ഡോ. രാംപുനിയാനി

കശ്മീര്‍ ഫയല്‍സ് സിനിമ വീണ്ടും വാര്‍ത്തകളില്‍ നിറയുകയാണ്. ഗോവയിലെ രാജ്യാന്തര ചലച്ചിത്ര മേളക്കിടെ ‘ദി കശ്മീര്‍ ഫയല്‍സി’നെതിരെ രൂക്ഷവിമര്‍ശനവുമായി ജൂറി ചെയര്‍മാനും ഇസ്രാഈലി ചലച്ചിത്ര സംവിധായകനുമായ നാദവ് ലാപിഡ് രംഗത്തിത്തെത്തിയതാണ് പുതിയ വിവാദത്തിന് ഹേതു.

തിയേറ്ററുകളില്‍ കശ്മീര്‍ ഫയല്‍സ് സിനിമ കണ്ടത് വല്ലാത്തൊരു അനുഭവമാണ്. ഭൂരിഭാഗം കാഴ്ചക്കാരിലും ഇത് നിഷേധാത്മകവും വിദ്വേഷകരവും വൈകാരികവുമായ പ്രതികരണത്തിന് പ്രേരണ നല്‍കുന്നു. സിനിമയുടെ അവസാനം ആരോ മുസ്‌ലിം വിരുദ്ധ മുദ്രാവാക്യങ്ങള്‍ വിളിക്കാന്‍ തുടങ്ങുന്നു, പിന്നെ തിയേറ്ററുകള്‍ ഏറ്റുവിളിക്കുന്നു. ശ്രീശ്രീ രവിശങ്കര്‍, ആര്‍. എസ്.എസ് മേധാവി മോഹന്‍ ഭഗവത്, പ്രധാനമന്ത്രി നരേന്ദ്ര മോദി എന്നിവരൊക്കെയാണ് സിനിമ കാണാന്‍ ശുപാര്‍ശ ചെയ്തിരുന്നു. ബി. ജെ.പി ഭരിക്കുന്ന സംസ്ഥാനങ്ങള്‍ സിനിമക്ക് നികുതി ഒഴിവാക്കുകയും ചെയ്തിരുന്നു.

അക്രമത്തെ ഭയാനകമായ രീതിയില്‍ സിനിമ കാണിക്കുന്നു, ചിലത് യഥാര്‍ത്ഥ കഥകളെ അടിസ്ഥാനമാക്കിയുള്ളതായിരിക്കണം. ഇത്തരം ക്രൂരമായ അക്രമങ്ങള്‍ നടന്നിട്ടില്ലെന്ന് മറുവാദങ്ങളുണ്ട്. മുസ്‌ലിം അയല്‍വാസികള്‍ പണ്ഡിറ്റുകളെ അതിക്രമങ്ങളില്‍നിന്ന് രക്ഷിക്കുകയും അവരെ പലവിധത്തില്‍ സഹായിക്കുകയും ചെയ്തതിന്റെ കഥകളുണ്ട്. കശ്മീരി ജീവിതത്തിലെ സൗഹാര്‍ദ്ദപരമായ എല്ലാ പ്രതിഭാസങ്ങളും ബോധപൂര്‍വം മറച്ചുവെക്കപ്പെടുന്നു. കശ്മീരി പണ്ഡിറ്റുകളുടെ കൊലപാതകങ്ങള്‍ ഏകപക്ഷീയമായി എടുത്തുകാണിക്കുന്നതാണ് ചിത്രം. തീവ്രവാദികളുടെ ക്രോധം നേരിട്ട മുസ്‌ലിംകളുടെ കൊലപാതകങ്ങള്‍ എന്തുകൊണ്ടാണ് കാണിക്കാത്തതെന്ന് ഒരു അഭിമുഖത്തില്‍ ചിത്രത്തിന്റെ സംവിധായകനോട് ചോദിച്ചു. രണ്ടാം ലോക യുദ്ധത്തില്‍ ജര്‍മന്‍കാരും ജൂതന്മാരും കൊല്ലപ്പെട്ടുവെന്ന അദ്ദേഹത്തിന്റെ പ്രതികരണം തീര്‍ത്തും തെറ്റായിരുന്നു. ജര്‍മനിയിലെ ജൂതന്മാരെപ്പോലെ പണ്ഡിറ്റുകളുടെ കൊലപാതകങ്ങളും നാം ഓര്‍ക്കണമെന്ന് അദ്ദേഹം പറയുന്നു! തികച്ചും യുക്തിരഹിതമായ താരതമ്യം. ജര്‍മന്‍കാര്‍ തടങ്കല്‍പ്പാളയങ്ങളില്‍ മരിച്ചിട്ടില്ല, ഹിറ്റ്‌ലറുടെ ഫാസിസ്റ്റ് നയത്തിന്റെ ഇരകളായ ജൂതന്മാരാണ് ഓര്‍മിക്കപ്പെടുന്നത്.

