Connect with us

Culture

ഇലക്ട്രോണിക് ഉപകരണങ്ങള്‍ സി.ഐ.എ ചാരവലയത്തില്‍

Published

on

വാഷിങ്ടണ്‍: അമേരിക്കന്‍ ചാരസംഘടനയായ സി.ഐ.എയുടെ ആയിരക്കണക്കിന് രഹസ്യരേഖകള്‍ പുറത്തുവിട്ട് വിക്കിലീക്‌സ് വീണ്ടും ലോകത്തെ ഞെട്ടിച്ചു. സ്മാര്‍ട്‌ഫോണുകള്‍ ഉള്‍പ്പെടെ ലോകത്തെ ഇലക്ട്രോണിക് ഉപകരണങ്ങളെല്ലാം സി.ഐ.എയുടെ ചാരവലയത്തിലാണെന്ന് വ്യക്തമാക്കുന്ന രേഖകളാണ് പുറത്തുവന്നിരിക്കുന്നത്. വിദേശ ഇന്റലിജന്‍സ് ഏജന്‍സികളെ കൂട്ടുപിടിച്ച് സ്മാര്‍ട്‌ഫോണുകളും സ്മാര്‍ട് ടെലിവിഷനുമെല്ലാം സി.ഐ.എ നിരീക്ഷണ ആയുധങ്ങളാക്കി മാറ്റിയിരിക്കുകയാണെന്ന് വിക്കിലീക്‌സ് പുറത്തുവിട്ട രേഖകളില്‍ പറയുന്നു.

ഐഒഎസ്, ആന്‍ഡ്രോയ്ഡ്, വിന്‍ഡോസ്, സാംസങ് സ്മാര്‍ട് ടിവി തുടങ്ങി ഇലക്ട്രോണിക് ഉപകരണങ്ങളെല്ലാം സി.ഐ.എക്ക് ഹാക്ക് ചെയ്യാന്‍ സാധിക്കും. സ്മാര്‍ട്‌ഫോണുകളുടെ ക്യാമറയും മൈക്രോഫോണുകളും പ്രവര്‍ത്തിപ്പിക്കാനും ബന്ധപ്പെട്ട വ്യക്തിയുടെ ലൊക്കേഷന്‍ കണ്ടെത്താനും സന്ദേശങ്ങള്‍ അയക്കാനും സി.ഐ.എക്ക് കഴിയുമെന്ന് രേഖകളില്‍ പറയുന്നു. ആന്‍ഡ്രോയ്ഡ് ഉപകരണങ്ങള്‍ നിയന്ത്രണത്തിലാക്കി വാട്‌സ്ആപ്പ് ഉള്‍പ്പെടെയുള്ള ആപ്ലിക്കേഷനുകളും സി.ഐ.എക്ക് ചോര്‍ത്താന്‍ സാധിക്കുമെന്നാണ് ഞെട്ടിക്കുന്ന മറ്റൊരു വെളിപ്പെടുത്തല്‍. കമ്പ്യൂട്ടറുകളുടെ പ്രവര്‍ത്തനം തകരാറിലാക്കുന്ന പ്രോഗ്രാമുകള്‍ ഉപയോഗിച്ചാണ് സി.ഐ.എ ഹാക്കിങ് നടത്തുന്നത്. സ്വകാര്യ സംഭാഷണങ്ങളും ആശയ വിനിമയവും ചോര്‍ത്താന്‍ സി.ഐ.എയുടെ കൈവശം പുതിയ സാങ്കേതിക വിദ്യയുണ്ട്. വെര്‍ജീനിയയിലുള്ള സൈബര്‍ ഇന്റലിജന്‍സ് സെന്ററിന്റെ അതീവ സുരക്ഷയുള്ള നെറ്റ്‌വര്‍ക്കില്‍ സൂക്ഷിച്ചിരുന്ന 8,761 രേഖകളാണ് വിക്കിലീക്ക്‌സ് പുറത്തുവിട്ടിരിക്കുന്നത്. അമേരിക്കയുടെ മുന്‍ ഹാക്കര്‍മാര്‍ക്കും കോണ്‍ട്രാക്ടര്‍മാര്‍ക്കുമിടയില്‍ വിതരണം ചെയ്തിരുന്ന രേഖകളാണ് തങ്ങള്‍ ചോര്‍ത്തിയതെന്ന് വിക്കിലീക്‌സ് പറയുന്നു. ആധുനിക കാറുകളും ട്രക്കുകളും ഉപയോഗിക്കുന്ന വാഹന നിയന്ത്രണ സംവിധാനങ്ങളെപ്പോലും നിയന്ത്രണത്തിലൊതുക്കാന്‍ സി.ഐ.എ ശ്രമിച്ചിരുന്നു. അത് എന്തിനായിരുന്നുവെന്ന് വ്യക്തമല്ല. തിരിച്ചറിയാനാവാത്ത വിധം കൊലപാതകങ്ങള്‍ നടത്താനായിരിക്കാം അതെന്ന് വിക്കിലീക്‌സ് അഭിപ്രായപ്പെടുന്നു. സി.ഐ.എയുടെ ചരിത്രത്തിലെ ഏറ്റവും വലിയ ചോര്‍ത്തലെന്നാണ് ഇയര്‍ സീറോ എന്ന പേരില്‍ പുറത്തിറക്കിയ രേഖകളെ വിക്കിലീക്‌സ് വിശേഷിപ്പിക്കുന്നത്. 2010ല്‍ അമേരിക്കന്‍ സേനയുടെ രണ്ടര ലക്ഷത്തിലധികം രഹസ്യരേഖകള്‍ വിക്കിലീക്‌സ് പുറത്തുവിട്ടത് അന്താരാഷ്ട്രതലത്തില്‍ വന്‍ പ്രത്യാഘതമുണ്ടാക്കി. കഴിഞ്ഞ ദിവസം പുറത്തുവിട്ട രേഖകളോട് പ്രതികരിക്കാന്‍ സി.ഐ.എ തയാറാട്ടില്ല. എന്നാല്‍ വെളിപ്പെടുത്തലിനെക്കുറിച്ച് പഠിക്കുമെന്ന് ആപ്പിളും സാംസങും മൈക്രോ സോഫ്റ്റും അറിയിച്ചു. ഉപയോക്താക്കള്‍ക്ക് സുരക്ഷ ഉറപ്പാക്കിയാണ് ഉപകരണങ്ങള്‍ വികസിപ്പിക്കുന്നതെന്നും എവിടെയെങ്കിലും പാളിച്ച പറ്റിയിട്ടുണ്ടെങ്കില്‍ പരിഹരിക്കുമെന്നും അവര്‍ പറഞ്ഞു.

