റഷ്യയില്‍നിന്ന് എണ്ണ ഇറക്കുമതി ചെയ്യുന്നതിന്റെ പേരില്‍ ഇന്ത്യക്കുമേല്‍ ചുമത്തിയ 25 ശതമാനം അധിക തീരുവ ഒഴിവാക്കുമെന്ന സൂചന നല്‍കി യു.എസ് പ്രസിഡന്റ് ഡോണള്‍ഡ് ട്രംപ്. റഷ്യക്ക് അവരുടെ എണ്ണ ഉപഭോക്താക്കളിലൊരാളായ ഇന്ത്യയെ യു.എസ് പിഴ ചുമത്തുമെന്ന് പ്രഖ്യാപിച്ചതിന് പിന്നാലെ നഷ്ടപ്പെട്ടുവെന്ന് ട്രംപ് അവകാശപ്പെട്ടു. അതേസമയം, റഷ്യയില്‍നിന്ന് എണ്ണ വാങ്ങുന്നത് നിര്‍ത്തിയതായി ഇന്ത്യ ഇതുവരെ സ്ഥിരീകരിച്ചിട്ടില്ല. ഈമാസം 27നാണ് യു.എസ് പ്രഖ്യാപിച്ച 25 ശതമാനം തീരുവ പ്രാബല്യത്തില്‍ വരുന്നത്.

ഇന്ത്യയും ചൈനയുമാണ് റഷ്യയില്‍നിന്ന് ഏറ്റവും കൂടുതല്‍ എണ്ണ ഇറക്കുമതി ചെയ്യുന്നത്. കഴിഞ്ഞമാസം ഇന്ത്യന്‍ ഉല്‍പന്നങ്ങള്‍ക്കുമേല്‍ യു.എസ് ചുമത്തിയ 25 ശതമാനം താരിഫിന് പുറമെ റഷ്യന്‍ എണ്ണയുടെ പേരില്‍ 25 ശതമാനം അധിക തീരുവ കൂടി ട്രംപ് പ്രഖ്യാപിച്ചിരുന്നു.

‘റഷ്യന്‍ പ്രസിഡന്റ് വ്‌ലാദിമിര്‍ പുടിന്, അവരുടെ ഒരു എണ്ണ ഉപഭോക്താവിനെ നഷ്ടപ്പെട്ടു, അത് ഇന്ത്യയാണ്, റഷ്യന്‍ എണ്ണയുടെ 40 ശതമാനവും വാങ്ങിയിരുന്നത് അവരായിരുന്നു. ചൈനയും ഒരുപാട് എണ്ണ വാങ്ങുന്നുണ്ടെന്ന് നിങ്ങള്‍ക്കറിയാമല്ലോ. സെക്കന്‍ഡറി താരിഫ് എന്ന് വിളിക്കുന്ന ഒന്ന് ഏര്‍പ്പെടുത്തിയാല്‍ റഷ്യക്ക് വളരെ വിനാശകരമായിരിക്കും. എനിക്കത് ചെയ്യേണ്ടി വന്നാല്‍, ഞാന്‍ ചെയ്യും. ചിലപ്പോള്‍ എനിക്കത് ചെയ്യേണ്ടി വരില്ല’ ട്രംപ് മാധ്.മത്തോട് പറഞ്ഞു. അതേസമയം, അലാസ്‌കയില്‍ നടന്ന ട്രംപ്-പുടിന്‍ കൂടിക്കാഴ്ച നിര്‍ണായക പ്രഖ്യാപനങ്ങളില്ലാതെയാണ് പിരിഞ്ഞത്.

പാകിസ്താനിലെ വടക്കന്‍ മേഖലയിലുണ്ടായ മിന്നല്‍ പ്രളയത്തില്‍ 340ലധികം ആളുകള്‍ മരിച്ചതായി റിപ്പോര്‍ട്ട്. സംഭവത്തില്‍ നിരവധിപേരെ കാണാതായതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു.

48 മണിക്കൂറിനിടെ 204 പേരാണ് ബുണര്‍ ജില്ലയില്‍ മാത്രം മരിച്ചത്. 120 പേര്‍ക്ക് പരിക്കേറ്റു. 50 പേരെ കാണാതായെന്നും ദുരന്ത നിവാരണ വിഭാഗം ഡെപ്യൂട്ടി കമ്മീഷണര്‍ കാശിഫ് ഖയ്യൂം ഖാന്റെ ഓഫീസ് അറിയിച്ചു. മേഘവിസ്‌ഫോടനത്തെ തുടര്‍ന്നാണ് മിന്നല്‍ പ്രളയമുണ്ടായത്. ബജൗര്‍, സ്വാത്, മനേഹ്ര, ഷാംഗ്ല, തോര്‍ഘര്‍, ബടാഗ്രാം തുടങ്ങിയ ജില്ലകളും വെള്ളപ്പൊക്കമുണ്ടായി.

അധിനിവിഷ്ട വെസ്റ്റ് ബാങ്കിനെ വിഭജിക്കുന്ന രീതിയില്‍ 3000 ത്തോളം അനധികൃത കുടിയേറ്റങ്ങള്‍ പ്രഖ്യാപിച്ച് ഇസ്രാഈലി ധനമന്ത്രി ബെസലേല്‍ സ്‌മോട്രിച്ച്. പദ്ധതി ഫലസ്തീന്‍ രാഷ്ട്രം എന്ന ആശയം എന്നന്നേക്കുമായി ഇല്ലാതാകുന്നതാണെന്ന് സ്‌മോട്രിച്ച് പ്രഖ്യാപിച്ചു. വെസ്റ്റ് ബാങ്കില്‍ നിലവിലുള്ള അനധികൃത കുടിയേറ്റമായ മാല്‍ അഡ്മീമിനെ ജറൂസലം നഗരവുമായി ബന്ധിപ്പിക്കുന്നതാണ് പുതിയ പദ്ധതി.

‘ ഈ പദ്ധതി നടപ്പായാല്‍ പിന്നെ ഫലസ്തീന് അംഗീകാരം നല്കാന്‍ ആര്‍ക്കും കഴിയില്ല ,കാരണം അംഗീകാരം നല്കാന്‍ അങ്ങനെയൊന്ന് നിലനില്‍ക്കുകയില്ല. ഇനി സ്വതന്ത്ര ഫലസ്തീന്‍ സ്ഥാപിക്കാന്‍ ശ്രമിക്കുന്നവര്‍ക്ക് അതിന്റെ മറുപടി ഇവിടെ നിന്ന് ലാന്‍ഹിക്കും’ സ്‌മോട്രിച്ച് പറഞ്ഞു. പദ്ധതിക്ക് അടുത്ത ആഴ്ചയോട് കൂടി ഔദ്യോഗിക അംഗീകാരം ലഭിക്കുമെന്നാണ് കരുതപ്പെടുന്നത്.

ഗസ്സ മുനമ്പിനേക്കാള്‍ 15 മടങ്ങ് വലുപ്പമുള്ള വെസ്റ്റ് ബാങ്ക് ഭാവി ഫലസ്തീന്‍ രാഷ്ട്രത്തിന്റെ ഹൃദയ ഭൂമി ആയാണ് ഫലസ്തീന്‍ രാഷ്ട്ര സ്ഥാപനത്തെ അനുകൂലിക്കുന്നവര്‍ കാണുന്നത്.