tech
ഓരോ 60 സെക്കന്ഡിലും ഇന്ത്യക്കാര് വാങ്ങിയത് 1.5 കോടി രൂപയുടെ സ്മാര്ട് ഫോണുകള്
ഒക്ടോബര് 15 മുതല് 21 വരെ നടന്ന ഉത്സവ വില്പ്പനയുടെ 47 ശതമാനവും സ്മാര്ട് ഫോണുകള് ആയിരുന്നു
മുന്നിര ഇ-കൊമേഴ്സ് വെബ്സൈറ്റുകളായ ആമസോണ്, ഫ്ലിപ്കാര്ട്ട് വഴി കഴിഞ്ഞ ദിവസങ്ങളില് ഏറ്റവും വലിയ വില്പ്പനയാണ് നടന്നതെന്നാണ് പുതിയ റിപ്പോര്ട്ട്. ഒക്ടോബര് 15 മുതല് 21 വരെ നടന്ന ഉത്സവ വില്പ്പനയുടെ 47 ശതമാനവും സ്മാര്ട് ഫോണുകള് ആയിരുന്നു. ഉപഭോക്താക്കള് കൂടുതല് ആവശ്യപ്പെടുന്ന ഷോപ്പിങ് വിഭാഗത്തില് സ്മാര്ട് ഫോണുകളായിരുന്നു മുന്നില്. പുതിയ ഫോണുകളുടെ അവതരിപ്പിക്കലും താങ്ങാനാവുന്ന വിലകളും ഉപഭോക്താക്കളെ ഏറെ ആകര്ഷിച്ചു.
ഉത്സവ വില്പ്പനയുടെ ആദ്യ ആഴ്ചയില് ഓരോ 60 സെക്കന്ഡിലും 1.5 കോടി രൂപയുടെ സ്മാര്ട് ഫോണുകള് ഓണ്ലൈന് പ്ലാറ്റ്ഫോമുകളില് വിറ്റഴിച്ചുവെന്നാണ് ബെംഗളൂരു ആസ്ഥാനമായുള്ള മാര്ക്കറ്റ് റിസര്ച്ച് സ്ഥാപനമായ റെഡ്സീര് അഭിപ്രായപ്പെട്ടത്. വസ്ത്രങ്ങള്ക്കായുള്ള ആവശ്യം ഇപ്പോഴും കുറവാണ്. എന്നാല്, ഫാഷന് വിഭാഗത്തില് കഴിഞ്ഞ വര്ഷത്തെപ്പോലെ വലിയ വില്പ്പന കാണിച്ചില്ലെങ്കിലും ഉത്സവ സീസണില് വില്പ്പനയുടെ 14 ശതമാനം പിടിച്ചെടുക്കാന് സാധിച്ചെന്നും റെഡ്സീര് വ്യക്തമാക്കി.
വീട്ടില് നിന്ന് ജോലി ചെയ്യുന്നതിനും പഠിക്കുന്നതിനും അടിസ്ഥാന സൗകര്യങ്ങള് ഒരുക്കുന്നതിനുള്ള ഉല്പ്പന്നങ്ങളുടെ വില്പ്പനയും കൂടി. ഏഴു ദിവസത്തെ ഉത്സവ വില്പ്പനയില് 50 ലക്ഷം ഹാന്ഡ്സെറ്റുകള് വിറ്റതായി സ്മാര്ട് ഫോണ് ബ്രാന്ഡായ എംഐ ഇന്ത്യ അറിയിച്ചു.
ചൈനീസ് സ്മാര്ട് ഫോണ് ബ്രാന്ഡായ പോക്കോ ഉത്സവ വില്പ്പന കാലയളവില് 10 ലക്ഷത്തിലധികം സ്മാര്ട് ഫോണുകള് ഫ്ലിപ്കാര്ട്ടില് വിറ്റു. മൊബൈല് വിഭാഗത്തില് പ്ലാറ്റ്ഫോം ഉപഭോക്താക്കളില് രണ്ട് മടങ്ങ് വളര്ച്ച രേഖപ്പെടുത്തിയെന്ന് ഫ്ലിപ്കാര്ട്ട് നേരത്തെ വെളിപ്പെടുത്തിയിരുന്നു.