Continue Reading
Advertisement
Click to comment

Leave a Reply

Your email address will not be published. Required fields are marked *

Film

ഇഡിക്ക് മൊഴി നൽകി സൗബിൻ ഷാഹിർ; ‘പറവ ഫിലിംസ് കമ്പനി കള്ളപ്പണ ഇടപാടുകൾ നടത്തിയിട്ടില്ല’

ജൂണ്‍ 11നാണ് മഞ്ഞുമ്മൽ ബോയ്സ് നിർമ്മാതാക്കൾക്കെതിരെ കള്ളപ്പണ ഇടപാടുകളിൽ ഇഡി അന്വേഷണം ആരംഭിച്ചത്

Published

on

മഞ്ഞുമ്മൽ ബോയ്സ് സിനിമ നി‍ർമ്മാതാക്കൾക്കെതിരെയുള്ള ഇഡി അന്വേഷണത്തിൽ മൊഴി നൽകി നിർമ്മാതാക്കളിലൊരാളായ നടൻ സൗബിൻ ഷാഹിർ. പറവ ഫിലിംസ് കമ്പനി കള്ളപ്പണ ഇടപാടുകൾ നടത്തിയിട്ടില്ല. എല്ലാത്തിനും കൃത്യമായ രേഖകൾ ഉണ്ടെന്നും ഇഡിക്ക്‌ മൊഴി നൽകി.

ജൂണ്‍ 11നാണ് മഞ്ഞുമ്മൽ ബോയ്സ് നിർമ്മാതാക്കൾക്കെതിരെ കള്ളപ്പണ ഇടപാടുകളിൽ ഇഡി അന്വേഷണം ആരംഭിച്ചത്. സാമ്പത്തിക തട്ടിപ്പ് കേസിൽ നിർമ്മാതാക്കൾക്കെതിരെ പൊലീസ് കേസുണ്ട്. സിനിമയുടെ നിർമ്മാണത്തിനായി തന്റെ പക്കൽ നിന്നും പണം വാങ്ങി കബളിപ്പിച്ചതായി സിറാജ് എന്ന നിർമ്മാതാവാണ് പരാതി നൽകിയത്.

