Connect with us

columns

ലഹരി വിപത്ത് പാഠ്യവിഷയമാവണം

യുദ്ധങ്ങളും പരിസ്ഥിതി നാശങ്ങളും മാനവരാശിക്ക് ഏല്‍പിക്കുന്ന ആഘാതങ്ങള്‍ സ്‌കൂള്‍ സിലബസിലുണ്ട്. ലഹരി സൃഷ്ടിക്കുന്ന ആരോഗ്യപരവും സാമൂഹികവും സാമ്പത്തികവുമായ വിപത്തും പാഠ്യപദ്ധതിയുടെ ഭാഗമാവണം. താന്‍ പഠിപ്പിച്ച കുട്ടികള്‍ ലഹരി ഉപയോഗിക്കാത്തവരാണെന്ന് പറയുന്നതില്‍ അധ്യാപകരും അഭിമാനം കൊള്ളണം.

Published

on

പി.ഇസ്മായില്‍ വയനാട്

ഇന്ത്യയുള്‍പ്പെടെയുള്ള രാജ്യങ്ങളെ ലക്ഷ്യമിട്ട് അഫ്ഗാനിസ്ഥാനിലെ കറുപ്പ് കൃഷി (ഓപ്പിയം) 37 ശതമാനം വര്‍ധിപ്പിച്ചതായുള്ള വാര്‍ത്തകളാണ് കഴിഞ്ഞ ദിവസം മാധ്യമങ്ങള്‍ റിപ്പോര്‍ട്ട് ചെയ്തത്. ഐക്യരാഷ്ട്ര സംഘടനയുടെ ഓഫീസ് ഓണ്‍ ഡ്രഗ്‌സ് ആന്റ് ക്രൈം വാര്‍ഷിക പഠന റിപ്പോര്‍ട്ടിന്റെ അടിസ്ഥാനത്തില്‍ ഇന്റര്‍നാഷണല്‍ നാര്‍ക്കോട്ടിക് കണ്‍ട്രോള്‍ ബോര്‍ഡ് കറുപ്പ് കൃഷിയുമായി ബന്ധപ്പെട്ട് നല്‍കിയ മുന്നറിയിപ്പുകളാണ് മാധ്യമങ്ങള്‍ വാര്‍ത്തയാക്കിയത്. ദക്ഷിണാഫ്രിക്ക, നേപ്പാള്‍, ബ്രസീല്‍, അര്‍ജന്റീന, പാക്കിസ്താന്‍, അഫ്ഗാന്‍ തുടങ്ങിയ രാജ്യങ്ങളില്‍ നിന്ന് അതിര്‍ത്തി കടന്നുള്ള ലഹരിയൊഴുക്ക് ഇന്ത്യ നേരിടുന്ന മുഖ്യപ്രശ്‌നമാണ്. റെഡ് കോറിഡോര്‍ അഥവാ ചുവപ്പിന്റെ ഇടനാഴി എന്നറിയപ്പെട്ടിരുന്ന ബീഹാര്‍, ജാര്‍ഖണ്ഡ്, ഛത്തീസ്ഗഢ്, അസം, ബംഗാള്‍, ഒഡീഷ, ആന്ധ്ര എന്നീ സ്‌റ്റേറ്റുകള്‍ അടങ്ങുന്ന മധ്യ വടക്കു കിഴക്കന്‍ വനമേഖലയെ ഇന്ത്യന്‍ സുരക്ഷാ ഏജന്‍സികള്‍ വിശേഷിപ്പിക്കുന്നത് ഡ്രഗ് കോറിഡോര്‍ എന്നാണ്. ഈ സംസ്ഥാനങ്ങളില്‍ നിന്നാണ് കേരളത്തിലേക്കും റോഡ് മാര്‍ഗവും കപ്പല്‍ വഴിയും ട്രയിന്‍ ഉപയോഗിച്ചും വന്‍തോതില്‍ ലഹരി കടത്തുന്നത്. പഴം ഇറക്കുമതിയുടെ മറവില്‍ ഓറഞ്ച് കാര്‍ട്ടനിലൂടെ 1470 കോടിയുടെയും ഗ്രീന്‍ആപ്പിള്‍ കാര്‍ട്ടനിലൂടെ 520 കോടിയുടെയും ലഹരിക്കടത്തിന്റെ വാര്‍ത്ത ഞെട്ടലോടെയാണ് കേരളം കേട്ടത്. ആയുധവ്യാപാരത്തിന് തുല്യമായ രീതിയില്‍ കോടികളുടെ ലഹരി ഇടപാടുകളാണ് സംസ്ഥാനത്ത് നടക്കുന്നത്.

കുട്ടികളെയും സ്ത്രീകളെയും കാരിയര്‍മാരാക്കിയാണ് ലഹരിമാഫിയക്കാര്‍ പിടിമുറുക്കുന്നത്. സൗജന്യമായി ലഹരി നല്‍കി വലയിലാക്കലാണ് ആദ്യനടപടി. പിന്നീട് മയക്കുമരുന്നിന് പണം ആവശ്യപ്പെടും. തുടര്‍ന്ന് ഇവരെ കാരിയര്‍മാരാക്കി മാറ്റും. ഇടപാടുകള്‍ക്കായി വാട്‌സ്ആപ്പ് ഗ്രൂപ്പുകള്‍ പോലുമുണ്ട്. അതിര്‍ത്തി കടന്നുള്ള ലഹരികടത്തിനെതിരെ അന്വേഷണം ഊര്‍ജിതമാക്കിയപ്പോള്‍ കൊറിയര്‍ വഴിയും പാഴ്‌സല്‍ വഴിയും ലഹരി വസ്തുക്കള്‍ എത്തിച്ചാണ് കച്ചവടം നടത്തുന്നത്. ലഹരി കേസുകളില്‍ പിടിക്കപ്പെടുന്നവരിലും ലഹരി ചികിത്സക്കായി വിമുക്തി കേന്ദ്രങ്ങളില്‍ എത്തുന്നവരിലും കുട്ടികളുടെ എണ്ണക്കൂടുതല്‍ കേരളത്തിന്റെ ഉറക്കം കെടുത്തുകയാണ്.
ലഹരി ഉപയോഗിക്കുന്നവരുടെ പ്രായപരിധി 28ല്‍ നിന്ന് 12 വയസിലേക്ക് അഥവാ സ്‌കൂള്‍ തലത്തിലേക്ക് മാറിക്കഴിഞ്ഞു. കോളജില്‍ പഠിക്കുന്നവരില്‍ 31 ശതമാനം പേരും ലഹരി ഉപയോഗിക്കുന്നവരാണെന്ന പഠനങ്ങളും ഞെട്ടിപ്പിക്കുന്നതാണ്.

ഞാനോ കുടുംബമോ ലഹരി ഉപയോഗിക്കുന്നില്ല, അതിനാല്‍ തങ്ങള്‍ സേഫ് സോണിലാണെന്ന ചിന്തയെ മനസില്‍ നിന്ന് നീക്കം ചെയ്യലാണ് ലഹരി വിരുദ്ധ പോരാട്ടത്തില്‍ ആദ്യം ചെയ്യേണ്ട കാര്യം. ലഹരി ഉപയോഗിക്കുന്നവര്‍ മാത്രമല്ല അതിന്റെ ഗന്ധമോ രുചിയോ അറിയാത്തവരും ഇരകളായി തീരാറുണ്ട്. ലഹരി ഉപയോഗിക്കുന്നവര്‍ കൊല നടത്താനോ പിടിച്ചുപറിക്കാനോ ബലാത്സംഗം ചെയ്യാനോ മടിയില്ലാത്തവരാണ്. ലഹരിക്കാരുടെ ഇത്തരം ക്രൂരവിനോദങ്ങളില്‍ ലഹരി ഉപയോഗിക്കാത്തവരും ജീവഹാനിക്കും മാനഹാനിക്കും ഇരയായിത്തീരാറുണ്ട്.

