Connect with us

columns

നാളെയെ സ്വപ്‌നം കണ്ട നായകന്‍

ചരിത്രത്തില്‍ മായാത്ത മുദ്ര പതിപ്പിച്ച വര്‍ ഒട്ടേറെയുണ്ട്. എന്നാല്‍ ചരിത്രം തന്നെ സൃഷ്ടിച്ചവര്‍ അത്യപൂര്‍വമാണ്. ഒരു കാലഘട്ടത്തിന്റെ വര്‍ണാഭമായ ചിത്രം സ്വന്തം ജീവ ചരിത്രമാക്കി മാറ്റാന്‍ കഴിഞ്ഞ സി.എച്ചിനെ പഠിക്കാനും പകര്‍ത്താനും പുതിയ തലമുറ തയാറാകണം.

Published

on

നവാസ് പൂനൂര്‍

വാടിക്കരിഞ്ഞ സ്വപ്‌നങ്ങളുമായി മോഹഭംഗത്തിന്റെ മൂടുപടത്തിനുള്ളില്‍ നിദ്രയിലായിരുന്ന സമൂഹത്തെ വിളിച്ചുണര്‍ത്തിയത് സി.എച്ചായിരുന്നു. പ്രതീക്ഷയുടെ തീരത്തേക്ക് അവരെ അദ്ദേഹം കൈ പിടിച്ച് നടത്തി. അധികാരത്തിന്റെ ചെങ്കോല്‍ പിടിക്കാനുള്ള കരുത്തുണ്ട് ആ കരങ്ങള്‍ക്ക് എന്നദ്ദേഹം ബോധ്യപ്പെടുത്തി.

സി.എച്ച് വെറും രാഷ്ട്രീയക്കാരനായിരുന്നില്ല, രാഷ്ട്രതന്ത്രജ്ഞനായിരുന്നു. രാഷ്ട്രീയക്കാരന്‍ അടുത്ത തിരഞ്ഞെടുപ്പിനെക്കുറിച്ച് ചിന്തിക്കുമ്പോള്‍ രാഷ്ട തന്ത്രജ്ഞന്‍ അടുത്ത തലമുറയെക്കുറിച്ചാണ് ചിന്തിക്കുക. സി.എച്ചിന്റെ സ്വപ്‌നങ്ങളില്‍ ഉണ്ടായിരുന്നത് അടുത്ത തലമുറയായിരുന്നു. ആ തലമുറയാണ് ഇന്ന് അന്തസോടെ തല ഉയര്‍ത്തിപ്പിടിച്ച് നില്‍ക്കുന്നത്. എന്തായിരുന്നു സി.എച്ച് എന്ന് ചോദിക്കുന്നതിനേക്കാള്‍ എളുപ്പം എന്തായിരുന്നില്ല സി.എച്ച് എന്ന് ചോദിക്കുന്നതാണ്. ഹ്രസ്വമായ ജീവിതത്തിനിടയില്‍ ഒരു നേതാവിന് വളരാവുന്നത്ര വളര്‍ന്നു, ഒരു ഭരണാധികാരിക്ക് ഉയരാവുന്നത്ര ഉയര്‍ന്നു. ശാഖാ മുസ്‌ലിംലീഗ് സെക്രട്ടറി സ്ഥാനം മുതല്‍ ഇന്ത്യന്‍ യൂനിയന്‍ മുസ്‌ലിംലീഗ് ജനറല്‍ സെക്രട്ടറി സ്ഥാനം വരെ, മുനിസിപ്പല്‍ കൗണ്‍സിലര്‍ മുതല്‍ കേരള സംസ്ഥാന മുഖ്യമന്ത്രി വരേ. സംഭവബഹുലമായ ആ വളര്‍ച്ച തുല്യതയില്ലാത്തതായിരുന്നു. ഒരു യുഗം കൊണ്ട് ചെയ്തുതീര്‍ക്കേണ്ടതെല്ലാം ചെയ്ത അത്ഭുത പ്രതിഭാസമായിരുന്നു അദ്ദേഹം. ഒരു പൂവ് ചോദിച്ചപ്പോള്‍ ഒരു വസന്തം നല്‍കിയ ഇന്ദ്രജാലം അവിശ്വസനീയമാണ്. ജാടയും പ്രകടനപരതയും ഘോഷയാത്ര നടത്തുന്ന കാപട്യം കലര്‍ന്ന രാഷ്ട്രീയത്തിന് സി.എച്ച് അന്യനായിരുന്നു.

ഇന്നത്തെ നേതാക്കളെല്ലാം അവാര്‍ഡുകളും പുരസ്‌കാരങ്ങളുംകൊണ്ട് ശ്വാസം മുട്ടിയപ്പോള്‍ സി.എച്ച് ജനലക്ഷങ്ങളുടെ സ്‌നേഹപ്രകടനങ്ങളാല്‍ പെറുതിമുട്ടി. സി.എച്ചിനെതിരെ പ്രചണ്ഡമായ ദുഷ്പ്രചാരണങ്ങളുണ്ടായപ്പോഴും തികച്ചും അക്ഷോഭ്യനായി സുസ്‌മേരവദനനായി വിനയാന്വിതനായി തല ഉയര്‍ത്തി അദ്ദേഹം പറഞ്ഞു: ‘ജനകോടികളുടെ ഹൃദയ സിംഹാനങ്ങളിലാണ് എന്റെ സ്ഥാനം. അവിടെ നിന്നെന്നെ കുടിയിറക്കാന്‍ ഒരു പ്രചാരണ കോലാഹലങ്ങള്‍ക്കും കഴിയില്ല’. അധികാരം വിട്ട്, പദവികള്‍ വിട്ട് ഒരു മന്ദമാരുതനായി ഇറങ്ങിയ അദ്ദേഹം ഒരു കൊടുങ്കാറ്റായി തിരിച്ചുവരുന്നതാണ് കേരളം കണ്ടത്.

ബി.ജെ.പി നേതാവ് മാരാര്‍ പോലും പറഞ്ഞു ‘ക്രിസ്ത്യന്‍ ഹിന്ദു മുസ്‌ലിം ഐക്യത്തിന്റെ പ്രതീകമാണ് സി.എച്ച്.എം കോയ ‘ശ്രീകൃഷ്ണ ജയന്തി അവധിയായി പ്രഖ്യാപിച്ച വിദ്യാഭ്യാസ മന്ത്രി, മോയിന്‍ കുട്ടി വൈദ്യര്‍ സ്മാരകം മാത്രമല്ല പൂന്താനം സ്മാരകവും സ്ഥാപിച്ച സാംസ്‌കാരിക വകുപ്പ് മന്ത്രി, സാഹിത്യ അക്കാദമിയിലേക്ക് മുസ്‌ലിംലീഗിന്റെ കടുത്ത വിമര്‍ശകനായ പള്ളിക്കര വി.പി മുഹമ്മദിനെ നോമിനേറ്റ് ചെയ്തപ്പോള്‍ പരാതിയുമായെത്തിയവരോട് സി.എച്ച് പറഞ്ഞത് ‘ഞാനേല്‍പ്പിച്ച പണിക്ക് വി.പി പറ്റും’ എന്നായിരുന്നു.

1957 ലെ പ്രഥമ നിയമസഭാതിരഞ്ഞെടുപ്പില്‍ മുസ്‌ലിംലീഗ് എട്ട് സീറ്റില്‍ വിജയിച്ചു. സി.എച്ച് മത്സരിച്ചത് താനൂരില്‍ നിന്നായിരുന്നു. കോണ്‍ഗ്രസ് സ്ഥാനാര്‍ഥി ടി അസ്സനാര്‍ കുട്ടിയെ ദയനീയമായി പരാജയപ്പെടുത്തിയാണ് സി.എച്ച് തിരഞ്ഞെടുക്കപ്പെട്ടത്. ചാക്കീരി അഹമ്മദ്കുട്ടി, അഹമ്മദ് കുരിക്കള്‍, അവുക്കാദര്‍കുട്ടി നഹ, കെ ഹസ്സന്‍ ഗനി, ബാവ ഹാജി, എം ചടയന്‍, കെ.വി മുഹമ്മദ് എന്നിവരായിരുന്നു മറ്റ് എം.എല്‍.എമാര്‍. സി.എച്ച് പാര്‍ലമെന്ററി പാര്‍ട്ടി നേതാവായി. പ്രഥമ ഇ.എം. എസ് സര്‍ക്കാറിനെതിരെ 1959ല്‍ വിമോചനസമരം നടന്നു. ജൂലൈ 31ന് സര്‍ക്കാര്‍ പിരിച്ച്‌വിട്ട് രാഷ്ട്രപതി ഭരണം ഏറ്റെടുത്തി. 1960ല്‍ വീണ്ടും നിയമസഭാതിരഞ്ഞെടുപ്പ്. കോണ്‍ഗ്രസ് മുസ്‌ലിംലീഗ് പി.എസ്.പി ഐക്യമുന്നണി വന്‍ ഭൂരിപക്ഷം നേടി. മുസ്‌ലിം ലീഗ് 11 സീറ്റില്‍ വിജയിച്ചു.

