദ്ധീകരിക്കുന്ന രീതിയിലായിരുന്നു കഴിഞ്ഞ വര്ഷം. ഇത് കണക്കിലെടുത്താല് ഈ വര്ഷം ആഗസ്റ്റ് ഒന്നിനോ ആഗസ്റ്റ് 10നോ യു.ജി.സി നെറ്റ് ഫലം പുറത്തുവരുമെന്നാണ് ലഭിക്കുന്ന സൂചന. ഈ പറഞ്ഞ തീയതികള്ക്കകം ഉറപ്പായും യു.ജി.സി നെറ്റ് പരീക്ഷ ഫലം അറിയാന് സാധിക്കും. പരീക്ഷ എഴുതിയവര്ക്ക് ugcnet.nta.ac.in എന്ന വെബ്സൈറ്റില് കയറി പരിശോധിക്കാവുന്നതാണ്.
ഫലം എങ്ങനെ പരിശോധിക്കാം?
സൈറ്റില് കയറി യു.ജി.സി നെറ്റ് റിസല്റ്റ് 2025 എന്ന ലിങ്കില് ക്ലിക്ക് ചെയ്യുക. അതിനു ശേഷം ലോഗിന് വിവരങ്ങള് നല്കുക. അപ്പോള് ഫലം സ്ക്രീനില് കാണാന് സാധിക്കും. പിന്നീട് മാര്ക്ക് ഷീറ്റിന്റെ പി.ഡി.എഫ് ഡൗണ്ലോഡ് ചെയ്ത് എടുക്കാം.
News
കോപ്പികാറ്റുകള്ക്ക് പണമില്ല: ഒരു കോടി ഫേസ്ബുക്ക് അക്കൗണ്ടുകള് നീക്കം ചെയ്ത് മെറ്റ
ഫേസ്ബുക്കും യൂട്യൂബും പോലുള്ള പ്രധാന പ്ലാറ്റ്ഫോമുകള് കര്ശനമായ ഉള്ളടക്ക നയങ്ങള് നടപ്പിലാക്കാനുള്ള ശ്രമങ്ങള് ശക്തമാക്കുന്നതിനാല് ഡിജിറ്റല് ഉള്ളടക്ക സ്രഷ്ടാക്കള് പുതിയ തടസ്സങ്ങള് നേരിടുകയാണ്.

ഫേസ്ബുക്കും യൂട്യൂബും പോലുള്ള പ്രധാന പ്ലാറ്റ്ഫോമുകള് കര്ശനമായ ഉള്ളടക്ക നയങ്ങള് നടപ്പിലാക്കാനുള്ള ശ്രമങ്ങള് ശക്തമാക്കുന്നതിനാല് ഡിജിറ്റല് ഉള്ളടക്ക സ്രഷ്ടാക്കള് പുതിയ തടസ്സങ്ങള് നേരിടുകയാണ്. ലോകമെമ്പാടുമുള്ള ദശലക്ഷക്കണക്കിന് ആളുകള് വരുമാനത്തിനായി ഈ പ്ലാറ്റ്ഫോമുകളെ ആശ്രയിക്കുന്നതിനാല്, പ്രത്യേകിച്ച് വീഡിയോ ഉള്ളടക്കത്തിലൂടെ, ഒറിജിനല് മെറ്റീരിയല് അപ്ലോഡ് ചെയ്യുന്നതില് പരാജയപ്പെടുന്ന ഉപയോക്താക്കളെയാണ് അടിച്ചമര്ത്തല് ലക്ഷ്യമിടുന്നത്. ഇത് നിരവധി സ്രഷ്ടാക്കളുടെ വരുമാനത്തെ സാരമായി ബാധിച്ചേക്കാം.
ഉള്ളടക്കം പകര്ത്തി ഒട്ടിക്കുന്നതായി കണ്ടെത്തിയ അക്കൗണ്ടുകള്ക്കെതിരെ മെറ്റ കര്ശന നടപടി പ്രഖ്യാപിച്ചു. ഉള്ളടക്ക മോഷണത്തെ ചെറുക്കാനുള്ള പ്രതിബദ്ധതയ്ക്ക് അടിവരയിടുന്നതാണ് മെറ്റയുടെ ഏറ്റവും പുതിയ പ്രഖ്യാപനം. മറ്റ് സ്രഷ്ടാക്കളില് നിന്നുള്ള ടെക്സ്റ്റോ ഫോട്ടോകളോ വീഡിയോകളോ തുടര്ച്ചയായി പകര്ത്തുന്ന ഉപയോക്താക്കള്ക്ക് അവരുടെ അക്കൗണ്ടുകള് അടയ്ക്കാനും ധനസമ്പാദനം നിര്ത്താനും സാധ്യതയുണ്ട്. ഇവയുടെ റീച്ചും ഗണ്യമായി കുറയും. ഈ നടപടികള്ക്ക് അനുസൃതമായി, പ്രമുഖ ഉള്ളടക്ക സ്രഷ്ടാക്കളില് നിന്ന് പോസ്റ്റുകള് പകര്ത്തുന്നതായി കണ്ടെത്തിയ 1 കോടി പ്രൊഫൈലുകള് Meta ഇതിനകം നീക്കം ചെയ്തിട്ടുണ്ട്.
