Health
എലിപ്പനിയെ കുറിച്ച് അറിയേണ്ടതെല്ലാം
തുരത്താം എലിപ്പനിയെ

സംസ്ഥാനത്ത് മഴ തുടരുന്ന സാഹചര്യത്തില് എലിപ്പനിക്കെതിരെ ജാഗ്രത പാലിക്കണം. പ്രളയബാധിത മേഖലകളിലെ പകര്ച്ച വ്യാധികളില് ഏറ്റവും പ്രധാനമാണ് എലിപ്പനി. മലിനജല സമ്പര്ക്കത്തിലൂടെയാണ് എലിപ്പനി ഉണ്ടാകുന്നത്. ആരംഭത്തില് കണ്ടെത്തി ചികിത്സിച്ചില്ലെങ്കില് സങ്കീര്ണതകളിലേക്കും മരണത്തിലേക്കും പോകാന് സാധ്യതയുണ്ട്. വെള്ളം കയറിയ പ്രദേശത്തുള്ളവരും രക്ഷാപ്രവര്ത്തനങ്ങളില് ഏര്പ്പെടുന്നവരും മലിനജലവുമായി സമ്പര്ക്കത്തില് വരുന്നവരും നിര്ബന്ധമായും എലിപ്പനി പ്രതിരോധത്തിനുള്ള ഗുളികയായ ഡോക്സിസൈക്ലിന് ആരോഗ്യ പ്രവര്ത്തകരുടെ നിര്ദേശാനുസരണം കഴിക്കേണ്ടതാണ്. ഡോക്സിസൈക്ലിന് എല്ലാ സര്ക്കാര് ആശുപത്രികളിലും സൗജന്യമായി ലഭിക്കുന്നതാണ്. ഈ അവബോധം എല്ലാവരിലുമെത്തിക്കണം.
എന്താണ് എലിപ്പനി?
ലെപ്ടോസ്പൈറ ജനുസില്പ്പെട്ട ഒരിനം സ്പൈറോകീറ്റ മനുഷ്യരില് ഉണ്ടാക്കുന്ന ഒരു ജന്തുജന്യ രോഗമാണ് എലിപ്പനി അഥവാ ലെപ്റ്റോസ്പൈറോസിസ്. രോഗാണുവാഹകരയായ എലി, അണ്ണാന്, പശു, ആട്, നായ എന്നിവയുടെ മൂത്രം, വിസര്ജ്യം മുതലായവ കലര്ന്ന വെള്ളവുമായി സമ്പര്ക്കം വരുന്നവര്ക്കാണ് ഈ രോഗം പകരുന്നത്. തൊലിയിലുള്ള മുറിവുകളില് കൂടിയോ കണ്ണ്, മൂക്ക്, വായ വഴിയോ രോഗാണു മനുഷ്യ ശരീരത്തില് പ്രവേശിക്കുന്നു.
രോഗ ലക്ഷണങ്ങള്
പെട്ടെന്നുണ്ടാവുന്ന ശക്തമായ പനിയും പനിയോടൊപ്പം ചിലപ്പോള് വിറയലും ഉണ്ടാവാം. കഠിനമായ തലവേദന, പേശീവേദന, കാല്മുട്ടിന് താഴെയുള്ള വേദന, നടുവേദന, കണ്ണിന് ചുവപ്പുനിറം, മഞ്ഞപ്പിത്തം, ത്വക്കിനും കണ്ണുകള്ക്കും മഞ്ഞനിറമുണ്ടാവുക, മൂത്രം മഞ്ഞ നിറത്തില് പോവുക എന്നീ രോഗലക്ഷണങ്ങളുമുണ്ടാകാം. ശക്തമായ പനിയോടൊപ്പം മഞ്ഞപ്പിത്തം ഉണ്ടാവുന്നുവെങ്കില് എലിപ്പനി ആണോയെന്ന് സംശയിക്കണം. മഞ്ഞപ്പിത്തത്തോടൊപ്പം വിശപ്പില്ലായ്മ, മനംമറിച്ചില്, ഛര്ദി എന്നിവയും ഉണ്ടാവാം. ചിലര്ക്ക് വയറുവേദന, ഛര്ദി, വയറ്റിളക്കം, ത്വക്കില് ചുവന്ന പാടുകള് എന്നിവ ഉണ്ടാവാം.
