india
75-ാം വയസില് മോദി വിരമിച്ചില്ലെങ്കില് മറ്റു വഴികളിലൂടെ അധികാരം നഷ്ടപ്പെടും: ബി.ജെ.പി നേതാവ് സുബ്രഹ്മണ്യന് സ്വാമി
വരുന്ന സെപ്തംബര് 17നാണ് പ്രധാനമന്ത്രിയുടെ 74-ാം ജന്മദിനം. 2025ല് 75 തികയും.

മുന് കേന്ദ്രമന്ത്രിയും ബിജെ.പി നേതാവുമായ സുബ്രഹ്മണ്യന് സ്വാമിയുടെ കണ്ണിലെ കരടാണ് പ്രധാനമന്ത്രി നരേന്ദ്ര മോദി. പ്രധാനമന്ത്രിക്കെതിരെ നിരന്തരം വിമര്ശനങ്ങളുയര്ത്തുക സ്വാമിയുടെ പതിവാണ്. ഇപ്പോഴിതാ മോദിയുടെ 74-ാം പിറന്നാളിനു മുന്നോടിയായി വീണ്ടും പ്രധാനമന്ത്രിയെ കടന്നാക്രമിച്ചിരിക്കുകയാണ് സുബ്രഹ്മണ്യന് സ്വാമി. 75-ാം വയസില് മോദി വിരമിച്ചില്ലെങ്കില് അദ്ദേഹത്തിന് മറ്റു മാര്ഗങ്ങളിലൂടെ കസേര നഷ്ടപ്പെടുമെന്ന് സ്വാമി മുന്നറിയിപ്പ് നല്കി. വരുന്ന സെപ്തംബര് 17നാണ് പ്രധാനമന്ത്രിയുടെ 74-ാം ജന്മദിനം. 2025ല് 75 തികയും.
‘ആര്.എസ്.എസ് പ്രചാരകന്റെ സംസ്കാരത്തോട് പ്രതിബദ്ധതയുള്ള മോദി തന്റെ 75-ാം ജന്മദിനത്തിന് ശേഷം സെപ്തംബര് 17-ന് വിരമിക്കല് പ്രഖ്യാപിച്ചില്ലെങ്കില്, മറ്റ് വഴികളിലൂടെ അദ്ദേഹത്തിന് പ്രധാനമന്ത്രി കസേര നഷ്ടപ്പെടും.’ സ്വാമി എക്സില് കുറിച്ചു. മോദിയുടെ കടുത്ത വിമര്ശകനായ സ്വാമി കഴിഞ്ഞയാഴ്ച ജിഡിപിയുടെ കാര്യത്തില് കേന്ദ്രത്തെ വിമര്ശിച്ചിരുന്നു. ജിഡിപി വളര്ച്ചയെക്കുറിച്ചുള്ള മോദി സര്ക്കാരിന്റെ അവകാശവാദം പൊതുജനങ്ങളോടുള്ള വഞ്ചനയാണെന്നാണ് സ്വാമി പറഞ്ഞത്.
75 വയസായാല് വിരമിക്കണമെന്നാണ് ബി.ജെ.പിയിലെ അലിഖിത നയം. 2014ല് മോദി അധികാരത്തിലെത്തിയപ്പോള് നടപ്പാക്കിയ നയമാണിത്. 2014-ലെ തെരഞ്ഞെടുപ്പില് പല മുതിര്ന്ന നേതാക്കള്ക്കും സീറ്റ് കിട്ടിയിരുന്നില്ല. എല്.കെ. അഡ്വാനിയും സുമിത്ര മഹാജനും ആനന്ദി ബെന്നും മുരളി മനോഹര് ജോഷി വരെ ഈ മാനദണ്ഡപ്രകാരം മാറി. ഈ പ്രായത്തിനു മുകളിലുള്ളവര് തെരഞ്ഞെടുപ്പുകളില് മത്സരിക്കേണ്ടെന്നും ഭരണഘടനാപദവി കൈകാര്യം ചെയ്യേണ്ടതില്ലെന്നുമുള്ളത് പാര്ട്ടി നയമായി സ്വീകരിച്ചിട്ടുണ്ടെന്ന് അമിത്ഷാ നേരത്തെ പരസ്യമായി സമ്മതിച്ചിരുന്നു. അതുകൊണ്ട് തന്നെ 75 വയസായാല് മോദി വിരമിക്കുമോ എന്ന ചോദ്യം കുറച്ചുനാളുകളായി പ്രതിപക്ഷം ഉയര്ത്തുന്നുണ്ട്.
