കാസര്കോട്: നീലേശ്വരം പാലായി അയ്യങ്കുന്നത്ത് ഭഗവതി ക്ഷേത്രത്തില് മോഷണം. വിഗ്രഹത്തില് ചാര്ത്തിയിരുന്ന തിരുവാഭരണവും ഭണ്ഡാരവും കവര്ച്ച ചെയ്തു. നീലേശ്വരം പാലായി അയ്യങ്കുന്നത്ത് ഭഗവതി ക്ഷേത്രത്തില് നടന്ന കവര്ച്ച പുറത്തറിയുന്നത് ശനിയാഴ്ച രാവിലെ. ഭണ്ഡാരത്തിലെ കാശും കൊണ്ട് പോയി.
ശ്രീകോവിലിന്റെ വാതില് കുത്തിത്തുറന്നാണ് മോഷ്ടാക്കള് അകത്ത് പ്രവേശിച്ചത്. ക്ഷേത്രത്തില് പതിവ് പൂജകള്ക്കായി എത്തിയ ആചാര സ്ഥാനക്കാരനാണ് വാതില് തകര്ന്ന നിലയിലും ഭണ്ഡാരപ്പെട്ടി തുറന്ന നിലയും കണ്ടത്. നീലേശ്വരം പൊലീസ് സംഘമെത്തി തെളിവുകള് ശേഖരിച്ചു. പരിസരത്തെ സിസിടിവി ദൃശ്യങ്ങള് അടക്കം പരിശോധിച്ചാണ് അന്വേഷണം. വിരലടയാള വിദഗ്ദ്ധരും ഡോഗ് സ്ക്വാഡും പരിശോധന നടത്തി.