kerala
കലക്ടര്മാര് ഒരു സമുദായത്തില്പെട്ടവര്; വര്ഗീയ പരാമര്ശവുമായി പിസി ജോര്ജ് എം.എല്.എ-വസ്തുതകള് ഇങ്ങനെ
അതേസമയം പ്രസംഗം വിവാദമായതോടെ മുസ്ലിം വിഭാഗത്തിലുള്ളവരുടെ കഠിനാധ്വാനത്തെപ്പറ്റിയാണ് പറഞ്ഞതെന്നാണ് ജോര്ജിന്റെ വിശദീകരണം. എന്നാല് വസ്തുത അങ്ങനെയല്ല.

കൊച്ചി: മുസ്ലിംകള്ക്കെതിരെ വിദ്വേഷ പ്രചാരണവുമായി പൂഞ്ഞാര് എം.എല്.എ പി.സി ജോര്ജ്. ഉന്നത വിദ്യാഭ്യാസ വകുപ്പടക്കം കേരളത്തിലെ ഉന്നതാധികാര സ്ഥാനങ്ങള് മുസ്ളിംകള് തട്ടിയെടുക്കുകയാണെന്ന രീതിയില് ഈരാറ്റുപേട്ടയില് പി. സി ജോര്ജ് എം.എല്.എ നടത്തിയ വിദ്വേഷപ്രസംഗം വിവാദമാകുന്നത്.
കേരളത്തിലെ 14 ജില്ലകളില് ഏഴ് ജില്ലകളിലും കലക്ടര്മാര് ഒരു സമുദായത്തില്പെട്ടവരാണെന്നാണ് പി.സി ജോര്ജ് പറയുന്നത്. ഉന്നതവിദ്യാഭ്യാസ വകുപ്പിലെ പ്രധാനപ്പെട്ട പോസ്റ്റുകളിലെല്ലാം ഒരേ സമുദായത്തിലുള്ളവരാണെന്നും ഇത് എന്തുകൊണ്ടാണ് സംഭവിച്ചതെന്ന് ആലോചിക്കണമെന്നുമാണ് പി.സി ജോര്ജ് പ്രസംഗത്തില് പറഞ്ഞത്.
സിറോ മലബാര് യൂത്ത് മൂവ്മെന്റ് ഈരാറ്റുപേട്ടയില് സംഘടിപ്പിച്ച പരിപാടിയിലായിരുന്നു ജോര്ജിന്റെ പരാമര്ശങ്ങള്. 70 ശതമാനം വിദ്യാഭ്യാസ സ്ഥാപനങ്ങളും നമ്മുടെ കത്തോലിക്കാ സഭയും വൈദികരും ചേര്ന്ന് തുടങ്ങിയതാണ്. എന്നാല് ഇന്നത്തെ നിലയെന്താണ്. വിദ്യാഭ്യാസത്തില് ക്രൈസ്തവ സമൂഹത്തിന്റെ നിലയെന്താണ്, പി.സി ജോര്ജ് ചോദിച്ചു. ഐ.എ.എസ്, ഐ.ഇ.എസ്, ഐ.എഫ്.എസ് കോഴ്സുകള് എടുത്തുനോക്കണം. അഖിലേന്ത്യാ സര്വീസുകള് എടുത്ത് പരിശോധിക്കുമ്പോള് നമ്മുടെ കുഞ്ഞുങ്ങള് വളരെ താഴെയാണ്. എന്താണതിന്റെ കാരണമെന്ന് സഭ ചര്ച്ച ചെയ്യേണ്ടതാണെന്നും പി.സി ജോര്ജ് പറഞ്ഞു.