എലിപ്പനി കരളിനെ ബാധിക്കുമ്പോള് മഞ്ഞപ്പിത്തവും, വൃക്കകളെ ബാധിക്കുമ്പോള് മൂത്രത്തിന്റെ അളവ് കുറയുക, രക്തം കലര്ന്ന മൂത്രം പോവുക, കാലില് നീരുണ്ടാവുക എന്നിവയും ഉണ്ടാകുന്നു. ചിലരില് രക്തസ്രാവം ഉണ്ടാവാം.
പ്രതിരോധ മാര്ഗങ്ങള്
· മലിനജലവുമായി സമ്പര്ക്കത്തില് ഏര്പ്പെടുന്നവരും, ശുചീകരണ തൊഴിലാളികളും, വെള്ളത്തിലിറങ്ങുന്ന സന്നദ്ധ പ്രവര്ത്തകരും വ്യക്തി സുരക്ഷാ ഉപാധികളായ കയ്യുറ, മുട്ട് വരെയുള്ള പാദരക്ഷകള്, മാസ്ക് എന്നിവ ഉപയോഗിക്കുക.
· കെട്ടിക്കിടക്കുന്ന വെള്ളത്തില് കുട്ടികളെ കളിക്കാന് അനുവദിക്കരുത്. വെള്ളത്തിലിറങ്ങിയാല് കൈയ്യും കാലും സോപ്പ് ഉപയോഗിച്ച് നന്നായി കഴുകേണ്ടതാണ്.
· മലിനജലവുമായി സമ്പര്ക്കം വരുന്ന കാലയളവില് പരമാവധി ആറാഴ്ചത്തേക്ക് ആഴ്ചയിലൊരിക്കല് ഡോക്സിസൈക്ലിന് ഗുളിക 200 മില്ലീഗ്രാം (100 മില്ലീഗ്രാമിന്റെ രണ്ട് ഗുളിക) കഴിച്ചിരിക്കേണ്ടതാണ്.
· എലിപ്പനിയുടെ പ്രാരംഭ ലക്ഷണങ്ങള് കണ്ടാല് ഉടന്തന്നെ, ആരോഗ്യ പ്രവര്ത്തകരുമായി ബന്ധപ്പെടേണ്ടതാണ്. യാതൊരു കാരണവശാലും സ്വയം ചികിത്സ പാടില്ല.
Health
ചൈനയില് വീണ്ടും പകര്ച്ചവ്യാധി വ്യാപിക്കുന്നുവോ?, ആശുപത്രികള് രോഗികളാല് തിങ്ങിനിറയുന്നു, ആശങ്കയോടെ ലോകം
രാജ്യത്തുടനീളം ഹ്യൂമന് മെറ്റാപ്ന്യൂമോവൈറസ് (എച്ച്എംപിവി) പടരുന്നതായി സാമൂഹ്യ മാധ്യമ പോസ്റ്റുകളില് പറയുന്നു

കോവിഡ് മഹാമാരി സ്ഥിരീകരിച്ച് അഞ്ച് വര്ഷം പൂര്ത്തീകരിക്കുന്നതിനിടെ ചൈനയില് വീണ്ടും ആശങ്ക പരത്തി പുതിയ പകര്ച്ചവ്യാധി വ്യാപിക്കുന്നു. രാജ്യത്തുടനീളം ഹ്യൂമന് മെറ്റാപ്ന്യൂമോവൈറസ് (എച്ച്എംപിവി) പടരുന്നതായി സാമൂഹ്യ മാധ്യമ പോസ്റ്റുകളില് പറയുന്നു. ഹ്യൂമന് മെറ്റാപ്ന്യൂമോവൈറസ്, ഇന്ഫ്ലുവന്സ എ, കോവിഡ്19 വൈറസുകള് എന്നിങ്ങനെ ഒന്നിലധികം വൈറസ് ബാധകള് ചൈനയിലുണ്ടെന്ന റിപ്പോര്ട്ടുകള് പുറത്തുവരുന്നുണ്ട്.
