Connect with us

Article

പെരും നുണകളില്‍ നിര്‍മിച്ച കേരള സ്റ്റോറി

കേരള മുന്‍ മുഖ്യമന്ത്രിയും മുതിര്‍ന്ന സി.പി.എം നേതാവുമായ വി.എസ് അച്യുതാനന്ദന്‍ 2010 ജൂലൈ 24 ന് ഡല്‍ഹിയില്‍ നടത്തിയ വാര്‍ത്താസമ്മേളനമാണ് തങ്ങളുടെ പ്രമേയത്തിനു തെളിവായി സിനിമയുടെ പിന്നണിയിലുള്ളവര്‍ ചൂണ്ടി കാണിക്കുന്നത്. കേരളത്തെ മുസ്‌ലിം രാജ്യമാക്കാന്‍ ചിലര്‍ ശ്രമിക്കുകയാണെന്നും 20 വര്‍ഷംകൊണ്ട് കേരളത്തെ ഇസ്‌ലാമിക രാജ്യമാക്കുമെന്നാണ് അന്ന് വി.എസ് പറഞ്ഞത്.

Published

on

റസാഖ് ആദൃശ്ശേരി

‘കേരള സ്റ്റോറി’യെന്ന സിനിമയുടെ ടീസറില്‍ ഹിന്ദി സിനിമാതാരം അദാ ശര്‍മ്മ പര്‍ദ്ദയും നിഖാബും ധരിച്ച് പ്രത്യക്ഷ്യപ്പെട്ടു പറയുന്നത് ‘തനിക്ക് ഒരു നഴ്‌സാകാനായിരുന്നു ആഗ്രഹമെന്നും എന്നാല്‍ താന്‍ ഇപ്പോള്‍ ഒരു തീവ്രവാദിയാണെന്നും അഫ്ഗാനിസ്ഥാനില്‍ ജയിലില്‍ ആണെന്നുമാണ്. കേരളത്തില്‍നിന്നും 32,000 ത്തോളം യുവതികളെ മതപരിവര്‍ത്തനം നടത്തി ഐ.എസില്‍ ചേര്‍ത്തെന്നു അവകാശപ്പെടുന്ന സിനിമയുടെ ആദ്യ ടീസര്‍ ഏഴ് മാസങ്ങള്‍ക്ക്മുമ്പ് അണിയറ പ്രവര്‍ത്തകര്‍ പുറത്ത്‌വിട്ടിരുന്നു. കേരള മുഖ്യമന്ത്രിയായിരുന്ന വി.എസ് അച്യുതാനന്ദന്‍ കേരളത്തിലെ ലൗ ജിഹാദിനെക്കുറിച്ച് നടത്തിയ വാര്‍ത്താസമ്മേളനത്തിന്റെ ഒരു ഭാഗമായിരുന്നു ആദ്യ ടീസറില്‍ ഉണ്ടായിരുന്നത്. ആ വീഡിയോയിലുള്ള സബ്‌ടൈറ്റിലില്‍ അര്‍ധരാത്രി ആയിട്ടും നിങ്ങളുടെ പെണ്‍കുട്ടി വീട്ടില്‍ തിരിച്ചെത്തിയില്ലെങ്കില്‍ നിങ്ങള്‍ക്ക് എന്തായിരിക്കും അനുഭവപ്പെടുക എന്നു ചോദിക്കുന്നതോടൊപ്പം കേരളത്തില്‍ കഴിഞ്ഞ 12 വര്‍ഷമായി നിരവധി പെണ്‍കുട്ടികളെ കാണാതാവുകയും അവര്‍ പിന്നീട് വീട്ടിലേക്ക് തിരിച്ചു വന്നിട്ടില്ലെന്നുമാണ് പറയുന്നത്.

‘കേരളത്തിലെ മനോഹരമായ കായലുകള്‍ക്ക് പിന്നില്‍, കാണാതായ 32,000 സ്ത്രീകളുടെ ഭീകരകഥയുണ്ട്. ഭീതിജനകവും ഹൃദയഭേദകവുമായ സമൂഹത്തിന്റെ ഇരുണ്ട ചിത്രത്തിന്റെ ഒരു ചെറിയ ഭാഗം ‘ദി കേരള സ്റ്റോറി’ വെളിപ്പെടുത്തുന്നു’. എന്നാണ് ടീസറിന്റെ താഴെ കൊടുത്തിരിക്കുന്നത്. സുദീപ് തോ സെന്‍ സംവിധാനം ചെയ്യുന്ന ചിത്രം നിര്‍മിച്ചിരിക്കുന്നത് വിപുല്‍ അമൃത് ലാല്‍ഷായാണ്. സത്യവുമായി ഒരു ബന്ധവുമില്ലാത്ത ഈ സിനിമ അവതരണത്തിലൂടെ മുസ്‌ലിംകളോടുള്ള വെറുപ്പും വിദ്വേഷവും വര്‍ധിപ്പിക്കുകയും ഒപ്പം കേരളത്തെ ഇകഴ്ത്തി കാണിക്കുകയുമാണ് ലക്ഷ്യംവെച്ചിട്ടുള്ളത്.

കേരള മുന്‍ മുഖ്യമന്ത്രിയും മുതിര്‍ന്ന സി.പി.എം നേതാവുമായ വി.എസ് അച്യുതാനന്ദന്‍ 2010 ജൂലൈ 24 ന് ഡല്‍ഹിയില്‍ നടത്തിയ വാര്‍ത്താസമ്മേളനമാണ് തങ്ങളുടെ പ്രമേയത്തിനു തെളിവായി സിനിമയുടെ പിന്നണിയിലുള്ളവര്‍ ചൂണ്ടി കാണിക്കുന്നത്. കേരളത്തെ മുസ്‌ലിം രാജ്യമാക്കാന്‍ ചിലര്‍ ശ്രമിക്കുകയാണെന്നും 20 വര്‍ഷംകൊണ്ട് കേരളത്തെ ഇസ്‌ലാമിക രാജ്യമാക്കുമെന്നാണ് അന്ന് വി.എസ് പറഞ്ഞത്. ‘ഒരു നുണയുടെ വലുപ്പമാണതിന്റെ വിശ്വാസം’ എന്നു പറഞ്ഞത് അഡോള്‍ഫ് ഹിറ്റ്‌ലറാണ്. ഈ വാക്കുകളെ അനര്‍ത്ഥമാക്കുംവിധം വി.എസിന്റെ വലിയ ‘നുണ’ സമൂഹത്തില്‍ വന്‍ പ്രതികരണങ്ങളുണ്ടാക്കി. ഇതിന്റെ ചുവടുപിടിച്ചു ഉത്തരേന്ത്യയിലെ വിവിധ സംസ്ഥാനങ്ങളില്‍ സംഘ്പരിവാറും ബി.ജെ.പിയും വലിയ വിവാദങ്ങളുയര്‍ത്തുകയും മുസ്‌ലിം സമുദായത്തെ അരക്ഷിതാവസ്ഥയിലാക്കുകയും ചെയ്തു. തുടര്‍ന്നു മുസ്‌ലിം യുവാക്കള്‍ക്കെതിരെ നിരവധി ആക്രമണങ്ങള്‍ വിവിധ സ്ഥലങ്ങളിലുണ്ടായി. പലയിടത്തും പൊലീസ് വ്യാജ ആരോപണങ്ങള്‍ ഉന്നയിച്ചു അവരെ അറസ്റ്റ് ചെയ്യുകയും ജയിലിലടക്കുകയും ചെയ്തു. ബി. ജെ.പി യു.പിയിലും ഗുജറാത്തിലുമൊക്കെ വ്യാപകമായി ‘വി.എസ് വര്‍ത്തമാനം’ തിരഞ്ഞെടുപ്പ് പ്രചാരണ വിഷയമാക്കുകയും ചെയ്തു.