മുസ്‌ലിംകള്‍ മാത്രമാണ് പണ്ഡിറ്റുകളെ കൊന്നതെന്ന് ജമ്മുകശ്മീരില്‍ നിന്നുള്ള മറ്റൊരു ബി.ജെ.പി നേതാവ് വാദിക്കുന്നു. മുസ്‌ലിം സമുദായത്തെ മുഴുവന്‍ ഭീകരവാദികളുടെ നിറത്തില്‍ അവതരിപ്പിക്കാനുള്ള ശ്രമമാണിത്. സ്വയംഭരണ വ്യവസ്ഥകളോടുള്ള എതിര്‍പ്പും അടിച്ചമര്‍ത്തലും കശ്മീരി യുവാക്കള്‍ക്കിടയില്‍ അസംതൃപ്തിയും അകല്‍ച്ചയും സൃഷ്ടിച്ചു. ഈ അന്യവത്കരണം വിവിധ ഘട്ടങ്ങളിലൂടെ കടന്നുപോയി. തുടക്കത്തില്‍, അത് കശ്മീരിയത്തിന്റെ അടിസ്ഥാന മൂല്യങ്ങളെ അടിസ്ഥാനമാക്കിയുള്ളതായിരുന്നു. 1980മുതല്‍ അത് ഇന്ത്യാ വിരുദ്ധമായി മാറുകയും പിന്നീട് ഹിന്ദു വിരുദ്ധ രൂപം കൈക്കൊള്ളുകയും ചെയ്തു. ജമ്മുകശ്മീര്‍ ബി.ജെ.പി നേതാവ് ടികലാല്‍ ടിപ്ലുവിന്റെ കൊലപാതകത്തിന് മുമ്പ് നാഷണല്‍ കോണ്‍ഫറന്‍സിന്റെ മുഹമ്മദ് യൂസഫ് ഹല്‍വായിയുടേതായിരുന്നു ആദ്യത്തെ രാഷ്ട്രീയ കൊലപാതകം. രണ്ട് സമുദായങ്ങള്‍ പരസ്പരം പോരടിക്കുന്ന വര്‍ഗീയ കലാപമായിരുന്നില്ല അത് എന്ന് നാം അറിയണം. അജണ്ട അടിസ്ഥാനമാക്കിയുള്ള ഭീകരാക്രമണമായിരുന്നു അത്.

‘പണ്ഡിറ്റുകള്‍ മാത്രം കൊല്ലപ്പെട്ടു’ എന്നത് ബോധപൂര്‍വമായ പച്ചക്കള്ളമാണ്. തെറ്റ് കാണിക്കുന്നത് സത്യം മറച്ചുവെക്കുന്നത് പോലെതന്നെ അപകടകരമാണെന്ന് സിനിമതന്നെ കാണിക്കുന്നു; അത് മുസ്‌ലികളുടെ കൊലപാതകങ്ങളും പലായനവും പൂര്‍ണമായും മറച്ചുവെക്കുന്നു. പണ്ഡിറ്റുകള്‍ക്ക് മാത്രമേ താഴ്‌വര വിടേണ്ടിവന്നിട്ടുള്ളൂവെന്ന് ചലച്ചിത്ര സംവിധായകന്‍ വിവിധ അഭിമുഖങ്ങളില്‍ പറയുന്നു. 50,000ത്തിലധികം മുസ്‌ലിംകള്‍ക്കും നാടുവിടേണ്ടിവന്നു എന്നതാണ് സത്യം. ഇപ്പോള്‍ താഴ്‌വരയില്‍ പണ്ഡിറ്റുകളില്ലെന്ന് അദ്ദേഹം അവകാശപ്പെടുന്നു. വീണ്ടും ഒരു മുഴുനീള നുണ! താഴ്‌വരയില്‍ എണ്ണൂറോളം പണ്ഡിറ്റ് കുടുംബങ്ങള്‍ താമസിക്കുന്നുണ്ടെന്ന വസ്തുത അദ്ദേഹം ബോധപൂര്‍വം മറച്ചുവെക്കുന്നു.