സ്പാമുമായി ബന്ധിപ്പിച്ച 5 ലക്ഷം അക്കൗണ്ടുകളും മെറ്റാ അടച്ചുപൂട്ടി. യഥാര്ത്ഥ ഉള്ളടക്കം ഇല്ലെങ്കിലും പണം സമ്പാദിക്കുന്ന വ്യാജ പോസ്റ്റുകള് കണ്ടെത്താനുള്ള ശ്രമത്തിലാണ് കമ്പനി.
അദ്വിതീയമായ ഉള്ളടക്കം സൃഷ്ടിക്കാതെ ഉപയോക്താക്കളെ ലാഭത്തില് നിന്ന് പിന്തിരിപ്പിക്കാന്, കോപ്പി-പേസ്റ്റിംഗില് ഏര്പ്പെടുന്നവരില് നിന്നുള്ള കമന്റുകളുടെ ദൃശ്യപരതയും മെറ്റ കുറയ്ക്കുന്നു. ഈ സമീപനം അവരുടെ ധനസമ്പാദന അവസരങ്ങള് തടയാന് ലക്ഷ്യമിടുന്നു. ഈ പ്രവര്ത്തനങ്ങള് YouTube-ന്റെ സമീപകാല നീക്കങ്ങളെ പ്രതിഫലിപ്പിക്കുന്നു, അത് ആവര്ത്തിച്ചുള്ളതും AI- ജനറേറ്റുചെയ്തതുമായ വീഡിയോകള് അതിന്റെ പ്ലാറ്റ്ഫോമില് നിന്ന് നീക്കം ചെയ്യാന് തുടങ്ങി.
kerala
എഴുത്തുകാരി വിനീത കുട്ടഞ്ചേരി തൂങ്ങി മരിച്ച നിലയില്

തൃശൂര്: എഴുത്തുകാരിയും സോഷ്യല് മീഡിയ ഇന്ഫ്ളുവന്സറുമായ വിനീത കുട്ടഞ്ചേരി (44) അന്തരിച്ചു. തൃശൂര് എരുമപ്പെട്ടി സ്വദേശിനിയാണ്. ഇന്നലെ രാത്രി 7.30 ഓടെ വീട്ടില് തൂങ്ങി മരിച്ച നിലയില് കണ്ടെത്തുകയായിരുന്നു.
ഭാരതീയ ദലിത് സാഹിത്യ അക്കാദമിയുടെ മലയാള സാഹിത്യത്തിനുള്ള 2019 ലെ അവാര്ഡ് ജേതാവാണ്. ജൂലൈ 13 ന് ആയിരുന്നു വിനീതയുടെ ‘വിന്സെന്റ് വാന്ഗോഗിന്റെ വേനല്പക്ഷി’ എന്ന പുസ്തകം മന്ത്രി ആര് ബിന്ദു പ്രകാശനം ചെയ്തത്.
തൃശൂര് പ്രസ്സ്ക്ലബില് വച്ചായിരുന്നു പ്രകാശനം. ഭര്ത്താവ് മണിത്തറ കാങ്കില് രാജു. ‘നിനക്കായ്…’ എന്ന ഗാനത്തിന്റെ സംഗീത സംവിധായക എന്ന നിലയിലും അവര് പ്രശസ്തി നേടിയിട്ടുണ്ട്.
-
india2 days ago
നിമിഷപ്രിയ കേസ്; ‘വിഷയത്തില് ഇടപെട്ടത് ഒരു മനുഷ്യന് എന്ന നിലക്ക്’: കാന്തപുരം
-
kerala2 days ago
എഴുത്തുകാരി വിനീത കുട്ടഞ്ചേരി തൂങ്ങി മരിച്ച നിലയില്
-
Film3 days ago
സുരേഷ് ഗോപി ചിത്രം “ജെ എസ് കെ- ജാനകി വി vs സ്റ്റേറ്റ് ഓഫ് കേരള” ട്രെയ്ലർ പുറത്ത്; റിലീസ് ജൂലൈ 17ന്
-
kerala2 days ago
നിപ; സംസ്ഥാനത്ത് 675 പേര് സമ്പര്ക്ക പട്ടികയില്
-
News2 days ago
സമൂസ, ജിലേബി, ലഡു എന്നിവയില് മുന്നറിയിപ്പ് ലേബലുകളില്ല; ഉപദേശങ്ങളുള്ള ബോര്ഡുകള് മാത്രം: ആരോഗ്യ മന്ത്രാലയം
-
india2 days ago
കോളേജില് വിദ്യാര്ത്ഥിനിയെ പീഡിപ്പിച്ചു; ബെംഗളൂരുവില് 2 അധ്യാപകരടക്കം 3 പേര് അറസ്റ്റില്
-
News2 days ago
കോപ്പികാറ്റുകള്ക്ക് പണമില്ല: ഒരു കോടി ഫേസ്ബുക്ക് അക്കൗണ്ടുകള് നീക്കം ചെയ്ത് മെറ്റ
-
india3 days ago
ഒഡിഷയിൽ വിദ്യാർഥി മരിച്ച സംഭവം: ‘പ്രതികളെ സംരക്ഷിക്കാൻ ബിജെപി ശ്രമിച്ചു, പ്രധാനമന്ത്രി മൗനം പാലിക്കുന്നു’; രാഹുൽ ഗാന്ധി