പലപ്പോഴും സി.പി.എം നേതാക്കളുടെ ഈ നിലപാട് കേരളത്തില്‍ ഇരുപത്തേഴ് ശതമാനത്തോളം വരുന്ന മുസ്‌ലിം സമൂഹത്തെ ബി.ജെ.പി ആഗ്രഹിച്ച ദ്വന്ദ്വത്തിലേക്ക് കൂട്ടിയിണക്കാന്‍ മാത്രമേ സഹായിച്ചിട്ടുള്ളു. ഫാസിസ്റ്റ് വിരുദ്ധ കൂട്ടായ്മകള്‍ക്ക് കരുത്ത്പകരാന്‍ ശ്രമിക്കേണ്ടതിനുപകരം, സി.പി.എം മുസ്‌ലിംകളെ ഫാസിസ്റ്റുകള്‍ക്ക് എറിഞ്ഞുകൊടുക്കാനും ജാതി ഹിന്ദുത്വ ധ്രുവീകരണത്തിന്റെ അരികുപറ്റി താല്‍ക്കാലിക നേട്ടം കൊയ്യാനുമാണ് ശ്രമിക്കാറുള്ളത്. രാഷ്ട്രീയ നേട്ടത്തിനുവേണ്ടിയുള്ള ഈ നുണ പറച്ചിലുകള്‍ സംഘ്പരിവാര്‍ കാഴ്ചപ്പാടുള്ളവര്‍ സിനിമകളും നോവലുകളും ആക്കുന്നുവെന്നേയുള്ളു. ഗുജറാത്ത് തിരഞ്ഞെടുപ്പ് പ്രഖ്യാപിച്ചിരിക്കുന്ന ഈ അവസരത്തില്‍ മുസ്‌ലിംകളെകുറിച്ച് തെറ്റിദ്ധാരണാപരമായ പരാമര്‍ശങ്ങള്‍ നടത്തി, വീണ്ടും കുളം കലക്കി മീന്‍ പിടിക്കാന്‍ കേരള സ്റ്റോറിയിലൂടെ സംഘ്പരിവാര്‍ ശ്രമിക്കുമ്പോള്‍ വി.എസിന്റെയും സി.പി.എമ്മിന്റെയും വ്യാജ പ്രചാരണങ്ങള്‍ അവര്‍ക്ക് മുതല്‍കൂട്ടായി മാറുന്നു. മാര്‍ക്‌സിസ്റ്റ്പാര്‍ട്ടിയും ബി.ജെ.പിയും ഭായി ഭായി കളിക്കുമ്പോള്‍ അതിനു സമൂഹം കൊടുക്കേണ്ടിവരുന്ന വിലയെക്കുറിച്ചു സി.പി.എം ഒരിക്കലും ചിന്തിക്കുന്നേയില്ല എന്നതാണ് ഖേദകരം.

മുസ്‌ലിംകളെ തീവ്രവാദികളും ദേശവിരുദ്ധരുമാക്കി ചിത്രീകരിക്കുന്നതില്‍ ഇന്ത്യന്‍ സിനിമകള്‍ക്ക് അനല്‍പമായ പങ്കുണ്ട്. എല്ലാ ഭാഷകളിലും ഇത്തരം സിനിമകള്‍ നിര്‍മിക്കപ്പെടുന്നുണ്ടെങ്കിലും ബോളിവുഡ് സിനിമകളാണ് ഇതില്‍ ഒന്നാം സ്ഥാനത്ത്. ഇന്ത്യയില്‍ മാത്രമല്ല, ലോകത്ത് എല്ലായിടത്തും ബോളിവുഡ് സിനിമകള്‍ പ്രദര്‍ശിക്കപ്പെടുന്നു. അപ്പോള്‍ അതിന്റെ കാഴ്ചക്കാരും കൂടുതലായിരിക്കും. സമൂഹത്തില്‍ സിനിമകള്‍ സൃഷ്ടിക്കുന്ന സ്വാധീനം ചെറുതല്ല. തീവ്രവാദം പോലെയുള്ള വിവാദാത്മകമായ വിഷയങ്ങളെ പ്രശ്‌നവത്കരിക്കുന്നതില്‍ ബോളിവുഡ് സിനിമകള്‍ ഏറെ മുന്നിലാണ്. അപ്പോള്‍ അത് പ്രേക്ഷകരിലുണ്ടാക്കുന്ന മനോഭാവം എത്ര വലുതായിരിക്കും? ഇസ്‌ലാം വിരുദ്ധത പ്രമേയമാക്കിയ ബോളിവുഡ് സിനിമകളും മറ്റു ഭാഷാ ചിത്രങ്ങളും നിര്‍മിക്കുന്നതിലൂടെ അതിന്റെ അണിയറ പ്രവര്‍ത്തകര്‍ക്ക് സാമ്പത്തിക നേട്ടത്തിനുപുറമെ മറ്റു പല ലക്ഷ്യങ്ങളുമുണ്ട്.

ബി.ജെ.പി സര്‍ക്കാരുകളുടെ രാഷ്ട്രീയ അജണ്ടകളും നയങ്ങളും ബോളിവുഡിന്റെ സമീപനങ്ങളെ ആവേശിച്ചിരിക്കുന്നുവെന്നതിന് ധാരാളം പഠനങ്ങള്‍ പുറത്തുവന്നിട്ടുണ്ട്. ഏതാനും മാസങ്ങള്‍ക്ക് മുമ്പ് പുറത്തിറങ്ങിയ ‘ദി കശ്മീര്‍ ഫയല്‍സ്’ ഉദാഹരണം. കശ്മീരില്‍ മുസ്‌ലിം തീവ്രവാദികള്‍ 4000 ത്തോളം കശ്മീരി പണ്ഡിറ്റുകളെ കൊല ചെയ്തുവെന്ന പെരുംനുണയാണ് സിനിമ പറയുന്നത്. സംഘ്പരിവാര്‍ ആശയമായ ‘വെറുപ്പ്’ പ്രചരിപ്പിക്കുകയെന്ന ഉദ്ദേശത്തോടെ നിര്‍മിക്കുന്ന ഇത്തരം സിനിമകള്‍ക്ക് സര്‍ക്കാരിന്റെ പൂര്‍ണ പിന്തുണയും സഹായവും ലഭിക്കുന്നു. ദി കശ്മീര്‍ ഫയല്‍സ് എന്ന ചിത്രത്തെ പ്രധാനമന്ത്രി നരേന്ദ്രമോദി പോലും പ്രശംസിക്കുകയും ടിക്കറ്റുകള്‍ക്ക് നികുതിയിളവ് നല്‍കുകയും ചെയ്തു. മുസ്‌ലിം ഐഡന്റിറ്റിയും തീവ്രവാദവും തമ്മില്‍ പ്രതീകാത്മക ബന്ധമുണ്ടെന്നു സ്ഥാപിക്കാനുള്ള ശ്രമമാണ് ഇതിലൂടെയെല്ലാം നടത്തുന്നത്. അതിന് സംഘ്പരിവാര്‍ സര്‍വ പ്രോല്‍സാഹനവും നല്‍കുകയും ചെയ്യുന്നു.