ലോക്സഭാ തെരഞ്ഞെടുപ്പ് വേളയില് ഡല്ഹി മുഖ്യമന്ത്രി അരവിന്ദ് കെജ്രിവാളും മോദിയുടെ വിരമിക്കലുമായി ബന്ധപ്പെട്ട് രംഗത്തെത്തിയിരുന്നു. ”സെപ്തംബര് 17 ന് മോദിക്ക് 75 വയസ് തികയുകയാണ്. പാര്ട്ടിയിലെ നേതാക്കള് 75 വര്ഷത്തിന് ശേഷം വിരമിക്കുമെന്ന് അദ്ദേഹം ചട്ടം സ്ഥാപിച്ചിരുന്നു. എല് കെ അദ്വാനി, മുരളി മനോഹര് ജോഷി, സുമിത്ര മഹാജന്, യശ്വന്ത് സിന്ഹ എന്നിവര് ഇതുപ്രകാരം വിരമിച്ചു, ഇപ്പോള് പ്രധാനമന്ത്രി മോദി സെപ്റ്റംബര് 17 ന് വിരമിക്കാന് പോകുന്നു” എന്നാണ് കെജ്രിവാള് പറഞ്ഞത്.
ഇതിനെതിരെ ബി.ജെ.പി നേതാക്കള് രംഗത്തെത്തിയിരുന്നു. മോദി രാജി വയ്ക്കില്ലെന്നും കാലാവധി പൂര്ത്തിയാക്കുമെന്നായിരുന്നു നേതാക്കളുടെ വാദം. ”ബി.ജെ.പി ഭരണഘടനയില് 75 വയസ് എന്ന പരിധിയില്ല, ഇക്കാര്യത്തില് പാര്ട്ടിക്ക് ആശയക്കുഴപ്പമില്ല. നരേന്ദ്രമോദി തന്നെ തുടരും” എന്ന് അമിത് ഷായും മറുപടി നല്കി.
india
ഹോം വർക്ക് ചെയ്യാത്ത കുട്ടിയെ ശകാരിച്ച അധ്യാപകരെ മാതാപിതാക്കൾ സ്കൂളിൽ കയറി തല്ലി
ആക്രമണത്തിൽ പരിക്കേറ്റ അധ്യാപകൻ ആശുപത്രിയിൽ ചികിത്സയിലാണ്

ബിഹാർ: ഹോം വർക്ക് ചെയ്യാത്ത വിദ്യാർത്ഥിയെ അധ്യാപകൻ അടിച്ചതിനെ തുടർന്ന് സ്കൂളിൽ കയറി അധ്യാപകരെ തല്ലി കുടുംബം. ബിഹാറിലെ ഗയ ജില്ലയിലാണ് സംഭവം. രാകേഷ് രഞ്ജൻ ശ്രീ വാസ്തവ എന്ന അധ്യാപകനാണ് മർദനമേറ്റത്. ജൂലൈ അഞ്ചാം തീയതിയാണ് സംഭവം നടന്നത്. അധ്യാപകരെ കുടുംബം ആക്രമിക്കുന്നതിന്റെ വീഡിയോ ഇപ്പോൾ സോഷ്യൽ മീഡിയയിൽ വൈറലാണ്. ആക്രമണത്തിൽ പരിക്കേറ്റ അധ്യാപകൻ ആശുപത്രിയിൽ ചികിത്സയിലാണ്.
ബിഹാറിലെ ഷാവാസ്പൂർ മിഡിൽ സ്കൂളിലാണ് നാടകീയ രംഗങ്ങൾ അരങ്ങേറിയത്. ഹോം വർക്ക് ചെയ്യാത്തതിന് വിദ്യാർത്ഥിയെ അധ്യാപകൻ അടിച്ചതും ശകാരിച്ചതും വീട്ടുകാർക്ക് ഇഷ്ടപ്പെടാത്തതിനാലാണ് ആക്രമിച്ചതെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. അധ്യാപകൻ അടിച്ചതിന് പിറ്റേ ദിവസം കുടുംബാംഗങ്ങൾക്കൊപ്പമാണ് വിദ്യാർത്ഥി സ്കൂളിലെത്തിയത്. ആക്രമണം തടയാൻ ശ്രമിച്ച മറ്റൊരു അധ്യാപകനെയും കുടുംബാംഗങ്ങൾ ആക്രമിച്ചു.
