Connect with us

FOREIGN

ബാബാ സായിദിന്റെ ഓര്‍മ്മയില്‍ യുഎഇ

2004ലെ റമദാന്‍ 19നാണ് യു.എ.ഇ പ്രസിഡണ്ടും രാഷ്ട്ര ശില്‍പ്പിയുമായിരുന്ന ശൈഖ് സായിദ് ബിന്‍ സുല്‍ത്താന്‍ അല്‍നഹ്‌യാന്‍ അറബ് ലോകത്തെ മുഴുവന്‍ കണ്ണീരിലാഴ്ത്തി ഈ ലോകത്തോട് വിടവാങ്ങിയത്.

Published

on

റസാഖ് ഒരുമനയൂര്‍

യുഎഇ രാഷ്ട്രപിതാവില്ലാത്ത മറ്റൊരു റമദാന്‍ 19 കൂടി കടന്നുവന്നു.
2004ലെ റമദാന്‍ 19നാണ് യു.എ.ഇ പ്രസിഡണ്ടും രാഷ്ട്ര ശില്‍പ്പിയുമായിരുന്ന ശൈഖ് സായിദ് ബിന്‍ സുല്‍ത്താന്‍ അല്‍നഹ്‌യാന്‍ അറബ് ലോകത്തെ മുഴുവന്‍ കണ്ണീരിലാഴ്ത്തി ഈ ലോകത്തോട് വിടവാങ്ങിയത്. ശൈഖ് സായിദിന്റെ ഓര്‍മ്മ ഇന്ന് രാജ്യമെങ്ങും നിറഞ്ഞുനിന്നു. വെള്ളിയാഴ്ച ജുമുഅ ഖുത്തുബയിലും രാഷ്ട്രപിതാവിനുവേണ്ടിയുള്ള പ്രത്യേക പ്രാര്‍ത്ഥനകള്‍ നടന്നു.

ആധുനിക ലോകത്ത് കാരുണ്യത്തിന്റെ പിതാവായി പരക്കെ അറിയപ്പെട്ട ശൈഖ് സായിദ് സ്വദേശികളോടൊപ്പം വിദേശികളെയും എന്നും അതിരറ്റു സ്‌നേഹിച്ച അതുല്യ ഭരണാധികാരിയായിരുന്നു. സീമകളില്ലാത്ത മനുഷ്യ സ്‌നേഹത്തിന്റെ ഉടമയും കാരുണ്യത്തി ന്റെ നിറകുടവുമായിരുന്നു. അതോടൊപ്പം പ്രകൃതിയെയും മറ്റു ജീവജാലങ്ങളെയും ശൈഖ് സായിദ് താലോലിക്കുകയും തന്റെ സ്‌നോഹ നിര്‍ഭരമായ മനസ്സ് അവര്‍ക്കുവേണ്ടിയും സമര്‍പ്പിക്കുന്നതില്‍ അദ്ദേഹം പ്രത്യേകം ശ്രദ്ധ ചെലുത്തി.

മാനുഷിക മൂല്യങ്ങളെ ഒരു ഭരണാധികാരി എത്രമാത്രം ആഴത്തില്‍ ചിന്തിക്കുകയും താലോലിക്കുകയും ചെയ്തിട്ടുണ്ടെന്ന ലോക ചിന്തക്ക് ശൈഖ് സായിദിനപ്പുറം മറ്റൊരു മറുപടിയും കണ്ടെത്താന്‍ കഴിഞ്ഞില്ല. തന്റെ രാജ്യത്തെയും ജനതയെയും അതിരറ്റു സ്‌നേഹിച്ച അദ്ദേഹം പാശ്ചാത്യന്‍ രാജ്യങ്ങളുടെ പുരോഗതി അറേബ്യന്‍ മണ്ണിലേക്ക് കൊണ്ടുവരുന്നതിന് നടത്തിയ പരിശ്രമം വന്‍ വിജയം കാണുക തന്നെ ചെയ്തു.