യുവാല്‍ ഹരാരിയുടെ ‘സാപിയന്‍സ്’ എന്ന പുസ്തകം സമൂഹത്തിന്റെ വളര്‍ച്ചക്കും നിലനില്‍പ്പിനും ആശയവിനിമയം അനിവാര്യമാണെന്ന കാര്യമാണ് മാനവരാശിയെ ഉണര്‍ത്തുന്നത്. സന്തോഷവും വിഷമവും രക്ഷിതാക്കളോട് പങ്കുവെക്കാന്‍ കഴിയാതെ പല വീടുകളിലും കുട്ടികള്‍ വീര്‍പ്പുമുട്ടുന്ന അവസ്ഥയിലാണ്. സ്‌നേഹശൂന്യത നേരിടുന്ന അത്തരം കുടുംബങ്ങളില്‍ നിന്നുള്ള കുട്ടികളെയാണ് ലഹരിമാഫിയക്കാര്‍ നോട്ടമിടുന്നത്. ജീവിതത്തിരക്കില്‍ സ്‌നേഹം, അഭിനന്ദനം, പ്രോത്സാഹനം തുടങ്ങിയ കാര്യങ്ങള്‍ രക്ഷിതാക്കള്‍ മറന്നു പോവുമ്പോള്‍ കുട്ടികള്‍ ഒറ്റപ്പെടലിനു വിധേയരാകും. നിരാശാകൗമാരങ്ങള്‍ക്ക് മദ്യക്കുപ്പിയിലും കഞ്ചാവിന്റെ പൊതിയിലും മയക്കുമരുന്നിന്റെ പാക്കറ്റിലുമായി ലഹരിമാഫിയക്കാര്‍ കൃത്രിമ സ്‌നേഹം വിളമ്പി അവരെ വശീകരിക്കും. ഒരു കുട്ടിയുടെ ഏറ്റവും വലിയ മാതൃകയായി മാറേണ്ടത് രക്ഷിതാക്കളാണ്. ലഹരി ഉപയോഗിക്കാത്തവരായി മാതൃക തീര്‍ക്കാനും കുട്ടികളോട് ഉള്ളു തുറന്ന് സംസാരിക്കാനും അവരെ ചേര്‍ത്തുപിടിക്കാനും രക്ഷിതാക്കള്‍ ശീലിക്കേണ്ടതും വീടുകള്‍ അതിഥി മന്ദിരങ്ങളാവാതെ സ്‌നേഹാലയമായി മാറേണ്ടതും ലഹരിയെ നാടുനീക്കാന്‍ അനിവാര്യമാണ്.

വീട്ടില്‍ ചിലവഴിക്കുന്നതിനേക്കാളും സമയം കുട്ടികള്‍ കൂട്ടുകാര്‍ക്കൊപ്പമാണ് കഴിച്ചുകൂട്ടാറുള്ളത്. മത ഭക്തിയുള്ള വീടുകളില്‍ നിന്ന് വരുന്നവര്‍ വഴിതെറ്റുന്നതായും അധാര്‍മിക അന്തരീക്ഷത്തില്‍ കഴിയുന്നവര്‍ ധാര്‍മിക മൂല്യങ്ങള്‍ പാലിക്കുന്നവരായും കാണപ്പെടാറുണ്ട്. വഴിതെറ്റിക്കുന്നതിലും നേര്‍വഴി കാണിക്കുന്നതിലും ചങ്ങാത്തമാണ് പ്രധാനം. ജീവിതത്തില്‍ ഒരാള്‍ക്കും മാതാപിതാക്കളെയോ സഹോദരങ്ങളെയോ തിരഞ്ഞെടുക്കാനാവില്ല. ജീവിത പങ്കാളിയെ തിരഞ്ഞെടുക്കുന്നതില്‍ പോലും സുഹൃത്തുക്കളുടെ സ്വാധീനം കാണാനാവും. കുട്ടികളുടെ കൂട്ടുകാരാവാനും മക്കളുടെ കൂട്ടുകാരെ അറിയാനും മാതാപിതാക്കള്‍ക്ക് കഴിയേണ്ടതുണ്ട്.

യുദ്ധങ്ങളും പരിസ്ഥിതി നാശങ്ങളും മാനവരാശിക്ക് ഏല്‍പിക്കുന്ന ആഘാതങ്ങള്‍ സ്‌കൂള്‍ സിലബസിലുണ്ട്. ലഹരി സൃഷ്ടിക്കുന്ന ആരോഗ്യപരവും സാമൂഹികവും സാമ്പത്തികവുമായ വിപത്തും പാഠ്യപദ്ധതിയുടെ ഭാഗമാവണം. താന്‍ പഠിപ്പിച്ച കുട്ടികള്‍ ലഹരി ഉപയോഗിക്കാത്തവരാണെന്ന് പറയുന്നതില്‍ അധ്യാപകരും അഭിമാനം കൊള്ളണം. എന്‍.എസ്.എസ്, എന്‍.സി.സി, സ്റ്റുഡന്റ് കേഡറ്റ് തുടങ്ങിയ പ്രസ്ഥാനങ്ങളെ ഒരു കുടക്കീഴിലാക്കി ലഹരി വിരുദ്ധ പോരാട്ടത്തിന് ചൈല്‍ഡ് ആര്‍മിയെക്കുറിച്ചും ആലോചിക്കാവുന്നതാണ്. സ്‌കൂളുകളില്‍ പേരിനു മാത്രമുള്ള കായിക പിരീഡുകള്‍ കാര്യക്ഷമമാക്കാനും കൂട്ടികളെ കൂട്ടത്തോടെ കളിക്കളത്തില്‍ എത്തിക്കാനും സാധിക്കണം.

ലഹരി വില്‍പ്പനയുടെ പേരില്‍ പിടിക്കപ്പെടുന്ന പ്രതികള്‍ക്ക് ജയിലുകളില്‍ ലഭിക്കുന്ന സുഖവാസം വീണ്ടും കുറ്റകൃത്യങ്ങള്‍ക്ക് പ്രേരണയായി മാറുന്ന സ്ഥിതി വിശേഷവും അവസാനിക്കണം. സെന്‍ട്രല്‍ ജയിലുകളിലെ അടുക്കളയില്‍ ലഹരി പൂക്കുന്നത് തടയാനും എക്‌സൈസ് സേനയെ കാര്യക്ഷമമാക്കുന്നതും രഹസ്യമായി വിവരം അറിയിക്കുന്നവരുടെ വിവരങ്ങള്‍ ലഹരിമാഫിയക്കാര്‍ക്ക് കൈമാറുകയും പിടികൂടുന്ന ലഹരി വസ്തുക്കള്‍ മറിച്ചുവില്‍പ്പന നടത്തുകയും ചെയ്യുന്ന ഉദ്യോഗസ്ഥര്‍ക്ക് മാതൃകാപരമായി ശിക്ഷ ഉറപ്പുവരുത്താനും സര്‍ക്കാരിന് കഴിയേണ്ടതുണ്ട്. ലഹരി എന്നാല്‍ മയക്കുമരുന്ന് മാത്രമാണെന്ന് സ്ഥാപിക്കാനാണ് മന്ത്രി എം.ബി രാജേഷ് കഴിഞ്ഞ ദിവസം ചാനല്‍ ചര്‍ച്ചയില്‍ ശ്രമിച്ചത്. രാഷ്ട്രത്തിന്റെ പുരോഗതിക്ക് നേതൃത്യം നല്‍കേണ്ടവരും നാടിനും കുടുംബത്തിനും ഊന്നുവടിയായി നിലകൊള്ളുകയും ചെയ്യേണ്ട കൗമാരവും യുവത്വവും അലിഞ്ഞും പുകഞ്ഞും ഇല്ലാതാക്കുന്ന ലഹരിക്കെതിരെ നാടൊന്നായ് കൈകോര്‍ക്കുമ്പോള്‍ മദ്യത്തിന് സ്വീകാര്യത നല്‍കിക്കൊണ്ടുള്ള ലഘൂകരണം വിപരീത ഫലം ചെയ്യും.

