തിലക് വര്‍മക്ക് വമ്പന്‍ വരവേല്‍പ്പ്; വീഡിയോ വൈറല്‍

ഏഷ്യാ കപ്പ് ഫൈനലില്‍ ഇന്ത്യയെ കിരീടത്തിലേക്ക് നയിച്ച തിലക് വര്‍മയ്ക്ക് നാട്ടില്‍ അതിപ്രത്യേകമായ സ്വീകരണം. സ്വന്തം നാട്ടിലെത്തിയ താരത്തെ സ്വീകരിക്കാന്‍ ആരാധകര്‍ തിരമാലപോലെ ഒഴുകിയെത്തി. തെലങ്കാന സ്‌പോര്‍ട്‌സ് അതോറിറ്റി ചെയര്‍മാന്‍ ശിവസേന റെഡ്ഡിയും, മാനേജിംഗ് ഡയറക്ടര്‍ സോണി ബാല ദേവിയും ചേര്‍ന്ന് തിലകിനെ ആദരിച്ചു.

കാറില്‍ കയറിയെത്തിയ തിലകിനെ ആരാധകര്‍ പേരെടുത്തു വിളിച്ചും, ആവേശത്തോടെ കൈയ്യടി മുഴക്കിയും വരവേറ്റു. ആരാധകര്‍ക്ക് നന്ദി പറഞ്ഞുകൊണ്ടുള്ള അദ്ദേഹത്തിന്റെ വീഡിയോ സോഷ്യല്‍ മീഡിയയില്‍ വന്‍ വൈറലായി. ”തിലകിന്റെ ബാറ്റിങ് ഞങ്ങളെ അഭിമാനിപ്പിച്ചു,” എന്ന് സഹോദരന്‍ തരുണ്‍ വര്‍മ പറഞ്ഞു.

ദുബായില്‍ നടന്ന കലാശപ്പോരില്‍ ഇന്ത്യ 5 വിക്കറ്റിനാണ് പാകിസ്താനെ തോല്‍പിച്ചത്.

പാകിസ്താനെ 147 റണ്‍സിന് എറിഞ്ഞൊതുക്കിയ ഇന്ത്യ രണ്ട് പന്തുകള്‍ ബാക്കിനില്‍ക്കെ അഞ്ച് വിക്കറ്റ് നഷ്ടപ്പെടുത്തി വിജയലക്ഷ്യം മറികടന്നു. പുറത്താകാതെ 53 പന്തില്‍ 69 റണ്‍സെടുത്ത തിലക് വര്‍മയാണ് ഇന്ത്യയുടെ വിജയശില്‍പി.

തുടക്കത്തില്‍ 20 റണ്‍സിനുള്ളില്‍ മൂന്ന് ടോപ് ഓര്‍ഡര്‍ ബാറ്റര്‍മാരെ നഷ്ടപ്പെട്ട ഇന്ത്യയെ, തിലക് സഞ്ജു സാംസണ്‍ (57 റണ്‍സ് കൂട്ടുകെട്ട്) കരകയറ്റി.

ശിവം ദുബെയുടെ 22 പന്തില്‍ 33 റണ്‍സും നിര്‍ണായകമായി. അവസാന ഓവറില്‍ ആവശ്യമായ 10 റണ്‍സില്‍ ഭൂരിഭാഗവും തിലക് നേടിയപ്പോള്‍, റിങ്കു സിംഗ് ബൗണ്ടറിയോടെ വിജയറണ്‍ നേടി.

ഇന്ത്യയുടെ ഒന്‍പതാം ഏഷ്യാ കപ്പ് കിരീടമാണ് ഈ ജയം.