കഴിഞ്ഞ തിരഞ്ഞെടുപ്പില്‍ പാര്‍ലിമെന്റിലേക്ക് മത്സരിച്ചിരുന്ന സീതി സാഹിബ് നിയമസഭയിലെത്തി, കുറ്റിപ്പുറത്ത് നിന്ന്. സി.എച്ച് മൃഗീയ ഭൂരിപക്ഷത്തോടെ താനൂരില്‍ നിന്ന്തന്നെ തിരഞ്ഞെടുക്കപ്പെട്ടു. സി.എച്ചിന്റെ മൂന്നിലൊന്ന് വോട്ട് പോലും തൊട്ടടുന്ന എതിരാളിയായ കമ്യൂണിസ്റ്റ് പാര്‍ട്ടിയിലെ നടുക്കണ്ടി മുഹമ്മദ് കോയക്ക് കിട്ടിയില്ല. സീതിസാഹിബ് സ്പീക്കറായി, അദ്ദേഹത്തിന്റെ മരണത്തെതുടര്‍ന്ന് സി.എച്ച് സ്പീക്കറായി. 1961 നവംബര്‍ 10 ന് സി. എച്ച് രാജിവെച്ചു (ഈ കാലഘട്ടത്തിലെ രാഷ്ട്രീയ ചരിത്രം പ്രസക്തമല്ലാത്തതിനാല്‍ വിശദീകരിക്കുന്നില്ല). 1962 ലെ പാര്‍ലിമെന്റ് തിരഞ്ഞെടുപ്പില്‍ സി.എച്ച് കോഴിക്കോട്ട്‌നിന്ന് മത്സരിച്ചു. പി.എസ്.പി പിന്തുണയോടെ കഴിഞ്ഞതവണ മത്സരിച്ച സീതി സാഹിബിനെ വിജയിപ്പിക്കാന്‍ കഴിയാത്ത മുസ്‌ലിംലീഗ് തനിച്ച് മത്സരിച്ച് സി.എച്ചിനെ വിജയിപ്പിച്ചു. സിറ്റിംഗ് എം. പി കോണ്‍ഗ്രസിലെ കെ.പി കുട്ടികൃഷ്ണന്‍ നായര്‍, കമ്യൂണിസ്റ്റ് പാര്‍ട്ടിയിലെ എച്ച് മഞ്ചുനാഥ റാവു, ജനസംഘത്തിലെ ടി. എന്‍ ഭരതന്‍ എന്നിവരാണ് തോറ്റത്. ഈ തിരഞ്ഞെടുപ്പ് പ്രഖ്യാപിച്ചപ്പോള്‍ കഴിഞ്ഞ തിരഞ്ഞെടുപ്പില്‍ തലശ്ശേരിയില്‍ തോറ്റ എസ്.കെ പൊറ്റക്കാട്ട് വടകരയിലേക്ക് മാറി, മുസ്‌ലിംലീഗ് പിന്തുണ തേടി സി.എച്ചിനേയും ബാഫഖി തങ്ങളേയും എസ്. കെ കണ്ടു. വടകരയില്‍ പിന്തുണ തരാനാവില്ല, തലശേരിയില്‍ തന്നെ വീണ്ടും മത്സരിച്ചാല്‍ ജയിപ്പിച്ച് തരാമെന്നാണ് മുസ് ലിംലീഗ് നേതാക്കള്‍ അറിയിച്ചത്. എസ്. കെ പ്രയാസത്തിലായി.

ഒടുവില്‍ അദ്ദേഹത്തിന്റെ സമ്മര്‍ദ്ദത്തിന് വഴങ്ങി കമ്യൂണിസ്റ്റ് പാര്‍ട്ടി എസ്.കെയെ തലശ്ശേരിയില്‍ തന്നെ നിര്‍ത്തി. ഏറ്റവും വലിയ ഭൂരിപക്ഷത്തിന് എസ്.കെ വിജയിച്ചു. എസ്.കെ ഞെട്ടിപ്പോയി. സി.എച്ചിനെ കണ്ട് നന്ദി പറയാന്‍ വന്നു. സി.എച്ച് പറഞ്ഞു: ‘നന്ദി വാക്കുകളില്‍ പോര’. ‘എന്ത് വേണമെങ്കിലും ആവാം’ എന്ന് എസ്.കെ. സി.എച്ച് പറഞ്ഞു: ‘ഡല്‍ഹിയുടെ പശ്ചാത്തലത്തില്‍ ഒരു നോവല്‍ വേണം, ചന്ദ്രികക്ക്’. എസ്. കെ ഏറ്റു. വാക്ക് പാലിച്ച എസ്.കെ പിന്നീട് എഴുതിയ ആദ്യ നോവല്‍ നോര്‍ത്ത് അവന്യൂ ചന്ദ്രികക്ക് നല്‍കി.

ഒരു സാദാ പ്രസംഗകന്‍ ഏറ്റ യോഗത്തില്‍ അയാള്‍ എത്തിയില്ലെന്നറിഞ്ഞ സി.എച്ച് ഒഴിവ് കിട്ടിയപ്പോള്‍ ആ യോഗത്തില്‍ പോയി പ്രസംഗിച്ചത് ആരെയും ഞെട്ടിക്കാനായിരുന്നില്ല, നരിക്കുനിക്കടുത്ത് മണ്ണാര്‍കണ്ടി അബൂബക്കര്‍ എന്ന ഒരു പാവം മുസ്‌ലിംലീഗ് പ്രവര്‍ത്തകനെ കണ്ട് സ്റ്റേറ്റ് കാറ് നിര്‍ത്തി കുശലം പറഞ്ഞ ആഭ്യന്തരമന്ത്രിയെ എനിക്കറിയാം, വയനാട്ടിലെ സി.എച്ച് മൊയ്തു എന്ന മുസ് ലിംലീഗ് പ്രവര്‍ത്തകന്‍ മെഡിക്കല്‍ കോളജ് ആസ്പത്രിയില്‍ മരിച്ചെന്നറിഞ്ഞ് കാറിനും ഓട്ടോക്കും കാത്തുനില്‍ക്കാതെ ചന്ദ്രികയില്‍നിന്ന് പുറത്തിറങ്ങി സിറ്റി ബസ്സിന് കൈ കാണിച്ച് കയറിപ്പോയ ചീഫ് എഡിറ്ററും സി.എച്ചായിരുന്നു.

അരീക്കോട്ടെ അബ്ദുസലാം മൗലവിയുടെ പ്രസംഗം എഴുതി ചന്ദ്രികയിലെത്തിച്ചത് വിദ്യാഭ്യാസ മന്ത്രിയായിരുന്നു, ചെറിയ ചായക്കടക്ക് മുമ്പില്‍ മന്ത്രിയുടെ കാര്‍ നിര്‍ത്തി മകളുടെ കല്യാണത്തിന് കനകക്കുന്ന് കൊട്ടാരത്തിലേക്ക് കടക്കാരനെ ക്ഷണിച്ച സി.എച്ചിന്റെ ചിത്രം ചുമരില്ല ഹൃദയത്തിലാണയാല്‍ ചില്ലിട്ട് സൂക്ഷിച്ചത്. മഞ്ചേരിയിലെ ഒരു പഴയകാല മുസ്‌ലിംലീഗ് പ്രവര്‍ത്തകനെക്കുറിച്ച് പരാതിയുമായി എത്തിയവരോട് എല്ലാ പ്രമാണിമാരും മു സ്‌ലിംലീഗ് വിട്ടപ്പോള്‍ മുസ്‌ലിംലീഗ് സംഘടിപ്പിക്കാന്‍ ഇറങ്ങിപ്പുറപ്പെട്ട ആ പ്രവര്‍ത്തകന്റെ ആത്മാര്‍ഥതയെക്കുറിച്ചും അയാള്‍ക്ക് പ്രചോദനമായ മാനു കുരിക്കളെക്കുറിച്ചുമാണ് സി.എച്ചിന് പറയാനുണ്ടായിരുന്നത്.