Article

വിവാഹപ്രായം: സുപ്രീംകോടതി വീണ്ടും ഇടപെടുമ്പോള്‍

ദേശീയ ബാലാവകാശ കമീഷന്റെ വാദങ്ങള്‍ ശരിവെച്ച് തന്നെ സുപ്രീംകോടതി ചീഫ് ജസ്റ്റിസ് ഡി.വൈ ചന്ദ്രചൂഡ് മുന്നോട്ട്‌വെച്ച ആശങ്കകള്‍ അതിപ്രധാനമാണ്. പ്രായപൂര്‍ത്തിയായി പരസ്പര സമ്മതത്തോടെ വിവാഹബന്ധത്തിലേര്‍പ്പെട്ടവര്‍ ക്രിമിനലുകളായി ചിത്രീകരിക്കപ്പെടുന്നതിലെ സാംഗത്യമാണ് പരമോന്നത നീതിപീഠം ചര്‍ച്ചക്ക് വെക്കുന്നത്.

Published

on

എന്‍.സി ജംഷീറലി ഹുദവി

ഇന്ത്യന്‍ നിയമ രംഗത്ത് ഏറെ ചര്‍ച്ച ചെയ്യപ്പെടുകയും നിയമ നിര്‍മാണങ്ങള്‍ക്ക് വിധേയമാവുകയും ചെയ്തതാണ് ശൈശവ വിവാഹം. വ്യത്യസ്ത കോടതി നടപടികള്‍ കണ്ട രാജ്യത്ത് ഇക്കഴിഞ്ഞ ജനുവരിയില്‍ പരമോന്നത കോടതി വീണ്ടും പ്രസ്തുത വിഷയത്തില്‍ സുപ്രധാന ഇടപെടല്‍ നടത്തിയിരിക്കുകയാണ്. 15 വയസ് തികഞ്ഞവര്‍ക്ക് മത നിയമപ്രകാരം വിവാഹം ആകാമോ എന്നതാണ് ചോദ്യം. 2017 ലാണ് സുപ്രീംകോടതി, 18 വയസിന് താഴെയുള്ള പെണ്‍കുട്ടിയുമായി ഭാര്യയെന്ന നിലക്കും ലൈംഗിക ബന്ധം പുലര്‍ത്തുന്നത് പീഢനമായി കണക്കാക്കുമെന്ന് വിധി പുറപ്പെടുവിച്ചത്. 15 നും 18 നുമിടക്ക് പ്രായമുള്ള ഭാര്യയുമായി ബന്ധത്തിലേര്‍പെടുന്നത് ശൈശവ വിവാഹ നിരോധന പരിധിയില്‍നിന്ന് മാറ്റിനിര്‍ത്തിയിരുന്ന രണ്ടാം സെക്ഷന്‍ ഇന്ത്യന്‍ ശിക്ഷാനിയമത്തിലെ 375 ാം സെക്ഷനില്‍ നിന്ന് സുപ്രീംകോടതി എടുത്തുകളയുകയും ചെയ്തു.

നിലവില്‍ ഇന്ത്യയുടെ പരമോന്നത നീതിപീഠത്തിന്റെ ഇടപെടല്‍ പക്ഷേ ബാലിശമല്ല. കോടതി മുന്നോട്ട്‌വെക്കുന്നത് ആശങ്കകളും സാധ്യതകളും ചോദ്യങ്ങളുമാണ്. ജനുവരി 13 ന് സുപ്രീംകോടതി ഉന്നയിച്ച ചോദ്യമിതാണ് 15 തികഞ്ഞ പെണ്‍കുട്ടിക്ക്, ലൈംഗിക ചേതനയുണ്ടെങ്കില്‍ അവളുടെ വ്യക്തിനിയമപ്രകാരം വൈവാഹിക ജീവിതത്തിലേക്ക് പ്രവേശിക്കാമോ? ഈ ചോദ്യം പ്രധാനമാണ്. ഒരു വ്യക്തിയുടെ ലൈംഗികതയും പക്വതയും നിര്‍ണയിക്കുന്നത് പ്രായമാണോ? 18 തികയുക എന്നത് പക്വതാ നിര്‍ണയത്തിന്റെ മാനദണ്ഡമാണോ ? ഈ ചോദ്യങ്ങളും ചേര്‍ത്തുവെക്കേണ്ട വിഷയങ്ങളാണ്.

ദേശീയ ബാലാവകാശ കമ്മീഷന്‍ ഫയല്‍ ചെയ്ത ഹരജിയാണ് പുതിയ കോടതി ഇടപെടലുകള്‍ക്ക് വഴിതുറന്നത്. 2022 ജൂണ്‍ മാസം 20 ലെ പഞ്ചാബ് ഹരിയാന ഹൈകോടതി വിധിയെ ചോദ്യം ചെയ്യുന്നതായിരുന്നു ഹരജി. 16 വയസ് പ്രായമുള്ള പെണ്‍കുട്ടി 21 വയസുള്ള ഭര്‍ത്താവിന്റെ കൂടെ സുരക്ഷാപ്രശ്‌നം ഉന്നയിച്ച് കോടതിയെ സമീപിച്ചതിനെതുടര്‍ന്നാണ് ഹൈകോടതി ഇടപെടലുണ്ടായത്.

മുസ്‌ലിം വ്യക്തി നിയമ പ്രകാരം വിവാഹത്തിന് തടസങ്ങളൊന്നുമില്ലെന്ന് ജസ്റ്റിസ് ജസ്ജിത് സിങ് ബേദി വിധിച്ചു. ദമ്പതികള്‍ക്ക് സുരക്ഷ ഉറപ്പാക്കാനും കോടതി നിര്‍ദേശിച്ചു. 2021 ഡിസംബറിലും സമാനമായ വിധി പഞ്ചാബ്-ഹരിയാന ഹൈകോടതിയില്‍ നിന്നുണ്ടായിരുന്നു. 17 വയസുകാരിയായ പെണ്‍കുട്ടി ഹൈന്ദവ വിശ്വാസിയായ ഭര്‍ത്താവൊന്നിച്ചാണ് അന്ന് കോടതിയെ സമീപിച്ചത്.

മുസ്‌ലിം വ്യക്തി നിയമ പ്രകാരം പ്രായപൂര്‍ത്തി പരിധി 15 ആകയാല്‍ പതിനേഴുകാരിക്ക് ഇഷ്ടപ്രകാരം വിവാഹമാകാം എന്ന് കോടതി വിധിച്ചു. 2022 ജൂണ്‍ മാസത്തിലെ ഹൈകോടതി വിധിക്കെതിരെയാണ് ദേശീയ ബാലാവകാശ കമ്മീഷന്‍ സുപ്രീം കോടതിയില്‍ ഹര്‍ജി നല്‍കിയത്. പോക്‌സോ, ഇന്ത്യന്‍ ശിക്ഷാ നിയമം ശൈശവ വിവാഹം നിയമവിരുദ്ധമാകുമ്പോള്‍ 18 ന് താഴെ പ്രായമുള്ള പെണ്‍കുട്ടികള്‍ വ്യക്തി നിയമപ്രകാരം വിവാഹിതരാവുന്നത് അനുവദിക്കാന്‍ പാടില്ലെന്നാണ് ബാലാവകാശ കമീഷന്‍ മുന്നോട്ട്‌വെക്കുന്ന വാദം. പഞ്ചാബ് – ഹരിയാന ഹൈകോടതി വിധി മറ്റു ഹൈകോടതികള്‍ക്ക് ജുഡീഷ്യല്‍ പ്രിസിഡന്റ് (കീഴ്‌വഴക്കം) ആവുകയില്ലെന്ന് സുപ്രീം കോടതി പറയുകയും ചെയ്തു. അതേസമയം വിവാഹ പ്രായ പരിധി 18 ല്‍ നിന്നും കുറക്കുന്നതുമായി ബന്ധപ്പെട്ട് കേന്ദ്ര സര്‍ക്കാരുമായി സുപ്രീംകോടതി അഭിപ്രായമാരായുകയും ചെയ്തു.