താടിയെന്നത് തീവ്രവാദിയുടെ രൂപമാണെന്ന നരേഷനാണിപ്പോള്‍ സിനിമകളിലൂടെ നടന്നുകൊണ്ടിരിക്കുന്നത്. ഇസ്‌ലാമിക സിംബലുകളെല്ലാം ഭീകരവാദ രൂപമായി പരിവര്‍ത്തനം ചെയ്യപ്പെട്ടു. താടിയും തൊപ്പിയും വെച്ച വില്ലന്‍, കൈയില്‍ തസ്ബീഹ് മാല. അയാള്‍ക്ക് ചുറ്റും ഷല്‍വാര്‍ ഖമീസും ഷാളും ധരിച്ച തോക്കുധാരികള്‍. അവര്‍ ഇന്ത്യന്‍ വിരുദ്ധ മുദ്രാവാക്യങ്ങള്‍ മുഴക്കുന്നു. എത്രയോ സിനിമകളിലെ പതിവുകാഴ്ചകളാണിതൊക്കെ. താടിവെച്ച ആളുകളെ കാണേണ്ട താമസം കുട്ടികള്‍ പോലും ‘ഭീകരവാദി’കളെന്നു വിളിക്കുന്ന അവസ്ഥയുണ്ടാക്കിയതും പൊതുമണ്ഡലത്തില്‍ മുസ്‌ലിംകള്‍ ദേശവിരുദ്ധരാണെന്ന മനോഭാവം ഉണ്ടാക്കിയെടുത്തതും ഇത്തരം സിനിമകളാണ്. അങ്ങനെ സംഘ്പരിവാറിന്റെ ലക്ഷ്യം എളുപ്പത്തില്‍ പൂവണിയുന്നു.

മുസ്‌ലിം ഐഡന്റിറ്റിയെ പ്രതിലോമ ചിഹ്നങ്ങളായി ചിത്രീകരിക്കുന്നതിലൂടെ മനസ്സിലാവുന്നത്, ഇസ്‌ലാമിന്റെ ചേതോഹരമായ ജീവിത സൗന്ദര്യത്തെ കുറിച്ചു അവരില്‍ ഭൂരിഭാഗവും അജ്ഞരാണ് എന്നുള്ളതാണ്. അല്ലെങ്കില്‍ മുസ്‌ലിം വിരുദ്ധത കുത്തിനിറച്ചാല്‍ തങ്ങളുടെ ഫിലിം ദിവസങ്ങളോളം തിയേറ്ററുകളില്‍ ഓടുമെന്നും അങ്ങനെ ലാഭമുണ്ടാക്കാമെന്നുമുള്ള ചിന്ത അവരെ നയിക്കുന്നുണ്ടാവാം. ഇസ്‌ലാം സൃഷ്ടിക്കുന്ന മൂല്യവത്തായ ഒരു സംസ്‌കാരത്തിന്റെ വളര്‍ച്ചയോടെ തങ്ങളുടെ ലാഭക്കൊതിയില്‍ അധിഷ്ഠിതമായ ചീഞ്ഞളിഞ്ഞ സംസ്‌കാരത്തിനു അന്ത്യമാവും എന്ന ഭയവും അവരെ അലട്ടുന്നുണ്ടാവാം.

ലോകത്തിനുമുമ്പില്‍ ഇസ്‌ലാമിനെ വികൃതമാക്കി കാണിക്കാന്‍ ഇസ്‌ലാം വിരുദ്ധ ശക്തികള്‍ പല ഗൂഢാലോചനകളും നടത്തിവരുന്നുണ്ട്. സാമ്രാജ്യത്ത ശക്തികള്‍ തന്നെയാണ് പണവും ആയുധവും കൊടുത്ത് ഭീകരവാദ സംഘടനകളെ വളര്‍ത്തിയെടുക്കുന്നത്. ഐ.എസ്.ഐ.എസ് ഉദാഹരണം. ഇസ്‌ലാമിനു നിരക്കാത്ത എന്തെല്ലാം ക്രൂരതകളാണ് ഈ സംഘടന ചെയ്തിരുന്നത്. ഇതിന്റെ തലവന്‍ ഒരു ജൂതനായിരുന്നുവെന്നാണ് പറയപ്പെട്ടിരുന്നത്. ഇത്തരം തീവ്രവാദ സംഘടനകളുമായി മുസ്‌ലിംകള്‍ക്ക് ഒരു ബന്ധമില്ലെന്നും തീവ്രവാദവും ഭീകരവാദവും ഇസ്‌ലാമിനു അന്യമാണെന്നും സംശയത്തിനിടയില്ലാത്തവിധം പരിശുദ്ധ ഖുര്‍ആനും പ്രവാചകചര്യയും വെച്ചു ഇസ്‌ലാമിക പണ്ഡിതന്മാര്‍ വ്യക്തമാക്കിയതാണ്. എന്നിട്ടും കേരളത്തില്‍നിന്നും 32,000 ത്തോളം യുവതികളെ മതപരിവര്‍ത്തനം നടത്തി ഐ.എസില്‍ ചേര്‍ത്തുവെന്നു ഒരു സിനിമ പറയുമ്പോള്‍ അത് കേരള സംസ്ഥാനത്തെ ഇകഴ്ത്തികെട്ടാനുള്ള ശ്രമം തന്നെയാണ്. ഇതിനെതിരെ ഉത്തരവാദപ്പെട്ടവര്‍ മൗനം പാലിക്കുകയല്ല വേണ്ടത്, സിനിമക്കെതിരെ ശിക്ഷാനടപടികള്‍ സ്വീകരിക്കണം.

 

Article

ബി.ബി.സി ഡോക്യുമെന്ററിയും ജനാധിപത്യ ഇന്ത്യയുടെ ഭാവിയും

പുള്ളിപ്പുലിയുടെ പുള്ളി മാറിയാലും ആര്‍.എസ്.എസിന്റെ വര്‍ഗീയത മാറില്ലെന്ന് എത്രയോ വര്‍ഷങ്ങള്‍ക്കു മുന്‍പേ ഈ ലോകത്തോടു വിളിച്ചുപറഞ്ഞത് എന്റെ പിതാവ് ആണെങ്കില്‍ ഇടതുപക്ഷക്കാര്‍ ഞങ്ങള്‍ക്ക് സംഘ്പരിവാര്‍ വിരോധം പഠിപ്പിച്ചു സമയം കളയേണ്ട

Published

on

ഡോ. എം.കെ മുനീര്‍

ഫാഷിസം അതിന്റെ എല്ലാ രൂപ ഭാവത്തോടെയും ഇന്ത്യയില്‍ ഉറഞ്ഞുതുള്ളുകയാണ്. എങ്ങോട്ടാണ് നമ്മുടെ യാത്ര…? ഒരു ഡോക്യുമെന്ററിയെ പോലും അസഹിഷ്ണുതയോടെ നോക്കുന്ന ഭരണകൂടത്തിന് കീഴില്‍ നമ്മുടെ മഹിത ജനാധിപത്യത്തിന്റെ ഭാവി എന്താണ്… ഇന്ത്യന്‍ പ്രധാനമന്ത്രിയെ വിമര്‍ശിക്കുന്ന ബി.ബി.സി ഡോക്യുമെന്ററി പ്രദര്‍ശിപ്പിക്കുന്നിടങ്ങളിലെല്ലാം ഭരണകൂടവും അനുയായികളും പ്രദര്‍ശനം തടയുന്നതിനായി ഏത് നെറികേടും ചെയ്തുകൊണ്ടിരിക്കുകയാണ്.

