വാടാനപ്പള്ളി: കഴിഞ്ഞദിവസം മരണപ്പെട്ട പ്രമുഖ പ്രവാസിയും അബുദാബി ഇന്ത്യന്‍ ഇസ്ലാമിക് സെന്റര്‍ സ്ഥാപകാംഗവും കെഎംസിസി നേതാവുമായ വാടാനപ്പള്ളി മുക്രിയകത്ത് എംഎം ദാവൂദ് ഹാജിയുടെ മയ്യിത്ത് വാടാനപ്പള്ളി തെക്കെ ജുമുഅത്ത് പള്ളിയില്‍ വന്‍ജനാവലിയുടെ സാന്നിധ്യത്തില്‍ ഖബറടക്കി.
ആറുപതിറ്റാണ്ടോളം അബുദാബിയില്‍ പ്രവാസ ജീവിതം നയിച്ച ദാവൂദ്ഹാജി മത-സാമുഹിക- സാംസ്‌കാരിക-വിദ്യാഭ്യാസ മേഖലകളില്‍ നിറഞ്ഞുനിന്ന വ്യക്തിത്വമായിരുന്നു. അരനൂറ്റാണ്ടിലേറെ അദ്ദേഹം അബുദാബി രാജകുടുംബത്തിലെ വിശ്വസ്ഥനായ ഉദ്യോഗസ്ഥനായി സേവനം ചെയ്ത ദാവൂദ്ഹാജി സാധാരണക്കാരന്റെ പ്രയാസങ്ങളില്‍ എന്നും കൂടെനില്‍ക്കുകയും പരമാവധി സഹായങ്ങള്‍ ചെയ്തുകൊടുക്കുകയും ചെയ്തു.
അബുദാബി ഇന്ത്യന്‍ ഇസ്ലാമിക് സെന്റര്‍ വൈസ് പ്രസിഡണ്ട്, കെഎംസിസി നാഷണല്‍ കമ്മിറ്റി ഉപദേശക സമിതിയംഗം, തൃശൂര്‍ മാലിക്ക് ദീനാര്‍ ഇസ്ലാമിക് കോംപ്ലക്‌സ് പ്രസിഡണ്ട് തുടങ്ങി വിവിധ സംഘടനകളില്‍ നേതൃത്വപരമായ പങ്ക് വഹിച്ചിട്ടുണ്ട്.
അബുദാബിയില്‍ നടന്ന ജനാസ നമസ്‌കാരത്തില്‍ നിരവധിപേര്‍ പങ്കെടുത്തു. തുടര്‍ന്നുനടന്ന പ്രാര്‍ത്ഥനക്ക് കെഎംസിസി നേതാവും പണ്ഡിതനുമായ യു അബ്ദുല്ല ഫാറൂഖി നേതൃത്വം നല്‍കി. മത-സാമൂഹിക-സാംസ്‌കാരിക മേഖലകളിലെ നിരവധി പ്രമുഖര്‍ സന്നിഹിതരായിരുന്നു.