നിലവില്‍ 13 സംസ്ഥാനങ്ങളിലാണ് കഴിഞ്ഞ അഞ്ച് വര്‍ഷങ്ങള്‍ക്കിടയില്‍ ശൈശവ വിവാഹ വര്‍ധനവുള്ളത്. അസം, ബിഹാര്‍, ഗുജറാത്ത്, ഝാര്‍ഖണ്ഡ്, കര്‍ണാടക, മധ്യപ്രദേശ്, മഹാരാഷ്ട്ര, രാജസ്ഥാന്‍, ഉത്തര്‍പ്രദേശ്, വെസ്റ്റ്ബംഗാള്‍ സംസ്ഥാനങ്ങളില്‍ ശൈശവ വിവാഹം കൂടുതലാണ്. ഇത്തരം വിവാഹ ബന്ധങ്ങള്‍ മാരകമായ രോഗങ്ങള്‍ക്ക് കാരണമാകുമെന്നാണ് ദേശീയ ബാലാവകാശ കമീഷന്‍ സുപ്രീംകോടതിയില്‍ ഉന്നയിച്ച പ്രശ്‌നങ്ങളിലൊന്ന്. കൂടാതെ പോക്‌സോ, ഐ.പി.സി 375 നിലവിലുള്ളപ്പോള്‍ വ്യക്തിനിയമ പ്രകാരം വിവാഹ ബന്ധം അനുവദിക്കുന്നത് നിയമ വിരുദ്ധമാണെന്നുമാണ് വാദം.

ദേശീയ ബാലാവകാശ കമീഷന്റെ വാദങ്ങള്‍ ശരിവെച്ച് തന്നെ സുപ്രീംകോടതി ചീഫ് ജസ്റ്റിസ് ഡി.വൈ ചന്ദ്രചൂഡ് മുന്നോട്ട്‌വെച്ച ആശങ്കകള്‍ അതിപ്രധാനമാണ്. പ്രായപൂര്‍ത്തിയായി പരസ്പര സമ്മതത്തോടെ വിവാഹബന്ധത്തിലേര്‍പ്പെട്ടവര്‍ ക്രിമിനലുകളായി ചിത്രീകരിക്കപ്പെടുന്നതിലെ സാംഗത്യമാണ് പരമോന്നത നീതിപീഠം ചര്‍ച്ചക്ക് വെക്കുന്നത്.

ശൈശവ വിവാഹവുമായി ബന്ധപ്പെട്ട് രാജ്യത്ത് നിരവധി കേസുകള്‍ വ്യത്യസ്ത കോടതികളിലായി നിലവിലുണ്ട്. ഭൂരിപക്ഷവും പരസ്പര സമ്മതത്തോടെ വിവാഹബന്ധത്തിലേര്‍പ്പെട്ട ദമ്പതികള്‍ക്കെതിരെയാണ്. രാജ്യത്ത് നിര്‍ബന്ധിത വിവാഹങ്ങള്‍ വ്യത്യസ്ത ആചാരങ്ങളുടെ ഭാഗമായി ഇപ്പോഴും നിലവിലുണ്ട്. പെണ്‍കുട്ടികളെ പീഢനത്തിനിരയാക്കാന്‍ മറയാക്കുന്ന ദേശ, ഗോത്ര ആചാരങ്ങള്‍ പലതുണ്ട്. പഠനം നിര്‍ത്തി വിവാഹത്തിന് നിര്‍ബന്ധിക്കുന്നവരുണ്ട്. ഇതെല്ലാം എതിര്‍ക്കപ്പെടേണ്ടതാണ്. എന്നാല്‍, ഇവ പലതും നടപടിക്ക് വിധേയമാകാതെ പോകുന്നു എന്നതാണ് യാഥാര്‍ഥ്യം. എന്നാല്‍, പ്രായപൂര്‍ത്തിയായ നിലക്ക് രണ്ടു പേരുടേയും സമ്മതത്തോടെ മതാചാരപ്രകാരം നടക്കുന്ന വിവാഹങ്ങള്‍ പലതും ക്രിമിനല്‍ കേസുകളായി രജിസ്റ്റര്‍ ചെയ്യപ്പെടുന്നു. വിവാഹ പ്രായത്തിലും ഏകതാനിയമത്തെ പറയുന്നവരോട് കൂടിയാണ് ചീഫ് ജസ്റ്റിസിന്റെ ചോദ്യം, ‘നമുക്ക്, പുനരാലോചന നടത്താമല്ലോ?’.

Continue Reading

Article

ഇന്ധന നികുതി കുറച്ചേ മതിയാകൂ – എഡിറ്റോറിയല്‍

തിരഞ്ഞെടുപ്പുകളൊന്നുമില്ലാത്ത വര്‍ഷം നോക്കിയാണ് സാധ്യമായ എല്ലാ മേഖലയിലും കൈവെച്ചതിന്പുറമെ വന്‍ വിലക്കയറ്റത്തിന് വഴിവെച്ച് പെട്രോള്‍, ഡീസല്‍ വിലയും കൂട്ടിയത്. സമീപകാല ചരിത്രത്തിലൊന്നും ഇത്ര വലിയ ജീവിതഭാരം ഒരു സര്‍ക്കാറും ഒറ്റയടിക്ക് അടിച്ചേല്‍പിച്ചിട്ടില്ല.

Published

on

വറുതികള്‍ക്കും പ്രതിസന്ധികള്‍ക്കും നടുവില്‍ നട്ടംതിരിയുന്ന സാധാരണക്കാരുടെ ജീവിതം കൂടുതല്‍ ദുരിതമയമാക്കുന്നതാണ് ഇന്ധന വിലയില്‍ രണ്ടു രൂപ വര്‍ധന. കോവിഡ് കാലത്തെ ദുരിതത്തിന് ഇതുവരെ അറുതിവന്നിട്ടില്ല. രണ്ടറ്റവും കൂട്ടിമുട്ടിക്കാന്‍ പെടാപാട് പെടുകയാണ് സാധാരണക്കാര്‍. കോവിഡ് ദുരന്തത്തില്‍ വീണുപോയവര്‍ ഇതുവരെ രണ്ടു കാലില്‍ ഉറച്ചുനിന്നിട്ടില്ല. ജീവിത ചെലവിന്റെ ചെറിയ വര്‍ധനപോലും അവരുടെ ജീവിതത്തിന്റെ താളംതെറ്റിക്കും.

ഇന്ധനത്തില്‍ ചുറ്റിത്തിരിയുന്നതാണ് സാധാരണക്കാരുടെ ജീവിതമെന്നു പറയാം. പെട്രോളിനും ഡീസലിനും രണ്ടു രൂപ കൂടുമ്പോള്‍ സാധാരണക്കാരുടെ ജീവിതമാണ് പ്രതിസന്ധിയിലാകുന്നത്. പെട്രോളിലെ സെസ് ആദ്യം ബാധിക്കുക അവരെയാണ്. സ്ത്രീകളും ചെറുപ്പക്കാരുമടക്കം ദിവസ വേതനക്കാരുള്‍പ്പെടെ സമയത്തിന് ജോലിക്ക്‌പോയി കുടുംബം പുലര്‍ത്താന്‍ ഇരുചക്ര വാഹനങ്ങളെയാണ് ആശ്രയിക്കുന്നത്. കോവിഡിനുശേഷം ബസ് സര്‍വീസുകള്‍ പലതും നിര്‍ത്തിയതിനാല്‍ സ്വന്തമായുള്ള ചെറിയ വാഹത്തിലാണ് ആളുകള്‍ പണിക്ക് പോയ്‌ക്കൊണ്ടിരിക്കുന്നത്.