tech
33 വര്ഷം മുമ്പ് ലോകത്തെ മാറ്റിയ ‘മെറി ക്രിസ്മസ്’; ആദ്യ എസ്എംഎസിന് ഇന്ന് ജന്മദിനം
1992 ഡിസംബര് 3ന് വോഡഫോണ് എഞ്ചിനിയര് നീല് പാപ്വോര്ത്ത് തന്റെ കമ്പ്യൂട്ടറില് നിന്ന് സഹപ്രവര്ത്തകനായ റിച്ചാര്ഡ് ജാര്വീസിന്റെ ഓര്ബിറ്റല് 901 മൊബൈല് ഫോണിലേക്ക് അയച്ച ‘Merry Christmas’ ആയിരുന്നു ലോകത്തെ ആദ്യ എസ്എംഎസ് സന്ദേശം
വാഷിങ്ടണ്: ആഗോള ആശയവിനിമയത്തില് വിപ്ലവം സൃഷ്ടിച്ച ആദ്യത്തെ ടെക്സ്റ്റ് മെസേജിന് ഇന്ന് 33 വര്ഷം. 1992 ഡിസംബര് 3ന് വോഡഫോണ് എഞ്ചിനിയര് നീല് പാപ്വോര്ത്ത് തന്റെ കമ്പ്യൂട്ടറില് നിന്ന് സഹപ്രവര്ത്തകനായ റിച്ചാര്ഡ് ജാര്വീസിന്റെ ഓര്ബിറ്റല് 901 മൊബൈല് ഫോണിലേക്ക് അയച്ച ‘Merry Christmas’ ആയിരുന്നു ലോകത്തെ ആദ്യ എസ്എംഎസ് സന്ദേശം. അതുവരെ മൊബൈല് ഫോണിലൂടെ എഴുത്ത് സന്ദേശങ്ങള് അയയ്ക്കാനുള്ള സംവിധാനം ഇല്ലാതിരുന്നതിനാല് ഈ ചെറുസന്ദേശം തന്നെ ആശയവിനിമയരംഗത്ത് വലിയ വഴിത്തിരിവായി.
160 അക്ഷരപരിധിയുള്ള ലഘു മെസേജായിരുന്നെങ്കിലും ഈ സാങ്കേതിക പരീക്ഷണം പിന്നീട് ലോകമൊട്ടുക്കും ആശയവിനിമയത്തിന്റെ മുഖച്ഛായ തന്നെ മാറ്റിയ സംഭവമായി. ഈ ആദ്യ സന്ദേശം അയച്ചതോടെ ആശയവിനിമയ രംഗത്ത് പുതിയ അധ്യായം തുടങ്ങിയതും തുടര്ന്ന് എസ്എംഎസ് ആഗോള നിലവാരമായി മാറുകയും ചെയ്തു. ഇന്ന് വാട്ട്സ്ആപ്പ്, ഫേസ്ബുക്ക് മെസഞ്ചര്, ഇന്സ്റ്റാഗ്രാം ഡി.എം., ഇമോജികള്, ഏകഎകള്, ഗ്രൂപ്പ് ചാറ്റുകള് തുടങ്ങി അനവധി സംവിധാനങ്ങളിലൂടെ ഓരോ സെക്കന്ഡിലും ദശലക്ഷക്കണക്കിന് സന്ദേശങ്ങള് ലോകമെമ്പാടും കൈമാറുന്നു.