സ്വര്ണ്ണക്കടത്തുകാരന് മന്ത്രി ഉന്നത വിദ്യാഭ്യാസ മേഖലയില് പ്രത്യേക സമുദായത്തെ കുത്തിനിറയ്ക്കുകയാണ്. ഇപ്പോഴത്തെ മന്ത്രിസഭയിലെ കത്തോലിക്കാ മന്ത്രിമാര് തങ്ങളുടെ വകുപ്പുകളില് കുറേയേറെ തസ്തികകളില് കത്തോലിക്കാ സഭക്കാരെ വയ്ക്കണമെന്നും ജോര്ജ് ആവശ്യപ്പെട്ടു. എം.ജി സര്വകലാശാലാ വി.സി നിയമനത്തില് ഇടതുപക്ഷം ഡോ. ബി. ഇക്ബാലിന്റെ പേര് നിര്ദ്ദേശിച്ചപ്പോള് താന് വാശിപിടിച്ചാണ് സിറിയക് തോമസിനെ നിയമിച്ചതെന്ന് പി.സി ജോര്ജ് അവകാശപ്പെട്ടു. സ്വാതന്ത്ര്യാനന്തരം ഇന്ത്യയില് ക്രിസ്ത്യാനികള് ഒഴിച്ച് എല്ലാ ന്യുനപക്ഷവും വളര്ന്നു. അതേക്കുറിച്ച് ആലോചിക്കണമെന്നും പി.സി ജോര്ജ് പറഞ്ഞു.
പാക്കിസ്ഥാനില് ഭരണകൂടം തന്നെ എല്ലാവരെയും മുസ്ലീങ്ങളാക്കി മാറ്റിയെന്ന് പി.സി ജോര്ജ് ആരോപിച്ചു. ക്രിസ്ത്യന് പള്ളികളും ക്ഷേത്രങ്ങളും മോസ്കുകളാക്കി മാറ്റിയെന്നും പി.സി ജോര്ജ് ആരോപിച്ചു. എന്നാല് ഇന്ത്യയില് ഒരു മുസ്ലിം ദേവാലയവും തകര്ക്കപ്പെട്ടില്ലെന്നും പി.സി ജോര്ജ് പറഞ്ഞു.
അതേസമയം പ്രസംഗം വിവാദമായതോടെ മുസ്ലിം വിഭാഗത്തിലുള്ളവരുടെ കഠിനാധ്വാനത്തെപ്പറ്റിയാണ് പറഞ്ഞതെന്നാണ് ജോര്ജിന്റെ വിശദീകരണം. എവിടെ നിന്നാണ് ഈ കണക്കുകളെന്ന ചോദ്യത്തിനും പി സി ജോര്ജിന് മറുപടി ഉണ്ട്. ഉന്നത വിദ്യാഭ്യാസ വകുപ്പില് ഒരു വിഭാഗത്തില് മാത്രമുള്ളവരാണെന്നായിരുന്നു അടുത്ത പരാമര്ശം. ഉദ്ദേശിച്ചത് സി.പി.എമ്മിനെയാണെന്നാണ് പി.സി ജോര്ജിന്റെ ന്യായീകരണം. തന്റെ പ്രസംഗം വളച്ചൊടിച്ച് പ്രചരിപ്പിക്കുന്നുവെന്ന് കാണിച്ച് ഈരാറ്റുപേട്ട സ്റ്റേഷനിലും പി.സി ജോര്ജ് പരാതി നല്കിയിട്ടുണ്ട്.
എന്നാല്, സംസ്ഥാനത്ത് ഉന്നത വിദ്യാഭ്യാസ വകുപ്പില് പ്രധാന തസ്തികകളിലെല്ലാം അമുസ്ലിം ഉദ്യോഗസ്ഥരാണെന്ന വസ്തുത മറച്ചുവച്ചാണ് പി.സി ജോര്ജിന്റെ പരാമര്ശം. ഉന്നതവിദ്യാസ വകുപ്പിനു കീഴിലെ സംസ്ഥാനത്തെ 13 സര്വ്വകലാശാലകളില് ഒരിടത്തു മാത്രമാണ് മുസ്ലിം വിസിയുള്ളത്. മന്ത്രി കെ.ടി ജലീലിന്റെ കീഴിലുള്ള ഉന്നത വിദ്യാഭ്യാസ വകുപ്പില് മുസ്ലിം വിഭാഗത്തില്പ്പെട്ട ആളല്ലാതെ മറ്റു മതത്തില്പ്പെട്ട ഒരു ഉന്നതോദ്യോഗസ്ഥനെ പോലും കാണാനാവില്ലെന്നാണ് പി സി ജോര്ജ് പറഞ്ഞത്.