അവരുടെ സംഘടനയാണ് കശ്മീര്‍ പണ്ഡിറ്റ് സുരക്ഷാ സമിതി (കെ.പി.എസ്.എസ്). താഴ്‌വരയില്‍ താമസിക്കുന്ന പണ്ഡിറ്റുകളെ ഈ സിനിമ പ്രതികൂലമായി ബാധിച്ചേക്കുമെന്ന് അതിന്റെ നേതാവ് സഞ്ജയ് ടിക്കൂ ഭയപ്പെടുന്നു. ഈ സിനിമ സമുദായങ്ങളെ ധ്രുവീകരിക്കുകയും വിദ്വേഷം പ്രചരിപ്പിക്കുകയും ജമ്മുകശ്മീരിലെയും മറ്റിടങ്ങളിലെയും ജനങ്ങള്‍ ഇനിയൊരിക്കലും ആവര്‍ത്തിക്കാന്‍ ആഗ്രഹിക്കാത്ത അക്രമങ്ങള്‍ക്ക് ആക്കം കൂട്ടുകയും ചെയ്‌തേക്കാമെന്നും അദ്ദേഹം ഭയപ്പെടുന്നു. കശ്മീരി മുസ്‌ലിംകളും പണ്ഡിറ്റുകളും തമ്മിലുള്ള ബന്ധത്തെക്കുറിച്ച് അദ്ദേഹം വിശദീകരിക്കുന്നു: ‘ഞങ്ങള്‍ കൂട്ട കുടിയേറ്റം എന്ന് വിളിക്കുന്നത് 1990 മാര്‍ച്ച് 15 മുതലാണ് ആരംഭിച്ചത്. തീവ്രവാദ സംഘടനകള്‍ ദിവസേന ഹിറ്റ്‌ലിസ്റ്റുകള്‍ ഉണ്ടാക്കുകയും പള്ളികളില്‍ ഒട്ടിക്കുകയും ചെയ്തു. ഈ പട്ടികയില്‍ പണ്ഡിറ്റുകളും നാഷണല്‍ കോണ്‍ഫറന്‍സ് പ്രവര്‍ത്തകരും മുസ്‌ലിംകളും ഉണ്ടായിരുന്നു. ഓരോ പണ്ഡിറ്റുകളും മുസ്‌ലിംകളും തമ്മില്‍ സൗഹാര്‍ദ്ദപരമായ ബന്ധമുണ്ടായിരുന്നതിനാല്‍ വൈകുന്നേരത്തെ നമസ്‌കാരത്തിന് ശേഷം രണ്ടാമന്‍ പേര് കണ്ടാല്‍ തന്റെ (പണ്ഡിറ്റ്) അയല്‍ക്കാരനെ അറിയിക്കും. തന്റെ സുഹൃത്ത്/അയല്‍ക്കാരനെയും അവരുടെ കുടുംബത്തെയും രക്ഷിക്കാന്‍ അവന്‍ ആഗ്രഹിച്ചു.

സംവിധായകന്റെയും സിനിമയെ ശുപാര്‍ശ ചെയ്യുന്നവരുടെയും പ്രോത്സാഹിപ്പിക്കുന്നവരുടെയും ഭിന്നിപ്പിക്കല്‍ അജണ്ടക്ക് അനുയോജ്യമല്ലാത്ത കാര്യങ്ങളാണിത്. ‘സൂഫിയുടെ വാള്‍’ (സിനിമയിലെ അനുപം ഖേറിന്റെ സംഭാഷണം) ഇസ്‌ലാം സ്വീകരിച്ച പണ്ഡിറ്റുകള്‍/ഹിന്ദുക്കള്‍ മാത്രമാണ് കശ്മീരില്‍ അധിവസിച്ചിരുന്നത് എന്ന സ്റ്റീരിയോടൈപ്പും സിനിമ ഉപയോഗിക്കുന്നു. താഴ്‌വരയിലും ഇന്ത്യയുടെ മറ്റ് ഭാഗങ്ങളിലും ഇസ്‌ലാം വ്യാപിച്ചതിന്റെ സത്യാവസ്ഥയില്‍നിന്ന് ഇത് വളരെ അകലെയാണ്. സൂഫി സന്യാസിമാര്‍ ആത്മീയതയ്ക്കും സ്‌നേഹത്തിനും വേണ്ടി നിലകൊള്ളുന്നവരാണെന്ന സൂഫി പാരമ്പര്യത്തെ കുറിച്ചുള്ള ചെറിയ അറിവ്‌പോലും നമ്മോട് പറയും. അങ്ങനെയാണ് ഇന്നുവരെയുള്ള മിക്ക സൂഫി ആരാധനാലയങ്ങളും ഹിന്ദുക്കളും മുസ്‌ലിംകളും സന്ദര്‍ശിക്കുന്നത്. പലരും ഇസ്‌ലാം മതം സ്വീകരിച്ചത് രാജാക്കന്മാരുടെ വാളിനേക്കാള്‍ ജാതി അതിക്രമങ്ങള്‍ മൂലമാണ്. സ്വാമി വിവേകാനന്ദന്‍ പറഞ്ഞു: ‘മതപരിവര്‍ത്തനങ്ങള്‍ നടന്നത് ക്രിസ്ത്യാനികളുടെയും മുസ്‌ലിംകളുടെയും ക്രൂരതകള്‍ കൊണ്ടല്ല, മറിച്ച് സവര്‍ണരുടെ അതിക്രമങ്ങള്‍ മൂലമാണ്’.