തന്റെ സഹോദരനോടൊപ്പം നടത്തിയ പ്രഥമ വിദേശ യാത്രയാണ് യു.എ.ഇ യുടെ വികസനത്തില്‍ പരമപ്രധാന പങ്ക് വഹിച്ചത്. പാരീസിന്റെ പുരോഗതിയും സ്വിസര്‍ലാന്റിന്റെ സൗകുമാര്യതയും അറേബ്യന്‍ മണ്ണിലും പരിലസിപ്പിക്കണമെന്ന ശൈഖ് സായിദിന്റെ മോഹം പൂവണിയാന്‍ അധിക കാലമൊന്നും കാത്തിരിക്കേണ്ടിവന്നില്ല. രാജ്യത്തിന്റെ പുരോഗതി സ്വപ്നം കണ്ടുകിടന്ന അദ്ദേഹം നിരവധി രാവുകള്‍ അതിനായി ഉറക്കമിളച്ചു കഠിനാദ്ധ്വാനം ചെയ്തു. അക്ഷരാഭ്യാസമില്ലാത്ത ജനതക്ക് വികസനത്തിന്റെ വിളി കേള്‍ക്കാന്‍ കഴിയില്ലെന്ന സന്ദേശം തന്റെ ജനതക്ക് നല്‍കിയ അദ്ദേഹം വിദ്യാഭ്യാസ വിപ്ലവത്തിന് തിരി കൊളുത്തി. ഇതുവഴി ചുരുങ്ങിയ കാലത്തിനകം പതിറ്റാണ്ടുകളുടെ പരിവര്‍ത്തനം രാജ്യത്ത് ഉണ്ടാക്കിയെടുക്കാന്‍ അദ്ദേഹത്തിന് കഴിഞ്ഞു.

തന്റെ കഠിനാദ്ധ്വാനം വിഫലമാകുകയില്ലെന്ന ഉത്തമ ബോധം അദ്ദേഹത്തിനുണ്ടായിരുന്നു. ദീര്‍ഘവീക്ഷണവും അടിയുറച്ച ആത്മവിശ്വാസവും ശൈഖ് സായിദിന്റെ കൈമുതലായിരുന്നു. തന്റെജനതയുടെ ഐശ്വര്യ പൂര്‍ണ്ണമായ ജീവിതത്തിനുവേണ്ടി അദ്ദേഹം മറ്റാരും ചിന്തിക്കാത്ത വിധത്തിലുള്ള ശാസ്ത്രീയ പ്രവര്‍ത്തനങ്ങള്‍ക്ക് രൂപം നല്‍കി. അതിലൂടെ അറേബ്യക്ക് അഭിമാനവും ലോകത്തിന് മാതൃകയുമായി പരിവര്‍ത്തനത്തിന്റെ പുത്തന്‍ പുലരികള്‍ വിടര്‍ന്നു. ഉറക്കമിളച്ചു കാത്തിരുന്ന പാതിരാവുകളിലെ ചിന്തകളൊന്നും വൃതാവിലായില്ല എന്ന യാഥാര്‍ത്ഥ്യം കൂടുതല്‍ ആത്മവിശ്വാസം പകര്‍ന്നു.

വറ്റിവരണ്ട മരൂഭൂമിയ ഫലവത്തായ കൃഷിഭൂമിയും അര്‍ത്ഥവത്തായ സമ്പത് സമൃദ്ധിയിലേക്കും കൊണ്ടുവരുന്നതിന് അദ്ദേഹം വഹിച്ച പങ്ക് അതിശയത്തോടെയല്ലാതെ നോക്കിക്കാണാനാവില്ല. രാജ്യത്തിനും ജനതക്കുമുണ്ടായ പുരോഗതി സസ്യലലാതികള്‍ക്കും ഉണ്ടാവണമെന്ന ബാബാ സായിദിന്റെ ചിന്ത മരുഭൂമിയെ മലര്‍വാടിയാക്കി മാറ്റി. ഈത്തപ്പനകള്‍ മാത്രം വളര്‍ന്നിരുന്ന മരുഭൂമിയില്‍ ഇതര പഴ വര്‍ഗ്ഗങ്ങളും പച്ചക്കറികളും പൂക്കളുമെല്ലാം വ്യാപകമായി. സ്വന്തം കുഞ്ഞുങ്ങളെപ്പോലെ അദ്ദേഹം മരങ്ങളെ യും മറ്റു സസ്യലലാതികളെയും തലോടി പോറ്റി വളര്‍ത്തി. അതുകൊണ്ടുതന്നെ ബാബാ സായിദിന്റെ വിയോഗത്തില്‍ മനുഷ്യരെപ്പോലെത്തന്നെ വൃക്ഷത്തലപ്പുകളും വിങ്ങിപ്പൊട്ടി.