എന്നാല് വസ്തുത അങ്ങനെയല്ല. വീണ എന് മാധവന് ഐഎഎസ്, വിജയകുമാര് ആര്, അജയന് സി എന്നിവരാണ് അഡീഷണല് സെക്രട്ടറിമാര്. തരുണ് ലാല് എസ്, ഹരികുമാര് ജി ജോയിന്റ് സെക്രട്ടറിമാര്. ശ്രീകല എസ്, രാജേഷ്കുമാര് കെ കെ, സ്വപ്ന പി, ബാലസുബ്രഹ്മണ്യന് വി, ശ്രീദേവി ഇ എസ് അണ്ടര് സെക്രട്ടറിമാര്.
ജയകുമാര് ബി, രേഖ എസ്, ജോസ് എ, അനില്കുമാര് ടി, പ്രിയദര്ശിനി മോഹന്ദാസ്, മനോജ് കുമാര് എം. എസ്, സംഗീത എസ്, രാധാമണി അമ്മ ഒ, വിനീഷ് കുമാര് ജി, രാകേഷ് എസ്. പി എന്നിവരാണ് സെക്ഷന് ഓഫീസര്മാര്. വത്സല തപാല് സെക്ഷന് ഓഫിസ് സൂപ്രണ്ട്
സംസ്ഥാനത്ത് 14ല് ഏഴ് കലക്ടമാരും മുസ്ലിംകളാണെന്ന പി.സി ജോര്ജിന്റെ വാദവും വ്യാജമാണ്. നാല് കളക്ടര്മാര് മാത്രമാണ് മുസ്ലിംകളുള്ളത്. കൊല്ലം (ബി അബ്ദുല് നാസര്), പത്തനംതിട്ട (പി ബി നൂഹ്), തൃശൂര് (എസ് ഷാനവാസ്), വയനാട് (ഡോ. അദീല അബ്ദുല്ല). ഇവരാരൊക്കെയും തങ്ങളുടെ പ്രവര്ത്തന മികവില് കലക്ടര്മാരായവരാണ്. മുസ്ലിം ക്വാട്ടയില് കലക്ടര്മാരായവരല്ല.
മാത്രമല്ല, ഇവരാരും മന്ത്രി ജലീലിന്റെ കീഴിലുമല്ല ജോലിചെയ്യുന്നത്. കേരളത്തില് പിണറായി സര്ക്കാര് അധികാരത്തിലുള്ള കഴിഞ്ഞ നാലര വര്ഷവും 12 വൈസ് ചാന്സലര്മാരില് ഒരാള് പോലും മുസ്ലിം ആയിരുന്നില്ല. കഴിഞ്ഞ മാസം നിലവില് വന്ന ശ്രീനാരായണ ഓപണ് സര്വകലാശാലയിലാണ് ഏക മുസ്ലിം വിസിയെ നിയമിച്ചത്. അതും വെള്ളാപ്പള്ളി നടേശനടക്കമുള്ളവരുടെ എതിര്പ്പിനെ മറികടന്ന്. അതേസമയം കേരളത്തിലെ എം.പിമാരില് ലോക്സഭയില് അഞ്ചും രാജ്യസഭയില് രണ്ടും ഉള്പ്പെടെ ഏഴു പേര് 18% മാത്രമുള്ള ക്രിസ്ത്യന് സമുദായത്തില് നിന്നാണെന്നുള്ള കാര്യം പി.സി ജോര്ജ് മറച്ചുവെക്കുന്നു. 28 ശതമാനമുള്ള മുസ്ലിം സമുദായത്തില് നിന്ന് ഇരുസഭകളിലുമായി ആകെയുള്ളത് 4 പേരാണെന്നതാണ് വസ്തുത.