ചരിത്രത്തില്‍ മായാത്ത മുദ്ര പതിപ്പിച്ച വര്‍ ഒട്ടേറെയുണ്ട്. എന്നാല്‍ ചരിത്രം തന്നെ സൃഷ്ടിച്ചവര്‍ അത്യപൂര്‍വമാണ്. ഒരു കാലഘട്ടത്തിന്റെ വര്‍ണാഭമായ ചിത്രം സ്വന്തം ജീവ ചരിത്രമാക്കി മാറ്റാന്‍ കഴിഞ്ഞ സി.എച്ചിനെ പഠിക്കാനും പകര്‍ത്താനും പുതിയ തലമുറ തയാറാകണം.

Continue Reading
Advertisement
Click to comment

Leave a Reply

Your email address will not be published. Required fields are marked *

Article

ഇഷ്ടദാനവും കോടതിവിധിയും പരിഹാരവും

സി.എച്ച് മുഖ്യമന്ത്രിയായി അധികാരമേറ്റ ശേഷം കേവലം ആറ് ദിവസങ്ങള്‍ മാത്രമാണ് സഭ ചേര്‍ന്നത്. ഈ ദിവസങ്ങള്‍ക്കുള്ളില്‍ അദ്ദേഹം സുപ്രധാനമായ പല ബില്ലുകളും അവതരിപ്പിച്ച് പാസാക്കിയെടുത്തു. അതിലേറ്റവും സുപ്രധാനമായത് ഇഷ്ടദാനബില്‍ തന്നെയായിരുന്നു.

Published

on

സുഫ്‌യാന്‍ അബ്ദുസ്സലാം

കോടതിവിധി വന്നതോടെ കേരളത്തിലെ കുടുംബങ്ങളില്‍, വിശേഷിച്ചും മുസ്‌ലിം, ക്രിസ്ത്യന്‍ കുടുംബങ്ങളില്‍ അങ്കലാപ്പും അനിശ്ചിതത്വവും പ്രകടമായി. ഭൂപരിഷ്‌കരണ നിയമമനുസരിച്ച് മാതാവും പിതാവും മൂന്ന് മൈനര്‍ (18 വയസ്സിന് താഴെയുള്ള) കുട്ടികളും അടങ്ങുന്ന കുടുംബത്തിന് പരമാവധി കൈവശം വെക്കാവുന്ന ഭൂമി 20 സ്റ്റാന്‍ഡേര്‍ഡ് ഏക്കറായിരുന്നു. ബാക്കി വരുന്ന ഭൂമി സര്‍ക്കാരിന് നല്‍കണം. അതോടെ 18 വയസ്സ് പൂര്‍ത്തിയായ ഒരാള്‍ക്ക് കുടുംബ സ്വത്തില്‍ അവകാശം നഷ്ടപ്പെട്ടു. ഓരോ ഉള്‍ക്കുടുംബങ്ങള്‍ക്കും പ്രത്യേകം ഭൂപരിധി നിശ്ചയിക്കുന്ന രീതിയാണ് അവിഭക്ത ഹൈന്ദവ കുടുംബങ്ങളില്‍ ഉണ്ടായിരുന്നത് എന്നതിനാല്‍ ഇത് ഹൈന്ദവ കുടുംബങ്ങളെ സാരമായി ബാധിച്ചിരുന്നില്ല. എന്നാല്‍ പ്രത്യേക പിന്തുടര്‍ച്ചാനിയമങ്ങള്‍ പിന്തുടരുന്ന മുസ്‌ലിം-ക്രിസ്ത്യന്‍ കുടുംബങ്ങളെ ഇത് പ്രതികൂലമായി ബാധിച്ചു. മുസ്‌ലിം വ്യക്തി നിയമമനുസരിച്ച് പിതാവ് ജീവിച്ചിരിക്കുമ്പോള്‍ മക്കള്‍ക്ക് അവകാശം ലഭിക്കില്ല എന്ന അവസ്ഥ പരിഗണിച്ച് മുസ്‌ലിം കുടുംബനാഥന്മാര്‍ നല്‍കിയ ഇഷ്ടദാനം 1974 ലെ ഹൈക്കോടതി വിധിയിലൂടെ അസാധുവായി.

അവിഭക്ത ഹിന്ദു കുടുംബങ്ങള്‍ക്ക് ലഭിക്കുന്ന ആനുകൂല്യം മുസ്‌ലിം, ക്രിസ്ത്യന്‍ കുടുംബങ്ങള്‍ക്ക്കൂടി ലഭ്യമാകുന്ന ഭേദഗതി അതോടെ അനിവാര്യമായി. തദനുസൃതമായ ഇഷ്ടദാന ബില്‍ കൊണ്ടുവരാന്‍ ഐക്യമുന്നണി സര്‍ക്കാര്‍ തീരുമാനമെടുത്തു. തീരുമാനമെടുത്തത് മുഖ്യമന്ത്രി പി.കെ വാസുദേവന്‍ നായരും റവന്യു മന്ത്രി ബേബി ജോണിന്റെയും നേതൃത്വത്തിലായിരുന്നു.

പി.കെ.വി സര്‍ക്കാര്‍ ഇഷ്ടദാനബില്‍ കൊണ്ടുവരുന്നതിന്റെ മുന്നോടിയായി 1970 മുതല്‍ 1974 വരെയുള്ള ഇഷ്ടദാനങ്ങള്‍ക്ക് നിയമ പ്രാബല്യം നല്‍കിക്കൊണ്ട് ഗവര്‍ണര്‍ ജ്യോതി വെങ്കിടാചലം ഓര്‍ഡിനന്‍സ് പുറപ്പെടുവിച്ചു. ഗവര്‍ണറുടെ ഓര്‍ഡിനന്‍സ് പ്രകാരമുള്ള ബില്ലുകള്‍ നിയമസഭയില്‍ കൊണ്ടുവരാന്‍ മുന്നില്‍ നില്‍ക്കേണ്ട മുഖ്യമന്ത്രി പി.കെ.വിക്ക് അപ്പോഴാണ് ചാഞ്ചാട്ടമുണ്ടാകുന്നത്. അക്കാലമത്രയും നിയമസഭയില്‍ ഇഷ്ടദാനത്തിന് വേണ്ടി ഘോരഘോരം പ്രസംഗിച്ച പി.കെ.വി പെടുന്നനെ ഇഷ്ടദാന ബില്‍ ‘ശരിയല്ല’ എന്ന വാദമുന്നയിച്ച് ഐക്യമുന്നണിയില്‍ നിന്ന് ഇറങ്ങിപ്പോയി. 1979 ഒക്ടോബര്‍ 8 നു ഇഷ്ടദാനബില്‍ നിയമസഭയില്‍ അവതരിപ്പിച്ച് പാസാക്കാന്‍ തീരുമാനമായതായിരുന്നു. എന്നാല്‍ അതേദിവസം തന്നെ മുഖ്യമന്ത്രിപദം രാജിവെക്കാന്‍ പി.കെ.വി തിരഞ്ഞെടുത്തു. കമ്യൂണിസ്റ്റുകാരിലെ ന്യൂനപക്ഷ വിരുദ്ധമായ ‘വരേണ്യവീര്യം’ പ്രകടമായ സംഭവമായിരുന്നു അത്. ഐക്യമുന്നണിയുടെ നേതൃത്വത്തില്‍ കൊണ്ടുവന്ന ഇഷ്ടദാന ബില്ലിനെതിരെ നിലപാട് സ്വീകരിക്കുന്നത് നയ വഞ്ചനയാണെന്ന് കോണ്‍ഗ്രസ് നേതാക്കള്‍ പറഞ്ഞു. ന്യൂനപക്ഷ സമുദായങ്ങള്‍ പ്രതീക്ഷയോടെ കാത്തിരിക്കുന്ന ഇഷ്ടദാന ബില്ലിന്റെ കാര്യത്തില്‍ വിട്ടുവീഴ്ചക്കില്ലെന്ന് മുസ്‌ലിംലീഗും പ്രഖ്യാപിച്ചു.