പെട്രോളിനുതന്നെ നല്ലൊരു തുക വേണ്ടിവരുന്നു. നിത്യകൂലിയില്‍ നിന്ന് ഇത് കണ്ടെത്തണം. ഇന്ധന സെസ് വര്‍ധിപ്പിച്ചതോടെ ഓട്ടോക്കാരും ടാക്‌സിക്കാരും ചാര്‍ജ് വര്‍ധിപ്പിക്കണമെന്ന് ആവശ്യപ്പെടാനിരിക്കുകയാണ്. സ്വകാര്യ ബസ്സുടമകള്‍ നിരക്ക് വര്‍ധന ആവശ്യപ്പെട്ടുകഴിഞ്ഞു. കടത്ത്കൂലി കൂടുന്നതോടെ എല്ലാ ഉത്പന്നങ്ങളുടെയും വിലയില്‍ അത് പ്രതിഫലിക്കുമെന്നുറപ്പാണ്. അതോടെ അവശ്യസാധാനങ്ങളുടെ വില വര്‍ധിക്കാനിട വരും. ജീവിതഭാരം വര്‍ധിക്കാനും ചെലവ് കുതിച്ചുയരാനും ഇത് വഴിയൊരുക്കും. ഇപ്പോള്‍തന്നെ വില വര്‍ധനവില്‍ ജനം നടുവൊടിഞ്ഞിരിക്കുകയാണ്.

തിരഞ്ഞെടുപ്പുകളൊന്നുമില്ലാത്ത വര്‍ഷം നോക്കിയാണ് സാധ്യമായ എല്ലാ മേഖലയിലും കൈവെച്ചതിന്പുറമെ വന്‍ വിലക്കയറ്റത്തിന് വഴിവെച്ച് പെട്രോള്‍, ഡീസല്‍ വിലയും കൂട്ടിയത്. സമീപകാല ചരിത്രത്തിലൊന്നും ഇത്ര വലിയ ജീവിതഭാരം ഒരു സര്‍ക്കാറും ഒറ്റയടിക്ക് അടിച്ചേല്‍പിച്ചിട്ടില്ല. വെള്ളക്കരം, വൈദ്യുതിചാര്‍ജ്, ബസ്ചാര്‍ജ് ഒക്കെ വര്‍ധിപ്പിച്ചതിന് പിറകെയാണ് ഈ കടുംനടപടി. ഏകദേശം 4000 കോടി രൂപ വരുന്ന അധിക ബാധ്യതയാണ് ജനത്തിന് മുകളില്‍ വീഴുന്നത്. കെട്ടിട നികുതി വര്‍ധന അടക്കം പ്രാബല്യത്തില്‍ വരുമ്പോള്‍ കുറേക്കൂടി ആഘാതമുണ്ടാകും.

കേന്ദ്ര സര്‍ക്കാര്‍ അടിക്കടി ഇന്ധന വില ഉയര്‍ത്തുന്നതിനെതിരെ കടുത്ത പ്രതിഷേധം ഉയര്‍ന്നിരുന്നു. സംസ്ഥാന നികുതിയില്‍ ഇളവ് ആവശ്യം ഉയര്‍ന്നപ്പോള്‍ സംസ്ഥാനം അതിനു തയാറായതുമില്ല. നിലവില്‍ റോഡ് സെസ് അടക്കം വാങ്ങുന്നതിന്പുറമെയാണ് ഓരോ ലിറ്റര്‍ പെട്രോളിനും ഡീസലിനും രണ്ട് രൂപ വീതം വര്‍ധിപ്പിച്ചത്. 750 കോടിയാണ് ഇതിലൂടെ ലക്ഷ്യമിടുന്നതെങ്കിലും അതില്‍ കൂടുതല്‍ ലഭിക്കും. ക്ഷേമ പെന്‍ഷന്‍ വിതരണത്തിനാണ് ഇന്ധന സെസും മദ്യസെസും ഏര്‍പ്പെടുത്തിയതെന്ന് പറയുന്നുണ്ടെങ്കിലും രണ്ടു വര്‍ഷമായി പെന്‍ഷന്‍ കൂട്ടിയിട്ടില്ല. പെന്‍ഷന്‍ കമ്പനി വഴി കടമെടുപ്പിന് കേന്ദ്രം നിയന്ത്രണം കൊണ്ടുവന്നപ്പോഴാണ് പെന്‍ഷന്‍ ബാധ്യത മറ്റ് രീതിയില്‍ ഇടതുസര്‍ക്കാര്‍ ജനങ്ങളുടെ മുകളിലിട്ടത്. രണ്ടറ്റം കൂട്ടിമുട്ടിക്കാന്‍ പ്രയാസപ്പെടുന്ന ജനങ്ങളുടെ മുകളിലേക്കാണ് ഈ കടുംനടപടിളെല്ലാം വീണത്.

ഭൂമി ഇടപാടുകളും ഏറെ ചെലവേറിയതാകയാല്‍ ഭൂമികച്ചവടങ്ങളും നിര്‍മാണ പ്രവര്‍ത്തനങ്ങളും മന്ദഗതിയിലാകും. ഇതോടെ തൊഴില്‍ സാധ്യതയും ഇല്ലാതാകും. ഇപ്പോള്‍തന്നെ മിക്കവര്‍ക്കും ആഴ്ചയില്‍ മൂന്നും നാലും ദിവസം മാത്രമേ കൂലി പണി ലഭിക്കുന്നുള്ളു. നിര്‍മാണ സാധനങ്ങളുടെ വില വര്‍ധിക്കുന്നതോടെ സാധാരണക്കാരുടെ വീട് പണിയടക്കം എല്ലാം നിലയ്ക്കും. അതോടെ പണി പിന്നെയും കുറയും. ഒരുനിലക്കും ജീവിക്കാന്‍ അനുവദിക്കില്ലെന്ന നിലപാടിലാണ് സര്‍ക്കാര്‍. പരിമിതമായ തോതില്‍ മാത്രമേ നികുതി വര്‍ധിപ്പിച്ചിട്ടുള്ളൂ എന്നു പറഞ്ഞ് ഇന്നലെ നിയമസഭയില്‍ ന്യായീകരിക്കാന്‍ ശ്രമിക്കുകയാണ് ധനമന്ത്രി കെ.എന്‍ ബാലഗോപാല്‍ ചെയ്തത്.

സര്‍ക്കാറിന്റെ ഇന്ധന സെസിനെതിരെ ശക്തമായ പ്രതിഷേധം ഉയര്‍ന്നുവരേണ്ടതുണ്ട്. ജനങ്ങളോട് ഉത്തരവാദിത്തമുള്ള പ്രതിപക്ഷം അതാണ് ചെയ്തുവരുന്നതും. ബജറ്റില്‍ ഇന്ധന നികുതി കൂട്ടിയതിനെതിരെ പ്രതിപക്ഷം സഭാകവാടത്തില്‍ സത്യഗ്രഹം തുടങ്ങിയിരിക്കുകയാണ്. യുവ എം.എല്‍.എമാരായ നജീബ് കാന്തപുരം, ഷാഫി പറമ്പില്‍, സി.ആര്‍ മഹേഷ്, മാത്യു കുഴല്‍നാടന്‍ എന്നിവരാണ് സത്യഗ്രഹം ആരംഭിച്ചത്. നികുതി വര്‍ധനവിനെതിരെ പ്രതിഷേധം കടുപ്പിക്കാനുള്ള നീക്കത്തിന്റെ ഭാഗമായാണ് സത്യഗ്രഹം.

ഇന്നലെ പ്ലക്കാര്‍ഡുകളും ബാനറുകളുമായാണ് പ്രതിപക്ഷം സഭയില്‍ എത്തിയത്. നിയമസഭക്ക് പുറത്തും പ്രതിഷേധം കടുപ്പിക്കാനാണ് യു.ഡി.എഫ് തീരുമാനം. ഇതിന്റെ ഭാഗമായി ഇന്ന് സെക്രട്ടേറിയറ്റിലേക്കും എല്ലാ കലക്ടറേറ്റുകളിലേക്കും കോണ്‍ഗ്രസ് മാര്‍ച്ച് സംഘടിപ്പിക്കും. 13 ന് യു.ഡി.എഫ് ജില്ലാ കേന്ദ്രങ്ങളില്‍ രാപ്പകല്‍ സമരം നടത്താനും തീരുമാനമുണ്ട്. ഈ സമരത്തില്‍ യു.ഡി.എഫിനൊപ്പം ജനങ്ങളുമുണ്ടാകും. ജനവിരുദ്ധ സര്‍ക്കാറിനെതിരെയുള്ള ശക്തമായ പ്രതിഷേധമായി അലയടിക്കണം. കൂട്ടിയ ഇന്ധന നികുതി കുറയ്ക്കുന്നതുവരെ സമരം തുടരേണ്ടതുണ്ട്. ജനകീയ സമരത്തിനുമുന്നില്‍ പത്തി മടക്കുകയല്ലാതെ സര്‍ക്കാറിന് മറ്റു വഴിയൊന്നുമില്ല. അത് എത്രയും പെട്ടെന്നാകുന്നുവോ അത്രയും നന്ന്.