ഇന്ത്യയിലെ ഏറ്റവും ഉന്നത കലാലയമായ ന്യൂഡല്‍ഹി ജവഹര്‍ലാല്‍ നെഹ്‌റു യൂണിവേഴ്‌സിറ്റിയില്‍ പ്രദര്‍ശനം തടയുന്നതിനായി വൈദ്യുതിബന്ധം വിച്ഛേദിക്കുകയും തുടര്‍ന്ന് ഡോക്യുമെന്ററി മൊബൈല്‍ ഫോണില്‍ കണ്ടു പ്രതിഷേധിച്ച വിദ്യാര്‍ത്ഥികള്‍ക്ക് നേരെ ആക്രമണം അഴിച്ചുവിടുകയും ചെയ്തിരിക്കുന്നു. ഇത്തരം അപ്രഖ്യാപിത അടിയന്തരാവസ്ഥകള്‍ ഇന്ത്യയുടെ ജനാധിപത്യ പാരമ്പര്യത്തിന് തീരാകളങ്കമാണ്. വിമര്‍ശനങ്ങളെ സഹിഷ്ണുതയോടെ കേള്‍ക്കുക എന്ന ജനാധിപത്യ മര്യാദ ബി.ജെ.പി ഭരണാധികാരികള്‍ പാലിക്കേണ്ടതുണ്ട്. അല്ലാതെ വിമര്‍ശനങ്ങളുടെ പേരില്‍ രാജ്യത്തെ കലാപങ്ങളിലേക്ക് മനപൂര്‍വം തള്ളിവിടുന്നത് ആര്‍ക്കും അംഗീകരിക്കാന്‍ കഴിയില്ല.

ഗുജറാത്തില്‍ നടന്ന വര്‍ഗീയ കലാപത്തെ ഞെട്ടലോടെയാണ് രാജ്യം കാതോര്‍ത്തത്. അതിന്റെ വിങ്ങലും വേദനയും മനസ്സില്‍നിന്ന് ഒരു കാലത്തും മാഞ്ഞു പോകാത്തവിധം വേട്ടയാടുന്നുണ്ട്. ഇപ്പോള്‍ പ്രധാനമന്ത്രിയെക്കുറിച്ച് അത്യന്തം ഭയപ്പാടുകള്‍ സൃഷ്ടിക്കുന്ന വെളിപ്പെടുത്തലുകളാണ് ‘ഇന്ത്യ: ദി മോദി ക്വസ്റ്റ്യന്‍’ എന്ന ഡോക്യുമെന്ററിയിലൂടെ ബി.ബി.സി പുറത്ത്‌വിട്ടിരിക്കുന്നത്. തീര്‍ത്തും ഫാക്റ്റ് ഫൈന്‍ഡിംഗ് ആയ ഒരു ഡോക്യുമെന്റേഷനാണ് ബി.ബി.സി തയ്യാറാക്കിയിരിക്കുന്നത്.

കലാപത്തിന്റെ നേര്‍സാക്ഷികള്‍, ഇരകളോടൊപ്പം നിന്നവര്‍, കലാപത്തിന്റെ കെടുതികള്‍ അനുഭവിച്ചവര്‍, അതിന് സാക്ഷ്യംവഹിച്ച ഉദ്യോഗസ്ഥര്‍ തുടങ്ങിയവരുടെയെല്ലാം അഭിമുഖം നടത്തിയാണ് ബി.ബി.സി ഡോക്യുമെന്ററി തയ്യാറാക്കിയിരിക്കുന്നത്. അതു കാണുമ്പോള്‍ അന്നത്തെ സംഭവ വികാസങ്ങള്‍ ഹൃദയത്തിലേക്ക് വീണ്ടും അലയടിക്കുകയാണ്. കലാപകാലത്തെ ഗുജറാത്ത് സംസ്ഥാന മുഖ്യമന്ത്രി ആയിരുന്ന നരേന്ദ്രമോദിയുടെ ധാര്‍ഷ്ട്യം അദ്ദേഹം അന്ന് നടത്തിയ ഓരോ അഭിമുഖം കാണുമ്പോഴും ബോധ്യമാകും. ഇതിനെയെല്ലാം വളരെ പുച്ഛത്തോടെയാണ് മോദി സമീപിച്ചതെന്ന് അദ്ദേഹത്തിന്റെ ശരീരഭാഷകളില്‍നിന്നും വ്യക്തമാകും. മോദിയുടെ ഇത്തരം ചെയ്തികളില്‍ ഫാഷിസ്റ്റ് അനുയായികള്‍ അദ്ദേഹത്തിന്റെ പിന്നില്‍ ആവേശത്തോടെ അണിനിരക്കുന്നതും കാണാവുന്നതാണ്. നരേന്ദ്രമോദി ഇപ്പോള്‍ ഇന്ത്യയുടെ പ്രധാനമന്ത്രിയാണ്. തന്നെ അഭിമുഖം നടത്തിയവരോട് അദ്ദേഹം അന്നു മുതല്‍ക്കേ കാണിച്ച ഏകാധിപതിയുടെ ശരീരഭാഷയും ശബ്ദവും ഇപ്പോഴും അദ്ദേഹം തുടരുകയാണ്. അത്തരമൊരു വ്യക്തി ഇന്ത്യയുടെ പ്രധാനമന്ത്രിയായി തുടരുന്നു എന്നത് എത്രമാത്രം അപകടകരമാണ് എന്ന് വിളിച്ചുപറയുന്നതാണ് ബി.ബി.സിയുടെ വെളിപ്പെടുത്തല്‍.

ഇതോടെ മതേതര ജനാധിപത്യ മൂല്യങ്ങളില്‍ അടിയുറച്ചുനില്‍ക്കുകയും എന്നാല്‍ കഴിഞ്ഞ കുറേ നാളുകളായി നിശബ്ദമായി നില്‍ക്കുകയും ചെയ്തിരുന്നവരുടെ ഉയിര്‍ത്തെഴുന്നേല്‍പ്പ് ഇപ്പോള്‍ രാജ്യത്താകമാനം ദര്‍ശിക്കാന്‍ കഴിയും. അത് അങ്ങേയറ്റം പ്രതീക്ഷ നല്‍കുന്ന കാര്യമാണ്. എന്നാല്‍ ഇതിനെല്ലാമിടയിലും കുളം കലക്കി മീന്‍പിടിക്കാന്‍ സി.പി.എം ഇറങ്ങിത്തിരിച്ചിരിക്കുകയാണ്. ഞങ്ങള്‍ മാത്രമാണ് ജനാധിപത്യ ചേരിയോട് പ്രതിബദ്ധതയുള്ളവരെന്ന് സ്ഥാപിക്കാന്‍ മറ്റൊരു തരം ഏകാധിപത്യ മനോഭാവത്തോടെയാണ് കേരള മുഖ്യമന്ത്രി പിണറായിയും സംഘവും നിലകൊള്ളുന്നത്. ബി.ബി.സി ഡോക്യുമെന്ററിയുടെ പ്രദര്‍ശന വിവാദങ്ങളുടെ മറവില്‍ കോണ്‍ഗ്രസിനേയും മുസ്‌ലിം ലീഗിനെയും കുത്തിനോവിക്കാന്‍ മറക്കാത്ത സി.പി.എമ്മിനോടും അവരുടെ ഊരയില്‍ കൂരകെട്ടി പാര്‍ക്കുന്നവരോടും സഹതപിക്കുവാനേ തല്‍ക്കാലം നിര്‍വാഹമുള്ളൂ.

