ടി20 ക്രിക്കറ്റില്‍ നിന്ന് വിരമിക്കല്‍ പ്രഖ്യാപിച്ച് കെയ്ന്‍ വില്യംസണ്‍

ഓക്ലന്‍ഡ്: ന്യൂസിലാന്‍ഡ് ക്രിക്കറ്റിന്റെ ശാന്തനായ യോദ്ധാവും ക്ലാസിക് ബാറ്ററുമായ കെയ്ന്‍ വില്യംസണ്‍ ടി20 അന്താരാഷ്ട്ര ക്രിക്കറ്റില്‍ നിന്ന് വിരമിക്കല്‍ പ്രഖ്യാപിച്ചു. അടുത്ത ടി20 ലോകകപ്പിന് വെറും നാല് മാസം മാത്രം ബാക്കിയിരിക്കെ വന്ന താരത്തിന്റെ ഈ പ്രഖ്യാപനം ക്രിക്കറ്റ് ലോകത്തെ അതിശയിപ്പിച്ചു.

ടെസ്റ്റ് ക്രിക്കറ്റിലും ഏകദിനത്തിലും തുടരുമെന്നും വില്യംസണ്‍ വ്യക്തമാക്കി. സോഷ്യല്‍ മീഡിയയിലൂടെയാണ് താരം ഈ തീരുമാനം അറിയിച്ചത്.

‘വളരെക്കാലം ന്യൂസിലാന്‍ഡ് ടി20 ടീമിന്റെ ഭാഗമാകാന്‍ കഴിഞ്ഞത് വലിയ അനുഭവമായിരുന്നു. ആ ഓര്‍മ്മകള്‍ക്കും അനുഭവങ്ങള്‍ക്കും ഞാന്‍ വളരെ കടപ്പെട്ടിരിക്കുന്നു. യുവതാരങ്ങള്‍ക്ക് അവസരം നല്‍കേണ്ട സമയമാണിത്,” വില്യംസണ്‍ കുറിച്ചു.

35 കാരനായ വില്യംസണ്‍ ന്യൂസിലാന്‍ഡിന്റെ രണ്ടാമത്തെ ഉയര്‍ന്ന ടി20 റണ്‍ സ്‌കോററാണ്. 33 ശരാശരിയില്‍ 2575 റണ്‍സ്, അതില്‍ 18 അര്‍ധസെഞ്ച്വറികള്‍ ഉള്‍പ്പെടുന്നു. 95 ആണ് അദ്ദേഹത്തിന്റെ ഏറ്റവും ഉയര്‍ന്ന സ്‌കോര്‍.

2011-ല്‍ ടി20 അരങ്ങേറ്റം നടത്തിയ വില്യംസണ്‍ 75 മത്സരങ്ങളില്‍ ന്യൂസിലാന്‍ഡ് ടീമിനെ നയിച്ചു. അദ്ദേഹത്തിന്റെ നേതൃത്വത്തില്‍ ന്യൂസിലാന്‍ഡ് രണ്ട് തവണ ഐസിസി ടി20 ലോകകപ്പ് സെമിഫൈനലിലും (2016, 2022) ഒരിക്കല്‍ ഫൈനലിലും (2021) എത്തി.

ലോക ക്രിക്കറ്റിലെ ഏറ്റവും ബഹുമാനനീയനായ നായകന്മാരില്‍ ഒരാളായ വില്യംസണ്‍ വിട പറഞ്ഞതോടെ ന്യൂസിലാന്‍ഡ് ടി20 ടീമിന് വലിയൊരു ശൂന്യതയാണുണ്ടാകുന്നത്.