india
യുപിയില് തുടരേണ്ടെന്ന് പ്രിയങ്കഗാന്ധി; ജയ്പൂരിലേക്ക് വീടുമാറി കഫീല്ഖാന്
രാജസ്ഥാനില് കോണ്ഗ്രസ് സര്ക്കാരായതിനാല് ഇവിടെ സുരക്ഷിതമായിരിക്കുമെന്ന് കരുതുന്നു. എന്റെ കുടുംബത്തിനും ഇവിടെ താമസിക്കുന്നതാണ് സുരക്ഷിതമെന്ന് തോന്നുന്നു

ജയ്പുര്: ഡോ.കഫീല് ഖാന് കുടുംബത്തോടൊപ്പം ജയ്പൂരിലേക്ക് താമസം മാറ്റി. കോണ്ഗ്രസ് നേതാവ് പ്രിയങ്ക ഗാന്ധിയുടെ ഉപദേശ പ്രകാരമാണ് താന് രാജസ്ഥാനിലേക്ക് താമസം മാറിയതെന്ന് കഫീല് ഖാന് അറിയിച്ചു. അലഹബാദ് ഹൈക്കോടതി ഉത്തരവിനെ തുടര്ന്നാണ് കഫീല്ഖാന് ജയിലില് നിന്ന് മോചിതനായത്. ന്യൂ ഇന്ത്യന് എക്സ്പ്രസ് ദിനപത്രമാണ് ഇക്കാര്യം റിപ്പോര്ട്ട് ചെയ്തത്.
തനിക്കെതിരായ കേസ് കോടതി ഒഴിവാക്കിയിട്ടുണ്ടെങ്കിലും യോഗി സര്ക്കാര് വീണ്ടും കേസുകള് ചാര്ത്തി തന്നെ തടങ്കലിലാക്കുമെന്ന ഭയത്താലാണ് ജന്മദേശമായ ഗോരഖ്പൂരില് നിന്ന് ജയ്പൂരിലേക്ക് വന്നതെന്ന് പത്ര സമ്മേളനത്തില് കഫീല് ഖാന് പറഞ്ഞു. പ്രിയങ്ക ഗാന്ധിയുടെ ഉപദേശ പ്രകാരമാണ് താന് സുരക്ഷിത താവളം കണ്ടെത്തിയതെന്നും അദ്ദേഹം വെളിപ്പെടുത്തി. ‘പ്രിയങ്ക ഗാന്ധി എന്നെ വിളിച്ച് രാജസ്ഥാനില് വന്ന് താമസിക്കാന് ഉപദേശിച്ചു, ഞങ്ങള് നിങ്ങള്ക്ക് സുരക്ഷിതമായ സ്ഥലം നല്കാം. യുപി സര്ക്കാര് നിങ്ങളെ മറ്റേതെങ്കിലും കേസില് ഉള്പ്പെടുത്താന് ശ്രമിച്ചേക്കാമെന്നും അവിടെ തുടരുന്നത് സുരക്ഷിതമല്ലെന്നും പ്രിയങ്ക പറഞ്ഞു. അതിനാല് യുപിയില് നിന്ന് വിട്ടുനില്ക്കാന് ഞാന് തീരുമാനിച്ചു’ കഫീല് ഖാന് പറഞ്ഞു.
രാജസ്ഥാനില് കോണ്ഗ്രസ് സര്ക്കാരായതിനാല് ഇവിടെ സുരക്ഷിതമായിരിക്കുമെന്ന് കരുതുന്നു. എന്റെ കുടുംബത്തിനും ഇവിടെ താമസിക്കുന്നതാണ് സുരക്ഷിതമെന്ന് തോന്നുന്നു. കഴിഞ്ഞ ഏഴര മാസത്തോളം താന് ഒരുപാട് മാനസിക-ശാരീരിക പീഡനങ്ങള് അനുഭവിച്ചിട്ടുണ്ടെന്നും അദ്ദേഹം പറഞ്ഞു.