ലോകം മുഴുവന്‍ ബി.ബി.സി ഡോക്യുമെന്ററിയുടെ രണ്ടാം ഭാഗത്തിനായി ആകാംക്ഷയോടെ കാത്തുനിന്ന സമയത്താണ് ചിലര്‍ ആദ്യ ഭാഗത്ത് കോണ്‍ഗ്രസിനെതിരെ വല്ലതും ഉണ്ടോ എന്ന് ഇഴകീറി പരിശോധന നടത്തിയത്. ഇവരുടെയൊക്കെ മനോവൈകൃതത്തിന് ഈ നാട്ടില്‍ ചികിത്സ തല്‍ക്കാലം ലഭ്യമല്ല. ഇന്ത്യയില്‍ ജനാധിപത്യചേരിയുടെ മുന്നണിപ്പോരാളികളായി എക്കാലത്തും പ്രവര്‍ത്തിച്ചത് കോണ്‍ഗ്രസ് മുന്നണിയാണെന്ന പരമയാഥാര്‍ത്ഥ്യം എല്ലാവര്‍ക്കുമറിയാം.

രാഹുല്‍ഗാന്ധിയുടെ ഭാരത് ജോഡോ യാത്ര തന്നെ ഒരു ഓര്‍മപ്പെടുത്തലാണ്. ആര്‍.എസ്.എസുമായി സഹവസിക്കേണ്ടവര്‍ക്കെല്ലാം കോണ്‍ഗ്രസ് വിട്ടുപോകാം. അവശേഷിക്കുന്നവരെകൊണ്ട് ജനാധിപത്യ ചേരിയെ പുനരുജ്ജീവിപ്പിക്കാന്‍ കഴിയുമെന്ന ഉറച്ച സ്വരമാണ് കോണ്‍ഗ്രസ് പ്രവര്‍ത്തകരോടും നേതാക്കളോടുമായി രാഹുല്‍ ഗാന്ധി നടത്തിയത്.

അത്രമേല്‍ ശുദ്ധീകരിച്ച ജനാധിപത്യ പ്രസ്ഥാനമായി കോണ്‍ഗ്രസ് മാറിക്കഴിഞ്ഞിരിക്കുകയാണ്. അതുപോലെ മതേതര ചേരിയില്‍ എന്നും അടിയുറച്ചു നിലകൊണ്ട മുസ്‌ലിംലീഗ് എക്കാലത്തും ഫാഷിസ്റ്റ് വിരുദ്ധ ചേരിയില്‍ നിലകൊള്ളുന്ന പ്രസ്ഥാനമാണ്. പുള്ളിപ്പുലിയുടെ പുള്ളി മാറിയാലും ആര്‍.എസ്.എസിന്റെ വര്‍ഗീയത മാറില്ലെന്ന് എത്രയോ വര്‍ഷങ്ങള്‍ക്കു മുന്‍പേ ഈ ലോകത്തോടു വിളിച്ചുപറഞ്ഞത് എന്റെ പിതാവ് ആണെങ്കില്‍ ഇടതുപക്ഷക്കാര്‍ ഞങ്ങള്‍ക്ക് സംഘ്പരിവാര്‍ വിരോധം പഠിപ്പിച്ചു സമയം കളയേണ്ട. കേരള ഗവര്‍ണറുമായി നിങ്ങള്‍ വീണ്ടും ഭായി ഭായി ആയ ഈ സമയത്ത് പ്രത്യേകിച്ചും നിങ്ങള്‍ക്കതിന് യാതൊരു അര്‍ഹതയുമില്ല.

ബി.ജെ.പിക്കെതിരായ സന്ധിയില്ലാസമരത്തില്‍ ഇന്ത്യന്‍ നാഷണല്‍ കോണ്‍ഗ്രസിനോടൊപ്പം ഇന്ത്യന്‍ യൂണിയന്‍ മുസ്‌ലിംലീഗും മുന്നണിപ്പോരാളികളായി എക്കാലത്തും ഉണ്ടാവുക തന്നെ ചെയ്യും. ജനാധിപത്യ ഇന്ത്യയുടെ സംരക്ഷണം ആഗ്രഹിക്കുന്നവര്‍ക്കെല്ലാം അതില്‍ അണിചേരാം. അതുവഴി മാത്രമാണ് രാജ്യം ഇന്നോളം വിജയപഥം താണ്ടിയിട്ടുള്ളത്. അതെല്ലാവര്‍ക്കും പാഠമാകണം.

Continue Reading

Article

ചിന്തയുടെ ശമ്പളവും സര്‍ക്കാര്‍ ധൂര്‍ത്തും – എഡിറ്റോറിയല്‍

ചരിത്രത്തിലിന്നേവരെയില്ലാത്ത സാമ്പത്തിക പ്രതിസന്ധിയിലൂടെ സംസ്ഥാനം കടന്നുപോകുമ്പോഴാണ് കപട നാടകങ്ങളിലൂടെ സി.പി.എം നേതാക്കന്‍മാര്‍ ഖജനാവ് കാലിയാക്കിക്കൊണ്ടിരിക്കുന്നത്.

Published

on

സംസ്ഥാന യുവജന കമ്മീഷന്‍ അധ്യക്ഷ ചിന്താജെറോമിന്റെ ശമ്പള വിവാദം രണ്ടാം പിണറായി സര്‍ക്കാറിന്റെ ധൂര്‍ത്തിന്റെയും സ്വജനപക്ഷ പാതത്തിന്റെയും ഏറ്റവും ഒടുവിലത്തെ ഉദാഹരണമായി മാറിയിരിക്കുകയാണ്. കായിക യുവജനകാര്യ പ്രിന്‍സിപ്പല്‍ സെക്രട്ടറി എം. ശിവശങ്കര്‍ ഇറക്കിയ ഉത്തരവു പ്രകാരം 6.1.17 മുതല്‍ 26.5.18 വരെയുള്ള മുന്‍കാല പ്രാബല്യത്തോടെ ഒരു ലക്ഷം രൂപയായാണ് ചിന്തയുടെ ശമ്പളം വര്‍ധിപ്പിച്ചിരിക്കുന്നത്. കുടിശ്ശിക കാലയളവില്‍ 50,000 രൂപയാണ് അവര്‍ക്ക് ശമ്പളമായി ലഭിച്ചിരുന്നത്. 26.5.18 മുതലാണ് ഇത് ഒരു ലക്ഷം രൂപയാക്കി വര്‍ധിപ്പിച്ചിരുന്നത്. ഇതോടെ കുടിശ്ശിയിക ഇനത്തില്‍ മാത്രം എട്ടര ലക്ഷം രൂപയാണ് സംസ്ഥാന ഖജനാവില്‍ നിന്ന് അവര്‍ക്ക് എടുത്തുകൊടുക്കുന്നത്.

