മലപ്പുറം: കഴിഞ്ഞ ദിവസം വാഹനാപകടത്തില്‍ മരണപ്പെട്ട എംഎസ്എഫ് വയനാട് ജില്ലാ പ്രവര്‍ത്തക സമിതി അംഗവും കല്‍പ്പറ്റ നിയോജക മണ്ഡലം വൈസ് പ്രസിഡന്റുമായ വൈത്തിരി ചുണ്ട സ്വദേശി കുളങ്ങരകാട്ടില്‍ സല്‍മാന്‍ ഫാരിസിന് വേണ്ടി മയ്യിത്ത് നിസ്‌കരിക്കണമെന്ന് പാണക്കാട് സയ്യിദ് ഹൈദരലി ശിഹാബ് തങ്ങള്‍ അഭ്യര്‍ത്ഥിച്ചു.

കര്‍ണാടകയിലെ ഗുണ്ടില്‍ പേട്ടിനടുത്ത നഞ്ചന്‍ഗോഡ് പാലത്തിന് സമീപം നടന്ന വാഹനാപകടത്തില്‍ മരണപ്പെട്ട സല്‍മാന്‍ എം.എസ്.എഫിനെ ഹൃദയത്തോട് ചേര്‍ത്ത വിദ്യാര്‍ത്ഥിയായിരുന്നു. എം.എസ്.എഫ് ജില്ലാ കൗണ്‍സില്‍ അംഗവും കല്‍പ്പറ്റ നിയോജകമണ്ഡലം വൈസ് പ്രസിഡന്റും മുട്ടില്‍ ഡബ്ല്യു.എം.ഒ കോളജിലെ എം.എസ്. എഫ് യൂനിറ്റ് ഭാരവാഹിയുമായിരുന്ന സല്‍മാന്‍. കല്‍പ്പറ്റയില്‍ നടക്കുന്ന എം.എസ്. എഫിന്റെ മുഴുവന്‍ സമരങ്ങളിലും പരിപാടികളിലും ആദ്യ പേരുകളിലൊന്നായിരുന്നു സല്‍മാന്റേത്. രാഹുല്‍ ഗാന്ധിയുടെ തെരഞ്ഞെടുപ്പ് കാലത്ത്, പ്രചരണ ചുമതലയുണ്ടായിരുന്ന കര്‍ണാടകയിലെ മുതിര്‍ന്ന കോണ്‍ഗ്രസ് നേതാവ് നാച്ചിയക്കൊപ്പം വയനാട് പാര്‍ലമെന്റ് മണ്ഡലത്തിലുടനീളം സല്‍മാനുമുണ്ടായിരുന്നു.

ബിദുരദപഠനത്തിന് ശേഷം ജോലിക്കായി ബംഗലൂരുവില്‍ പോയ സല്‍മാനും സുഹൃത്ത് സഹലും നാട്ടിലേക്ക് മടങ്ങുന്നതിനിടെയായിരുന്നു അപകടം. സല്‍മാന്‍ സഞ്ചരിച്ചിരുന്ന ബൈക്കില്‍ കാര്‍ വന്ന് ഇടിക്കുകയായിരുന്നു. കൂടെയുണ്ടായിരുന്ന സഹല്‍ പരിക്കുകളോടെ ആസ്പത്രിയില്‍ ചികിത്സയിലാണ്.

സമല്‍മാന്റെ അപ്രതീക്ഷിത വിയോഗം ഉള്‍ക്കൊള്ളാന്‍ കഴിയാത്ത അവസ്ഥയിലാണ് സുഹൃത്തുക്കളും സഹപ്രവര്‍ത്തകരും. അപകടവിവരമറിഞ്ഞതോടെ സല്‍മാന്റെ വീട്ടിലെത്തിയ എം.എസ്. എഫിന്റെ ഭാരവാഹികള്‍ കുടുംബത്തിന്റെ തീരാനോവിനൊപ്പം തന്നെയുണ്ട്.

വൈത്തിരി ചുണ്ടേലിലെ കുളങ്ങരക്കാട്ടില്‍ മുഹമ്മദ് ഷമീറിന്റയും ഹസീനയുടെയും മകനാണ് ഈ 22 കാരന്‍. ഫര്‍സാനയും ഫര്‍ഹാനയുമാണ് സഹോദരങ്ങള്‍.

വിവരമറിഞ്ഞയുടന്‍ മൈസൂര്‍ കെ.എംസിസി പ്രവര്‍ത്തകര്‍ സംഭവസ്ഥലത്തെത്തുകയും നഞ്ചന്‍കോട്ടെ ആസ്പത്രിയില്‍ ആവശ്യമായ കാര്യങ്ങള്‍ക്കൊക്കെ നേതൃത്വം നല്‍കുകയും ചെയ്യുന്നുണ്ട്. പോസ്റ്റ്‌മോര്‍ട്ടം നടപടികള്‍ക്ക് ശേഷം മയ്യിത്ത് എത്രയും പെട്ടെന്ന് നാട്ടിലെത്തിക്കാനുള്ള ശ്രമത്തിലാണ് മൈസൂര്‍ കെ.എംസിസി പ്രവര്‍ത്തകര്‍.