പറവ ഫിലിംസ് നടത്തിയത് മുൻധാരണ പ്രകാരമുള്ള ചതിയാണെന്നും സിനിമയുടെ ഷൂട്ടിങ് തുടങ്ങുന്നതിന് മുൻപേ ആദ്യ ഷെഡ്യൂൾ പൂർത്തിയായെന്ന് പരാതിക്കാരനെ വിശ്വസിപ്പിച്ചുവെന്നുമാണ് ഹൈക്കോടതിയിൽ എറണാകുളം മരട് പൊലീസ് നടത്തിയ അന്വേഷണ റിപ്പോർട്ടിൽ പറഞ്ഞത്. 22 കോടി രൂപ സിനിമയ്ക്കായി ചെലവായെന്നാണ് നിർമ്മാതാക്കളുടെ വാദം. ഇത് കള്ളമാണെന്നും 18.65 കോടി രൂപ മാത്രമാണ് നിർമ്മാണ ചെലവായതെന്നും റിപ്പോർട്ടിൽ രേഖപ്പെടുത്തിയിരുന്നു.

Continue Reading

Film

‘അമ്മ’ വാർഷിക യോഗം ആരംഭിച്ചു; സസ്പെൻസ് നിലനിർത്തി ഭാരവാഹി തെരഞ്ഞെടുപ്പ്

നിലവിലെ ജനറൽ സെക്രട്ടറി ഇടവേള ബാബു മത്സരരംഗത്തില്ല

Published

on

കൊച്ചി: മലയാള ചലച്ചിത്ര അഭിനേതാക്കളുടെ കൂട്ടായ്മയായ ‘അമ്മ’ വാർഷിക യോഗം കലൂർ ഗോകുലം കൺവൻഷൻ സെന്ററിൽ ആരംഭിച്ചു. ഭാരവാഹി തിരഞ്ഞെടുപ്പിനായാണ് യോഗം. നിലവിലെ പ്രസിഡന്റായ മോഹൻലാൽ എതിരില്ലാതെ വീണ്ടും തിരഞ്ഞെടുക്കപ്പെട്ടിരുന്നു. ട്രഷറർ സ്ഥാനത്തേക്ക് ഉണ്ണി മുകുന്ദനും എതിരില്ലാതെ തിരഞ്ഞെടുക്കപ്പെട്ടു. എന്നാൽ ജനറൽ സെക്രട്ടറി, വൈസ് പ്രസിഡന്റ്, ജോയിന്റ് സെക്രട്ടറി സ്ഥാനങ്ങളിലേക്കു മത്സരം നടക്കും.

കുക്കു പരമേശ്വരൻ, സിദ്ദീഖ്, ഉണ്ണി ശിവപാൽ എന്നിവരാണ് സ്ഥാനാർഥികൾ. ജഗദീഷ്, ആർ. ജയൻ (ജയൻ ചേർത്തല), മഞ്ജു പിള്ള എന്നിവർ വൈസ് പ്രസിഡന്‍റ് സ്ഥാനത്തേക്കും അനൂപ് ചന്ദ്രനും ബാബുരാജും ജോയന്‍റ് സെക്രട്ടറി സ്ഥാനത്തേക്കും മത്സരിക്കുന്നുണ്ട്.

ജോയിന്റ് സെക്രട്ടറി സ്ഥാനത്തേക്കു ബാബുരാജും അനൂപ് ചന്ദ്രനും തമ്മിലാണ് മത്സരം. 11 അംഗ എക്സിക്യൂട്ടീവിലേക്കു 12 പേർ മത്സരിക്കുന്നു. നിലവിലെ ജനറൽ സെക്രട്ടറി ഇടവേള ബാബു മത്സരരംഗത്തില്ല. അമ്മയുടെ ഭരണഘടന അനുസരിച്ച് ആകെയുള്ള 17 ഭാരവാഹികളിൽ 4 പേർ സ്ത്രീകളായിരിക്കണം. വൈസ് പ്രസിഡന്റ് പദവിയിലേക്ക് രണ്ടു സ്ത്രീകൾ മത്സരിക്കുന്നതിനാൽ ഇക്കാര്യത്തിൽ തീരുമാനം ആയതിനു ശേഷമാകും എക്സിക്യൂട്ടീവ് കമ്മിറ്റിയിൽ എത്ര സ്ത്രീകൾ ഉണ്ടാവണം എന്നു നിശ്ചയിക്കുക.