പി.കെ.വി രാജിവെച്ചതോടെ ഐക്യമുന്നണി സര്‍ക്കാര്‍ തകരുമെന്നാണ് കമ്യൂണിസ്റ്റുകാര്‍ സ്വപ്‌നം കണ്ടത്. അതുവഴി ഇഷ്ടദാനത്തെ ഇല്ലാതാക്കാനും കമ്യൂണിസ്റ്റ് ഐക്യം സാക്ഷാത്കരിക്കാനും കഴിയുമെന്നവര്‍ കരുതി. ന്യൂനപക്ഷങ്ങള്‍ കോണ്‍ഗ്രസിന്റെ പിന്തുണയോടെ കൈകോര്‍ത്തുപിടിച്ചു. സര്‍ക്കാരിനെ തള്ളിയിട്ട് ഇഷ്ടദാനത്തെ ഇല്ലാതാക്കാമെന്ന് മനക്കോട്ട കെട്ടിയവര്‍ക്ക് വലിയ തിരിച്ചടിയുണ്ടായി. ഇഷ്ടദാന നിയമത്തിന്റെ അഭാവം ഏറെ കഷ്ടപ്പെടുത്തിയിരുന്ന ക്രിസ്ത്യന്‍ സമൂഹവും അതിനനുകൂലമായ സാഹചര്യം സൃഷ്ടിക്കാന്‍ യത്‌നിച്ചു. പ്രതിഭാധനനും സര്‍വസ്വീകാര്യനും തന്ത്രശാലിയുമായ സി.എച്ച് മുഖ്യമന്ത്രി സ്ഥാനത്ത് വരിക മാത്രമാണ് പരിഹാരമെന്ന് അവരും തിരിച്ചറിഞ്ഞു. സി.എച്ചിനെ മുഖ്യമന്ത്രിയാക്കാന്‍ പാലാ ബിഷപ്പ് ഡോ. സെബാസ്റ്റ്യന്‍ വയലില്‍ തിരുവനന്തപുരം ആര്‍ച്ച് ബിഷപ്പ് ഡോ. ജോര്‍ജ് മാത്യൂവിന് കത്ത് കൈമാറി. അതോടെ കേരള കോണ്‍ഗ്രസ് നേതാക്കള്‍ പിന്തുണ പ്രഖ്യാപിച്ചു. കോണ്‍ഗ്രസ് (ഐ), കോണ്‍ഗ്രസ് (യു), എന്‍.ഡി. പി, പി.എസ്.പി, ജനതാപാര്‍ട്ടി എന്നീ രാഷ്ട്രീയകക്ഷികളും പിന്തുണ പ്രഖ്യാപിച്ചു. അതോടെ സി.എച്ച് മുഹമ്മദ്‌കോയയെ മുഖ്യമന്ത്രിയായി ഐക്യമുന്നണി പ്രഖ്യാപിച്ചു. സി.എച്ച് മന്ത്രിസഭ വരാതിരിക്കാന്‍ കമ്യൂണിസ്റ്റുകാര്‍ പല അടവുകളും പയറ്റിനോക്കി. പക്ഷേ സംഭവിക്കേണ്ടത് സംഭവിച്ചു. 1979 ഒക്ടോബര്‍ 12 വെള്ളിയാഴ്ച ജുമുഅ നമസ്‌കാരാനന്തരം സി.എച്ച് മുഖ്യമന്ത്രിയായി സത്യപ്രതിജ്ഞ ചെയ്തു.

1979 ഒക്ടോബര്‍ 22 ന് നിയമസഭ ചേര്‍ന്നു. 24ാം തീയതി തന്നെ ഇഷ്ടദാനവുമായി ബന്ധപ്പെട്ട ഭൂ പരിഷ്‌കരണ നിയമ ഭേദഗതി സി.എച്ച് അവതരിപ്പിച്ചു. പി.കെ.വിയും ഇ.എം.എസും നേതൃത്വം നല്‍കുന്ന പ്രതിപക്ഷം അതിനെതിരെ ശക്തമായ വാദങ്ങളുയര്‍ത്തി. ഭേദഗതി കര്‍ഷക വിരുദ്ധമാണെന്നും 1969 ല്‍ കെ.ആര്‍ ഗൗരിയമ്മ കൊണ്ടുവന്ന ബില്‍ അതേപടി നിലനിര്‍ത്തണമെന്നും ഇ.എം.എസ് പറഞ്ഞപ്പോള്‍ ആ ബില്ലില്‍ ‘സ്‌നേഹ വാത്സല്യങ്ങളുടെ’ പേരില്‍ ഇഷ്ടദാനം ചെയ്യാമെന്ന വ്യവസ്ഥയുണ്ടെന്ന കാര്യം എ.കെ ആന്റണി ഓര്‍മ്മിപ്പിച്ചു. ഗൗരിയമ്മയുടെ ബില്‍ അങ്ങനെ തന്നെ നിലനിര്‍ത്തുകയാണോ വേണ്ടതെന്ന ആന്റണിയുടെ ചോദ്യത്തിന് ‘അതെ’ എന്നായിരുന്നു ഇ.എം.എസിന്റെ മറുപടി. വാത്സല്യത്തിന്റെ പേരില്‍ ഇഷ്ടദാനം നല്‍കാമെന്ന് വ്യവസ്ഥ ചെയ്യുന്ന ബില്ലിനെ പിന്തുണക്കുന്ന ഇ.എം.എസ് ആണോ അതോ അത് റദ്ദ് ചെയ്ത കോടതിയാണോ കര്‍ഷകരുടെ ബന്ധു എന്ന് സി.എച്ച് പരിഹസിച്ചു. കര്‍ഷക വാത്സല്യത്തിന്റെ പേരിലല്ല സ്‌നേഹവാത്സല്യം എന്ന് കമ്യൂണിസ്റ്റുകാര്‍ ബില്ലില്‍ ചേര്‍ത്തത് എന്ന് അദ്ദേഹം ഇ.എം.എസിനെ ഓര്‍മിപ്പിച്ചു. സ്‌നേഹവാത്സല്യത്തിന്റെ പേരില്‍ ആര്‍ക്കും വാരിക്കോരി കൊടുക്കാമായിരുന്ന മാര്‍ക്‌സിസ്റ്റുകള്‍ പാസാക്കിയ ഇഷ്ടദാനത്തെ 1972 ല്‍ അച്യുതമേനോന്റെ നേതൃത്വത്തിലുള്ള ഐക്യമുന്നണി സര്‍ക്കാര്‍ മക്കള്‍ക്കും പേരമക്കള്‍ക്കും മാത്രമാക്കി ചുരുക്കുകയാണ് ചെയ്തത് എന്നും അതാണ് ഇപ്പോള്‍ ഹൈക്കോടതി റദ്ദ് ചെയ്തത് എന്നും അതിനുള്ള പരിഹാരമാണ് പുതിയ ബില്‍ എന്നും സി.എച്ച് സഭയെ ബോധ്യപ്പെടുത്തി.

1957 ലെയും 1960 ലെയും കാര്‍ഷിക പരിഷ്‌കാര ബില്ലിലും 1964 ലെയും 1969 ലെയും ഭൂ പരിഷ്‌കരണ ബില്ലിലും ഇഷ്ടദാനം ഉള്‍പ്പെട്ടിട്ടുണ്ട് എന്ന് അദ്ദേഹം സഭയില്‍ തെളിവുകള്‍ നിരത്തി സംസാരിച്ചു. മാത്രവുമല്ല, ന്യൂനപക്ഷങ്ങള്‍ക്കുണ്ടായ ആശങ്ക അകറ്റണമെന്നത് ഞങ്ങളുടെ മാത്രം ആവശ്യമല്ലെന്നും 1972 ജൂലൈ 23 നു രാജ്യത്തെ മുഖ്യമന്ത്രിമാരുടെ സമ്മേളനത്തില്‍ ‘വ്യത്യസ്ത വ്യക്തിനിയമങ്ങള്‍ ബാധകമായിട്ടുള്ള പ്രായപൂര്‍ത്തിയായ സന്താനങ്ങള്‍ക്ക് ഇതുമൂലം വിവേചനം ഉണ്ടാവുകയില്ലെന്ന് ഉറപ്പുവരുത്തേണ്ടതാണ്’ എന്ന് മാര്‍ഗനിര്‍ദേശം നല്‍കിയിട്ടുണ്ടെന്നും രേഖകള്‍ ഉദ്ധരിച്ച് അദ്ദേഹം സമര്‍ത്ഥിച്ചു.