india
ഡിജിറ്റല് – സാങ്കേതിക സര്വകലാശാല താത്കാലിക വി സി നിയമനം; പട്ടിക രാജ്ഭവന് കൈമാറി
ഡിജിറ്റല് – സാങ്കേതിക സര്വകലാശാലയിലെ താത്കാലിക വിസിമാരുടെ പട്ടിക ഉന്നത വിദ്യാഭ്യാസ വകുപ്പ് രാജ്ഭവന് കൈമാറി.

ഡിജിറ്റല് – സാങ്കേതിക സര്വകലാശാലയിലെ താത്കാലിക വിസിമാരുടെ പട്ടിക ഉന്നത വിദ്യാഭ്യാസ വകുപ്പ് രാജ്ഭവന് കൈമാറി. സര്ക്കാര് നല്കുന്ന പട്ടികയില് നിന്ന് താത്കാലിക വിസിമാരെ നിയോഗിക്കാനുള്ള ഹൈക്കോടതി വിധിക്ക് പിന്നാലെയാണ് മൂന്ന് പേര് അടങ്ങുന്ന പട്ടിക കൈമാറിയത്.
ഹൈക്കോടതി വിധി വന്നതിനു തൊട്ടടുത്ത ദിവസം തന്നെ ഡിജിറ്റല് സാങ്കേതിക സര്വകലാശാലകളിലേക്ക് നിയമിക്കേണ്ട താത്കാലിക വി സി മാരുടെ പട്ടികയാണ് രാജ്ഭവന് കൈമാറിയിരിക്കുന്നത്. സാങ്കേതിക സര്വകലാശാലയില് ഡയറക്ടര് ഓഫ് ടെക്നിക്കല് എഡ്യുക്കേഷന് ഇന് ചാര്ജ് പ്രൊഫ (ഡോ) ജയപ്രകാശ്, പ്രൊഫ (ഡോ) എ.പ്രവീണ്, പ്രൊഫ (ഡോ) ആര്. സജീബ് എന്നിവര് ഉള്പ്പെടുന്നതാണ് പട്ടിക.
അതേസമയം, സാങ്കേതിക ഡിജിറ്റല് സര്വകലാശാലകളിലെ താത്കാലിക വി സി നിയമനം റദ്ദാക്കിയതിനെതിരെ രാജഭവന് നാളെ സുപ്രീം കോടതിയില് ഹര്ജി ഫയല് ചെയ്യും. പുതിയ പാനല് തയ്യാറാക്കി നല്കിയ പശ്ചാത്തലത്തില് ഗവര്ണര് ജനാധിപത്യപരമായ തീരുമാനം എടുക്കണമെന്ന് ഉന്നത വിദ്യാഭ്യാസ മന്ത്രി ആര് ബിന്ദു പറഞ്ഞു.
kerala
നിപ; സംസ്ഥാനത്ത് 675 പേര് സമ്പര്ക്ക പട്ടികയില്
178 പേര് പാലക്കാട് നിപ റിപ്പോര്ട്ട് ചെയ്ത രണ്ടാമത്തെ വ്യക്തിയുടെ സമ്പര്ക്കപ്പട്ടികയില് ഉള്ളവരാണ്.

