അന്തരിച്ച നടന്‍ മാമുക്കോയയ്ക്ക് മലയാള സിനിമ അര്‍ഹിച്ച ആദരവ് നല്‍കിയില്ലെന്നാരോപിച്ച് സമൂഹിക മാധ്യമങ്ങളില്‍ നടന്ന വിമര്‍ശനങ്ങളോട് പ്രതികരിച്ച് മാമുക്കോയയുടെ മകന്‍ മുഹമ്മദ് നിസാര്‍. സംസ്‌കാര ചടങ്ങില്‍ സിനിമപ്രവര്‍ത്തകര്‍ പിതാവിനെ കാണാനെത്താത്തതില്‍ പരാതിയില്ലെന്നും എല്ലാവരുടെയും സാഹചര്യം മനസിലാക്കണമെന്നും മകന്‍ മുഹമ്മദ് നിസാര്‍ പറഞ്ഞു. അനാവശ്യ വിവാദങ്ങള്‍ ഈ സാഹചര്യത്തില്‍ ഒഴിവാക്കണമെന്നും അദ്ദേഹം പ്രതികരിച്ചു.

അതേസമയം കഴിഞ്ഞ ദിവസമാണ് അന്തരിച്ച നടന്‍ മാമുക്കോയക്ക് മലയാള സിനിമ അര്‍ഹിച്ച ആദരവ് നല്‍കിയില്ലെന്ന് സംവിധായകന്‍ വി.എം വിനു ഉള്‍പെടെ പ്രമുഖര്‍ വിമര്‍ശിച്ചത്. ഇന്നലെ കാലത്ത് മുതല്‍ സാമൂഹ്യ മാധ്യമങ്ങള്‍ നിറയെ ഇതേ വിമര്‍ശനം വ്യാപകമാവുന്നതിനിടെയാണ് പ്രമുഖ സംവിധായകരുള്‍പെടെ സിനിമാ മേഖലയിലെ അവഗണനക്കെതിരെ രംഗത്തെത്തിയത്. മാമുക്കോയയുടെ സംസ്‌കാര ചടങ്ങില്‍ പങ്കെടുക്കാന്‍ പലരും വരുമെന്ന് കരുതി. കൊച്ചിയില്‍ പോയി മരിച്ചാല്‍ കൂടുതല്‍ പേര്‍ വരുമായിരുന്നുവെന്ന് വിനു പറഞ്ഞു. നിരവധി സിനിമകളുടെ വിജയഘടകമായിരുന്നു മാമുക്കോയ. ഇക്കാര്യങ്ങള്‍ സംവിധാകരും തലപ്പത്തുള്ളവരും ചിന്തിക്കേണ്ടിയിരുന്നു. വിനു പറഞ്ഞു. നടന്‍ മമ്മൂട്ടി മാതാവിന്റെ വിയോഗത്തെ തുടര്‍ന്നുള്ള ദു:ഖാചരണത്തിലായതു കൊണ്ടാണ് വരാതിരുന്നത്. മോഹന്‍ലാല്‍ ജപ്പാനില്‍ കുടുംബത്തോടൊപ്പം ഉല്ലാസയാത്രയിലാണ്. മറ്റു പലരും ഷൂട്ടിങ് സ്ഥലങ്ങളില്‍ നിന്ന് ഇന്നലെ മടങ്ങിയില്ല. സിനിമാ നടന്‍മാരുടെ കൂട്ടായ്മയായ അമ്മയെ പ്രതിനിധീകരിച്ച് ഇടവേള ബാബുവാണ് ചടങ്ങിനെത്തിയത്.