FOREIGN

മലയാളി യുവാക്കളെ അബുദാബിയില്‍ നിന്നും കാണാതായി

സ്വദേശികളായ സഫീര്‍, സുഹൈബ് എന്നിവരെ കാണാനില്ലെന്ന് പരാതി. പെരിന്തല്‍മണ്ണ വള്ളിക്കാപറ്റ കുട്ടീരി ഹൗസില്‍ അബൂബക്കറിന്റെ മകന്‍ സുഹൈബ്, ഒപ്പമുണ്ടായിരുന്ന സഫീര്‍ എന്നിവരെയാണ് ഈ മാസം 22 മുതല്‍ കാണാതായിട്ടുള്ളത്.

Published

on

അബുദാബി: അബുദാബിയില്‍ നിന്നും തായ്‌ലാന്റിലേക്ക് ജോലി തേടിപ്പോയ മലപ്പുറം സ്വദേശികളായ സഫീര്‍, സുഹൈബ് എന്നിവരെ കാണാനില്ലെന്ന് പരാതി. പെരിന്തല്‍മണ്ണ വള്ളിക്കാപറ്റ കുട്ടീരി ഹൗസില്‍ അബൂബക്കറിന്റെ മകന്‍ സുഹൈബ്, ഒപ്പമുണ്ടായിരുന്ന സഫീര്‍ എന്നിവരെയാണ് ഈ മാസം 22 മുതല്‍ കാണാതായിട്ടുള്ളത്. സുഹൈബും സഫീറും ഇക്കഴിഞ്ഞ മാര്‍ച്ച് 27നാണ് സന്ദര്‍ശക വിസയില്‍ ദുബൈയിലെത്തുന്നത്.

പിന്നീട് അബുദാബിയിലെ മില്ലേനിയം ടവറിനടുത്തുള്ള ഗിഫ്റ്റ് കിംഗ് ബില്‍ഡിംഗില്‍ താമസിക്കുമ്പോഴാണ് ഓണ്‍ലൈന്‍ ഇന്റര്‍വ്യൂ വഴി തായ്‌ലാന്റിലേക്കുള്ള തൊഴില്‍ വിസ കരസ്ഥമാക്കുന്നത്. ഈമാസം 21ന് അബുദാബിയില്‍ നിന്നും ഇത്തിഹാദ് വിമാനത്തില്‍ തായ്‌ലാന്റിലേക്ക് പുറപ്പെടുന്നു. 22 ന് തായ്‌ലാന്റ് സുവര്‍ണഭൂമി എയര്‍പോര്‍ട്ടിലെത്തിയ ചിത്രങ്ങള്‍ കുടുംബവുമായി പങ്കുവെച്ചിരുന്നു.

എയര്‍പോര്‍ട്ടിലെത്തിയ യുവാക്കളെ ഏജന്റ് വാഹനത്തില്‍ കയറ്റി കൊണ്ടുപോയെന്നും 21 മണിക്കൂര്‍ നീണ്ട യാത്രക്ക് ശേഷം അജ്ഞാതമായ സ്ഥലത്ത് എത്തിച്ചുവെന്നുമാണ് അറിയുന്നത്. അന്വേഷണത്തില്‍ ഇവരുള്ളത് മ്യാന്‍മര്‍ അതിര്‍ത്തിക്കടുത്തുള്ള സ്ഥലത്താണെന്ന് സൂചനയുണ്ട്. ഇവരുടെ പാസ്‌പോര്‍ട്ടും മറ്റു രേഖകളും പിടിച്ചുവെക്കുകയും ക്രൂരമായ മര്‍ദ്ദനത്തിന് വിധേയരാക്കിയെന്നുമാണ് കിട്ടിയ വിവരം. യുവാക്കളുടെ രക്ഷിതാക്കള്‍ മലപ്പുറം ജില്ലാ പോലീസ് സൂപ്രണ്ട് മുഖേന ബാങ്കോക്കിലെ ഇന്ത്യന്‍ എംബസിയില്‍ പരാതി നല്‍കിയിട്ടുണ്ട്.