Continue Reading

columns

ചരിത്രത്തെ അപനിര്‍മിക്കുന്ന സംഘ്പരിവാര്‍

ചരിത്രത്തെ അപനിര്‍മിക്കുന്നതിനുള്ള തിരക്കിലാണ് കേന്ദ്ര സര്‍ക്കാര്‍. പ്രധാനമന്ത്രി നരേന്ദ്രമോദിയും ആഭ്യന്തര മന്ത്രി അമിത്ഷായും വിദ്യാഭ്യാസ മന്ത്രി ധര്‍മേന്ദ്ര പ്രധാനും ഇതിനായുള്ള പ്രബോധന പ്രവര്‍ത്തനങ്ങളില്‍ ഏര്‍പ്പെട്ടിരിക്കുകയാണ്.

Published

on

റസാഖ് ആദൃശ്ശേരി

ചരിത്രത്തെ അപനിര്‍മിക്കുന്നതിനുള്ള തിരക്കിലാണ് കേന്ദ്ര സര്‍ക്കാര്‍. പ്രധാനമന്ത്രി നരേന്ദ്രമോദിയും ആഭ്യന്തര മന്ത്രി അമിത്ഷായും വിദ്യാഭ്യാസ മന്ത്രി ധര്‍മേന്ദ്ര പ്രധാനും ഇതിനായുള്ള പ്രബോധന പ്രവര്‍ത്തനങ്ങളില്‍ ഏര്‍പ്പെട്ടിരിക്കുകയാണ്. പാഠപുസ്തകങ്ങളില്‍നിന്നും കുട്ടികള്‍ തെറ്റായ ചരിത്രമാണ് പഠിക്കുന്നതെന്നും അവരെ ശരിയായ ചരിത്രം പഠിപ്പിക്കേണ്ടത് ഗവണ്‍മെന്റിന്റെ ധാര്‍മിക ഉത്തരവാദിത്തമാണെന്നും അവര്‍ പറയുന്നു. പൗരാണികകാലം മുതലുള്ള ഇന്ത്യന്‍ സംസ്‌കാരത്തോടും ഈ നാട് ഭരിച്ച ഭരണാധികാരികളോടും യാതൊരു ബഹുമാന ആദരവുകളുമില്ലാത്ത പുതിയ തലമുറ വളര്‍ന്നുവരുന്നതിനു കാരണം ചരിത്രത്തിലെ തെറ്റായ നിര്‍മിതിയാണെന്നാണ് സംഘ്പരിവാര്‍ വാദം. ചരിത്ര ഗവേഷണ കൗണ്‍സിലും ആര്‍.എസ്.എസ് നേതൃത്വത്തിലുള്ള ഭാരതീയ ഇതിഹാസ സങ്കലന യോജനയും ഒന്നിച്ചുചേര്‍ന്ന് ഈ ദൗത്യം ഏറ്റെടുത്തിരിക്കുന്നു.

2014ല്‍ ബി.ജെ.പി അധികാരത്തില്‍ വന്ന നാള്‍ മുതല്‍തന്നെ ഈ പദ്ധതിക്ക് ആക്കം കൂട്ടിയിരുന്നു. പാഠപുസ്തകങ്ങളിലൂടെയുള്ള വര്‍ഗീയവത്കരണമായിരുന്നു അവയിലൊന്ന്. ഹിന്ദുത്വയുടെ ലക്ഷ്യസാക്ഷാത്കാരത്തിനുവേണ്ടി തലമുറകളെ വരുതിയിലാക്കാന്‍ കഴിയുന്ന അധികാര വിദ്യാഭ്യാസ തന്ത്രമാണ് ഇതിന് അവര്‍ പ്രയോഗിക്കുന്നത്. കാവിയുടെ പ്രത്യയശാസ്ത്രം പാഠപുസ്തകങ്ങളില്‍ കുത്തിനിറച്ചുകൊണ്ട് കുട്ടിക്കാലത്തെ പിടിച്ചെടുക്കാനുള്ള ഫാസിസ്റ്റ് ഗൂഢാലോചനയുടെ ഭാഗമായ തന്ത്രം ബി.ജെ. പി ഭരിക്കുന്ന സംസ്ഥാനങ്ങളില്‍ ഏറെക്കുറെ വിജയിച്ചിട്ടുണ്ട്. ആര്‍.എസ്.എസ് രൂപകല്‍പ്പനചെയ്ത പുസ്തകങ്ങള്‍ പ്രൈമറി ക്ലാസ് മുതല്‍ സര്‍വകലാശാല തലം വരെ പഠിപ്പിക്കുന്ന തരത്തില്‍ സിലബസുകള്‍ പൂര്‍ണമായും മാറ്റിയെഴുതികൊണ്ടിരിക്കുന്നു. കേന്ദ്ര സര്‍ക്കാര്‍ കൊണ്ടുവന്ന പുതിയ വിദ്യാഭ്യാസ പദ്ധതിയും സമ്പൂര്‍ണ വര്‍ഗീയവത്കരണം ലക്ഷ്യം വെച്ചുകൊണ്ടുള്ളതാണ്. ഇക്കാലം വരെ രാജ്യം പിന്തുടര്‍ന്നുപോന്ന സര്‍വ മൂല്യങ്ങളും തകര്‍ക്കുന്നതാണ് ദേശീയ വിദ്യാഭ്യാസ നയം. ഇതിനെതിരെ കേരളത്തില്‍പോലും വേണ്ടത്ര പ്രതിഷേധങ്ങള്‍ ഉയര്‍ന്നുവന്നിട്ടില്ലയെന്നതാണ് വസ്തുത.

പ്രാചീന ഇന്ത്യയെന്ന മിത്തിന് ഊന്നല്‍ നല്‍കികൊണ്ടുള്ള ചരിത്ര ദര്‍ശനമാണ് ആര്‍.എസ്.എസിന്റെത്. ‘ഇന്ത്യക്കാരനാകുന്നതില്‍ അഭിമാനിക്കുക’ എന്നതാണ് ഈ ചരിത്രദര്‍ശനത്തിന്റെ കാതല്‍. ആര്യന്മാരാണ് ഈ രാജ്യത്തെ ചിരപുരാതന ജനത. ആദിമ മനുഷ്യന്‍ ജന്മം കൊണ്ടത് ഭാരതത്തിലാണ്, ഇത് ദേവന്മാരുടെ ഭൂമിയാണ്, ഏറ്റവും പൗരാണികവും വിശിഷ്ടവുമായ ഭാഷ സംസ്‌കൃതമാണ്, ലോകത്തെ സംസ്‌കാരം പഠിപ്പിച്ചത് ആര്യന്മാരാണ് തുടങ്ങിയവയെല്ലാം ഈ ചരിത്രദര്‍ശനം ഉള്‍കൊള്ളുന്നു. ഇന്ത്യയുടെ സാമൂഹിക രൂപവത്കരണത്തില്‍ മുസ്‌ലിംകള്‍ക്ക് യാതൊരു പങ്കുമില്ല. അവര്‍ രാജ്യത്തെ കൊള്ളയടിക്കുകയും നശിപ്പിക്കുകയും ചെയ്തവരാണ്. അടിമത്തത്തിന്റെ കാലഘട്ടമായിരുന്നു മുസ്‌ലിം ഭരണ കാലം, അതിന്റെ സ്വാധീനത്തില്‍നിന്നും മോചനം നേടുകയെന്നതാണ് ദേശീയത. ഈ തരത്തിലുള്ള മിത്തുകളാണ് തങ്ങളുടെ ഗ്രന്ഥങ്ങളിലും പാഠ്യപദ്ധതിയിലും ആര്‍.എസ്.എസ് പ്രചരിപ്പിക്കുന്നത്.