പുതിയ വൈറസ് വ്യാപിച്ചതിനെ തുടര്ന്ന് മരണസംഖ്യ വര്ധിച്ചിരിക്കുകയാണ്. അതേസമയം പുതിയ മഹാമാരി സ്ഥിരീകരിക്കുകയോ ജാഗ്രത പാലിക്കണമെന്ന് മുന്നറിയിപ്പ് നല്കുകയോ ആരോഗ്യ അടിയന്തരാവസ്ഥ പ്രഖ്യാപിക്കുകയൊ ചൈനീസ് ആരോഗ്യ അധികാരികളും ലോകാരോഗ്യ സംഘടനയും ചെയ്തിട്ടില്ല. ചൈനയിലേതാണെന്ന അടിക്കുറിപ്പോടെ സോഷ്യല്മീഡിയയില് വ്യാപകമായി പ്രചരിക്കുന്ന വീഡിയോയില് ഒരു ആശുപത്രിയില് മാസ്ക് ധരിച്ച രോഗികള് തിങ്ങിനിറഞ്ഞിരിക്കുന്നത് കാണാം. ചിലര് ചുമയ്ക്കുന്നുമുണ്ട്. എന്നാല് ചിത്രീകരണത്തിന്റെ ഉറവിടമൊ തിയതിയോ വ്യക്തമല്ല. മറ്റൊരു വീഡിയോയില് ആശുപത്രിയിലെ ഇടനാഴി മുഴുവന് മുതിര്ന്ന ആളുകളെക്കൊണ്ട് നിറഞ്ഞിരിക്കുന്നു. 12 മില്യണ് പേരാണ് ഈ വീഡിയേ കണ്ടിരിക്കുന്നത്. ”ഇന്ഫ്ലുവന്സ എ, ഹ്യൂമന് മെറ്റാപ്ന്യൂമോവൈറസ് എന്നീ വൈറസുകളുടെ വ്യാപനത്തെ തുടര്ന്ന് ചൈനയിലെ ആശുപത്രികള് നിറഞ്ഞിരിക്കുന്നു. മൂന്ന് വര്ഷം മുന്പത്തെ ചൈനയിലെ കോവിഡ് കാലത്തെയാണ് ഇത് സൂചിപ്പിക്കുന്നത്” എന്ന് പോസ്റ്റില് പറയുന്നു.
ഉറവിടം വ്യക്തമല്ലാത്ത ന്യുമോണിയ കേസുകള് നിരീക്ഷിച്ചു വരിയാണെന്നാണ് ചൈനയുടെ രോഗ നിയന്ത്രണ അതോറിറ്റി റോയിട്ടേഴ്സിനോട് വ്യക്തമാക്കി. നാഷണല് ഡിസീസ് കണ്ട്രോള് ആന്ഡ് പ്രിവന്ഷന് അഡ്മിനിസ്ട്രേഷന് ലബോറട്ടറികള്ക്ക് കേസുകള് പരിശോധിക്കാനും സ്ഥിരീകരിക്കാനുമുള്ള ചട്ടവും മാര്ഗനിര്ദേശങ്ങളും പുറത്തിറക്കിയിട്ടുണ്ട്. പൊതുസ്ഥലങ്ങളില് മാസ്ക് ധരിക്കാനും സാമൂഹിക അകലം പാലിക്കാനും നിര്ദേശം നല്കിയതായും അധികൃതര് വ്യക്തമാക്കി.
അക്യൂട്ട് റെസ്പിറേറ്ററി രോഗങ്ങളുടെ ഡാറ്റ ഡിസംബര് 16 മുതല് 22 വരെയുള്ള വാരത്തില് അണുബാധകളുടെ വര്ധനവ് കാണിക്കുന്നതായി വ്യാഴാഴ്ച പുറത്തിറക്കിയ ഔദ്യോഗിക പ്രസ്താവനയില് നല്കിയിട്ടുണ്ട്. ശൈത്യകാലത്തും വസന്തകാലത്തും ചൈനയെ വിവിധ ശ്വാസകോശ സംബന്ധമായ പകര്ച്ചവ്യാധികള് ബാധിക്കാന് സാധ്യതയുണ്ടെന്ന് മറ്റൊരു ഉദ്യോഗസ്ഥനായ കന് ബിയാവോ വാര്ത്താ സമ്മേളനത്തില് പറഞ്ഞു. അടുത്തിടെ കണ്ടെത്തിയ കേസുകളില് റിനോവൈറസ്, ഹ്യൂമന് മെറ്റാപ്ന്യൂമോവൈറസ് തുടങ്ങിയ രോഗാണുക്കളും ഉള്പ്പെടുന്നു. പ്രത്യേകിച്ച് വടക്കന് പ്രവിശ്യകളില് 14 വയസിന് താഴെയുള്ളവരില് ഹ്യൂമന് മെറ്റാപ്ന്യൂമോവൈറസ് കേസുകള് വര്ധിച്ചിട്ടുണ്ട്. ഹ്യൂമന് മെറ്റാപ്ന്യൂമോവൈറസ് ബാധിച്ചവര്ക്ക് ആന്റിവൈറല് മരുന്നുകള് നല്കുന്നതിനെതിരെ ഷാങ്ഹായ് ആശുപത്രിയിലെ ഡോക്ടര് മുന്നറിയിപ്പ് നല്കിയിട്ടുണ്ട്.