സി.എച്ച് മുഖ്യമന്ത്രിയായി അധികാരമേറ്റ ശേഷം കേവലം ആറ് ദിവസങ്ങള്‍ മാത്രമാണ് സഭ ചേര്‍ന്നത്. ഈ ദിവസങ്ങള്‍ക്കുള്ളില്‍ അദ്ദേഹം സുപ്രധാനമായ പല ബില്ലുകളും അവതരിപ്പിച്ച് പാസാക്കിയെടുത്തു. അതിലേറ്റവും സുപ്രധാനമായത് ഇഷ്ടദാനബില്‍ തന്നെയായിരുന്നു. മൂന്നുദിവസത്തെ ചൂടേറിയ ചര്‍ച്ചകള്‍ക്കൊടുവില്‍ ഇ.എം.എസും പി.കെ.വിയും ടി.കെ രാമകൃഷ്ണനുമെല്ലാം ഉയര്‍ത്തിയ മറുവാദങ്ങള്‍ക്ക് വളരെ കൃത്യമായി അദ്ദേഹം മറുപടി പറഞ്ഞു. കേരള മുനിസിപ്പാലിറ്റി ഭേദഗതി ബില്‍, കേരള പഞ്ചായത്ത് ഭേദഗതി ബില്‍, കേരള അഭിഭാഷക ക്ഷേമനിധി ബില്‍, കേരള കശുവണ്ടി തൊഴിലാളി ആശ്വാസ ക്ഷേമനിധി ബില്‍ എന്നിവ ആറ് ദിവസങ്ങള്‍ക്കുള്ളില്‍ സി.എച്ച് അവതരിപ്പിച്ച് പാസാക്കിയെടുത്ത ബില്ലുകളാണ്.

ഇഷ്ടദാന ബില്‍ പാസായതിന് ശേഷം പ്രത്യേകിച്ചൊരു കാരണവും ഇല്ലാതെ കേരള കോണ്‍ഗ്രസ് (എം) പിന്തുണ പിന്‍വലിച്ചു. ശേഷം കോണ്‍ഗ്രസ് (യു) കൂടി പിന്തുണ പിന്‍വലിച്ചതോടെ സി.എച്ച് മുഖ്യമന്ത്രി പദം രാജിവെച്ചു. കേരള രാഷ്ട്രീയ ചരിത്രത്തിലെ സുപ്രധാന നാളുകളായിരുന്നു സി.എച്ചിന്റെ ഭരണകാലം.
(അവസാനിച്ചു)

Continue Reading

Article

ഇരട്ടക്കൊലയും സിപിഎമ്മിന്റെ ഇരട്ടത്താപ്പും

പാര്‍ട്ടി അംഗത്വമുള്ള സ്വന്തം സഖാക്കളെ അരുംകൊല ചെയ്ത പാറയില്‍ ബാബുവിനെ തള്ളിപ്പറയാന്‍ തയ്യാറാവാത്തത് സി.പി.എം ആ രണ്ട് വ്യക്തികളുടെ കുടുംബത്തോട് ചെയ്യുന്ന കൊടും ചതിയാണ്.

Published

on

അഡ്വ. കെ.എ ലത്തീഫ്

കേരള സര്‍ക്കാരിന്റെ നേതൃത്വത്തില്‍ ലഹരി വിരുദ്ധ കാമ്പയിന്റെ ഭാഗമായി ലോകകപ്പിന്റെ ചുവടൊപ്പിച്ച് ലഹരിക്കെതിരെ മില്യന്‍ ഗോള്‍ അടി തുടരുന്നതിനിടയിലാണ് തലശ്ശേരി കൊടുവള്ളിയില്‍ രണ്ട് സി.പി.എം പ്രവര്‍ത്തകര്‍ മൃഗീയമായി കുത്തേറ്റ് മരിക്കുന്നത്. കൊല്ലപ്പെട്ടവരില്‍ ഷമീര്‍ എന്നയാള്‍ സി.പി.എം പാര്‍ട്ടി മെമ്പറും ഭാര്യാസഹോദരന്‍ ഖാലിദ് പാര്‍ട്ടി അനുഭാവിയുമാണ്. ഇക്കഴിഞ്ഞ 23 ന് തലശ്ശേരി സഹകരണ ആശുപത്രിക്ക് മുമ്പില്‍ നടന്ന കൊലപാതക വാര്‍ത്ത റിപ്പോര്‍ട്ട് ചെയ്ത സി.പി.എം ചാനലായ കൈരളി എഴുതിയും വായിച്ചും കണ്ണൂര്‍ പ്രതിനിധിയെകൊണ്ട് സംഭവ സ്ഥലത്തുനിന്നും പറയിപ്പിച്ചും ജനം കേട്ടത് കൊല നടത്തിയത് ലഹരി മാഫിയ സംഘത്തില്‍പെട്ടവരാണ് എന്നാണ്. (എന്നാല്‍ വണ്ടി കച്ചവടത്തിന്റെ ഭാഗമായി കൊല്ലപ്പെട്ട ഷമീറിന്റെ മകന്‍ ബാബുവുമായി തര്‍ക്കം ഉണ്ടായിരുന്നു എന്നും പ്രശ്‌നം പറഞ്ഞുതീര്‍ക്കാന്‍ കൊളശ്ശേരി ലോക്കല്‍ സെക്രട്ടറിയുടെ നേതൃത്വത്തില്‍ നിരവധി തവണ മധ്യസ്ഥ ചര്‍ച്ച നടന്നിട്ടുണ്ടെന്നും ഈ പ്രദേശത്ത് പ്രചരിച്ച വാര്‍ത്തയാണ്.) തുടര്‍ന്ന് സി.പി.എം ഏരിയ കമ്മിറ്റി മുതല്‍ സംസ്ഥാന സെക്രട്ടറി വരെയും മുഖ്യമന്ത്രി പിണറായി വിജയനും പറഞ്ഞത് ഈ അരുംകൊല നടത്തിയത് ലഹരി മാഫിയ സംഘമാണ് എന്നാണ്. നാട്ടില്‍ പാതിരാത്രിയിലെ അന്ത്യയാമങ്ങളില്‍ സാക്ഷി പോലും ഇല്ലാത്ത അക്രമങ്ങളിലെയും കൊലപാതകങ്ങളിലെയും പ്രതികളെ മഷിയിട്ട് നോക്കി ഗവേഷണം നടത്തി പേരും ഊരും തറവാട് പേരും ഉള്‍പ്പെടെ പ്രഖ്യാപിക്കുന്ന സി.പി. എം പാര്‍ട്ടിയോ ഇരട്ടചങ്കുള്ള മുഖ്യമന്ത്രിയോ ഈ ഇരട്ടകൊലപാതക കേസിലെ മുഖ്യ പ്രതിയെക്കുറിച്ച് ഇതുവരെ അറിഞ്ഞിട്ടുപോലും ഇല്ല എന്ന മട്ടിലാണ്.