Continue Reading

Film

അങ്കമാലി താലൂക്ക് ആശുപത്രിയിലെ അത്യാഹിത വിഭാഗത്തിൽ സിനിമാ ഷൂട്ടിങ് ; കേസെടുത്ത് മനുഷ്യാവകാശ കമ്മീഷൻ

സർക്കാർ ആശുപത്രിയിലെ അത്യാഹിത വിഭാഗത്തിൽ സിനിമ ചിത്രീകരിക്കാൻ അനുമതി നൽകിയവർ 7 ദിവസത്തിനകം വിശദീകരണം സമർപ്പിക്കണമെന്ന് കമ്മീഷൻ അംഗം വി.കെ. ബീനാകുമാരി ആവശ്യപ്പെട്ടു.

Published

on

എറണാകുളം : അങ്കമാലി താലൂക്ക് ആശുപത്രിയിലെ അത്യാഹിത വിഭാഗത്തിൽ വ്യാഴാഴ്ച രാത്രി മുഴുവൻ രോഗികളെ ബുദ്ധിമുട്ടിലാക്കി നടന്ന സിനിമാ ചിത്രീകരണത്തിനെതിരെ മനുഷ്യാവകാശ കമ്മീഷൻ.

സർക്കാർ ആശുപത്രിയിലെ അത്യാഹിത വിഭാഗത്തിൽ സിനിമ ചിത്രീകരിക്കാൻ അനുമതി നൽകിയവർ 7 ദിവസത്തിനകം വിശദീകരണം സമർപ്പിക്കണമെന്ന് കമ്മീഷൻ അംഗം വി.കെ. ബീനാകുമാരി ആവശ്യപ്പെട്ടു.

എറണാകുളം ജില്ല മെഡിക്കൽ ഓഫീസർ, അങ്കമാലി താലൂക്ക് ആശുപത്രി സൂപ്രണ്ട് എന്നിവർക്കാണ് കമ്മീഷൻ നിർദ്ദേശം നൽകിയത്.

ഫഹദ് ഫാസിൽ നിർമ്മിക്കുന്ന പൈങ്കിളി എന്ന സിനിമയാണ് ഇവിടെ ചിത്രീകരിച്ചത്. രാത്രി 9 മണിയോടെയാണ് ചിത്രീകരണം തുടങ്ങിയത്. അത്യാഹിത വിഭാഗത്തിലെ ലൈറ്റുകൾ മറച്ചും നിയന്ത്രണങ്ങൾ ഏർപ്പെടുത്തിയുമായിരുന്നു ചിത്രീകരണം. അഭിനേതാക്കൾ ഉൾപ്പെടെ 50 ഓളം പേർ അത്യാഹിത വിഭാഗത്തിൽ ഉണ്ടായിരുന്നു.

ഡോക്ടർമാർ ചികിത്സ തുടരുന്നതിനിടയിലും സിനിമാ ചിത്രീകരണം നടന്നുവെന്നാണ് മനസ്സിലാക്കുന്നത്. പരിമിതമായ സ്ഥലമാണ് അത്യാഹിത വിഭാഗത്തിലുള്ളത്. അത്യാസന്ന നിലയിലുള്ള രോഗിയുമായി എത്തിയയാൾക്ക് അത്യാഹിത വിഭാഗത്തിലേക്ക് പ്രവേശിക്കാൻ പോലുമായില്ല. പ്രധാന കവാടത്തിലൂടെ ആരെയും കടത്തിവിട്ടുമില്ല. ചിത്രീകണ സമയത്ത് നിശബ്ദത പാലിക്കാൻ അണിയറ പ്രവർത്തകർ രോഗികളോടും കൂട്ടിരിപ്പുകാരോടും നിർദ്ദേശിക്കുന്നുണ്ടായിരുന്നു.

രണ്ടു ദിവസമാണ് ചിത്രീകരണം നടക്കുന്നത്. പാവപ്പെട്ടവരുടെ ആശ്രയ കേന്ദ്രമാണ് അങ്കമാലി താലൂക്ക് ആശുപത്രി. ദൃശ്യമാധ്യമ വാർത്തയുടെ അടിസ്ഥാനത്തിൽ കമ്മീഷൻ സ്വമേധയാ രജിസ്റ്റർ ചെയ്ത കേസിലാണ് നടപടി. സ്വകാര്യ ആശുപത്രിയുടെ സെറ്റ് എന്ന നിലയിലാണ് സർക്കാർ ആശുപത്രി സിനിമയിൽ ചിത്രീകരിച്ചത്.

Continue Reading

Trending