സംസ്ഥാനത്ത് വിവിധ ജില്ലകളിലായി ആകെ 675 പേര് നിപ സമ്പര്ക്ക പട്ടികയിലുണ്ടെന്ന് ആരോഗ്യ വകുപ്പ്. 178 പേര് പാലക്കാട് നിപ റിപ്പോര്ട്ട് ചെയ്ത രണ്ടാമത്തെ വ്യക്തിയുടെ സമ്പര്ക്കപ്പട്ടികയില് ഉള്ളവരാണ്. മലപ്പുറത്ത് 210 പേരും പാലക്കാട് 347, കോഴിക്കോട് 115, എറണാകുളത്ത് 2, തൃശൂരില് ഒരാളുമാണ് സമ്പര്ക്കപ്പട്ടികയിലുള്ളത്.
മലപ്പുറത്ത് 13 പേര് ഐസിയുവില് ചികിത്സയിലുണ്ട്. ജില്ലയില് ഇതുവരെ 82 സാംപിളുകള് നെഗറ്റീവായി. പാലക്കാട് 12 പേര് ഐസൊലേഷന് ചികിത്സയിലാണ്. 5 പേര് ആശുപത്രി വിട്ടു. സംസ്ഥാനത്ത് ആകെ 38 പേര് ഹൈ റിസ്കിലും 139 പേര് ഹൈ റിസ്ക് വിഭാ?ഗത്തില് നിരീക്ഷണത്തിലുമുണ്ട്.
മന്ത്രി വീണ ജോര്ജിന്റെ നേതൃത്വത്തില് ഉന്നതതല യോഗം ചേര്ന്നു. ആരോഗ്യ വകുപ്പ് അഡീഷണല് ചീഫ് സെക്രട്ടറി, എന്എച്എം സ്റ്റേറ്റ് മിഷന് ഡയറക്ടര്, ആരോഗ്യ വകുപ്പ് ഡയറക്ടര്, മെഡിക്കല് വിദ്യാഭ്യാസ വകുപ്പ് ഡയറക്ടര്, അഡീഷണല് ഡയറക്ടര്മാര്, ജില്ലാ കലക്ടര്മാര്, ജില്ലാ മെഡിക്കല് ഓഫീസര്മാര്, പൊലീസ് ഉദ്യോഗസ്ഥര്, വിവിധ വകുപ്പ് ഉദ്യോഗസ്ഥരും യോഗത്തില് പങ്കെടുത്തു.
kerala
വിദ്യാര്ഥികളുടെ ചാര്ജ് വര്ധന: ബസുടമകളെ ചര്ച്ചക്ക് വിളിച്ച് ഗതാഗത മന്ത്രി കെ.ബി ഗണേഷ്കുമാര്
വിദ്യാര്ഥികളുടെ ചാര്ജ് വര്ധനയടക്കം നിരവധി ആവശ്യങ്ങള് ഉന്നയിച്ച് അനിശ്ചിതകാല പണിമുടക്ക് പ്രഖ്യാപിച്ച സ്വകാര്യ ബസുടമകളെ ചര്ച്ചക്ക് വിളിച്ച് ഗതാഗതമന്ത്രി കെ.ബി ഗണേഷ്കുമാര്.

വിദ്യാര്ഥികളുടെ ചാര്ജ് വര്ധനയടക്കം നിരവധി ആവശ്യങ്ങള് ഉന്നയിച്ച് അനിശ്ചിതകാല പണിമുടക്ക് പ്രഖ്യാപിച്ച സ്വകാര്യ ബസുടമകളെ ചര്ച്ചക്ക് വിളിച്ച് ഗതാഗതമന്ത്രി കെ.ബി ഗണേഷ്കുമാര്. ഈ മാസം 22ാം തിയതി മുതല് ബസുടമകള് പണിമുടക്ക് പ്രഖ്യാപിച്ചിരുന്നു. വിദ്യാര്ഥികളുടെ ഒരു രൂപ ടിക്കറ്റ് നിരക്ക് മാറ്റി മിനിമം ചാര്ജ് അഞ്ച് രൂപയാക്കി ഉയര്ത്തുക എന്നത് ഉള്പ്പെടെ വിവിധ ആവശ്യങ്ങള് ഉന്നയിച്ചാണ് സംയുക്ത സമരസമിതി പണിമുടക്ക് പ്രഖ്യാപിച്ചത്. ബുധനാഴ്ച വൈകീട്ട് മൂന്നരക്കാണ് ചര്ച്ച.