കേസിലെ ഒന്നാം പ്രതി പാറായി ബാബു തലശ്ശേരി കൊടുവള്ളി പ്രദേശത്തെ കിരീടം വെക്കാത്ത രാജാവാണ്. നേരത്തെ സജീവ ബി.ജെ.പി പ്രവര്‍ത്തകനായിരുന്ന പാറായി ബാബുവിനെ ബി.ജെ.പി പുറത്താക്കിയപ്പോള്‍ ഇരുകൈയ്യും നീട്ടി സ്വീകരിച്ചത് പിണറായി വിജയന്റെ ശിഷ്യന്‍മാരാണ്. അന്ന്മുതല്‍ ഇന്നുവരെ ബാബു സജീവ പാര്‍ട്ടി പ്രവര്‍ത്തകനാണ്. പാര്‍ട്ടി അംഗത്വമുള്ള ആളാണ് എന്നു പാര്‍ട്ടിയിലെ ഒരു വിഭാഗം തന്നെ പറയുന്നുണ്ട്. ഗുണ്ടാപ്പിരിവ് ഈ പ്രദേശത്ത് ബാബു ജീവിതത്തിന്റെ ഭാഗമാക്കിയപ്പോള്‍ സഹികെട്ട പല കച്ചവടക്കാരും വിഷയം പാര്‍ട്ടി നേതൃത്വത്തിന്റെ ശ്രദ്ധയില്‍പെടുത്തിയിട്ടും ചെറുവിരല്‍ പോലും ബാബുവിനെതിരെ ചൂണ്ടാന്‍ സി.പി.എം നേതൃത്വത്തിന് സാധിച്ചിട്ടില്ല. എന്നാല്‍ ബാബു പാര്‍ട്ടിക്ക് കൂടുതല്‍ സ്വീകാര്യനാവുകയായിരുന്നു.

പാര്‍ട്ടി ഏല്‍പ്പിക്കുന്ന ഏതു ദൗത്യവും കൃത്യമായി നിര്‍വഹിക്കുന്ന സഖാവ്. ഏതാനും വര്‍ഷങ്ങള്‍ക്കുമുമ്പ് കൊടുവള്ളിയിലെ ചായ കടയില്‍ വെച്ചാണ് പാറായി ബാബു ബാറ്റ ബാബു എന്ന ബി.ജെ.പിക്കാരനെ വെട്ടികൊലപ്പെടുത്താന്‍ ശ്രമിച്ചത്. കൈ അറ്റുതൂങ്ങിയ ബാറ്റബാബു രക്ഷപ്പെട്ടെങ്കിലും കൈക്കകത്ത് സ്റ്റീല്‍ ഘടിപ്പിച്ചു വീണ്ടും ജോലിക്ക് പോകവെ ആണ് വെല്‍ഡിങ് പ്രവൃത്തിക്കിടെ ഷോക്കേറ്റ് മരിക്കുന്നത്. പാറായി ബാബുവിനെതിരെ ധര്‍മ്മടം പൊലീസ് രജിസ്റ്റര്‍ ചെയ്ത വധശ്രമക്കേസ് നടത്തിയതും സി.പി.എം പാര്‍ട്ടിയായിരുന്നു. ഹാജരായത് സി.പി.എം അഭിഭാഷകനും. പാര്‍ട്ടി സമരപരിപാടികള്‍ എവിടെ ആയിരുന്നാലും അവിടങ്ങളിലൊക്കെ കുതിച്ചെത്തുന്ന കമ്യൂണിസ്റ്റാണ് ബാബു.

കേരള മുഖ്യമന്ത്രിയായിരുന്ന ഉമ്മന്‍ചാണ്ടിയെ കല്ലെറിയാല്‍ 20 കി.മീ. താണ്ടിയാണ് ബാബു കണ്ണൂര്‍ കലക്ടറേറ്റ് പരിസരത്ത് എത്തിയത്. ഉമ്മന്‍ചാണ്ടിയെ വധിക്കാന്‍ ശ്രമിച്ച കേസില്‍ പാറായി ബാബു പ്രതിയാണ്. ആ കേസിന്റെ വിചാരണ ഇപ്പോഴും കണ്ണൂര്‍ കോടതിയില്‍ നടന്നുകൊണ്ടിരിക്കുന്നു. കൂട്ടുപ്രതികള്‍ രണ്ട് മുന്‍ എം.എല്‍.എമാര്‍, ജില്ലാ സ്‌പോര്‍ട്‌സ് കൗണ്‍സില്‍ സെക്രട്ടറി, സി.പി.എം തദ്ദേശ സ്വയംഭരണ സ്ഥാപനങ്ങളിലെ ജനപ്രതിനിധി പദം അലങ്കരിച്ചവര്‍ ഉള്‍പ്പെടെ. ഇവരോടൊപ്പമാണ് പാറയില്‍ ബാബു പ്രതിപട്ടികയിലുള്ളത്. ഏതാനും ആഴ്ചകള്‍ക്ക് മുമ്പ് ഡി.വൈ.എഫ്.ഐയുടെ നേതൃത്വത്തില്‍ കൊളശ്ശേരി പ്രദേശത്ത് ലഹരിക്കെതിരെ മനുഷ്യശൃംഖല എന്ന പരിപാടി നടക്കുകയുണ്ടായി. മനുഷ്യശൃംഖലയില്‍ ഇടതും വലതുമുള്ള സഖാക്കളുടെ കൈകളില്‍ മുറുക്കെ പിടിച്ച് നില്‍ക്കുന്ന താടിക്കാരന്‍ സഖാവുണ്ട്. അവിടെ വെച്ച് ലഹരിക്കെതിരായി ശക്തമായ വിപ്ലവം നടത്താന്‍ പ്രതിജ്ഞ എടുത്ത ആ താടിക്കാരന്റെ പേരാണ് പാറയി ബാബു എന്ന ഇരട്ടകൊല കേസിലെ ഒന്നാം പ്രതി.

ബാബുവിന്റെ പ്രദേശത്ത് എം. ശ്രീജിത്ത് അനുസ്മരണ സമ്മേളനം ഉദ്ഘാടനം ചെയ്തു സി.പി.എം ജില്ലാ സെക്രട്ടറി എം.വി ജയരാജന്‍ പ്രസംഗിക്കുമ്പോള്‍ സദസ്സില്‍ ഇരിക്കുന്നവര്‍ക്ക് പാറായി ബാബു പായസം വിതരണം നടത്തുന്ന വീഡിയോയും നിയമസഭ സ്പീക്കര്‍ എ.എന്‍ ഷംസീറിനെ ഇക്കഴിഞ്ഞ നിയമസഭ തിരഞ്ഞെടുപ്പില്‍ സ്ഥാനാര്‍ത്ഥി എന്ന നിലയില്‍ സ്വീകരിച്ച് ആനയിക്കുന്ന വീഡിയോയും നവമാധ്യമങ്ങളില്‍ വൈറലാണ്. എം.വി ജയരാജന്‍ പ്രസംഗിക്കുന്ന വേദിയില്‍ മുഖ്യമന്ത്രിയുടെ പ്രൈവറ്റ് സെക്രട്ടറിയെയും വീഡിയോയില്‍ കാണാം. എന്നാല്‍ കൊലപാതകം നടന്ന് ദിവസങ്ങള്‍ പിന്നിട്ടിട്ടും ഒരു വരി പ്രസ്താവനയില്‍ എങ്കിലും പ്രതിയെ തള്ളിപ്പറയാന്‍ സി.പി.എം പാര്‍ട്ടി തയ്യാറാവാത്തതാണ് ഏവരെയും അത്ഭുതപ്പെടുത്തുന്നത്. കൊല്ലപ്പെട്ടവരുടെ മയ്യത്തുകള്‍ ഖബറടക്കിയതിനുശേഷം പരിസരത്ത് നടന്ന അനുശോചന യോഗത്തില്‍ പാര്‍ട്ടി ജില്ലാ സെക്രട്ടറി എം.വി ജയരാജന്‍ ഉള്‍പ്പെടെയുള്ള നേതാക്കള്‍ മയക്കുമരുന്ന് മാഫിയക്ക് എതിരെ ശക്തമായി പ്രസംഗിച്ചെങ്കിലും പാറായി ബാബുവിന്റെ പേര് അബദ്ധത്തില്‍ പോലും ഉച്ചരിക്കാതിരിക്കാന്‍ ശ്രദ്ധിച്ചു എന്നതും ശ്രദ്ധേയമാണ്. ദൃശ്യമാധ്യമങ്ങളും പ്രിന്റ് മീഡിയാകളും മുഖ്യപ്രതിയുടെ രാഷ്ട്രീയ ബന്ധം തെളിവ് സഹിതം നിരത്തിയിട്ടും പ്രതി ബാബുവിനെ പാര്‍ട്ടിയില്‍നിന്ന് പുറത്താക്കാനോ തള്ളിപ്പറയാനോ തയ്യാറാവാത്തത് പാര്‍ട്ടി ബാബുവിനെ ഭയപ്പെടുന്നു എന്നത് കൊണ്ട് തന്നെയാണ്.