സാമ്പത്തിക പ്രതിസന്ധിയിലൂടെ സംസ്ഥാനം നട്ടംതിരിയുമ്പോഴുള്ള മുന്‍കാല പ്രാബല്യത്തോടെയുള്ള ഈ ശമ്പള വര്‍ധനവിനോട് ധനവകുപ്പിന് പോലും യോജിക്കാന്‍ കഴിഞ്ഞിരുന്നില്ല. കായിക വകുപ്പിന്റെ ആവശ്യം പലവട്ടം ധനവകുപ്പ് തിരിച്ചയച്ചതാണ്. എന്നാല്‍ കടുത്ത സമ്മര്‍ദ്ദത്തിന് വഴങ്ങി ഈ കടുംവെട്ട് തീരുമാനത്തിന് അവസാനം മന്ത്രി കെ.എന്‍ വേണുഗോപാല്‍ പച്ചക്കൊടി കാണിക്കുകയായിരുന്നു. സ്‌പോര്‍ട്‌സ് യുവജനകാര്യ വകുപ്പിന്റെ ചുമതല സജി ചെറിയാനില്‍ നിന്ന് മന്ത്രി പി.എ മുഹമ്മദ് റിയാസ് വഹിക്കുമ്പോഴാണ് സര്‍ക്കാര്‍ ഈ തീരുമാനമെടുത്തരിക്കുന്നതെന്നതും വകുപ്പ് സെക്രട്ടറിയുടെ ചുമതലയില്‍ മുഖ്യമന്ത്രിയുടെ അടുപ്പക്കാരന്‍ എസ്. ശിവശങ്കറാണെന്നതും ഇവിടെ ചേര്‍ത്തു വായിക്കേണ്ടതാണ്. സ്വാഭാവികമായും മുഖ്യമന്ത്രിയുടെ നേരിട്ടുള്ള ഇടപെടല്‍ വിഷയത്തിലുണ്ടായിരിക്കുമെന്നതുറപ്പാണ്.

ശമ്പള വര്‍ധനവിലും അത് മുന്‍കാല പ്രാബല്യത്തോടെ തന്നെ അനുവദിക്കുന്നതിലും പല തരത്തിലുള്ള ഒളിച്ചുകളികളും നടന്നിട്ടുണ്ട്. അതിന്റെ തെളിവാണ് ഇക്കാര്യത്തില്‍ ചിന്താ ജെറോം മാധ്യമങ്ങള്‍ക്ക് മുന്നില്‍ പറഞ്ഞ പച്ചക്കള്ളം. ശമ്പള വര്‍ധന ആവശ്യപ്പെട്ട് താന്‍ ധനവകുപ്പിന് കത്തെഴുതിയിട്ടില്ലെന്നും അങ്ങനെയൊരു കത്ത് ആരുടെയെങ്കിലും കൈവശമുണ്ടെങ്കില്‍ അതു പുറത്തുവിടണമെന്നുമായിരുന്നു അവരുടെ വെല്ലുവിളി. ഇത്രയും വലിയ തുക കുടിശ്ശികയായി ലഭിച്ചാല്‍ അത് മുഴുവന്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കുമെന്നും അവര്‍ പ്രഖ്യാപിച്ചിരുന്നു. എന്നാല്‍ കുടിശ്ശിക ഉള്‍പ്പെടെയുള്ള ശമ്പള വര്‍ധന ചിന്താജെറോമിന്റെ അഭ്യര്‍ത്ഥന പ്രകാരമാണെന്ന് സര്‍ക്കാര്‍ ഉത്തരവില്‍ തന്നെ വ്യക്തമാക്കിയിരിക്കുകയാണ്.

ചരിത്രത്തിലിന്നേവരെയില്ലാത്ത സാമ്പത്തിക പ്രതിസന്ധിയിലൂടെ സംസ്ഥാനം കടന്നുപോകുമ്പോഴാണ് കപട നാടകങ്ങളിലൂടെ സി.പി.എം നേതാക്കന്‍മാര്‍ ഖജനാവ് കാലിയാക്കിക്കൊണ്ടിരിക്കുന്നത്. ഇത്തരത്തിലുള്ള എല്ലാ അന്തര്‍നാടകങ്ങള്‍ക്കും കുടപിടിക്കുകയും അവസാനം വിവാദമാകുമ്പോള്‍ ഞാനൊന്നുമറിഞ്ഞില്ലേ രാമ നാരായണ എന്ന മട്ടില്‍ തെളിഞ്ഞവെള്ളത്തിലിരിക്കുന്ന മുഖ്യമന്ത്രിയുടെ കാപട്യവും ഇവിടെ തുറന്നു കാട്ടപ്പെടുകയാണ്.

ശമ്പളവും പെന്‍ഷനും മാത്രമല്ല ക്ഷേമ പെന്‍ഷനുകളുടെ വിതരണവും താളംതെറ്റിയ ഒരു നാട്ടിലാണ് ഇത്തരത്തിലുള്ള ധൂര്‍ത്തെന്നതാണ് ഏറ്റവും സങ്കടകരം. രണ്ടാം പിണറായി സര്‍ക്കാര്‍ സംസ്ഥാനത്തെ എങ്ങോട്ടാണ് കൊണ്ടുപോകുന്നതെന്ന് ഓരോ ദിവസം പിന്നിടുംതോറും നാട്ടിലെ ജനങ്ങള്‍ ചോദിക്കുന്ന അവസ്ഥയിലേക്ക് കാര്യങ്ങള്‍ എത്തിച്ചേര്‍ന്നിരിക്കുന്നു. സര്‍ക്കാറിനു കീഴിലുള്ള വിവിധ കമ്മീഷനുകളുടെ പ്രവര്‍ത്തനം പാര്‍ട്ടിയുടെ പോഷക സംഘടനകളെപോലും വെല്ലുന്ന തരത്തിലാണെന്ന് ഓരോ വിഷയത്തിലും ഇവര്‍ നടത്തിയ ഇടപെടലുകള്‍ പലതവണ തെളിയിച്ചതാണ്. യുവജന ,ബാലാവകാശ , വനിതാ കമ്മീഷന്‍ എന്നൊന്നുമുള്ള വ്യത്യാസം ഇക്കാര്യത്തിലില്ല. നിര്‍ണായക ഘട്ടങ്ങളില്‍ ഇതിന്റെയൊക്കെ അധ്യക്ഷന്‍മാര്‍ അര്‍ത്ഥഗര്‍ഭമായ മൗനത്തിലാണുണ്ടാവാറുള്ളത്. ഇങ്ങനെയുള്ള സ്ഥാപനങ്ങള്‍ ഇത്രത്തോളം രാഷ്ട്രീയവല്‍ക്കരിക്കപ്പെട്ട ഒരു കാലം ഇതിനുമുമ്പ് കേരളത്തിലുണ്ടായിട്ടില്ല.