സോഷ്യല് മീഡിയയില് ഇന്ന് ആദ്യ എസ്എംഎസിനെ കുറിച്ച് രസകരമായ പ്രതികരണങ്ങളും ഉയരുന്നുണ്ട്. ‘ക്രിസ്മസിന് മുന്പേ ‘മെറി ക്രിസ്മസ്’ അയച്ചത് എന്തിനു?’ എന്ന പരിഹാസത്തിനൊപ്പം, ഒരു ലളിതമായ രണ്ട് വാക്കുകളുടെ സന്ദേശം ലോകത്തെ സാങ്കേതിക പുരോഗതിയുടെ വഴി തുറന്ന മഹത്തായ നിമിഷമാണെന്ന് പലരും ഓര്മ്മിപ്പിക്കുന്നു. 33 വര്ഷം മുമ്പ് ആരംഭിച്ച ഈ ചെറുസന്ദേശത്തിന്റെ യാത്ര ഇന്ന് കോടിക്കണക്കിന് ആശയങ്ങള് കൈമാറ്റം ചെയ്യുന്ന അതിവേഗ ഡിജിറ്റല് ലോകത്തിന്റെയും അടിസ്ഥാനം തന്നെയാണെന്ന് വിദഗ്ധര് ചൂണ്ടിക്കാട്ടുന്നു
tech
ഗൂഗിള് ജെമിനി; 2025-ല് ഇന്ത്യയില് ഏറ്റവും കൂടുതല് ജനങ്ങള് തെരഞ്ഞ എ.ഐ. ടൂള്
ഗൂഗിളിന്റെ പുതിയ ‘ഇയര് ഇന് സെര്ച്ച്’ റിപ്പോര്ട്ടിലാണ് ജെമിനി ചാറ്റ് ജിപിടിയെയും പെര്പ്ലെക്സിറ്റിയെയും ഉള്പ്പെടെ നിരവധി എ.ഐ. പ്ലാറ്റ്ഫോമുകളെ മറികടന്ന് ഒന്നാം സ്ഥാനത്തെത്തിയതായി വ്യക്തമാക്കുന്നത്.
2025-ല് ഇന്ത്യയില് ഏറ്റവും കൂടുതല് ജനങ്ങള് തെരഞ്ഞ എ.ഐ. ടൂളായി ഗൂഗിളിന്റെ ജെമിനി എ.ഐ ഉയര്ന്നു. ഗൂഗിളിന്റെ പുതിയ ‘ഇയര് ഇന് സെര്ച്ച്’ റിപ്പോര്ട്ടിലാണ് ജെമിനി ചാറ്റ് ജിപിടിയെയും പെര്പ്ലെക്സിറ്റിയെയും ഉള്പ്പെടെ നിരവധി എ.ഐ. പ്ലാറ്റ്ഫോമുകളെ മറികടന്ന് ഒന്നാം സ്ഥാനത്തെത്തിയതായി വ്യക്തമാക്കുന്നത്.
ഇന്ത്യക്കാര് സര്ഗ്ഗാത്മകതക്കും ഉല്പ്പാദനക്ഷമതക്കും വേണ്ടിയുള്ള എ.ഐ. ഉപകരണങ്ങള് കൂടുതലായി അന്വേഷിക്കുകയാണ് എന്നതാണ് റിപ്പോര്ട്ട് ചൂണ്ടിക്കാണിക്കുന്നത്. ഈ വര്ഷം ഇന്ത്യയില് ഏറ്റവും കൂടുതല് ആളുകള് തിരഞ്ഞത് ഐ.പി.എല് ആയപ്പോള്, അതിന് താഴെ ജെമിനി രണ്ടാമതായി.
ഗൂഗിള് പുറത്തിറക്കിയ ഏറ്റവും ട്രെന്ഡിങ് എ.ഐ. സെര്ച്ച് പട്ടികയിലും ജെമിനി ഒന്നാംസ്ഥാനത്ത്. ‘ജെമിനി എ.ഐ ഫോട്ടോ’ രണ്ടാമതും ഗ്രോക്ക് മൂന്നാമതും ഡീപ്സീക്ക് നാലാമതും പെര്പ്ലെക്സിറ്റി അഞ്ചാമതും ഗൂഗിള് എ.ഐ സ്റ്റുഡിയോ ആറാമതുമാണ്. ചാറ്റ് ജിപിടി ഏഴാം സ്ഥാനത്തും ‘ചാറ്റ് ജിപിടി ഗിബ്ലി ആര്ട്ട്’ എട്ടാം സ്ഥാനത്തും ഫ്ലോ ഒമ്പതാം സ്ഥാനത്തും ‘ഗിബ്ലി സ്റ്റൈല് ഇമേജ് ജനറേറ്റര്’ പത്താംസ്ഥാനത്തുമാണ് സ്ഥാനം പിടിച്ചത്.