കൊലക്ക് ശേഷം എത്ര സുന്ദരമായാണ് ബാബുവും സംഘവും തലശ്ശേരി വിട്ടത്. പ്രതികള്‍ ആയുധവുമായി വന്ന ഓട്ടോറിക്ഷ പിണറായി വിജയന്റെ വീടിനടുത്തുനിന്ന് നോക്കിയാല്‍ കാണുന്ന ദൂരത്തില്‍ കിഴക്കുംഭാഗം എന്ന സ്ഥലത്താണ് ഒളിപ്പിച്ച്‌വെച്ചത്. പാര്‍ട്ടി ഗ്രാമമായ കിഴക്കും ഭാഗത്ത് ഇത്ര ധൈര്യത്തില്‍ വണ്ടി കൊണ്ട് വെക്കാനും ഏഴാം പ്രതി സന്ദീപിന്റെ പിണറായിയിലെ വീട്ടില്‍ സൂക്ഷിച്ച പിക്അപ്പ് വാനില്‍നിന്ന് പ്രതികള്‍ ധരിച്ച വസ്ത്രവും പരിസരത്തുനിന്ന് കത്തിയും കണ്ടെടുത്തു എന്നു പറയുമ്പോള്‍ പിണറായി പ്രദേശത്തെ പ്രാദേശിക നേതൃത്വവും കൊലയാളികള്‍ക്ക് ഒപ്പമായിരുന്നു എന്ന് പറഞ്ഞാല്‍ നിഷേധിക്കാന്‍ ആവുമോ?.

പാര്‍ട്ടി അംഗത്വമുള്ള സ്വന്തം സഖാക്കളെ അരുംകൊല ചെയ്ത പാറയില്‍ ബാബുവിനെ തള്ളിപ്പറയാന്‍ തയ്യാറാവാത്തത് സി.പി.എം ആ രണ്ട് വ്യക്തികളുടെ കുടുംബത്തോട് ചെയ്യുന്ന കൊടും ചതിയാണ്. മുഖ്യമന്ത്രിയുടെ ഭാഷയില്‍ പറഞ്ഞാല്‍ സര്‍ക്കാരും പാര്‍ട്ടിയും ഏറ്റെടുത്ത ലഹരി നിര്‍മാണ കാമ്പയിന്റെ ഭാഗമായി മരണപ്പെട്ടവര്‍ നടത്തിയ ഇടപെടലാണ് ലഹരി വിപണന മാഫിയയുടെ ഭാഗമായ ബാബു സ്വന്തം സഹപ്രവര്‍ത്തകരെ കുത്തിക്കൊലപ്പെടുത്താന്‍ കാരണമായത്. എന്നിട്ടും എന്തെ പാര്‍ട്ടിയും മുഖ്യമന്ത്രിയും കൊലപാതകിയെ കുറിച്ച് മൗനം പാലിക്കുന്നു. മാത്രവുമല്ല കൊല്ലപ്പെട്ടവരുടെ കുടുംബത്തെ സഹായിക്കാന്‍ ബക്കറ്റ് പിരിവ് നടത്തി രക്തസാക്ഷി കുടുംബത്തോട് കൂറുപുലര്‍ത്തുന്നതാണ് സി.പി.എം ശൈലി. എങ്കില്‍ കൊല്ലപ്പെട്ട ഷമീറിന്റെയും ഖാലിദിന്റെയും കുടുംബത്തെ സഹായിക്കാന്‍ പാര്‍ട്ടി നേരിട്ട് രംഗത്ത് ഇറങ്ങുന്നില്ല എന്ന വാര്‍ത്തയും സാധാരണ പാര്‍ട്ടി പ്രവര്‍ത്തകരെ പോലും ഞെട്ടിച്ചിരിക്കുകയാണ്.

കഴിഞ്ഞദിവസം തലശ്ശേരി നഗരസഭ ചെയര്‍മാന്‍ ലഹരിമുക്ത കാമ്പയില്‍ നടത്താന്‍ വിളിച്ചു ചേര്‍ത്ത സര്‍വകക്ഷി യോഗത്തില്‍ വെച്ച് മുനിസിപ്പല്‍ ചെയര്‍മാന്റെ നേതൃത്വത്തില്‍ എക്‌സൈസ് ഓഫീസറെ കണ്‍വീനര്‍ ആക്കി ഫണ്ട് ശേഖരണത്തിനായി കമ്മിറ്റി ഉണ്ടാക്കിയിരിക്കുകയാണ്. കണ്ടതിനൊക്കെ മണിക്കൂറുകള്‍കൊണ്ട് ലക്ഷങ്ങള്‍ പിരിക്കുന്ന പാര്‍ട്ടി കൊല്ലപ്പെട്ട സഖാക്കളുടെ കുടുംബത്തിന് സഹായഫണ്ട് പിരിക്കാന്‍ പോലും തയ്യാറല്ലത്രെ. സ്വന്തം സഖാക്കളെ അതിക്രൂരമായി കൊലചെയ്ത കൊലയാളികളോട് ഇതിലേറെ ഐക്യദാര്‍ഢ്യം സി.പി.എം പാര്‍ട്ടിക്ക് എങ്ങിനെ പ്രകടിപ്പിക്കാനാവും. ഇരട്ട ചങ്കന്റെ നാട്ടില്‍ നടന്ന ഇരട്ട കൊലപാതകത്തിലെ പ്രതികളോടൊപ്പം ചേര്‍ന്ന് നില്‍ക്കുന്ന പാര്‍ട്ടി ഇരട്ടത്താപ്പ് അരി ആഹാരം കഴിക്കുന്നവര്‍ തിരിച്ചറിയുക തന്നെ ചെയ്യും.

Continue Reading

Article

തോറ്റുകൊണ്ടിരിക്കുന്ന പിണറായി സര്‍ക്കാര്‍-എഡിറ്റോറിയല്‍

ആരോപണ പ്രത്യാരോപണങ്ങള്‍ കുട്ടികളെയാണു ബാധിക്കുന്നതെന്നും രാജ്യത്തിന്റെ മൂലക്കല്ലായ സാങ്കേതിക വിദ്യാഭ്യാസം കേരളത്തില്‍ ഈ സര്‍വകലാശാലയുടെ കീഴിലാണെന്നുമുള്ള കോടതിയുടെ ഓര്‍മപ്പെടുത്തലെങ്കിലും മുഖവിലക്കെടുക്കാനുള്ള കനിവ് പിണറായി സര്‍ക്കാറിനുണ്ടാവുമെന്ന് കരുതിയവര്‍ക്കും തെറ്റിയിരിക്കുകയാണ്

Published

on

സാങ്കേതിക സര്‍വകലാശാല വൈസ് ചാന്‍സിലറുടെ ചുമതല ഡോ. സിസ തോമസിനു നല്‍കിയ ഗവര്‍ണറുടെ നടപടിക്കെതിരെയുള്ള ഹര്‍ജി ഹൈക്കോടതി തള്ളിയതോടെ പിണറായി സര്‍ക്കാറിന് കോടതിയില്‍നിന്ന് വീണ്ടും തിരിച്ചടിയേറ്റിരിക്കുന്നു. സര്‍വകലാശാല വൈസ് ചാന്‍സിലര്‍ നിയമനങ്ങളുമായി ബന്ധപ്പെട്ട് ഗവര്‍ണറുമായി ഏറ്റുമുട്ടല്‍ നടന്നുകൊണ്ടിരിക്കെ തുടര്‍ച്ചയായ നാലാമത്തെ പരാജയമാണ് സര്‍ക്കാര്‍ കോടതിയില്‍ നിന്ന് ഏറ്റുവാങ്ങിയിരിക്കുന്നത്.

