ന്യൂഡല്‍ഹി: പെണ്‍സുഹൃത്തിനെ വിമാനത്തിന്റെ കോക്പിറ്റില്‍ ക്ഷണിച്ച സംഭവത്തില്‍ രണ്ടു പൈലറ്റുമാര്‍ക്ക് വിലക്കേര്‍പ്പെടുത്തി എയര്‍ഇന്ത്യ. ഡല്‍ഹിയില്‍ നിന്ന് ലേയിലേക്ക് പുറപ്പെട്ട എ.ഐ-445 നമ്പര്‍ വിമാനത്തിലെ പൈലറ്റുമാര്‍ക്കെതിരെയാണ് നടപടി. അനുവാദമില്ലാതെ യാത്രക്കാരിയായ സ്ത്രീ കോക്പിറ്റിലേക്ക് പ്രവേശിച്ചുവെന്ന ക്യാബിന്‍ ക്രൂവിന്റെ പരാതിയുടെ അടിസ്ഥാനത്തിലാണ് വിമാനത്തിലെ പൈലറ്റിനും സഹപൈലറ്റിനും വിലക്കേര്‍പ്പെടുത്തിയത്.
അപകടസാധ്യത വളരെയേറെയാണ് ഡല്‍ഹി-ലേ ആകാശപാത. ഗുരുതരമായ സുരക്ഷാ ലംഘനമാണ് നടന്നതെന്നും പൈലറ്റുമാര്‍ക്കെതിരെ കടുത്ത നടപടിയുണ്ടാകുമെന്നും എയര്‍ഇന്ത്യ അറിയിച്ചു. വിഷയം ശ്രദ്ധയില്‍പ്പെട്ടിട്ടുണ്ടെന്നും കര്‍ശന നടപടി സ്വീകരിക്കുമെന്നും ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന്‍ വ്യക്തമാക്കി. അടുത്തിടെ റിപ്പോര്‍ട്ട് ചെയ്യുന്ന സമാനമായ രണ്ടാമത്തെ സംഭവമാണിത്.