ദക്ഷിണ കൊറിയയിലെ സോളില്‍ ഏഷ്യാന എയര്‍ലൈന്‍സിന്റെ വിമാനം ലാന്‍ഡ് ചെയ്യാന്‍ തയാറെടുക്കുന്നതിനിടെ ഒരു യാത്രക്കാരന്‍ എമര്‍ജന്‍സി ഡോര്‍ തുറന്നു.

വിമാനം സുരക്ഷിതമായി ലാന്‍ഡ് ചെയ്‌തെങ്കിലും ശ്വാസതടസ്സം ഉള്‍പ്പെടെയുള്ള അസ്വസ്ഥതകള്‍ അനുഭവപ്പെട്ട നിരവധി പേരെ ആശുപത്രിയില്‍ പ്രവേശിപ്പിച്ചു.

ഡേഗു രാജ്യാന്തര വിമനളത്താവളത്തിലെ റണ്‍വേയില്‍ ലാന്‍ഡിങ്ങിനു തയാറെടുക്കുന്നതിനിടെയാണ് എ 321200 വിമാനത്തിന്റെ ഡോര്‍ യാത്രക്കാരന്‍ തുറന്നത്.

ഏകദേശം 200 യാത്രക്കാര്‍ വിമാനത്തിലുണ്ടായിരുന്നു. വിമാനം റണ്‍വേയില്‍നിന്ന് 200 മീറ്റര്‍ ഉയരത്തിലായിരുന്നപ്പോഴാണ് സംഭവം. എമര്‍ജന്‍സി വാതിലിനു സമീപത്തിരുന്ന യാത്രക്കാരനാണ് വാതില്‍ തുറന്നത്. അപ്രതീക്ഷിതമായി വാതില്‍ തുറന്നതോടെ ചില യാത്രക്കാര്‍ക്ക് ശ്വാസതടസ്സം അനുഭവപ്പെട്ടു. ലാന്‍ഡിങ്ങിനു ശേഷം ചിലരെ ആശുപത്രിയില്‍ പ്രവേശിപ്പിച്ചതായി വിമാനകമ്പനി അറിയിച്ചു.

വാതില്‍ തുറന്ന യാത്രക്കാരനെ കസ്റ്റഡിയിലെടുത്തതായും ഇയാളെ ചോദ്യം ചെയ്തുവരികയാണെന്നും പൊലീസ് അറിയിച്ചു.

ദോഹ: ഖത്തറിന്റെ ഔദ്യോഗിക വാർത്താ ഏജൻസിയായ ഖത്തർ ന്യൂസ്‌ ഏജൻസി (ക്യുഎൻഎ) 48 ന്റെ നിറവിൽ. വർഷം 48 പൂർത്തിയാക്കി മുന്നേറുന്ന ക്യു എൻ എ 1975 മെയ് 25നാണ് ആരംഭിച്ചത്. അന്നത്തെ ഖത്തർ അമീറിന്റെ 94-ാം നമ്പർ ഉത്തരവ് പ്രകാരമായിരുന്നു തുടക്കം. സ്ഥാപിതമായതിന്റെ നാൽപ്പത്തിയെട്ടാം വാർഷിക ആഘോഷം സംഘടിപ്പിക്കുമെന്ന് ക്യു.എൻ.എ അറിയിച്ചു. ഖത്തർ ന്യൂസ് ഏജൻസി (ക്യുഎൻഎ) നാൽപ്പത്തിയെട്ടാം വാർഷികം ആഘോഷിക്കുന്നതായും മികവിന്റെ പാതയിൽ മുന്നേറാൻ കൂടുതൽ താൽപ്പര്യവും ദൃഢനിശ്ചയവുമാണുള്ളതെന്നും ക്യു.എൻ.എ ഡയറക്ടർ ജനറൽ അഹമ്മദ് ബിൻ സഈദ് അൽറുമൈഹി പറഞ്ഞു.
സാമൂഹിക മാധ്യമങ്ങൾ പല നിലയിൽ സജീവമായ കാലത്ത് മാധ്യമ പ്രൊഫഷണലിസത്തിന്റെ പാതയിൽ തങ്ങൾ പരമാവധി ആധുനികമായി മുന്നേറുന്നുവെന്നും ക്യു.എൻ.എ അധികൃതർ വ്യക്തമാക്കി. സത്യസന്ധവും സമഗ്രവുമായ വാർത്തകൾ സ്വീകർത്താക്കൾക്ക് ചുരുങ്ങിയ സമയത്തിനുള്ളിൽ എത്തിക്കുന്നതിനായി ഡിജിറ്റൽ മീഡിയയിലെ ഏറ്റവും പുതിയ സജ്ജീകരണങ്ങൾ പ്രയോജനപ്പെടുത്തി വരുന്നു. പ്രമുഖ അറബ്, അന്തർദേശീയ വാർത്താ ഏജൻസികളിൽ ഒന്നായി ക്യു.എൻ.എ ഇതിനകം മാറിയിട്ടുണ്ട്.
ഖത്തറിലെ ചലനങ്ങൾ ലോക സമൂഹത്തിന് മുമ്പിൽ അവതരിപ്പിക്കാൻ കഴിഞ്ഞുവെന്നും ഖത്തർ ന്യൂസ് ഏജൻസി വിശദീകരിച്ചു.

ദോഹ: ഓടിച്ച ​ട്രക്ക് നിയ​ന്ത്രണംവിട്ടതിനെ തുടർന്നുണ്ടായ അപകടത്തിൽ മലപ്പുറം കൊണ്ടോട്ടി, പുളിക്കൽ സ്വദേശി ഖത്തറിൽ മരിച്ചു. പുളിക്കൽ കോന്തേടൻ അലി (50) ആണ് വ്യാഴാഴ്ച പുലർച്ചെ സൈലിയ അൽ മജ്ദ് റോഡിലെ അപകടത്തിൽ മരിച്ചത്. സംഭവ സ്ഥലത്തുവെച്ചു തന്നെ മരണം സംഭവിച്ചതായി ബന്ധപ്പെട്ടവർ പറഞ്ഞു.

പരേതനായ കോന്തേടൻ ഹസൻ കുട്ടി പിതാവും ഖദീജ മാതാവുമാണ്.
ഭാര്യമാർ: ആയിഷ, മൈമുന. മക്കൾ: ഹഫ്സത്ത്, ആഷിർ, ആരിഫ്, അഷ്ഫാക്, ലിയ ഫരീഹ, ഫാത്തിമ ഫർഹ, ഹഷ്മിൽ, ഹമദ്, ഹന്ന. സഹോദരങ്ങൾ: നാസർ, ഷരീഫ്, പരേതയായ ഫാത്തിമ, ആയിഷ, സാബിറ, ഹബീബ.

ഐ.സി.എഫ് ഉംസലാല്‍ സെക്ടര്‍ എക്‌സിക്യൂട്ടീവ് അംഗമായിരുന്നു. ഹമദ് ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം നടപടിക്രമങ്ങള്‍ പൂര്‍ത്തിയാക്കിയ ശേഷം ദോഹ അബൂഹമൂറിൽ ഖബറടക്കുമെന്ന് ബന്ധുക്കൾ അറിയിച്ചു.