ഏക സിവില് കോഡില് വൈകിയാണ് കോണ്ഗ്രസ് അഭിപ്രായം പറഞ്ഞതെന്നത് സി.പി.എം നരേറ്റീവാണ് എന്ന് പ്രതിപക്ഷ നേതാവ് വി.ഡി.സതീശൻ പറഞ്ഞു.ഇപ്പോഴും വ്യക്തതയില്ലാത്തത് സി.പി.എമ്മിനാണ്. ഭോപ്പാലിലെ പ്രധാനമന്ത്രിയുടെ പ്രസംഗത്തിന് പിന്നാലെ കോണ്ഗ്രസ് ജനറല് സെക്രട്ടറി ജയറാം രമേഷ് ഏക സിവില് കോഡിനെതിരായ നിലപാട് വ്യക്തമാക്കിയിട്ടുണ്ട്. പാര്ലമെന്ററി സമിതിയിലും കോണ്ഗ്രസാണ് ഏക സിവില് കോഡിനെ എതിര്ത്തിട്ടില്ല. ബി.ജെ.പിയുടെ വര്ഗീയ അജണ്ടയുമായാണ് സി.പി.എമ്മും ഇറങ്ങിയിരിക്കുന്നത് എന്നും അദ്ദേഹം പറഞ്ഞു.
ഏക സിവില് കോഡ് നടപ്പാക്കണമെന്ന് പറഞ്ഞത് ഇ.എം.എസാണ്. അതു നടപ്പാക്കാന് വേണ്ടി ജനാധിപത്യ മഹിളാ അസോസിയേഷനോട് രാജ്യവ്യാപകമായി പ്രക്ഷോഭം നടത്താന് പറഞ്ഞതും ഇ.എം.എസ്സാണ്. നയരേഖയില് മാറ്റം വരുത്തിയെന്നും ഇ.എം.എസിന്റെ അഭിപ്രായമല്ല ഇപ്പോള് പാര്ട്ടിക്കുള്ളതെന്നും ഇ.എം.എസിനെ തള്ളിപ്പറയുകയാണെന്നും തുറന്ന് പറയാന് എം.വി ഗോവിന്ദന് ധൈര്യമുണ്ടോ? അദ്ദേഹം ചോദിച്ചു.ബി.ജെ.പിയുടെ കെണിയില് വീഴാന് തയാറല്ലെന്നും മുസ്ലീകളെ മാത്രം ബാധിക്കുന്ന വിഷയമല്ലെന്നതുമാണ് യു.ഡി.എഫിന്റെയും കോണ്ഗ്രസിന്റെയും നിലപാട്. അതുകൊണ്ടാണ് തെരുവില് ഇറങ്ങേണ്ടെന്ന് തീരുമാനിച്ചതെന്നും വിഡിസതീശൻ വൃക്തമാക്കി