മ്യൂണിക്: യൂറോ കപ്പില്‍ ഹംഗറിക്കെതിരായ മത്സരത്തിന് മുമ്പ് നടന്ന വാര്‍ത്താസമ്മേളനത്തില്‍ കൊക്കോകോളയുടെ കുപ്പികള്‍ എടുത്തുമാറ്റി പോര്‍ച്ചുഗീസ് ക്യാപ്റ്റന്‍ ക്രിസ്റ്റ്യാനോ റൊണാള്‍ഡോ വാര്‍ത്തകളില്‍ നിറഞ്ഞുനിന്നിരുന്നു. ശീതളപാനീയങ്ങള്‍ക്ക് പകരം വെള്ളം കുടിക്കാന്‍ പറഞ്ഞാണ് ക്രിസ്റ്റ്യാനോ കൊക്കോകോള കുപ്പികള്‍ എടുത്തുമാറ്റിയത്. ഇതിന് പിന്നാലെ ക്രിസ്റ്റ്യാനോയുടെ മാര്‍ഗം പിന്തുടര്‍ന്ന് ഫ്രാന്‍സിന്റെ സൂപ്പര്‍ താരം പോള്‍ പോഗ്ബയും രംഗത്തുവന്നു.

ജര്‍മനിക്കെതിരായ മത്സരത്തിന് ശേഷം നടന്ന വാര്‍ത്താസമ്മേളനത്തിനിടെ മുന്നിലെ മേശയിലുള്ള ഹെയ്‌നെകെന്‍ കമ്പനിയുടെ ബിയര്‍ കുപ്പി എടുത്തുമാറ്റിയാണ് പോഗ്ബ ക്രിസ്റ്റിയാനോയെ മാതൃകയാക്കിയത്.

ഇസ്‌ലാം മതവിശ്വാസിയായ പോഗ്ബ മദ്യ ബ്രാന്റുകളെ പ്രോത്സാഹിപ്പിക്കുന്ന പരസ്യത്തില്‍നിന്ന് നേരത്തെ വിട്ടുനിന്നിരുന്നു. 2019ലാണ് പോഗ്ബ ഇസ്‌ലാം മതം സ്വീകരിച്ചത്. തന്റെ മനസ്സിന് കൂടുതല്‍ ശാന്തത നല്‍കാന്‍ ഇസ്‌ലാം മതത്തിന് കഴിയുന്നുണ്ടെന്ന് പോഗ്ബ പറഞ്ഞിരുന്നു. 2019ല്‍ മക്ക സന്ദര്‍ശിച്ച് ഉംറയും ചെയ്തു.