ഹ്യൂമന് മെറ്റാപ്ന്യൂമോവൈറസ് (HMPV) സാധാരണയായി ജലദോഷത്തിന് സമാനമായ ലക്ഷണങ്ങള് ഉണ്ടാക്കുന്ന ഒരു വൈറസാണ്. ചെറിയ കുട്ടികള്, പ്രായമായവര്, പ്രതിരോധശേഷി കുറഞ്ഞവര് എന്നിവരില് രോഗം ഗുരുതരമാകാന് സാധ്യതയുണ്ട്. ചുമയ്ക്കുമ്പോഴോ തുമ്മുമ്പോഴോ പുറത്തുവരുന്ന സ്രവങ്ങളിലൂടെ പടരുന്നതിനാല് പെട്ടെന്ന് രോഗം പകരാനുള്ള സാധ്യത കൂടും. രോഗബാധിതരുമായുള്ള അടുത്ത സമ്പര്ക്കം മൂലവും രോഗം പകരാം. ചുമ, പനി, ശ്വാസം മുട്ടല് തുടങ്ങിയവയാണ് രോഗത്തിന്റെ ലക്ഷണങ്ങള്. എച്ച്എംപിവിക്കെതിരെ വാക്സിന് ലഭ്യമല്ല. നിലവില് രോഗലക്ഷണങ്ങള് കുറയ്ക്കാനുള്ള ചികില്സയാണ് നല്കി വരുന്നത്.
Health
‘പനിക്ക് സ്വയം ചികിത്സ തേടരുത്’: ആരോഗ്യമന്ത്രി
സംസ്ഥാനത്ത് ഇടവിട്ടുള്ള മഴ തുടരുന്ന സാഹചര്യത്തില് ഡെങ്കിപ്പനി, എലിപ്പനി എന്നിവയ്ക്കെതിരെ ജാഗ്രത പാലിക്കണം

തിരുവനന്തപുരം: ഏത് പനിയും പകര്ച്ചപ്പനിയാകാന് സാധ്യതയുള്ളതിനാല് പനിക്ക് സ്വയം ചികിത്സ തേടരുതെന്ന് മന്ത്രി വീണ ജോര്ജ്. സംസ്ഥാനത്ത് ഇടവിട്ടുള്ള മഴ തുടരുന്ന സാഹചര്യത്തില് ഡെങ്കിപ്പനി, എലിപ്പനി എന്നിവയ്ക്കെതിരെ ജാഗ്രത പാലിക്കണം. പ്രാരംഭ ഘട്ടത്തില് ചികിത്സിക്കാത്തത് കൊണ്ടാണ് എലിപ്പനി മരണങ്ങള് പലപ്പോഴും ഉണ്ടാകുന്നത്.
എലിപ്പനി സാധ്യതയുള്ളവര്ക്ക് പ്രോട്ടോകോള് അനുസരിച്ചുള്ള ചികിത്സ സര്ക്കാര്, സ്വകാര്യ ആശുപത്രികള് ഉറപ്പാക്കണം. മലിന ജലത്തിലിറങ്ങിയവരില് ഡോക്സിസൈക്ലിന് കഴിക്കാത്തവരില് മരണനിരക്ക് കൂടുതലാണെന്നാണ് കണക്കുകള് സൂചിപ്പിക്കുന്നത്. അതിനാല് മലിന ജലത്തിലിറങ്ങിയവര് നിര്ബന്ധമായും ആരോഗ്യ പ്രവര്ത്തകരുടെ നിര്ദേശാനുസരണം എലിപ്പനി പ്രതിരോധ ഗുളിക കഴിക്കണം.
കൈകാലുകളില് മുറിവുകളുള്ളവര് മലിനജലവുമായി സമ്പര്ക്കം വരാതെ നോക്കുകയോ, വ്യക്തിഗത സുരക്ഷാ മാര്ഗങ്ങള് സ്വീകരിക്കുകയോ ചെയ്യണം. കൊതുകിന്റെ ഉറവിട നശീകരണം പ്രത്യേകം ശ്രദ്ധിക്കാനും മന്ത്രി നിര്ദേശം നല്കി.
Health
ഇരുപതുകാരനില് ഡെങ്കിപ്പനിയുടെ അപൂര്വ്വ വകഭേദം
ഒരാഴ്ചയോളം തുടര്ന്ന പനിയും പേശിവേദനയുമായാണ് രോഗിയെ ആശുപത്രിയില് പ്രവേശിപ്പിച്ചത്.