india
മംഗളൂരുവിലെ ആൾക്കൂട്ടക്കൊലക്ക് ഇരയായ അശ്റഫിന്റെ കുടുംബത്തിന് 15 ലക്ഷം രൂപ കൈമാറി കർണാടക മന്ത്രിയും സ്പീക്കറും
കർണാടക ന്യൂനപക്ഷ, വഖഫ്,ഭവന മന്ത്രി സമീർ അഹമ്മദ് ഖാൻ 10 ലക്ഷവും നിയമസഭ സ്പീക്കറും മംഗളൂരു എംഎൽഎയുമായ യു.ടി ഖാദർ അഞ്ച് ലക്ഷം രൂപയുമാണ് സ്വന്തം നിലയിൽ നൽകിയത്

മലപ്പുറം: ആൾക്കൂട്ട ആക്രമണത്തിൽ മംഗളൂരുവിൽ കൊല്ലപ്പെട്ട മലപ്പുറം വേങ്ങര പറപ്പൂർ സ്വദേശി അശ്റഫിന്റെ കുടുംബത്തിന് 15 ലക്ഷം രൂപ കൈമാറി കർണാടക മന്ത്രിയും സ്പീക്കറും. കർണാടക ന്യൂനപക്ഷ, വഖഫ്,ഭവന മന്ത്രി സമീർ അഹമ്മദ് ഖാൻ 10 ലക്ഷവും നിയമസഭ സ്പീക്കറും മംഗളൂരു എംഎൽഎയുമായ യു.ടി ഖാദർ അഞ്ച് ലക്ഷം രൂപയുമാണ് സ്വന്തം നിലയിൽ നൽകിയത്. 15 ലക്ഷം രൂപയുടെ ചെക്ക് മരിച്ച അശ്റഫിന്റെ മാതാപിതാക്കൾക്ക് കൈമാറി. ഈ വിഷയത്തിൽ തുടക്കം മുതൽ നിതിക്കായി കെ.സി വേണുഗോപാലും, പി.കെ കുഞ്ഞാലിക്കുട്ടിയും, എ. പി അനിൽകുമാറും കർണ്ണാടക സർക്കാരിനോടും,കോൺഗ്രസ്സ് നേതാക്കളുമായും ഇടപെട്ടിട്ടുണ്ടായിരുന്നു.
ബംഗളൂരുവിൽ യു.ടി.ഖാദറിന്റെ ഔദ്യോഗിക വസതിയിൽ വെച്ച് മഞ്ചേശ്വരം എംഎൽഎ എ.കെ.എം അഷ്റഫ്,ആക്ഷൻ കമ്മിറ്റി ചെയർമാനും വേങ്ങര ബ്ലോക്ക് പഞ്ചായത്ത് അംഗവുമായ നാസർ പറപ്പൂർ എന്നിവരടങ്ങിയ സംഘം മന്ത്രി സമീർഖാനെ സന്ദർശിച്ചു. കർണാടക സർക്കാർ കുടുംബത്തിന് 25 ലക്ഷം രൂപ ലഭ്യമാക്കാനുള്ള നടപടികൾ തുടരുകയാണന്നും കേസിൽ സ്പെഷ്യൽ പബ്ലിക്ക് പ്രോസിക്യൂട്ടറെ ഉടൻ നിയമിക്കുമെന്നും,പ്രതികളെ മാത്രകാപരമായി ശിക്ഷിക്കാനുള്ള നിയമനടപടികൾക്ക് സർക്കാർ നേത്രത്വം നൽകുമെന്നും ഉറപ്പുനൽകി.ബി.കെ.ഹരിപ്രസാദ് എംഎൽസി, മുഖ്യമന്ത്രി സിദ്ധരാമയ്യയുടെ രാഷ്ട്രീയകാര്യ സെക്രട്ടറി നസീർ അഹമ്മദ്, കോൺഗ്രസ് നേതാവ് ജി.എ.ബാവ, സോളിഡാരിറ്റി സംസ്ഥാന സെക്രട്ടറി ശബീർ കൊടുവള്ളി ,കമ്മറ്റി കൺവീനർ ഹബീബ് ജഹാൻ,ജലിൽ മംഗലാപുരം,ഫൈസി പുൽപ്പള്ളി,അഡ്വ മാനവി എന്നിവർ സംബന്ധിച്ചു.
india
തമിഴ്നാട്ടില് സ്കൂള് ബസില് ട്രെയിനിടിച്ച് അപകടം; നാല് വിദ്യാര്ത്ഥികള്ക്ക് ദാരുണാന്ത്യം
പത്തോളം കുട്ടികള്ക്ക് പരിക്ക്

തമിഴ്നാട്ടില് സ്കൂള് ബസില് ട്രെയിനിടിച്ച് നാല് വിദ്യാര്ത്ഥികള് മരിച്ചു. രാവിലെ 7.45 ഓടെ കടലൂര് ചെമ്മംകുപ്പത്താണ് അപകടമുണ്ടായത്. റെയില്വേ ട്രാക്ക് മുറിച്ചുകടക്കാന് ശ്രമിക്കുന്നതിനിടെയാണ് ബസില് ട്രെയിനിടിച്ച് അപകടം ഉണ്ടായത്. ആളില്ലാ ലെവല്ക്രോസില് വെച്ചായിരുന്നു അപകടം. പത്തോളം കുട്ടികള്ക്ക് പരിക്കേറ്റു. പലരുടെയും നില ഗുരുതരമാണ്. പരിക്കേറ്റ വിദ്യാര്ത്ഥികളെ കടലൂര് സര്ക്കാര് ആശുപത്രിയില് പ്രവേശിപ്പിച്ചിട്ടുണ്ട്. സംഭവത്തില് കൂടുതല് അന്വേഷണം നടന്നുവരികയാണ്.