ഭരണഘടനാ സ്ഥാപനങ്ങളെ രാഷ്ട്രീയ വല്‍ക്കരിക്കുന്നതിന്റെ പേരില്‍ കേന്ദ്രത്തിനെതിരെ വലിയ വായില്‍ സംസാരിക്കുന്ന സി.പി.എമ്മും ഇടതുപക്ഷവും മോദി സര്‍ക്കാറിനെ വെല്ലുന്ന തരത്തിലാണ് സംസ്ഥാനത്ത് കാര്യങ്ങള്‍ മുന്നോട്ട് നീക്കുന്നത്. ഈ വിധേയത്വത്തിനുള്ള സമ്മാനം എന്ന കണക്കെ ഇത്തരം കമ്മീഷനുകളുടെ തലപ്പത്തുള്ളവര്‍ക്കെല്ലാം ശമ്പളവും ആനുകൂല്യവുമൊക്കെ വാരിക്കോരി നല്‍കുകയുമാണ്. ഭരണത്തുടര്‍ച്ച എന്തും ചെയ്യാനുള്ള ലൈസന്‍സാക്കിമാറ്റിയ ഈ ഭരണകൂടത്തിന്റെ ആത്മവിശ്വാസം വൈകാരിക പ്രകടനങ്ങളിലൂടെ ജനങ്ങളെ മയക്കിക്കിടത്താം എന്നതാണ്. ഭരണകൂടത്തിന്റെ പിടിപ്പുകേടുകൊണ്ട് ദുരിത പര്‍വങ്ങള്‍ പേറേണ്ടിവരുന്ന നാട്ടിലെ ജനങ്ങള്‍ ഈ കുതന്ത്രങ്ങളെല്ലാം തിരിച്ചറിഞ്ഞുകഴിഞ്ഞു എന്ന് ബോധ്യപ്പെടാന്‍ സര്‍ക്കാറിന് അധിക കാലം കാത്തിരിക്കേണ്ടി വരില്ല.

Continue Reading

Article

ബി.ബി.സിയെ ഭയക്കുന്ന സംഘ്പരിവാര്‍

2002 ഫിബ്രവരിയിലായിരുന്നു മുസ്‌ലിം ഉന്മൂലനം ലക്ഷ്യമിട്ടുള്ള ഗുജറാത്ത് കലാപം അരങ്ങേറിയത്. ബ്രിട്ടീഷ് അധികാരികള്‍ നടത്തുന്ന അന്വേഷണത്തെ കുറിച്ചുള്ള വിശദമായ റിപ്പോര്‍ട്ട് അതേവര്‍ഷം മെയ് 6 ന് ഇന്ത്യ ടുഡേ പ്രസിദ്ധീകരിച്ചിട്ടുണ്ടായിരുന്നു. സംഭവം കഴിഞ്ഞ് 20 വര്‍ഷത്തിന് ശേഷമുണ്ടായ പുതിയ വെളിപ്പെടുത്തലൊന്നുമല്ല ബി.ബി.സിയുടേത്

Published

on

സുഫ്‌യാന്‍ അബ്ദുസ്സലാം

ഗുജറാത്ത് വംശഹത്യയുമായി ബന്ധപ്പെട്ട വസ്തുതകള്‍ വെളിപ്പെടുത്തിക്കൊണ്ട് ‘ഇന്ത്യ: ദി മോദി ക്വസ്റ്റ്യന്‍’ എന്ന പേരില്‍ ബി. ബി.സി ഡോക്യുമെന്ററി പുറത്തിറക്കിയതോടെ സംഘ്പരിവാര്‍ കേന്ദ്രങ്ങള്‍ ഞെട്ടിയിരിക്കുകയാണ്. ഡോക്യുമെന്ററി മാലോകര്‍ കാണാതെ നോക്കാനുള്ള വിറളിപിടിച്ച ഓട്ടത്തിലാണവര്‍. ഡോക്യുമെന്ററിയെ അധികാരത്തിന്റെ മുഷ്‌ക്ക് ഉപയോഗിച്ചുബ്ലോക്ക് ചെയ്യാനാണ് കേന്ദ്ര സര്‍ക്കാര്‍ തീരുമാനം. ഇന്‍ഫര്‍മേഷന്‍ ടെക്‌നോളജി റൂള്‍സ് പ്രകാരമുള്ള അധികാരങ്ങള്‍ ഉപയോഗിച്ച് കേന്ദ്ര വാര്‍ത്താവിതരണ പ്രക്ഷേപണ മന്ത്രാലയമാണ് ഡോക്യുമെന്ററിയുടെ യുട്യൂബ് വീഡിയോകളും അവ ആക്‌സസ് ചെയ്യാനുള്ള ട്വിറ്റര്‍ ലിങ്കുകളും ബ്ലോക്ക് ചെയ്തുകൊണ്ടുള്ള ഉത്തരവ് ഇറക്കിയിരിക്കുന്നത്. ബ്രിട്ടീഷുകാരന്റെ പഴയ കൊളോണിയല്‍ മാനസികാവസ്ഥയാണ് ഡോക്യുമെന്ററിയുടെ പിന്നിലെന്നാണ് കേന്ദ്ര വിദേശകാര്യ മന്ത്രാലയത്തിന്റെ ആരോപണം. എന്നാല്‍ ബ്രിട്ടീഷ് അധികൃതര്‍ കേന്ദ്ര സര്‍ക്കാറിന്റെ ആരോപണത്തെ തള്ളിക്കളഞ്ഞിരിക്കുകയാണ്.

ജനുവരി 21 ന് മുതിര്‍ന്ന മാധ്യമപ്രവര്‍ത്തകന്‍ കരണ്‍ ഥാപ്പറുമായി നടത്തിയ അഭിമുഖത്തില്‍ മുന്‍ ബ്രിട്ടീഷ് വിദേശകാര്യ സെക്രട്ടറിയും നയതന്ത്രരംഗത്തെ പ്രമുഖനുമായ ജാക്ക് സ്‌ട്രോയാണ് ബി.ബി.സി ഡോക്യൂമെന്ററിയെയും അതിലെ ഉള്ളടക്കത്തെയും ശരിവെച്ചത്. 2002 ലെ ഗുജറാത്ത് കലാപത്തെ കുറിച്ച് ബ്രിട്ടീഷ് സര്‍ക്കാര്‍ സ്വന്തം നിലക്ക് അന്വേഷണം നടത്തിയിട്ടുണ്ടെന്നും അതിന്റെ പ്രതിഫലനമാണ് ബി.ബി.സി ഡോക്യുമെന്ററിയിലെ ഉള്ളടക്കമെന്നും ജാക്ക് സ്‌ട്രോ തുറന്നുപറയുന്നു. ബ്രിട്ടനിലെ ഗുജറാത്തി മുസ്‌ലിം വംശജരായ പൗരന്മാര്‍ ഗുജറാത്തില്‍ ജീവിക്കുന്ന തങ്ങളുടെ ബന്ധുമിത്രാദികളുടെ കാര്യത്തില്‍ പ്രകടിപ്പിച്ച ആശങ്കകളുടെ അടിസ്ഥാനത്തിലാണ് ബ്രിട്ടീഷ് സര്‍ക്കാര്‍ അന്വേഷണം നടത്തിയിരുന്നത് എന്നാണ് സ്‌ട്രോ വ്യക്തമാക്കുന്നത്. തന്റെ നിയോജകമണ്ഡലമായിരുന്ന ബ്ലാക്ക്‌ബേണ്‍ ഉള്‍പ്പെടെയുള്ള ബ്രിട്ടനിലെ നിരവധി പ്രദേശങ്ങളില്‍ താമസിക്കുന്ന ലക്ഷക്കണക്കിന് ഗുജറാത്തികള്‍ വലിയ വിഷമത്തിലും ആശങ്കയിലുമായിരുന്നു കഴിഞ്ഞിരുന്നത്. ഗുജറാത്തില്‍ നടന്ന വര്‍ഗീയ കലാപങ്ങളില്‍ അവരുടെ കുടുംബങ്ങളില്‍പെട്ട പലര്‍ക്കും ജീവഹാനി സംഭവിക്കുകയും സ്വന്തം ഭൂമി ഉപേക്ഷിച്ചുപോവേണ്ടിവരികയും ചെയ്ത സംഭവങ്ങള്‍ തനിക്കറിയാമെന്നും അത്തരമൊരു സാഹചര്യത്തില്‍ ഗുജറാത്തില്‍ നടന്ന വംശഹത്യക്കെതിരെ ഇന്ത്യയിലെ അന്നത്തെ ബ്രിട്ടീഷ് ഹൈകമ്മീഷണര്‍ റോബര്‍ട്ട് യംഗ് അന്വേഷണം ആവശ്യപ്പെടുകയായിരുന്നുവെന്നും അദ്ദേഹം വിശദീകരിക്കുന്നു. മറ്റൊരു രാജ്യത്ത് നടന്ന കൂട്ടക്കൊലയെകുറിച്ച് സ്വന്തം നിലക്ക് യു.കെ അന്വേഷണം നടത്താനുണ്ടായ സാഹചര്യം അതായിരുന്നുവെന്ന് മുന്‍ ആഭ്യന്തര സെക്രട്ടറി കൂടിയായ ജാക്ക് സ്‌ട്രോ പറയുന്നു.