ഡെങ്കിപ്പനിയുടെ അപൂര്വ്വ വകഭേദം കണ്ടെത്തിയതായി കോലഞ്ചേരി മെഡിക്കല് കോളജ്. ചികിത്സയ്ക്കുവെണ്ടി എത്തിയ ഇരുപത് വയസ്സുകാരനിലാണ് വകഭേദം കണ്ടെത്തിയത്.
ഒരാഴ്ചയോളം തുടര്ന്ന പനിയും പേശിവേദനയുമായാണ് രോഗിയെ ആശുപത്രിയില് പ്രവേശിപ്പിച്ചത്. സാധാരണ ഒരാഴ്ചയ്ക്കപ്പുറം ഡെങ്കിപ്പനി നീണ്ടുനില്ക്കാറില്ല. എന്നാല് ഒരാഴ്ച കഴിഞ്ഞിട്ടും ശക്തമായ പനി തുടര്ന്നതിനാല് രോഗിയെ മറ്റു പരിശോധനകള്ക്ക് വിധേയമാക്കി. പല അവയവങ്ങളെയും ഒരേസമയം ബാധിക്കുന്ന നീര്ക്കെട്ട് രോഗിക്കുള്ളതായി പരിശോധനയിലൂടെ കണ്ടെത്തി.
തുടര്ന്നുള്ള പരിശോധനകളില് രോഗിക്ക് ഡെങ്കിപ്പനിയുടെ അപൂര്വ്വ രോഗാവസ്ഥയായ എച്ച്എല്എച്ച് സിന്ഡ്രോം(ഹീമോഫാഗോസൈറ്റിക് ലിംഫോഹിസ്റ്റിയോസൈറ്റോസിസ്) ഉണ്ടെന്ന് സ്ഥിരീകരിച്ചു. ചികിത്സ പൂര്ത്തിയാക്കി രോഗി ആശുപത്രി വിട്ടതായും കോലഞ്ചേരി മെഡിക്കല് കോളജ് പറഞ്ഞു. എച്ച്എല്എച്ച് സിന്ഡ്രോം ഡെങ്കിപ്പനിയില് വളരെ അപൂര്വ്വമായേ കാണാറുള്ളൂവെന്ന് ആശുപത്രി അധികൃതര് പറഞ്ഞു.
-
kerala3 days ago
മാസപ്പടി കേസ്: സിബിഐ, ഇഡി അന്വേഷണം ആവശ്യപ്പെട്ടുള്ള ഹർജിയിൽ വീണ വിജയനുൾപ്പെടെയുള്ളവർക്ക് ഹൈക്കോടതി നോട്ടീസ്
-
india2 days ago
ഇന്ത്യയില് നിന്നും നൂറുകണക്കിന് മുസ്ലിംകളെ നിയമവിരുദ്ധമായി ബംഗ്ലാദേശിലേക്ക് നാടുകടത്തിയതായി ഹ്യൂമന് റൈറ്റ്സ് വാച്ച് റിപ്പോര്ട്ട്
-
kerala3 days ago
ഷാർജയിൽ മകൾക്കൊപ്പം മരിച്ച നിലയിൽ കണ്ടെത്തിയ വിപഞ്ചികയുടെ മൃതദേഹം സംസ്കരിച്ചു
-
india2 days ago
മുംബൈയില് ‘ദൃശ്യം’ മോഡല് കൊലപാതകം; ഭര്ത്താവിന്റെ മൃതദേഹം ടൈലുകള്ക്കടിയില് കുഴിച്ചിട്ട് ഭാര്യ
-
crime2 days ago
ബിഹാറിൽ ആക്രി കച്ചവടക്കാരനെ വെടിവെച്ചുകൊന്നു
-
EDUCATION2 days ago
പ്ലസ് വണ് ട്രാന്സ്ഫര് അലോട്മെന്റ് പ്രവേശനം നാളെ മുതല്
-
india2 days ago
‘മതവികാരം വ്രണപ്പെടും’; കര്ണാടകയില് സര്ക്കാര് സ്കൂളില് മുട്ട വിതരണത്തിനെതിരെ രക്ഷിതാക്കള്
-
kerala2 days ago
ഇന്ന് ഒറ്റപ്പെട്ട ശക്തമായ മഴക്ക് സാധ്യത; എട്ട് ജില്ലയില് യെല്ലോ അലര്ട്ട്