തന്നെ ജോലിയില് തിരികെ പ്രവേശിപ്പിക്കണമെന്ന് ആവശ്യപ്പെട്ട് യുപി മുഖ്യമന്ത്രി യോഗി ആദിത്യനാഥിന് കത്തയക്കുമെന്നും കഫീല് ഖാന് പറഞ്ഞു. കൊറോണവൈറസ് പ്രതിസന്ധി ഘട്ടത്തില് താന് സേവനമനുഷ്ടിക്കാന് ആഗ്രഹിക്കുന്നുവെന്നും അദ്ദേഹം വ്യക്തമാക്കി.
india
തമിഴ്നാട്ടിലെ തിരുവള്ളൂരില് ഡീസല് കയറ്റി വന്ന ട്രെയിനിന് തീപിടിച്ചു
ചെന്നൈ തുറമുഖത്ത് നിന്ന് ഇന്ധനവുമായി പോവുകയായിരുന്ന തീവണ്ടിക്ക് തമിഴ്നാട്ടിലെ തിരുവള്ളൂരില് വെച്ച് ഇന്ന് പുലര്ച്ചെ തീപിടിച്ചു.

ചെന്നൈ തുറമുഖത്ത് നിന്ന് ഇന്ധനവുമായി പോവുകയായിരുന്ന തീവണ്ടിക്ക് തമിഴ്നാട്ടിലെ തിരുവള്ളൂരില് വെച്ച് ഇന്ന് പുലര്ച്ചെ തീപിടിച്ചു. തീ അണയ്ക്കാനും അപകടമുണ്ടായ നാല് കമ്പാര്ട്ടുമെന്റുകളെ ട്രെയിനിന്റെ ബാക്കി ഭാഗങ്ങളില് നിന്ന് വേര്പെടുത്താനും നിരവധി ഫയര് ടെന്ഡറുകളെ സ്ഥലത്ത് വിന്യസിച്ചു.
തീപിടിത്തത്തിന്റെ യഥാര്ത്ഥ കാരണം കണ്ടെത്താന് റെയില്വേ പോലീസ് പ്രാഥമിക അന്വേഷണം ആരംഭിച്ചെങ്കിലും പാളം തെറ്റിയതിനെ തുടര്ന്നാണ് തീപിടിത്തമുണ്ടായതെന്ന് അധികൃതര് പറഞ്ഞു.
അതേസമയം പ്രദേശത്ത് നിന്ന് മാറിനില്ക്കാന് അധികൃതര് നാട്ടുകാരോട് അഭ്യര്ത്ഥിച്ചു.
ആരക്കോണം പാതയില് തീവണ്ടി ഗതാഗതം നിര്ത്തിവെച്ചതിനാല് ചെന്നൈയിലേക്കും തിരിച്ചുമുള്ള ട്രെയിനുകളെ ബാധിച്ചതായി അധികൃതര് അറിയിച്ചു.
‘തിരുവള്ളൂരിന് സമീപം തീപിടിത്തം ഉണ്ടായതിനെത്തുടര്ന്ന്, സുരക്ഷാ മുന്കരുതല് എന്ന നിലയില് ഓവര്ഹെഡ് പവര് ഓഫ് ചെയ്തിട്ടുണ്ട്. ഇത് ട്രെയിന് പ്രവര്ത്തനങ്ങളില് മാറ്റത്തിന് കാരണമായി. യാത്രയ്ക്ക് മുമ്പ് ഏറ്റവും പുതിയ അപ്ഡേറ്റുകള് പരിശോധിക്കാന് യാത്രക്കാര്ക്ക് നിര്ദ്ദേശിക്കുന്നു,’ സംഭവത്തിന് തൊട്ടുപിന്നാലെ ദക്ഷിണ റെയില്വേ ട്വീറ്റ് ചെയ്തു.
സമീപ പ്രദേശങ്ങളില് നിന്നുള്ള താമസക്കാരെ ഒഴിപ്പിച്ചു, തീ ആളിപ്പടരുന്നത് തുടരുന്നതിനാല് അഗ്നിശമന സ്ഥലത്തിന് സമീപമുള്ള വീടുകളില് ഉപയോഗിച്ചിരുന്ന എല്പിജി സിലിണ്ടറുകള് നീക്കം ചെയ്തതായി അധികൃതര് അറിയിച്ചു.