സാങ്കേതിക സര്‍വകലാശാലാ വൈസ് ചാന്‍സലറെ സുപ്രീംകോടതി പുറത്താക്കിയതും ഫിഷറീസ് സര്‍വകലാശാലാ വൈസ്ചാന്‍സലറെ ഹൈക്കോടതി പുറത്താക്കിയതും കണ്ണൂര്‍ സര്‍വകലാശാലാ അസോസിയേറ്റ് പ്രൊഫസര്‍ പ്രിയാ വര്‍ഗീസിന് യോഗ്യതയില്ലെന്ന ഹൈക്കോടതി വിധിയുമാണ് ഇതിനുമുമ്പ് സുപ്രീം കോടതിയില്‍ നിന്നും ഹൈക്കോടതിയില്‍നിന്നുമായി സര്‍ക്കാര്‍ നേരിട്ട തിരിച്ചടികള്‍. ഈ പരാജയങ്ങള്‍ പിണറായി സര്‍ക്കാറിനെ സംബന്ധിച്ചടുത്തോളം നിയമപരം മാത്രമല്ല രാഷ്ട്രീയപരവും കൂടിയാണ്. സര്‍വകലാശാലകളിന്‍മേല്‍ ഗവര്‍ണര്‍ നടത്തിക്കൊണ്ടിരിക്കുന്ന ഇടപെടലുകള്‍ക്കെതിരെ ഒരു ഭാഗത്ത് സര്‍ക്കാര്‍ നിയമപരമായി നടത്തുന്ന നീക്കങ്ങള്‍ക്കുപുറമേ മറുഭാഗത്ത് സി.പി.എമ്മിന്റെ നേതൃത്വത്തില്‍ തെരുവില്‍ പ്രക്ഷോഭങ്ങളും നടന്നുകൊണ്ടിരിക്കുകയായിരുന്നു. കോടതിയുടേയും പൊതുജനത്തിന്റെയുമെല്ലാം കണ്ണില്‍പൊടിയിടാനുള്ള ഈ ചെപ്പടി വിദ്യകള്‍ പക്ഷേ വിലപ്പോകുന്നില്ലെന്നു മാത്രം.

സാങ്കേതിക സര്‍വകലാശാല വി.സിയെ നിയമിച്ച ഗവര്‍ണറുടെ നടപടിക്കെതിരെ ഏറ്റവും വൃത്തികെട്ട നീക്കങ്ങളാണ് സര്‍വകലാശാലാ ആസ്ഥാനത്ത് സര്‍ക്കാറിന്റെ ആസൂത്രണത്തില്‍ സി.പി.എം പോഷക സംഘടനകളും ഇടതു അനുകൂല സംഘടനകളും ചേര്‍ന്ന് നടത്തിയിരുന്നത്. വൈസ് ചാന്‍സലര്‍ ചുമതലയേല്‍ക്കുന്നത് തടയാന്‍ ശ്രമിക്കുകയും അതു വിലപ്പോവാതെ വന്നപ്പോള്‍ അദ്ദേഹത്തോട് നിസ്സഹകരണം പ്രഖ്യാപിക്കുകയായിരുന്നു എസ്.എഫ്.ഐയും ചില സര്‍വീസ് സംഘടനകളും. എന്നാല്‍ ഇക്കാര്യത്തില്‍ കോടതി നടത്തിയ അഭിപ്രായ പ്രകടനങ്ങള്‍ സംസ്ഥാനത്തെ സാധാരണ പൗരന്റെ ആശങ്കകളെ പ്രതിഫലിപ്പിക്കുന്നതാണ്. ‘ഭരണഘടനാ ചുമതലയുള്ള ഉന്നതസ്ഥാനം വഹിക്കുന്നവര്‍ തമ്മിലുള്ള തര്‍ക്കം പരസ്യപ്രകടനമാകുമ്പോള്‍ വിദ്യാര്‍ത്ഥികളിലും വിദ്യാഭ്യാസ വിദഗ്ധരിലുമുണ്ടാകുന്ന ആഘാതങ്ങള്‍ വിലയിരുത്തണം.

നൂതന ആശ്യങ്ങളും സാങ്കേതിക മുന്നേറ്റങ്ങളും കൊണ്ട് ലോകമെങ്ങും സര്‍വകലാശാലകള്‍ മുന്നേറുകയാണ്. ഒരു വട്ടം കീര്‍ത്തി നഷ്ടപ്പെട്ടാല്‍ തിരിച്ചുപിടിക്കാന്‍ ബുദ്ധിമുട്ടാണ്. ഇതില്‍ ഉള്‍പ്പെട്ടവര്‍ക്കെല്ലാം ഇക്കാര്യം ബോധ്യമുണ്ടാകുമെന്ന് പ്രതീക്ഷിക്കുന്നു’. ഇത്രയും പറഞ്ഞ കോടതി ചുമതലയേറ്റെടുത്തതുമുതല്‍ ഒരു വിഭാഗം ജീവനക്കാരും വിദ്യാര്‍ത്ഥികളും പ്രതിഷേധിക്കുകയാണെന്നും ബിരുദ സര്‍ട്ടിഫിക്കറ്റിനുള്ള അപേക്ഷകള്‍ വരെ കെട്ടിക്കിടക്കുകയുമാണെന്നുള്ള വൈസ് ചാന്‍സലര്‍ ഡോ. സിസ തോമസ് അറിയിച്ചതും ചൂണ്ടിക്കാട്ടുകയുണ്ടായി.

സര്‍വകലാശാലാകളെ കരുവാക്കി ഗവര്‍ണറും സര്‍ക്കാറും നടത്തിക്കൊണ്ടിരിക്കുന്ന ഈ ചക്കളത്തിപ്പോരില്‍ മലയാളികളെ അസ്വസ്തമാക്കുന്നത് കോടതി നടത്തിയ ഈ നിരീക്ഷണങ്ങള്‍ മാത്രമാണ്. രാഷ്ട്രീയ താല്‍പര്യങ്ങള്‍ മുന്‍നിര്‍ത്തി ഇക്കണ്ട പദവികളിലേക്കെല്ലാം സര്‍ക്കാര്‍ നടത്തിയ നിയമനങ്ങള്‍ കണ്ണുമടച്ച് ഒപ്പിട്ടു നല്‍കിയത് ഈ ഗവര്‍ണര്‍ തന്നെയാണെന്നതും ഇരുകൂട്ടരും തമ്മിലുള്ള ഇടപാടുകളിലുണ്ടായ തര്‍ക്കമാണ് നിലവിലെ നിയമ വ്യവഹാരങ്ങള്‍ക്കും രാഷ്ട്രീയ പോരാട്ടങ്ങള്‍ക്കുമെല്ലാം കാരണമെന്നും പകല്‍ പോലെ വ്യക്തമാണ്. പക്ഷേ ഈ വ്യാജ ഏറ്റുമുട്ടലിലൂടെ ലക്ഷക്കണക്കായ വിദ്യാര്‍ത്ഥികളുടെ ഭാവിയും രക്ഷിതാക്കളുടെ പ്രതീക്ഷകളുമാണ് പന്താടപ്പെടുന്നത് എന്നതാണ് പ്രശ്‌നം.

ആരോപണ പ്രത്യാരോപണങ്ങള്‍ കുട്ടികളെയാണു ബാധിക്കുന്നതെന്നും രാജ്യത്തിന്റെ മൂലക്കല്ലായ സാങ്കേതിക വിദ്യാഭ്യാസം കേരളത്തില്‍ ഈ സര്‍വകലാശാലയുടെ കീഴിലാണെന്നുമുള്ള കോടതിയുടെ ഓര്‍മപ്പെടുത്തലെങ്കിലും മുഖവിലക്കെടുക്കാനുള്ള കനിവ് പിണറായി സര്‍ക്കാറിനുണ്ടാവുമെന്ന് കരുതിയവര്‍ക്കും തെറ്റിയിരിക്കുകയാണ്. സുപ്രീംകോടതി വിധിക്കെതിരെ അവര്‍ പുന:പരിശോധനാ ഹര്‍ജി നല്‍കിക്കഴിഞ്ഞിരിക്കുകയാണ്. ഉന്നത വിദ്യാഭ്യാസ രംഗത്ത് എന്തുസംഭവിച്ചാലും തങ്ങളുടെ ഭാഗം വിജയിക്കണമെന്ന നിലപാടില്‍ തന്നെയാണ് ഇരുകൂട്ടരും. ഏതായാലും ഒന്നുറപ്പാണ്. ഒരു തലമുറയുടെ സ്വപ്നങ്ങളുടെ മേല്‍ റീത്തുവെച്ചുകൊണ്ടിരിക്കുന്ന ഈ ഗവര്‍ണറും സര്‍ക്കാറും തലമുറകളോട് മാപ്പു പറയേണ്ടിവരികതന്നെ ചെയ്യും.

Continue Reading

Trending