ഇന്ത്യയിലെ സമഗ്ര ട്രെന്ഡിങ്ങ് പട്ടികയിലും ജെമിനിയുമായി ബന്ധപ്പെട്ട സെര്ചുകള് തന്നെ മുന്പന്തിയില്. ‘ജെമിനി ട്രെന്ഡ്’ ഒന്നാമതും ‘ഗിബ്ലി ട്രെന്ഡ്’ രണ്ടാമതും ‘3ഡി മോഡല് ട്രെന്ഡ്’ മൂന്നാമതും ‘ജെമിനി സാരി ട്രെന്ഡ്’ നാലാമതും ‘ആക്ഷന് ഫിഗര് ട്രെന്ഡ്’ അഞ്ചാമതും ഇടം പിടിച്ചു.
എ.ഐ. ഉപകരണങ്ങള് ഇന്ത്യയിലെ നിത്യജീവിതത്തിലും സൃഷ്ടിപരവുമായ മേഖലകളിലും കൂടുതല് ചേര്ന്ന് വരുന്നതിന്റെ തെളിവാണ് ഈ റിപ്പോര്ട്ടുകള് വ്യക്തമാക്കുന്നത്.
News
മെസേജിങ് ആപ്പുകള്ക്ക് കര്ശനനിയന്ത്രണം; ആക്ടീവ് സിം ഇല്ലാതെ ഉപയോഗിക്കാനാവില്ല
ടെലികമ്യൂണിക്കേഷന് ഭേദഗതി നിയമത്തിന്റെ ഭാഗമായി പുതിയ മാര്ഗനിര്ദേശങ്ങള് ഡിപ്പാര്ട്ട്മെന്റ് ഓഫ് ടെലികമ്യൂണിക്കേഷന്സ് പുറത്തിറക്കി.
ന്യൂഡല്ഹി: വാട്സാപ്പ്, ടെലിഗ്രാം, സിഗ്നല്, സ്നാപ്പ്ചാറ്റ്, ഷെയര്ചാറ്റ്, ജിയോ ചാറ്റ്, അരാട്ടെ, ജോഷ് തുടങ്ങി രാജ്യത്ത് വ്യാപകമായി ഉപയോഗിക്കുന്ന മെസേജിങ് ആപുകളില് നിര്ണായക മാറ്റങ്ങള് വരുത്തി കേന്ദ്ര സര്ക്കാര്. ടെലികമ്യൂണിക്കേഷന് ഭേദഗതി നിയമത്തിന്റെ ഭാഗമായി പുതിയ മാര്ഗനിര്ദേശങ്ങള് ഡിപ്പാര്ട്ട്മെന്റ് ഓഫ് ടെലികമ്യൂണിക്കേഷന്സ് പുറത്തിറക്കി.
പുതിയ നിയമപ്രകാരം ആക്ടീവ് സിം കാര്ഡില്ലാതെ ഇനി ഈ ആപ്പുകള് ഉപയോഗിക്കാനാവില്ല. സിം കാര്ഡ് ഉള്ള ഉപകരണങ്ങളില് മാത്രം മെസേജിങ് സേവനങ്ങള് ലഭ്യമാകണമെന്നാണ് നിര്ദ്ദേശം. ഇതോടെ സിം ഇല്ലാത്ത ഉപകരണങ്ങളിലൂടെയോ ഉപേക്ഷിച്ച സിം ഉപയോഗിച്ചുള്ള അക്കൗണ്ടുകളിലൂടെയോ ആപ്പുകള് പ്രവര്ത്തിപ്പിക്കുന്ന രീതി പൂര്ണമായി തടയപ്പെടും.
വെബ് ബ്രൗസര് വഴി ലോഗിന് ചെയ്യുന്ന ഉപയോക്താക്കള് ആറ് മണിക്കൂറിന് ഒരിക്കല് ലോഗ് ഔട്ട് ചെയ്യേണ്ടതുണ്ടെന്ന് പുതിയ മാര്ഗനിര്ദ്ദേശം പറയുന്നു. ലോഗ് ഔട്ട് ചെയ്യാത്ത പക്ഷം സിസ്റ്റം സ്വമേധയാ ഉപയോക്താവിനെ ലോഗ് ഔട്ട് ചെയ്യും.