വിവിധ ആവശ്യങ്ങള് ഉന്നയിച്ച് ഈ മാസം ഏഴാം തിയതി ബസുടമകള് സൂചന പണിമുടക്ക് നടത്തിയിരുന്നു. എന്നാല് ഗതാഗത കമീഷണര് ആദ്യ ഘട്ടത്തില് ബസ് ഉടമകളുമായി ചര്ച്ച നടത്തിയിരുന്നെങ്കിലും പരാജയപ്പെടുകയായിരുന്നു. ഇതിനുശേഷമാണ് സൂചനസമരം നടന്നത്. അനിശ്ചിതകാല പണിമുടക്കിലേക്ക് പോകുകയാണെന്നും ബസുടമകള് പ്രഖ്യാപിച്ചിരുന്നു. ഇതിനുപിന്നാലെയാണ് മന്ത്രി സ്വകാര്യ ബസ് ഉടമകളെ ചര്ച്ചക്ക് വിളിച്ചിരിക്കുന്നത്.
വിദ്യാര്ഥികളുടെ നിരക്ക് വര്ധിപ്പിക്കണം, 140 കിലോമീറ്ററിന് മുകളില് പെര്മിറ്റ് അനുവദിക്കണം, മോട്ടോര് വാഹന വകുപ്പിന്റെയും പൊലീസിന്റെയും ഇടക്കിടെയുള്ള പരിശോധനയും അന്യായ പിഴ ചുമത്താലും അവസാനിപ്പിക്കണം തുടങ്ങിയ ആവശ്യങ്ങളാണ് ബസ് ഉടമകള് മുന്നോട്ട് വെക്കുന്നത്.
-
india1 day ago
നിമിഷ പ്രിയയുടെ മോചനം; കാന്തപുരം മുസ്ലിയാരുടെ ഇടപെടലില് യെമനില് അടിയന്തര യോഗം
-
india2 days ago
ഡല്ഹിയില് ഫുട്പാത്തില് ഉറങ്ങിക്കിടന്ന അഞ്ചു പേരുടെ മേല് മദ്യപിച്ച് കാര് കയറ്റി; ഡ്രൈവര് അറസ്റ്റില്
-
kerala2 days ago
വിജിലന്സിനെ വിവരാവകാശ നിയമത്തിന്റെ പരിധിയില് നിന്ന് ഒഴിവാക്കിയേക്കും
-
film3 days ago
പ്രമുഖ നടന് കോട്ട ശ്രീനിവാസ റാവു അന്തരിച്ചു
-
kerala2 days ago
കാലിക്കറ്റ് യൂണിവേഴ്സിറ്റി കാമ്പസില് സമരങ്ങള്ക്ക് നിരോധനം; വിദ്യാര്ത്ഥി സംഘടനകള്ക്ക് കത്തയച്ച് പൊലീസ്
-
GULF2 days ago
നിമിഷ പ്രിയയുടെ വധശിക്ഷ മാറ്റിവെയ്ക്കണം; യെമന് സര്ക്കാരിന് അപേക്ഷ നല്കി അമ്മ
-
kerala2 days ago
വിപഞ്ചികയുടെ മരണം: ഭര്ത്താവിനും കുടുംബത്തിനുമെതിരെ പൊലീസ് കേസെടുത്തു
-
tech2 days ago
ഗൂഗിള് ക്രോമിന് വെല്ലുവിളി; എഐ പവര് വെബ് ബ്രൗസര് സമാരംഭിക്കാന് ഓപ്പണ്എഐ