64ാമത് സംസ്ഥാന സ്‌കൂള്‍ കായിക മേളക്ക് തലസ്ഥാന നഗരിയില്‍ തിരശ്ശീല വീഴുമ്പോള്‍ കായിക കൗമാരം തളരുന്നുവോ എന്ന ആശങ്കയാണ് ബാക്കിയാവുന്നത്. ദേശീയ ഗെയിംസില്‍ കേരളം വര്‍ഷങ്ങളായി ട്രാക്കിലും ഫീല്‍ഡിലും പിന്നോട്ടു നടന്നുകൊണ്ടിരിക്കുമ്പോള്‍ സ്‌കൂള്‍ കായികമേളയിലും ഉണ്ടായിക്കൊണ്ടിരിക്കുന്ന ഈ ആവേശക്കുറവ് കൂടുതല്‍ ഗൗരവതരമായ ചര്‍ച്ചകള്‍ക്ക് വഴിതുറക്കപ്പെടേണ്ടതാണ്. 2019 ല്‍ കണ്ണൂരില്‍ നടന്ന തൊട്ടുമുമ്പത്തെ മേളയില്‍ 16 മീറ്റ് റെക്കോര്‍ഡുകള്‍ പിറന്നുവെങ്കില്‍ തിരുവനന്തപുരത്തേക്കെത്തിയപ്പോള്‍ അത് ആറായി ചുരുങ്ങിയിരിക്കുകയാണ്. അതോടൊപ്പം മീറ്റിലെ നിറസാനിധ്യങ്ങളായ സ്‌കൂളുകളുടെ തളര്‍ച്ചയും ചില സ്‌കൂളുകളുടെ പിന്‍മാറ്റവും ശുഭസൂചനകളല്ല നല്‍കുന്നത്.

എറണാകുളം മാര്‍ബേസില്‍, പാലക്കാട് പറളി, മുണ്ടൂര്‍ സ്‌കൂളുകളുടെ പ്രകടനം മുന്‍കാലത്തെ അപേക്ഷിച്ച്‌മോശമായപ്പോള്‍ കോതമംഗലം സെന്റ്‌ജോര്‍ജ് മീറ്റിനുതന്നെ എത്തിയില്ല. മേളയുടെ ചരിത്രത്തില്‍തന്നെ ഏറ്റവും കുറവ് റെക്കോര്‍ഡുകള്‍ പിറന്ന മീറ്റുകളിലൊന്നാണ് കഴിഞ്ഞുപോയതെന്നത് മാത്രമല്ല ഈ ആറ് റെക്കോര്‍ഡുകളില്‍ ഒന്നുമാത്രമാണ് ട്രാക്കില്‍ സംഭവിച്ചത് എന്നതും അടിവരയിടേണ്ടതാണ്. അധികൃതരുടെ അനാസ്ഥ തന്നെയാണ് ഈ പിന്നോട്ടടിയുടെ ഒന്നാമത്തെ കാരണം എന്നത് ആരോപണത്തിനപ്പുറം ഒരു യാഥാര്‍ത്ഥ്യം മാത്രമാണ്. സ്‌കൂള്‍ തലത്തിലായാലും സീനിയര്‍ തലത്തിലായാലും കായിക രംഗത്ത് പ്രഖ്യാപനങ്ങള്‍ മാത്രമാണ് പലപ്പോഴും നടക്കുന്നത്. പതിവുപോലെ തിരുവനന്തപുരത്തെ ഉദ്ഘാടനച്ചടങ്ങിലും മുഖ്യമന്ത്രി വിസ്മയകരമായ പ്രഖ്യാപനങ്ങളും മോഹന വാഗ്ദാനങ്ങളുമാണ് വിദ്യാര്‍ത്ഥി പ്രതിഭകള്‍ക്കു മുന്നില്‍ നിരത്തിയത്. എന്നാല്‍ അദ്ദേഹത്തിന്റെ വാക്കുകളോട് പൊരുത്തപ്പെടുന്ന നിലയിലല്ല കായികരംഗത്തെ നിലവിലുള്ള യാഥാര്‍ത്ഥ്യങ്ങള്‍. പതിനയ്യായിരത്തിലധികം വരുന്ന കേരളത്തിലെ പൊതു വിദ്യാലയങ്ങളില്‍ രണ്ടായിരത്തിനടുത്തിടങ്ങളില്‍ മാത്രമാണ് കായികാധ്യാപക തസ്തിക നിലവിലുള്ളത് എന്നത് ഈ അവസ്ഥക്കുള്ള ഒരുദാഹരണം മാത്രമാണ്.

