വിശാഖപട്ടണം: അപൂര്വ്വ ഫോമില് വിരാട് കോലി. ഇന്ത്യ – ദക്ഷിണാഫ്രിക്ക ഏകദിന പരമ്പരയില് തുടര്ച്ചയായ രണ്ട് സെഞ്ചുറികള് നേടിയ കോലി, തന്റെ ഫോമും ടീമിലെ സ്ഥാനവും ചോദ്യം ചെയ്തവര്ക്ക് തകര്പ്പന് മറുപടിയാണ് നല്കിയിരിക്കുന്നത്. ഇതോടെ ശനിയാഴ്ച വിശാഖപട്ടണത്ത് നടക്കുന്ന മൂന്നാം ഏകദിന മത്സരത്തിനുള്ള ടിക്കറ്റുകള് മിനിറ്റുകള്ക്കുള്ളില് വിറ്റുതീര്ന്നതായി ആന്ധ്ര ക്രിക്കറ്റ് അസോസിയേഷന് (എസിഎ) സ്ഥിരീകരിച്ചു.
നവംബര് 28നാണ് മൂന്നാം ഏകദിനത്തിനായുള്ള ആദ്യഘട്ട ടിക്കറ്റ് വില്പ്പന ആരംഭിച്ചത്. തുടക്കത്തില് വില്പ്പനയ്ക്ക് അത്ര നല്ല പ്രതികരണം ലഭിച്ചിരുന്നില്ല. എന്നാല് റാഞ്ചിയില് നടന്ന രണ്ടാം ഏകദിനത്തിലും കോലി സെഞ്ചുറി നേടിയതോടെ കാഴ്ച മാറി.
രണ്ടാം, മൂന്നാം ഘട്ടങ്ങളില് വില്പ്പനയ്ക്ക് വെച്ച മുഴുവന് ടിക്കറ്റുകളും നിമിഷങ്ങള്ക്കുള്ളില് വിറ്റഴിഞ്ഞു. ‘ഒന്നുപോലും വില്ക്കാതെ അവശേഷിച്ചില്ല,’ എന്ന് എസിഎ മീഡിയ ആന്ഡ് ഓപ്പറേഷന്സ് ടീമിലെ വൈ. വെങ്കിടേഷ് വ്യക്തമാക്കി.
പരമ്പരയില് ഇതുവരെ കളിച്ച രണ്ടു മത്സരങ്ങളില് നിന്ന് 118.50 ശരാശരിയില് 237 റണ്സാണ് കോലി അടിച്ചുകൂട്ടിയിരിക്കുന്നത്. പരമ്പരയിലെ നിലവിലെ ടോപ്പ് സ്കോറും, ഏറ്റവും കൂടുതല് സിക്സറുകളും ബൗണ്ടറികളും നേടിയ താരവുമാണ് കോലി.
വിശാഖപട്ടണത്ത് കോലിയുടെ ഏകദിന റെക്കോഡും അതിഗംഭീരമാണ്. ഇവിടെ കളിച്ച ഏഴ് ഏകദിനങ്ങളില് മൂന്ന് സെഞ്ചുറികള് അദ്ദേഹം നേടിയിട്ടുണ്ട്. ഒരു മത്സരത്തില് 99 റണ്സില് പുറത്തായ കോലിക്ക് ഈ ഗ്രൗണ്ടിലെ ശരാശരി 97.83 ആണ്.