Continue Reading

FOREIGN

ഹജ്ജ് 2024: പ്രതിരോധ കുത്തിവയ്പ്പുകള്‍ എടുക്കണമെന്ന് തീര്‍ത്ഥാടകരോട് സഊദി അറേബ്യ

രാജ്യത്തിനകത്തുള്ളവര്‍ക്കും പുറത്ത് നിന്നെത്തുന്നവര്‍ക്കുമായി വ്യത്യസ്ത മാര്‍ഗ്ഗ രേഖകള്‍ ആരോഗ്യ മന്ത്രാലയം പുറത്തിറക്കി.

Published

on

ഹജ്ജ് തീര്‍ത്ഥാടനത്തിനെത്തുന്നവര്‍ വിവിധ പകര്‍ച്ചവ്യാധികള്‍ക്കുള്ള പ്രതിരോധ കുത്തിവയ്പ്പുകള്‍ എടുക്കണമെന്ന
നിര്‍ദ്ദേശവുമായി സഊദി അറേബ്യ. രാജ്യത്തിനകത്തുള്ളവര്‍ക്കും പുറത്ത് നിന്നെത്തുന്നവര്‍ക്കുമായി വ്യത്യസ്ത മാര്‍ഗ്ഗ രേഖകള്‍ ആരോഗ്യ മന്ത്രാലയം പുറത്തിറക്കി.

രാജ്യത്തെയും ഹജ്ജിനായി എത്തുന്ന വിദേശികളുടെയും ആരോഗ്യ സുരക്ഷ ഉറപ്പ് വരുത്തുകയാണ് ഇതിന്റെ ലക്ഷ്യമെന്ന് അധികൃതര്‍ പറഞ്ഞു. ഹജ്ജിനെത്തുന്ന സഊദിയിലെ പൗരന്മാര്‍ കഴിഞ്ഞ അഞ്ച് വര്‍ഷത്തില്‍ ഒരിക്കലെങ്കിലും കൊവിഡ് 19, സീസണല്‍ ഇന്‍ഫ്‌ലുവന്‍സ, മെനിഞ്ചൈറ്റിസ് എന്നിവയ്ക്കുള്ള പ്രതിരോധ കുത്തിവയ്പ്പുകള്‍ എടുത്തിരിക്കണമെന്ന് മന്ത്രാലയം അറിയിച്ചു.

പ്രതിരോധ കുത്തിവയ്പ്പുകള്‍ പ്രാഥമികാരോഗ്യ കേന്ദ്രങ്ങളില്‍ ലഭ്യമാണെന്നും ആരോഗ്യമന്ത്രാലയത്തിന്റെ സെഹാറ്റി അപ്ലിക്കേഷന്‍ വഴി ആവശ്യമായ വാക്‌സിനുകള്‍ ബുക്ക് ചെയ്യാമെന്നും മന്ത്രാലയം വ്യക്തമാക്കി.

അതേസമയം, വിദേശ പൗരന്മാര്‍ സഊദിയില്‍ എത്തുന്നതിന് 10 ദിവസം മുമ്പെങ്കിലും പോളിയോ, കൊവിഡ് 19, സീസണല്‍ രോഗങ്ങള്‍ എന്നിവയ്ക്കുള്ള വാക്‌സിനും നെയ്‌സെരിയ മെനിഞ്ചൈറ്റിസ് വാക്‌സിനും സ്വീകരിച്ചിരിക്കണം. തീര്‍ത്ഥാടനം ജൂണ്‍ 14 മുതല്‍ ആരംഭിക്കുമെന്നാണ് പ്രതീക്ഷിക്കുന്നത്.