ഇപ്പോള് വാട്സാപ്പ് പോലുള്ള ആപ്പുകളില് ലോഗിന് സമയത്ത് മാത്രമാണ് സിം കാര്ഡ് ആവശ്യം. പിന്നീട് സിം നീക്കം ചെയ്താലും സേവനം തുടരും. ഉപേക്ഷിച്ച സിം ഉപയോക്തൃ അക്കൗണ്ടുകള് സുരക്ഷാ ഭീഷണി സൃഷ്ടിക്കുന്നുവെന്ന് കേന്ദ്ര ടെലികമ്യൂണിക്കേഷന് മന്ത്രാലയം വിലയിരുത്തുന്നു.
പലരും സിം വാങ്ങി അക്കൗണ്ട് ആരംഭിച്ച് പിന്നീട് സിം ഉപേക്ഷിക്കുന്ന രീതി അന്വേഷണ ഏജന്സികള്ക്കും നിരീക്ഷണത്തിനും തടസം സൃഷ്ടിക്കുന്നതായാണ് കണ്ടെത്തല്.
യു.പി.ഐ., ബാങ്കിങ് ആപ്പുകള് തുടങ്ങി ഡിജിറ്റല് പേയ്മെന്റുകളില് ഇതിനോടുസമാനമായ കര്ശനസുരക്ഷാ സംവിധാനം നിലവിലുണ്ട്. സേബി മുന്പ് നിര്ദേശിച്ചതുപോലെ സിം ബന്ധിപ്പിക്കല്, ഫേഷ്യല് റെക്കഗ്നിഷന് തുടങ്ങി കൂടുതല് സുരക്ഷാ നടപടികളിലേക്ക് രാജ്യത്ത് നീങ്ങുന്നുവെന്നതിനും പുതിയ മാര്ഗനിര്ദേശം സൂചനയാകുന്നു.
-
kerala3 days agoഇത് മത്സ്യത്തൊഴിലാളി വിദ്യാര്ത്ഥികളെ ദ്രോഹിച്ച സര്ക്കാര്: ഷാഫി ചാലിയം
-
kerala2 days agoപിഎം ശ്രീ- ജോണ് ബ്രിട്ടാസ് വിവാദം: ‘ഇനിയും എത്ര പാലങ്ങള് വേണോ അത്രയും പാലങ്ങള് ഉണ്ടാക്കും, അതുകൊണ്ട് എന്താണ് കുഴപ്പം?’: എം.വി ഗോവിന്ദന്
-
News3 days ago1967 മുതല് കൈവശപ്പെടുത്തിയ ഫലസ്തീന് പ്രദേശങ്ങളില് നിന്നും ഇസ്രാഈല് പിന്വാങ്ങണം’; പ്രമേയം പാസാക്കി യുഎന്
-
kerala2 days agoസംഘടനാപരമായ പ്രവര്ത്തനങ്ങള്ക്കുള്ള പിന്തുണ മാത്രമേ ഇതുവരെ രാഹുലിന് ഞാന് നല്കിയിട്ടുള്ളൂ: ഷാഫി പറമ്പില്
-
GULF2 days agoഒരു മാസം എനിക്ക് അന്നം തന്നവരാണ് KMCC, കൊറോണ കാരണം ജോലി പോയപ്പോൾ അവരാണ് സഹായിച്ചത്: ഡാബ്സി
-
kerala13 hours agoയുഡിഎഫ് സ്ഥാനാര്ത്ഥിയുടെ വ്യാജ ചിത്രവുമായി സിപിഎമ്മുകാരുടെ വര്ഗീയ പ്രചാരണം; കുറ്റക്കാര്ക്കെതിരെ നിയമ നടപടി
-
india3 days agoപി.എം ശ്രീ പദ്ധതി: സിപിഎം- ബിജെപി ഡീലിലെ ഇടനിലക്കാരന് ജോണ് ബ്രിട്ടാസ്
-
india3 days agoവഖഫ് സ്വത്തുക്കളുടെ രജിസ്ട്രേഷന്; സമയം ദീര്ഘിപ്പിക്കണം, മുസിലിംലീഗ് എംപിമാര് വീണ്ടും കേന്ദ്രമന്ത്രിയെ സമീപിച്ചു