ഇന്ത്യയിലെ മുസ്‌ലിം ഭരണകൂടങ്ങളെ പൈശാചികവത്കരിക്കുകയെന്നത് ആര്‍.എസ്.എസിന്റെ സ്ഥിരം പദ്ധതിയാണ്. മുസ്‌ലിം ഭരണാധികാരമഹത്വം വിളംബരപ്പെടുത്തുന്ന ചരിത്ര സ്മാരകങ്ങളെ അപകീര്‍ത്തിപ്പെടുത്തലും തകര്‍ക്കലും പേര് മാറ്റുന്നതും എല്ലാം അതിനു വേണ്ടിയാണ്. താജ്മഹലും ചെങ്കോട്ടയും മറ്റു പ്രധാനപ്പെട്ട മുസ്‌ലിം ചരിത്ര സ്മാരകങ്ങളും ഹിന്ദു രാജാക്കന്മാരുടെ നിര്‍മിതിയാണെന്ന രീതിയില്‍ ഇന്ത്യാ ചരിത്രം ഇതിനകംതന്നെ തിരുത്തിയെഴുതപ്പെട്ടിട്ടുണ്ട്. പ്രസ്തുത പുസ്തകങ്ങള്‍ ഇംഗ്ലീഷിലും ഹിന്ദിയിലും ഇന്നു ലഭ്യമാണ്. മുസ്‌ലിം ഭരണാധികാരികള്‍ ക്ഷേത്ര ധ്വംസകരായിരുന്നുവെന്നത് സംഘ്ചരിത്ര രചനകളില്‍ ധാരാളം കാണാം. അക്ബറെ പോലും അവര്‍ വെറുതെ വിട്ടിട്ടില്ല. ആര്‍ക്കിയോളജിക്കല്‍ സര്‍വെ ഓഫ് ഇന്ത്യ ചരിത്ര സ്മാരകങ്ങളിലും പുരാതന മുസ്‌ലിം പള്ളികളിലും ക്ഷേത്രാവശിഷ്ടങ്ങള്‍ കണ്ടെത്താനുള്ള ഖനനം നടത്തുന്നത് ഇതിനു വേണ്ടിയാണ്. പല സ്ഥലങ്ങളിലും ഇത്തരം പ്രതിമകളും മറ്റും കണ്ടെത്തിയെന്ന വാദവുമായി പള്ളികളുടെയും ചരിത്ര സ്മാരകങ്ങളുടെയും നേരെ അവകാശവാദം ഉന്നയിക്കല്‍ സംഘ്പരിവാര്‍ പതിവാക്കിയിരിക്കുകയാണ്.

ചരിത്ര സ്മാരകങ്ങളുടെയും മറ്റും പേര് മാറ്റുന്നതാണ് മറ്റൊരു രീതി. ഡല്‍ഹിയിലെ ഔറംഗസേബ് റോഡ് എ.പി.ജെ അബ്ദുല്‍ കലാം റോഡ് എന്നാക്കിയത് മുഗളന്മാരുടെ ഓര്‍മകള്‍ മായ്ച്ചുകളയാന്‍ വേണ്ടിയാണ്. യു.പിയില്‍ ഫൈസാബാദ് ജില്ലയെ ശ്രീ അയോധ്യ എന്നാക്കി. ചരിത്ര നഗരമായ അലഹബാദ് പ്രയാഗ് രാജായി മാറി. ഫൈസാബാദ് റെയില്‍വെ സ്റ്റേഷന്‍ അയോധ്യ കന്റോണ്‍മെന്റാണിന്ന്. ഹരിയാനയിലെ ഗുഡ്ഗാവ് ഗുരുഗ്രാമമായും മധ്യപ്രദേശിലെ ഹോഷംഗാബാദ് നര്‍മദാപുരമായും ഹിമാചലിലെ സിംലയെ ശ്യാമളയായും മാറ്റപ്പെട്ടു. ഗുജറാത്തിലെ അഹമ്മദാബാദിനെ കര്‍ണാവതിയാക്കാനുള്ള ശ്രമത്തിലാണ്. രാഷ്ട്രപതി ഭവനിലെ ചരിത്രപ്രസിദ്ധമായ മുഗള്‍ ഗാര്‍ഡന്‍ അമൃത് ഉദ്യാന്‍ ആയിമാറിയിരിക്കുന്നു. ഡല്‍ഹിയില്‍ തന്നെയുള്ള അക്ബര്‍ റോഡും ഹുമയൂണ്‍ റോഡും ഷാജഹാന്‍ റോഡുമല്ലാം പുതിയ പേരുകളില്‍ ഉടന്‍ തന്നെ അറിയപ്പെടും. ഖുതുബുദ്ധീന്‍ ഐബക് നിര്‍മിച്ച ഖുതുബ് മിനാറും നയനമനോഹരമായ താജ്മഹലും ക്ഷേത്രമാണെന്ന അവകാശവാദം സംഘ് ശക്തികള്‍ ഉയര്‍ത്തുന്നുണ്ട്. ചില സംഘ് സംഘടനകള്‍ ഈ ആവശ്യം ഉന്നയിച്ച് കോടതിയെ സമീപിക്കാനുള്ള ഒരുക്കത്തിലാണ്.