india
‘ഇന്ധന ഒഴുക്ക് നിയന്ത്രിക്കുന്ന സ്വിച്ച് ഓഫ് ആയി’; അഹമ്മദാബാദ് വിമാന അപകടത്തില് കണ്ടെത്തലുമായി AAIB

ന്യൂഡൽഹി: അഹമ്മദാബാദ് വിമാന ദുരന്തവുമായി ബന്ധപ്പെട്ട് എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോയുടെ (AAIB) പ്രഥമിക റിപ്പോർട്ട് പുറത്ത്. ഇന്ധന നിയന്ത്രണ സ്വിച്ച് ഓഫായതാണ് അപകട കാരണം എന്നാണ് റിപ്പോർട്ട് വ്യക്തമാക്കുന്നത്. വിമാനം പറന്നുയർന്ന ഉടനെ ഇന്ധന നിയന്ത്രണ സ്വിച്ച് ഓഫാവുകയായിരുന്നു. സ്വിച്ച് എന്തിനാണ് ഓഫ് ചെയ്തതെന്ന് പൈലറ്റ് ചോദിക്കുന്നതും ഓഫ് ചെയ്തിട്ടില്ല എന്ന് സഹപൈലറ്റ് പറയുന്നതും കോക്പിറ്റ് ഓഡിയോയിൽ ഉണ്ടെന്നാണ് റിപ്പോർട്ട്. വിമാനത്തിൻ്റെ എഞ്ചിനുകൾ പ്രവർത്തിച്ചത് സെക്കൻഡുകൾ മാത്രമാണെന്നും 32 സെക്കൻ്റ് കൊണ്ട് അപകടം സംഭവിച്ചുവെന്നുമാണ് റിപ്പോർട്ട് വ്യക്തമാക്കുന്നത്. പക്ഷികൾ ഇടിക്കുകയോ പ്രതികൂല കാലാവസ്ഥയോ ആയിരുന്നില്ല അപകടകാരണമെന്നും റിപ്പോർട്ട് വ്യക്തമാക്കുന്നു. 15 പേജുള്ള പ്രാഥമിക അന്വേഷണ റിപ്പോർട്ടാണ് AAIB സമർപ്പിച്ചിരിക്കുന്നത്. വിശദമായ അന്വേഷണം റിപ്പോർട്ട് ശുപാർശ ചെയ്യുന്നുണ്ട്.
എഞ്ചിൻ 1, എഞ്ചിൻ 2 എന്നിവയിലേയ്ക്കുള്ള ഇന്ധനം കട്ട്ഓഫ് ചെയ്യുന്ന രണ്ട് സ്വിച്ചുകളും ഒരു സെക്കൻഡിനുള്ളിൽ RUN-ൽ നിന്ന് CUTOFF-ലേക്ക് മാറുകയും ഇന്ധന വിതരണം തടസ്സപ്പെടുകയും ചെയ്തു എന്നാണ് റിപ്പോർട്ട്. ഇതോടെ രണ്ട് എഞ്ചിനുകളും വിമാനം പറന്നുയർന്നതിന് പിന്നാലെ ഓഫ് ആവുകയും വായുവിൽ വെച്ച് എഞ്ചിനുകളുടെ ത്രസ്റ്റ് നഷ്ടപ്പെടാൻ കാരണമാവുകയും ചെയ്തുവെന്നാണ് റിപ്പോർട്ട് വ്യക്തമാക്കുന്നത്. രണ്ട് എഞ്ചിനുകൾക്കും ഒരേസമയം ത്രസ്റ്റ് നഷ്ടപ്പെടുന്നതിന് മുമ്പ് വിമാനം 180 നോട്ട് വേഗതയിലെത്തിയിരുന്നു. ഇന്ധന സ്വിച്ചുകൾ ഫ്ലിപ്പ് ചെയ്തതിന് തൊട്ടുപിന്നാലെ വിമാനത്തിന് വേഗതയും ഉയരവും പെട്ടെന്ന് നഷ്ടപ്പെട്ടുവെന്നും റിപ്പോർട്ട് ചൂണ്ടിക്കാണിക്കുന്നുണ്ട്. വിമാനം പറന്നുയർന്ന ഉടൻ തന്നെ ‘റാം എയർ ടർബൈൻ’ (RAT) പ്രവർത്തിക്കുന്നത് സിസിടിവി ദൃശ്യങ്ങളിൽ കാണാം. ഊർജ്ജ തടസ്സം സംഭവിക്കുമ്പോൾ RAT സാധാരണയായി സജീവമാകാറുണ്ട്. വിമാനത്തിൻ്റെ എഞ്ചിനുകൾ പറന്ന് ഉയരുന്നതിനിടെ ഓഫായി എന്നത് ഇത് സ്ഥിരീകരിക്കുന്നുവെന്നും റിപ്പോർട്ട് പറയുന്നു.
