കൊല്ലം: എ.എസ്.ഐ അടക്കമുള്ള മൂന്നു പൊലീസുകാരെ വിശ്രമമുറിയില്‍ പുറത്ത് നിന്നു പൂട്ടിയിട്ട് ബലിമണ്ഡപത്തിലെ കാണിക്കവഞ്ചി പൊളിക്കാന്‍ ശ്രമിച്ച് കുട്ടി മോഷ്ടാക്കള്‍. വര്‍ക്കല പാപനാശം തീരത്ത് വെച്ച് പൊലീസുകാരെ പൂട്ടിയിട്ടാണ് മോഷണ ശ്രമം. പൂജപ്പുര ജുവനൈല്‍ ഹോമില്‍ നിന്നു ഒളിച്ചു കടന്ന രണ്ടു കുട്ടികളെ സംഭവ സ്ഥലത്ത് നിന്നു കയ്യോടെ പിടികൂടി. കഴിഞ്ഞ ദിവസം പുലര്‍ച്ചെ ഒരു മണിയോടെയാണ് സംഭവം. തീരത്ത് ഡ്യൂട്ടിയിലുള്ള പൊലീസുകാര്‍ക്ക് മണ്ഡപത്തോടു ചേര്‍ന്നു നിര്‍മിച്ച മുറിയില്‍ ഇന്നലെ ഒരു എ.എസ.്‌ഐ അടക്കം മൂന്നു പൊലീസുകാര്‍ ഉള്ളപ്പോഴാണ് ‘കുട്ടി മോഷ്ടാക്കള്‍’ സ്ഥലത്തെത്തിയത്.

മോഷണത്തിന് മുമ്പായി മുറിയുടെ വാതിലിന്റെ ഓടാമ്പല്‍ പുറത്തു നിന്നു പൂട്ടിയ ശേഷമാണ് ഭാരമേറിയ കാണിക്കവഞ്ചി മണ്ഡപത്തില്‍ നിന്നു പുറത്തേക്ക് കൊണ്ടു വന്നത്. തുടര്‍ന്ന് പിന്നാമ്പുറത്ത് കല്ലു ഉപയോഗിച്ചു പൊളിക്കാന്‍ ശ്രമിച്ചു. ശബ്ദം കേട്ട പൊലീസുകാര്‍ വാതില്‍ തുറക്കാന്‍ ശ്രമിച്ചതോടെ പുറത്തു നിന്നു പൂട്ടിയിട്ടതായി മനസ്സിലാക്കി.

അതോടെ പൊലീസുകാര്‍ നാട്ടുകാരില്‍ ചിലരെ മൊബൈല്‍ ഫോണില്‍ ബന്ധപ്പെടുകയായിരുന്നു. പൊലീസുകാരെ സഹായിക്കാന്‍ എത്തിയവര്‍ മുറി തുറന്നു. തുടര്‍ന്നു നടത്തിയ തെരച്ചിലിലാണ് കാണിക്കവഞ്ചിയും പരിസരത്തെ കുറ്റിക്കാട്ടില്‍ ഒളിച്ചിരുന്ന മോഷ്ടാക്കളെയും കണ്ടെത്തിയത്. കാണിക്ക വഞ്ചിയുടെ പൂട്ടു കല്ലുപയോഗിച്ചു പൊളിക്കാനുള്ള ശ്രമം വിജയിച്ചില്ല.