ഇന്ത്യയുടെ ഭൂതകാല ചരിത്രത്തെ മഹത്വവത്കരിക്കുകയും അതിലേക്കുള്ള തിരിച്ചുപോക്ക് മാത്രമാണ് രാജ്യത്തെ രക്ഷിക്കാനുള്ള ഏക പോംവഴിയെന്നും സംഘ്പരിവാര്‍ ഉരുവിട്ടു കൊണ്ടേയിരിക്കുന്നു. മതേതരത്വം പോലും അവര്‍ക്ക് കയ്‌പേറിയതാണ്. ഹിന്ദുത്വമെന്ന പ്രഖ്യാപിത ലക്ഷ്യത്തിനു അത് വിഘാതമായി നില്‍ക്കുന്നുവെന്നതാണ് എതിര്‍പ്പിനുള്ള പ്രധാന കാരണം. ഹിന്ദു ഐക്യത്തെ ചെറുക്കാനായി നെഹ്‌റുവിയന്‍ സാമൂഹിക ചിന്താപദ്ധതിയുടെ ഭാഗമായി ഉപയോഗിക്കപ്പെട്ട രാഷ്ട്രീയ ആയുധമാണ് അവരുടെ കാഴ്ചപ്പാടില്‍ മതേതരത്വം. ഗാന്ധിയേക്കാള്‍, നെഹ്‌റുവിനേക്കാള്‍ പ്രധാനികളായി ആര്‍.എസ്.എസ് ആചാര്യന്മാരെ ഉയര്‍ത്തി കാട്ടുന്നതിനുള്ള കാരണം ഈ ചിന്താഗതിയാണ്. പക്ഷേ, ഇന്ത്യന്‍ സ്വാതന്ത്ര്യ സമരത്തില്‍ തങ്ങളുടെ നേതാക്കന്മാര്‍ കാര്യമായ പങ്കൊന്നും വഹിച്ചിട്ടില്ലെന്ന ചരിത്രവസ്തുത അവരെ തെല്ലെന്നുമല്ല അലട്ടുന്നത്. സ്വാതന്ത്ര്യസമരത്തില്‍ തങ്ങളുടെ പങ്ക് തെളിയിക്കാന്‍ അവരുടെ പക്കല്‍ ഒരു തെളിവ്‌പോലും ഇല്ല. എന്നാല്‍ അടുത്തകാലത്തായി പല സ്വാതന്ത്ര്യസമര സേനാനികളെയും തട്ടിയെടുക്കാനുള്ള ശ്രമത്തിലാണ് സംഘ്പരിവാര്‍. സ്വാതന്ത്ര്യസമര സേനാനിയും ഇന്ത്യന്‍ നാഷണല്‍ കോണ്‍ഗ്രസിന്റെ സമുന്നത നേതാവും ഇന്ത്യയുടെ ആദ്യത്തെ ആഭ്യന്തര മന്ത്രിയും ആയിരുന്ന സര്‍ദാര്‍ വല്ലഭായ് പട്ടേലായിരുന്നു ആദ്യത്തെ ഇര. ഇപ്പോള്‍ നേതാജി സുഭാഷ് ചന്ദ്ര ബോസിനെയാണ് ലക്ഷ്യംവെച്ചിരിക്കുന്നത്. ഇക്കഴിഞ്ഞ ജനുവരി 23ന് കൊല്‍ക്കത്തയില്‍ നേതാജിയുടെ ജന്മദിനം ആര്‍.എസ്.എസ് ആഘോഷിച്ചിരുന്നു. യഥാര്‍ത്ഥത്തില്‍ നേതാജിയുടെ കാഴ്ചപ്പാടുകള്‍ക്കും പ്രവര്‍ത്തനങ്ങള്‍ക്കും സംഘ്പരിവാറുമായി ഒരു ബന്ധവും ഉണ്ടായിരുന്നില്ല. അക്കാലത്ത് ബ്രിട്ടീഷ് സര്‍ക്കാരിനെ അവരാഗ്രഹിക്കുന്ന തരത്തില്‍ സേവിക്കാന്‍ തയ്യാറാണെന്നു പറഞ്ഞ് ബ്രിട്ടീഷ് ഗവണ്‍മെന്റിന് മാപ്പപേക്ഷ നല്‍കിയ വി. ഡി സവര്‍ക്കറും ഹിന്ദുമഹാസഭയും ബ്രിട്ടീഷുകാര്‍ക്ക് പാദസേവ ചെയ്യുകയായിരുന്നു. രണ്ടാം ലോക യുദ്ധം കൊടുമ്പിരി കൊള്ളുന്ന സമയത്ത്, 1941ല്‍ ഭഗത്പുരില്‍ ചേര്‍ന്ന ഹിന്ദു മഹാസഭയുടെ 23ാം സമ്മേളനത്തില്‍ സവര്‍ക്കര്‍ ആഹ്വാനം ചെയ്തത് ഓരോ ഹിന്ദുമഹാസഭാപ്രവര്‍ത്തകനും ബ്രിട്ടീഷ് സൈന്യത്തില്‍ ചേര്‍ന്നുകൊണ്ടു യുദ്ധത്തില്‍ ഇംഗ്ലീഷുകാരെ സഹായിക്കാനായിരുന്നു. അതേസമയം നേതാജിയുടെ ഉറച്ച നിലപാട് ഇതിന് വിപരീതമായിരുന്നു. യുദ്ധസാഹചര്യം ഉപയോഗപ്പെടുത്തി ബ്രിട്ടീഷ് സാമ്രാജ്യത്വത്തിന് പ്രഹരമേല്‍പ്പിക്കാനായിരുന്നു അദ്ദേഹം ആഹ്വാനം ചെയ്തത്. ‘ബ്രിട്ടന്‍ ഇപ്പോള്‍ ദുര്‍ബലമായിരിക്കുന്നു. ശത്രു ഏറ്റവും ദുര്‍ബലനായിരിക്കുമ്പോള്‍ അവരെ പരാജയപ്പെടുത്തുക ഏറ്റവും എളുപ്പമായിരിക്കും.’ എന്നതായിരുന്നു നേതാജിയുടെ വീക്ഷണം. ആര്‍.എസ്.എസും ഹിന്ദുമഹാസഭയും ‘ഹിന്ദു രാഷ്ട്ര’ത്തിനു വേണ്ടി വാദിച്ചപ്പോള്‍ നേതാജിയുടെ ലക്ഷ്യം പൂര്‍ണസ്വരാജ് നേടുകയും സോഷ്യലിസം സ്ഥാപിക്കുകയും ചെയ്യുകയെന്നതായിരുന്നു. നേതാജിയും ആര്‍.എസ്.എസും എല്ലാ കാര്യത്തിലും വിരുദ്ധ ധ്രുവങ്ങളിലായിരുന്നു നിലകൊണ്ടിരുന്നതെന്ന് സാരം. നേതാജി മതേതര നിലപാടില്‍നിന്നു കൊണ്ടു ആര്‍.എസ്.എസിനെയും ഹിന്ദുമഹാസഭയെയും വെറുത്തു.

ചരിത്ര പാരമ്പര്യമോ രാജ്യത്തിനു വേണ്ടി ത്യാഗം ചെയ്തതിന്റെ ചരിത്രമോ ഒന്നും ചൂണ്ടി കാണിക്കാനില്ലാത്ത ബി.ജെ.പി, പുതിയ ചരിത്രങ്ങള്‍ മെനയുമ്പോള്‍ 2024 ല്‍ നടക്കാന്‍ പോകുന്ന ലോക്‌സഭാ തിരഞ്ഞെടുപ്പും ഈ വര്‍ഷം നടക്കാനിരിക്കുന്ന വിവിധ സംസ്ഥാന നിയമസഭാ തിരഞ്ഞെടുപ്പുകളും ജയിച്ചു കയറാന്‍ പുതിയ ആയുധങ്ങള്‍ തേടുകയാണ്. രാജ്യമാകെ ബി.ജെ.പി ദുര്‍ഭരണത്തിനെതിരെ ജനങ്ങളുടെ അസംതൃപ്തി വളരുകയാണ്. ഭരണ നേട്ടങ്ങള്‍ ചൂണ്ടി കാണിക്കാന്‍ അവര്‍ക്കൊന്നുമില്ല. പതിവുപോലെ ‘വര്‍ഗീയത’ തന്നെയായിരിക്കും വരാന്‍ പോകുന്ന തിരഞ്ഞെടുപ്പുകളിലും അവര്‍ ഉയര്‍ത്തുകയെന്ന കാര്യത്തില്‍ സംശയമില്ല. അതിനു ചരിത്രത്തെ തങ്ങള്‍ക്കനുകൂലമാക്കേണ്ടതുണ്ട്. സ്വാതന്ത്ര്യസമരത്തിന്റെ പങ്ക് പറ്റേണ്ടതുണ്ട്. അതിനായി പച്ചകള്ളം പ്രചരിപ്പിക്കുകയും ചരിത്രം വളച്ചൊടിക്കുകയും ചെയ്യുന്നു. സവര്‍ക്കര്‍, ഗോള്‍വാള്‍ക്കര്‍, ശ്യാമപ്രസാദ് മുഖര്‍ജി, മുഞ്ചേ തുടങ്ങിയവരുടെ തികച്ചും പിന്തിരിപ്പനായ ആശയങ്ങളോടു കൂറുപുലര്‍ത്തികൊണ്ടാണ് ഇതെല്ലാം ചെയ്യുന്നത്. നമ്മുടെ സംസ്‌കാരത്തിന്റെ ബഹുസ്വരതയുടെ നിഷേധമാണ് അവരുടെ പ്രവര്‍ത്തനം. ‘നാനാത്വത്തില്‍ ഏകത്വം’ എന്ന സങ്കല്‍പത്തിന് അവിടെ യാതൊരു സ്ഥാനവും ഇല്ല. അവര്‍ക്ക് വേണ്ടത് വെറും ഏകത്വം മാത്രം. ഇത് തിരിച്ചറിയാന്‍ ഇന്ത്യന്‍ ജനതക്ക് സാധ്യമായാല്‍ രാജ്യത്തിന്റെ മഹത്തായ പാരമ്പര്യത്തിനു പോറലേല്‍ക്കാതെ കാത്തു സൂക്ഷിക്കാം.

Continue Reading

Trending