ഓഫായതിന് പിന്നാലെ രണ്ട് ഇന്ധന സ്വിച്ചുകളും RUN-ലേക്ക് തിരികെ മാറ്റി. ഇതിന് പിന്നാലെ ഒരു എഞ്ചിൻ താൽക്കാലികമായി സ്ഥിരത കൈവരിച്ചുവെന്നും പക്ഷേ മറ്റൊന്നിന് പ്രവർത്തന ശേഷി വീണ്ടെടുക്കാനായില്ലെന്നും റിപ്പോർട്ട് പറയുന്നു. എഞ്ചിൻ 2 പ്രവർത്തന ശേഷി വീണ്ടെടുക്കുന്നതിൻ്റെ ലക്ഷണങ്ങൾ കാണിച്ചു, പക്ഷേ എഞ്ചിൻ 1 സ്ഥിരത കൈവരിക്കുന്നതിൽ പരാജയപ്പെട്ടു, ത്രസ്റ്റ് വീണ്ടെടുക്കാൻ കഴിഞ്ഞില്ല എന്നാണ് റിപ്പോർട്ട് പറയുന്നത്. വിമാനത്തിന്റെ ഫോർവേഡ് എക്സ്റ്റെൻഡഡ് എയർഫ്രെയിം ഫ്ലൈറ്റ് റെക്കോർഡർ (EAFR) വീണ്ടെടുക്കുകയും വിജയകരമായി ഡൗൺലോഡ് ചെയ്യുകയും ചെയ്തുവെന്നാണ് റിപ്പോർട്ടിലുള്ളത്. വ്യവസ്ഥാപിത മാർഗങ്ങളിലൂടെ ഡാറ്റ വീണ്ടെടുക്കാൻ കഴിയാത്തത്ര ഗുരുതരമായ കേടുപാടുകൾ പിൻഭാഗത്തെ EAFR-ന് സംഭവിച്ചുവെന്നും റിപ്പോർട്ടിലുണ്ട്.
india
കരാര് സംബന്ധിച്ച് തീരുമാനമായില്ല; ഐഎസ്എല് അനിശ്ചിതകാലത്തേക്ക് നീട്ടി
അഖിലേന്ത്യാ ഫുട്ബോള് ഫെഡറേഷന് കരാര് പുതുക്കുന്നതില് ഇടപെടുന്നില്ലെന്നാണ് സംഘാടകരായ FSDL അറിയിച്ചിരിക്കുന്നത്

ഇന്ത്യന് സൂപ്പര് ലീഗില് അനിശ്ചിതത്വം. 2025-2026 സീസണ് അനിശ്ചിതകാലത്തേക്ക് നീട്ടി. കരാര് സംബന്ധിച്ച് തീരുമാനം ആകാത്തതിനാല് മുന്നോട്ടു പോകാനാവില്ലെന്ന് സംഘാടകര് അറിയിച്ചു. അഖിലേന്ത്യാ ഫുട്ബോള് ഫെഡറേഷന് കരാര് പുതുക്കുന്നതില് ഇടപെടുന്നില്ലെന്നാണ് സംഘാടകരായ FSDL അറിയിച്ചിരിക്കുന്നത്.
എഫ്എസ്ഡിഎല്ലിനും അഖിലേന്ത്യാ ഫുട്ബോള് ഫെഡറേഷനും ഇടയിലുള്ള മാസ്റ്റര് റൈറ്റ്സ് എഗ്രിമെന്റ് (എംആര്എ) പുതുക്കുന്നതുമായി ബന്ധപ്പെട്ട അനിശ്ചിതത്വങ്ങളെ തുടര്ന്ന് സെപ്തംബറില് ആരംഭിക്കേണ്ട സീസണാണ് സംപ്രേഷണാവകാശ കരാര് തര്ക്കത്തെ തുടര്ന്ന് നീട്ടിയിരിക്കുന്നത്. കരാര് പുതുക്കാതെ സീസണ് തുടങ്ങാനാവില്ലെന്ന് എഫ്എസ്ഡിഎല് എഐഎഫ്എഫിനെയും ക്ലബ്ബുകളെയും രേഖാമൂലം അറിയിച്ചു. റിലയന്സ് ഗ്രൂപ്പിന്റെ കീഴിലാണ് ഫുട്ബോള് സ്പോര്ട്സ് ഡവലപ്മെന്റ് ലിമിറ്റഡ് (FSDL). 2010 ല് ഒപ്പുവച്ച എംആര്എ 2025 ഡിസംബറില് അവസാനിക്കാനിരിക്കുകയാണ്.
