ഏഷ്യന്‍ ഗെയിംസ് ഫുട്ബാളില്‍ ഇന്ത്യ പ്രീ ക്വാര്‍ട്ടറില്‍. മ്യാന്മറുമായുള്ള മത്സരം സമനിലയില്‍ കലാശിച്ചതോടെയാണ് അവസാന പതിനാറിലേക്ക് മുന്നേറിയത്. 13 വര്‍ഷത്തെ ഇടവേളക്ക് ശേഷമാണ് ഇന്ത്യ ഏഷ്യന്‍ ഗെയിംസിന്റെ നോക്കൗട്ടില്‍ പ്രവേശിക്കുന്നത്.

ഇന്ത്യക്കായി 23ആം മിനിട്ടില്‍ ക്യാപ്റ്റന്‍ സുനില്‍ ഛേത്രി ഗോള്‍ നേടിയപ്പോള്‍ 74ആം മിനിട്ടില്‍ ക്യാവ് ഹ്‌ത്വേ മ്യാന്മറിന്റെ സമനില ഗോള്‍ നേടി. 23ആം മിനിട്ടില്‍ ഒരു പെനാല്‍റ്റിയിലൂടെയാണ് ഛേത്രി ഇന്ത്യയെ മുന്നിലെത്തിച്ചത്. തുടര്‍ച്ചയായ രണ്ടാം മത്സരത്തിലാണ് ഇന്ത്യക്കായി നായകന്‍ ഗോള്‍ നേടുന്നത്.

റഹീം അലിക്കെതിരായ ഫൗളിനു ലഭിച്ച പെനാല്‍റ്റി ഛേത്രി അനായാസം ഗോളാക്കി. 74ആം മിനിട്ടില്‍ ഒരു ഹെഡറിലൂടെ ക്യാവ് ഹ്‌ത്വേ മ്യാന്മറിന്റെ സമനില ഗോള്‍ കണ്ടെത്തി. പ്രീ ക്വാര്‍ട്ടര്‍ മത്സരത്തില്‍ ഇന്ത്യ സൗദി അറേബ്യയെ നേരിടും.

കൊല്‍ക്കത്തയിൽ നടന്ന ഇന്ത്യന്‍ സൂപ്പര്‍ ലീഗില്‍ അരങ്ങേറ്റ മത്സരത്തില്‍ പഞ്ചാബ് എഫ്‌സിക്കും ചെന്നൈയ്ക്കും തോൽവി .മോഹന്‍ ബഗാനെതിരെ ഒന്നിനെതിരെ മൂന്ന് ഗോളുകള്‍ക്കാണ് പഞ്ചാബ് പരാജയപ്പെട്ടത്. മറ്റൊരു മത്സരത്തില്‍ ഒഡീഷ എഫ്‌സി എതിരില്ലാത്ത രണ്ട് ഗോളുകള്‍ക്ക് ചെന്നൈയിന്‍ എഫ്‌സിയെ പരാജയപ്പെടുത്തി.ജേസണ്‍ കമ്മിംഗ്‌സ്, ദിമിത്രി പെട്രാടോസ്, മന്‍വീര്‍ സിംഗ് എന്നിവരാണ് മോഹന്‍ ബഗാന്റെ ഗോളുകള്‍ നേടിയത്. . ജെറി മാവ്മിംഗ്തങ്ക, ഡിയേഗോ മൗറീസിയോ എന്നിവരാണ് ഒഡീഷയുടെ ഗോളുകള്‍ നേടിയത്. ഇന്ന് നോര്‍ത്ത് ഈസ്റ്റ് യുണൈറ്റഡ്, നിലവിലെ ചാംപ്യന്മാരായ മുംബൈ സിറ്റി എഫ്‌സിയെ നേരിടും.

കൊച്ചി: ഇന്ത്യന്‍ ഫുട്ബാള്‍ ആരാധകര്‍ ആവേശത്തോടെ കാത്തിരുന്ന ഐ.എസ്.എല്ലിന്റെ പത്താം സീസണ് ഇന്ന് കൊച്ചി ജവഹര്‍ലാല്‍ നെഹ്‌റു സ്‌റ്റേഡിയത്തില്‍ തുടക്കം. മലയാളികളുടെ സ്വന്തം ടീം കേരള ബ്ലാസ്‌റ്റേഴ്‌സും ബംഗളൂരു എഫ്.സിയും തമ്മിലുള്ള ഉദ്ഘാടന മത്സരത്തിന്റെ കിക്കോഫ് രാത്രി 8ന്.

കഴിഞ്ഞ പ്ലേ ഓഫിലേറ്റ മുറിവിന്റെ കണക്ക് ഇന്ന് തീര്‍ക്കാനുറച്ചാണ് ബ്ലാസ്‌റ്റേഴ്‌സ് ബംഗളൂരുവിനെതിരെ ഇന്ന് ബൂട്ട് കെട്ടുന്നത്. കിരീടം മാത്രം ലക്ഷ്യമിട്ട് ഒരുപിടി മാറ്റങ്ങളോടെ പുതുമന്ത്രവും തന്ത്രവുമായാണ് അഡ്രിയന്‍ ലൂണയുടെ നേതൃത്വത്തില്‍ ബ്ലാസ്‌റ്റേഴ്‌സ് വരുന്നത്. തോല്‍വിയെപ്പറ്റി ചിന്തിക്കാന്‍ പോലുമാകാത്ത മുന്‍ചാമ്പ്യന്മാരായ ബംഗളൂരു എഫ്.സിയും വിജയത്തുടക്കമാണ് ലക്ഷ്യം വച്ചിരിക്കുന്നത്. സ്‌പോര്‍ട്‌സ് 18ലും സൂര്യ ടിവിയിലും തത്സമയം കാണാം.