തിരുച്ചെന്തൂര്-ചെന്നൈ എക്സ്പ്രസ് ട്രെയിന് ഇടിച്ചാണ് അപകടം ഉണ്ടായത്. കടലൂര് കൃഷ്ണസ്വാമി മെട്രിക്കുലേഷന് സ്കൂളിലെ വിദ്യാര്ത്ഥികള് സഞ്ചരിച്ചിരുന്ന ബസാണ് അപകടത്തില്പ്പെട്ടത്. മരിച്ച രണ്ട് കുട്ടികളുടെ മൃതദേഹം തിരിച്ചറിഞ്ഞു. ആറാം ക്ലാസ് വിദ്യാര്ത്ഥി നിവാസ്, പതിനൊന്നാം ക്ലാസ് വിദ്യാര്ത്ഥിനി ചാരുമതി എന്നിവരുടെ മൃതദേഹങ്ങളാണ് തിരിച്ചറിഞ്ഞത്.
ലെവല് ക്രോസില് ഗേറ്റ് അടയ്ക്കാന് ജീവനക്കാരന് മറന്ന് പോയതാണ് എന്നായിരുന്നു റെയില്വേ വൃത്തങ്ങളുടെ ആദ്യം പ്രതികരണം. പിന്നീട് ബസ് ഡ്രൈവറെ പഴിച്ചുകൊണ്ടാണ് റെയില്വേ ഔദ്യോഗിക വാര്ത്താക്കുറിപ്പ് ഇറക്കിയത്. ട്രെയിന് വരുംമുന്പ് ബസ് കടത്തി വിടണമെന്ന് ഡ്രൈവര് ആവശ്യപ്പെട്ടെന്നാണ് റെയില്വേ വിശദീകരിക്കുന്നത്. ഗേറ്റ് അടയ്ക്കാന് വൈകിയത് ബസ് ഡ്രൈവര് നിര്ബന്ധിച്ചതിനാലാണെന്ന് റെയില്വേ അധികൃതര് വാദിക്കുന്നു.
-
india3 days ago
ഇന്ത്യയില് റോയിട്ടേഴ്സ് എക്സ് അക്കൗണ്ട് ബ്ലോക്ക് ചെയ്തു
-
kerala3 days ago
കാളികാവിലെ നരഭോജി കടുവ വനംവകുപ്പിന്റെ കൂട്ടില് കുടുങ്ങി
-
News3 days ago
ഗസ്സയില് അഭയകേന്ദ്രങ്ങള്ക്കുനേരെ ഇസ്രാഈല് ആക്രമണം; 64 പേര് കൊല്ലപ്പെട്ടു
-
india3 days ago
മുന് ചീഫ് ജസ്റ്റിസ് ചന്ദ്രചൂഡിനെ ഔദ്യോഗിക വസതിയില് നിന്ന് മാറ്റണമെന്ന് സുപ്രീം കോടതി
-
kerala3 days ago
‘കൂട്ടിലായ കടുവയെ കാട്ടില് വിടരുത്’; കരുവാരക്കുണ്ടില് വന് പ്രതിഷേധം
-
india3 days ago
ചാരവൃത്തക്കേസില് അറസ്റ്റിലായ ജ്യോതി മല്ഹോത്ര കേരളത്തിലെത്തിയത് ടൂറിസം വകുപ്പിന്റെ ക്ഷണപ്രകാരം; വിവരാവകാശ രേഖ പുറത്ത്
-
kerala3 days ago
വ്യാജ മോഷണക്കുറ്റം; വീട്ടുടമയെയും കുടുംബത്തെയും പൊലീസുകാരെയും അറസ്റ്റ് ചെയ്ത് നിയമത്തിന് മുന്നില് കൊണ്ടുവരണമെന്ന് ബിന്ദു
-
News3 days ago
അമേരിക്ക പാര്ട്ടി; പുതിയ രാഷ്ട്രീയ പാര്ട്ടി രൂപീകരിച്ച് എലോണ് മസ്ക്