തിരിച്ചടികള്‍ക്കിടയിലും പുതിയ ജില്ലകളും സ്‌കൂളുകളും മുന്‍നിരയിലേക്ക് കടന്നുവരുന്നത് ശ്രദ്ധേയമാണ്. 2019ല്‍ ആറാം സ്ഥാനത്തുണ്ടായിരുന്ന മലപ്പുറം ജില്ല വിസ്മയകരമായ കുതിപ്പിലൂടെ രണ്ടാം സ്ഥാനത്ത് ഫിനിഷ്‌ചെയ്തിരിക്കുകയാണ്. 13 സ്വര്‍ണവും 17 വെള്ളിയും 14 വെങ്കലവുമായി 149 പോയിന്റ് നേടിയ ജില്ല ആധികാരിക മുന്നേറ്റമാണ് കാഴ്ചവെച്ചത്. 54 വര്‍ഷത്തെ ചരിത്രത്തിനിടയില്‍ ഇതാദ്യമായാണ് മലപ്പുറം രണ്ടാമതെത്തുന്നത്. സ്‌കൂളുകളില്‍ മലപ്പുറത്തെ തന്നെ കടകശ്ശേരി ഇ.എച്ച്.എസ്.എസ് പ്രമുഖരെയെല്ലാം വെട്ടിനിരത്തി ഒന്നാമതെത്തിയിരിക്കുകയാണ്. കഴിഞ്ഞ തവണ 13 ാം സ്ഥാനത്തായിരുന്ന ഐഡിയല്‍ 25 പേരുമായെത്തി 20 മെഡലും സ്വന്തമാക്കിയാണ് മടങ്ങിയത്. കാസര്‍കോട് ജില്ലയിലെ കെ.സി ത്രോസ് സ്‌കൂളും ആവേശകരമായ പ്രകടനമാണ് കാഴ്ചവെച്ചത്. എട്ടുപേരുമായി വന്ന് അവര്‍ നേടിയത് ഒരു ട്രിപ്പിള്‍ ഉള്‍പ്പെടെ ഏഴ് സ്വര്‍ണവും ഒരു വെള്ളിയുമാണ്. ഇതില്‍ തന്നെ നാലു മീറ്റ് റെക്കോര്‍ഡുകളും. അക്കാദമിക് രംഗത്തെന്നപോലെ കായിക രംഗത്തും കലാരംഗത്തുമെല്ലാം മലപ്പുറം പ്രകടിപ്പിക്കുന്ന മുന്നേറ്റം മറച്ചുപിടിക്കാന്‍ സാധിക്കാത്തതാണ്.