Continue Reading

FOREIGN

അബ്ദുള്‍ റഹീമിന്റെ മോചനത്തിനായി വാദിഭാഗം അഭിഭാഷകന് നല്‍കാനുള്ള പണമെത്തിച്ചു; മോചനത്തിനുള്ള നടപടിക്രമങ്ങള്‍ ഉടന്‍ ആരംഭിക്കും

അബ്ദുറഹീമിന്റെ മോചനവുമായി ബന്ധപ്പെട്ട് ഏറ്റവും പുതിയ വിവരമാണ് റിയാദിലെ നിയമസഹായ സമിതി അറിയിച്ചിരിക്കുന്നത്.

Published

on

സഊദി ജയിലില്‍ കഴിയുന്ന അബ്ദുള്‍ റഹീമിന്റെ മോചനവുമായി ബന്ധപ്പെട്ട് വാദിഭാഗം അഭിഭാഷകന് നല്‍കാനുള്ള പ്രതിഫലം സഊദിയിലെ ഇന്ത്യന്‍ എംബസിയില്‍ എത്തിച്ചു. പണം അഭിഭാഷകന് കൈമാറുന്നതോടെ നടപടിക്രമങ്ങള്‍ ആരംഭിക്കും.

അബ്ദുറഹീമിന്റെ മോചനവുമായി ബന്ധപ്പെട്ട് ഏറ്റവും പുതിയ വിവരമാണ് റിയാദിലെ നിയമസഹായ സമിതി അറിയിച്ചിരിക്കുന്നത്. മരിച്ച സഊദി പൗരന്റെ അഭിഭാഷകന്‍ ഏഴര ലക്ഷം റിയാല്‍ അബ്ദുറഹീമിന്റെ ഭാഗത്ത് നിന്നും പ്രതിഫലമായി ആവശ്യപ്പെട്ടിരുന്നു. ഈ തുക ഇപ്പോള്‍ ഇന്ത്യന്‍ എംബസിയുടെ അക്കൗണ്ടില്‍ എത്തിയതായി നിയമസഹായ സമിതി അറിയിച്ചു. മോചനദ്രവ്യമായ 15 മില്യണ്‍ റിയാലിന്റെ 5% ആണ് ഈ ഏഴര ലക്ഷം റിയാല്‍. അതായത് 1.66 കോടി രൂപ.

നാട്ടില്‍ നിന്നാണ് ഈ തുക എംബസി അക്കൌണ്ടില്‍ എത്തിയത്. ഇത് രണ്ട് ദിവസത്തിനുള്ളില്‍ അഭിഭാഷകന് കൈമാറും. ഇതോടെ അഭിഭാഷകനുമായി തുടര്‍നടപടിക്രമങ്ങളുമായി ബന്ധപ്പെട്ട കരാര്‍ ഒപ്പുവെക്കും. ശേഷം ദിയാധനമായ 34 കോടിരൂപയും എംബസിയുടെ അക്കൌണ്ടിലേക്ക് ട്രാന്‍സ്ഫര്‍ ചെയ്യുമെന്ന് സമിതി ഭാരവാഹികള്‍ അറിയിച്ചു. മറ്റ് നടപടിക്രമങ്ങളെല്ലാം പുരോഗമിക്കുന്നുണ്ടെന്ന് അബ്ദുറഹീമിന്റെ പവര്‍ ഓഫ് അറ്റോണി റിയാദിലെ പൊതുപ്രവര്‍ത്തകന്‍ സിദീഖ് തുവ്വൂര്‍ അറിയിച്ചു.

മരിച്ച സഊദി പൗരന്റെ കുടുംബം ദിയാധനം സ്വീകരിച്ച് അബ്ദുറഹീമിന് മാപ്പ് നല്കാന്‍ തയ്യാറാണ് എന്നു ഗവര്‍ണറേറ്റിനെ അറിയിച്ചതായാണ് റിപ്പോര്‍ട്ട്. ഇതുമായി ബന്ധപ്പെട്ട് എംബസി ഉദ്യോഗസ്ഥരുടെ നേതൃത്വത്തില്‍ ഗവര്‍ണറേറ്റ് സന്ദര്‍ശിക്കുകയും വിഷയങ്ങള്‍ ചര്‍ച്ച ചെയ്യുകയും ചെയ്തിട്ടുണ്ട്.

Continue Reading

Trending