മേപ്പാടി(വയനാട്): ഇന്ന് രാത്രി വയനാട്ടിലെ റിസോർട്ടിൽ വെച്ച് കാട്ടാനയുടെ ആക്രമണത്തിൽ കൊല്ലപ്പെട്ടത് കോളജ് അധ്യാപിക. പേരാമ്പ്ര ദാറുന്നുജൂം കോളജ് ഓഫ് ആർട്‌സ് ആന്റ് സയൻസിലെ സൈക്കോളജി വിഭാഗം അധ്യാപികയായ കണ്ണൂർ ചേലേരി കല്ലറപുരയിൽ ഷഹാന (26) യാണ് കൊല്ലപ്പെട്ടത്. മേപ്പാടി എളമ്പലേരിയിലെ സ്വകാര്യ റിസോർട്ടിൽ എത്തിയ മരിച്ചത്. ശനിയാഴ്ച രാത്രി 7. 45 നായിരുന്നു ആനയുടെ ആക്രമണം ഉണ്ടായത്. ഗുരുതരമായി പരിക്കേറ്റ ഷഹാനയെ മേപ്പാടിയിലെ സ്വകാര്യ മെഡിക്കൽ കോളേജിൽ എത്തിച്ചുവെങ്കിലും ജീവൻ രക്ഷിക്കാനായില്ല. മൃതദേഹം മേപ്പാടിയിലെ സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.

ഷഹാന ഭർത്താവിനൊപ്പം

ഇന്നലെ രാത്രി റിസോർട്ടിലെ ടെന്റിൽ താമസിക്കുന്നതിനിടെ ആനയെക്കണ്ട് ഭയന്നോടുകയായിരുന്നു. കൂടെയുണ്ടായിരുന്നവർ രക്ഷപ്പെട്ടെങ്കിലും ഷഹാനയെ കാട്ടാന ആക്രമിക്കുകയായിരുന്നു. 30 പേരടങ്ങുന്ന സംഘത്തോടൊപ്പമാണ് ഷഹാന മേപ്പാടിയിലെത്തിയത്. ഇന്ന് രാവിലെ പൊലീസെത്തി ഇൻക്വസ്റ്റ് നടപടികൾ പൂർത്തിയാക്കിയ ശേഷം. പോസ്റ്റുമോർട്ടം നടത്തി കണ്ണൂരിലേക്ക് കൊണ്ടുപോകും. പരേതനായ സത്താറിന്റെയും ആയിഷയുടെയും മകളായ ഷഹാന. ഭർത്താവ്: ലിഷാം. സഹോദരങ്ങൾ. ഡോ. ദിൽഷാത റൈഹാന. ലുഖ്മാൻ, ഹിലാൽ.

നിരവധി വിനോദ സഞ്ചാരികൾ എത്തുന്ന പ്രദേശമാണിത്. കോഴിക്കോട് ഊട്ടി റോഡായ മേപ്പാടിയിൽ കടൂർ റോഡിൽ 10 കിലോമീറ്റർ അകലെയാണ് എളമ്പിലേരി. പ്രദേശത്ത് ഭൂരിഭാഗവും ഏലത്തോട്ടങ്ങളാണ്. അടുത്തകാലത്താണ് വിനോദസഞ്ചാരത്തിന് കൂടുതൽ പേർ ഈ പ്രദേശത്തേക്ക് എത്താൻ തുടങ്ങിയത്. വനഭൂമിയുമായി അതിർത്തി പങ്കിടുന്ന പ്രദേശമായതിനാൽ ഇടയ്ക്കിടെ കാട്ടാന ഇറങ്ങാറുണ്ട്. സമീപപ്രദേശമായ ചുളിക്കയിൽ ഏതാനും വർഷങ്ങൾക്കു മുൻപ് കാട്ടാനയുടെ ആക്രമണത്തിൽ ഒരാൾ കൊല്ലപ്പെട്ടിരുന്നു.