നിലവിലെ കരാര് അനുസരിച്ച്, 15 വര്ഷത്തേക്ക് ഐഎസ്എല് നടത്തുന്നതിന് എഫ്എസ്ഡിഎല് പ്രത്യേക വാണിജ്യ, പ്രവര്ത്തന അവകാശങ്ങള് കൈവശം വച്ചിട്ടുണ്ട്. ലീഗിന്റെ ഭരണത്തില് ഒരു പ്രധാന പുനഃസംഘടന എഫ്എസ്ഡിഎല് ഇപ്പോള് നിര്ദ്ദേശിച്ചിട്ടുണ്ട്. ഐഎസ്എല് ക്ലബ്ബുകള് (60%), എഫ്എസ്ഡിഎല് (26%), എഐഎഫ്എഫ് (14%) എന്നിവയുടെ സംയുക്ത ഉടമസ്ഥതയിലുള്ള ഒരു ഹോള്ഡിംഗ് കമ്പനി സൃഷ്ടിക്കുന്നതാണ് പുതിയ മാതൃക. ഐഎസ്എല് പ്രവര്ത്തനങ്ങളില് എഫ്എസ്ഡിഎല് കേന്ദ്ര നിയന്ത്രണം നിലനിര്ത്തുന്ന നിലവിലെ ചട്ടക്കൂടില് നിന്നുള്ള ഒരു പ്രധാന മാറ്റമാണ് ഈ നിര്ദ്ദേശം.
എംആര്എ ചര്ച്ചകള് കൈകാര്യം ചെയ്തതില് കാര്യമായ വിമര്ശനം നേരിട്ട എഐഎഫ്എഫ്, 2025 ഏപ്രിലോടെ പുതിയ കരാറിന് അന്തിമരൂപം നല്കുന്നതില് പരാജയപ്പെട്ടു. പകരം, സാഹചര്യം വിലയിരുത്തുന്നതിനായി ഫെഡറേഷന് എട്ട് അംഗ ടാസ്ക് ഫോഴ്സ് രൂപീകരിച്ചു, ഈ നീക്കം മുന് ഇന്ത്യന് ക്യാപ്റ്റന് ബൈചുങ് ബൂട്ടിയ ഉള്പ്പെടെ നിരവധി പ്രധാന പങ്കാളികളില് നിന്ന് കടുത്ത പ്രതിഷേധത്തിന് ഇടയാക്കിയിരുന്നു.
-
india3 days ago
ഗുജറാത്തില് പാലം തകര്ന്നുണ്ടായ അപകടം; മരിച്ചവരുടെ എണ്ണം 13 ആയി
-
kerala3 days ago
യൂത്ത് കോണ്ഗ്രസ് പ്രവര്ത്തകനെ മര്ദിച്ച സംഭവം; പൊലീസുകാര്ക്കെതിരെ കേസെടുത്ത് കോടതി
-
kerala3 days ago
വളര്ത്തു പൂച്ച മാന്തിയതിനു പിന്നാലെ വാക്സിനെടുത്ത് ചികിത്സയിലായിരുന്ന വിദ്യാര്ഥിനി മരിച്ചു
-
kerala18 hours ago
മലക്കം മറിഞ്ഞ് മന്ത്രി; പ്രതിഷേധം ശക്തമായപ്പോള് സ്കൂള് സമയമാറ്റത്തില് ചര്ച്ചക്ക് തയ്യാറാണെന്ന് മന്ത്രി ശിവന്കുട്ടി
-
india3 days ago
റെയില്വേ ട്രാക്കില് അമ്മയാനയ്ക്ക് സുഖപ്രസവം; രണ്ട് മണിക്കൂറോളം ട്രെയിന് സര്വീസ് നിര്ത്തിവെച്ച് റെയിവേ
-
india3 days ago
ഡല്ഹിയില് ശക്തമായ ഭൂചലനം അനുഭവപ്പെട്ടതായി റിപ്പോര്ട്ട്
-
kerala3 days ago
കൈക്കൂലിക്കേസ്; ഇ ഡി അസിസ്റ്റന്റ് ഡയറക്ടര്ക്ക് മുന്കൂര് ജാമ്യം
-
kerala3 days ago
വയനാട് ചീരാലില് വീണ്ടും പുലിയിറങ്ങി