ത്രിതല പഞ്ചായത്തുകളുള്‍പ്പെടെയുള്ള പ്രാദേശിക ഭരണ സംവിധാങ്ങളുടെ നേതൃത്വത്തില്‍ നടക്കുന്ന ജനകീയ മുന്നേറ്റങ്ങളാണ് ഈ കുതിച്ചു ചാട്ടത്തിനു പിന്നില്‍ എന്നത് വ്യക്തമാണ്. സാമ്പത്തിക ഞെരുക്കത്തിന്റെയും മറ്റും പേരില്‍ സേവനമേഖലയില്‍നിന്ന് ഭരണകൂടങ്ങള്‍ പിന്‍വാങ്ങുന്നതിന്റെ തിരിച്ചടിയേല്‍ക്കേണ്ടി വരുന്നവരില്‍ നമ്മുടെ വിദ്യാലയങ്ങളുമുണ്ട്. അടിസ്ഥാന സൗകര്യത്തിന്റെ അപര്യാപ്തതകൊണ്ട് വിദ്യാര്‍ത്ഥികളുടെ സര്‍ഗാത്മകവും കായികപരവുമായ മികവുകള്‍ പരിപോഷിക്കപ്പെടാതെ പോകുന്ന സാഹചര്യം ഇന്നും നമ്മുടെ നാട്ടില്‍ നിലനില്‍ക്കുകയാണ്. ഈ അപര്യാപ്തതയെ ജനകീയ മുന്നേറ്റത്തിലൂടെ മറികടക്കുന്നു എന്നതാണ് മലപ്പുറം രചിക്കുന്ന നവവിപ്ലവത്തിന്റെ രഹസ്യം.

കായിക രംഗത്ത് സര്‍ക്കാറിന്റെ ശ്രദ്ധ കൂടുതല്‍ പതിയേണ്ടതിന്റെ ആവശ്യകതയിലേക്ക് ഓരോ മേളകളും വിരല്‍ചൂണ്ടിക്കൊണ്ടിരിക്കുകയാണ്. ഇക്കഴിഞ്ഞ ദേശീയ ഗെയിംസില്‍ നിരാശാജനകമായ പ്രകടനമാണ് കേരളം കാഴ്ച്ചവെച്ചത്. അയല്‍ സംസ്ഥാനങ്ങളായ കര്‍ണാടകവും തമിഴ്‌നാടുമെല്ലാം മികച്ച പ്രകടനം കാഴചവെച്ചപ്പോള്‍ ഒരു കാലത്ത് സംസ്ഥാനത്തിന്റെ കുത്തകയായിരുന്ന ട്രാക്കിലും ഫീല്‍ഡിലുമെല്ലാം ബഹുദൂരം പിന്നോട്ടടിക്കുകയുണ്ടായി. സ്‌കൂള്‍ കായിക മേളയും നല്‍കുന്നത് ഭാവി എത്രത്തോളം ശുഭകരമാണ് എന്ന സന്ദേഹം തന്നെയാണ്.

ഇരുപത്തിയേഴാമത് കേരളാ രാജ്യാന്തര ചലച്ചിത്രമേളയ്ക്ക് ഇനി രണ്ട് നാള്‍ മാത്രം. സിനിമാപ്രവര്‍ത്തകരും ചലച്ചിത്രപ്രേമികളും പങ്കെടുക്കും. 14 തിയേറ്ററുകളിലായി 70 ലധികം രാജ്യങ്ങളില്‍ നിന്നുള്ള 184 ചിത്രങ്ങളാണ് എട്ടുദിവസം നീണ്ടുനില്ക്കുന്ന മേളയില്‍ പ്രദര്‍ശിപ്പിക്കുന്നത്. മേളയുടെ ഉദ്ഘാടന സമാപനചടങ്ങുകള്‍ നിശാ ഗന്ധിയില്‍ നടക്കും. മേളയുടെ ഭാഗമായി വിവിധ തരം കലാ സാംസ്‌കാരിക പരിപാടികളും അരങ്ങേറും.

വിവിധ തിയേറ്ററുകളിലായി 9600 സീറ്റുകളാണ് മേളയ്ക്കായി സജ്ജമാക്കിയിട്ടുള്ളത്. 2500 സീറ്റുകള്‍ ഉള്ള ഓപ്പണ്‍ തിയേറ്റര്‍ ആയ നിശാഗന്ധിയാണ് ഏറ്റവും വലിയ പ്രദര്‍ശന വേദി. മിഡ്‌നൈറ്റ് സ്‌ക്രീനിങ് ചിത്രമായ സാത്താന്‍സ് സ്ലേവ്‌സ് 2 കമ്മ്യൂണിയന്‍ ഉള്‍പ്പടെ പ്രധാന ചിത്രങ്ങള്‍ ഇവിടെ പ്രദര്‍ശിപ്പിക്കും.