2002 ഫിബ്രവരിയിലായിരുന്നു മുസ്‌ലിം ഉന്മൂലനം ലക്ഷ്യമിട്ടുള്ള ഗുജറാത്ത് കലാപം അരങ്ങേറിയത്. ബ്രിട്ടീഷ് അധികാരികള്‍ നടത്തുന്ന അന്വേഷണത്തെ കുറിച്ചുള്ള വിശദമായ റിപ്പോര്‍ട്ട് അതേവര്‍ഷം മെയ് 6 ന് ഇന്ത്യ ടുഡേ പ്രസിദ്ധീകരിച്ചിട്ടുണ്ടായിരുന്നു. സംഭവം കഴിഞ്ഞ് 20 വര്‍ഷത്തിന് ശേഷമുണ്ടായ പുതിയ വെളിപ്പെടുത്തലൊന്നുമല്ല ബി.ബി.സിയുടേത് എന്നത് വ്യക്തമാണ്. ഗുജറാത്ത് കലാപത്തിന്റെ പേരില്‍ ഗുജറാത്ത്, ഇന്ത്യന്‍ സര്‍ക്കാറുകളെ അപലപിച്ചുകൊണ്ട് പരസ്യമായി രംഗത്ത് വന്നത് ബ്രിട്ടന്‍ മാത്രമായിരുന്നില്ല. ബ്രിട്ടന്റെ നിലപാടിനോട് യോജിച്ചുകൊണ്ട് യൂറോപ്യന്‍ യൂനിയനും രംഗത്തുവന്നിരുന്നു. ഇന്ത്യയിലെ ജര്‍മ്മന്‍, ഡച്ച് നയതന്ത്രകാര്യാലയങ്ങളും ബ്രിട്ടന്റെ നിലപാടിനോട് യോജിച്ചു ഗുജറാത്തിലെ നിരപരാധരായ സാധാരണക്കാര്‍ നിഷ്ഠൂരമായി കൊലചെയ്യപ്പെട്ട സംഭവങ്ങളെ വെളിച്ചത്തുകൊണ്ടുവരണമെന്ന ആവശ്യം ഉന്നയിച്ചിരുന്നു. ഗുജറാത്ത് സര്‍ക്കാറും പൊലീസും പക്ഷപാതപരമായ സമീപനമാണ് പുലര്‍ത്തുന്നതെന്നും അവര്‍ ആരോപിച്ചിരുന്നു. സംഭവത്തെതുടര്‍ന്ന് അന്നത്തെ ഗുജറാത്ത് മുഖ്യമന്ത്രി നരേന്ദ്രമോദിക്ക് അമേരിക്ക യാത്രാവിലക്ക് ഏര്‍പ്പെടുത്തുകയും ചെയ്തിരുന്നു. ഗുജറാത്ത് കൂട്ടക്കൊലയുടെ ദൃശ്യങ്ങള്‍ കണ്ട വിദേശ രാജ്യങ്ങളിലെ വിവിധ നേതാക്കള്‍ ‘ഹൃദയഭേദകം’ എന്നായിരുന്നു വിശേഷിപ്പിച്ചിരുന്നത്. 1992 ല്‍ ബാബരി മസ്ജിദിന്റെ തകര്‍ച്ചയോടെ ഇന്ത്യ ലോകത്തിന്റെ മുമ്പില്‍ നാണം കെട്ടിരുന്നുവെങ്കില്‍ പത്തുവര്‍ഷം കഴിഞ്ഞ് 2002 ലെ ഗുജറാത്ത് കൂട്ടക്കൊലയോടെ ഇന്ത്യയെ കുറിച്ച് ‘അസഹിഷ്ണുതയുടെ കേദാരം’ എന്ന് വിദേശരാജ്യങ്ങള്‍ വിശേഷിപ്പിക്കുന്ന അവസ്ഥയുണ്ടായി.

ജാക്ക് സ്‌ട്രോകരണ്‍ ഥാപ്പര്‍ അഭിമുഖത്തെ കുറിച്ച് ‘നിയോ കൊളോണിയല്‍’ എന്നാണ് ഇന്ത്യന്‍ വിദേശ കാര്യ വക്താവ് അരിന്ദം ബാഗ്ച്ചി വിശേഷിപ്പിച്ചത്. വിഷയത്തിന്റെ മര്‍മ്മത്തില്‍ നിന്നുള്ള ഒളിച്ചോട്ടമാണിത്. ഗുജറാത്ത് കലാപത്തിലെ കേന്ദ്ര സംസ്ഥാന സര്‍ക്കാരുകളെ കുറ്റപ്പെടുത്തിക്കൊണ്ടുള്ള നിലപാടുകള്‍ സ്വീകരിച്ചത് ബ്രിട്ടന്‍ മാത്രമായിരുന്നില്ല എന്ന യാഥാര്‍ഥ്യം മറച്ചുപിടിച്ചുകൊണ്ടാണ് വിദേശകാര്യ വക്താവിന്റെ പ്രതികരണം. ലോകത്തെ പ്രമുഖ രാജ്യങ്ങളെല്ലാം ഇന്ത്യന്‍ ഭരണകൂടം സ്വീകരിച്ച നിലപാടിനെ വിമര്‍ശിച്ചും അന്നത്തെ മുഖ്യമന്ത്രി നരേന്ദ്രമോദിയുടെ പങ്കിനെ കുറ്റപ്പെടുത്തിയുമാണ് സംസാരിച്ചിരുന്നത് എന്ന വസ്തുത മറച്ചുവെച്ചുകൊണ്ടും ബ്രിട്ടീഷുകാരെ കുറ്റപ്പെടുത്തിയും രക്ഷപ്പെടാനാണ് സംഘ്പരിവാര്‍ ശ്രമിക്കുന്നത്. നിയോ കൊളോണിയലിസം എന്ന് പറഞ്ഞുകൊണ്ട് ബി.ബി.സി ഡോക്യുമെന്ററിയെ നേരിടുന്ന പരിവാറുകാര്‍ക്ക് പഴയ ബ്രിട്ടീഷ് കൊളോണിയലിസത്തോടുണ്ടായിരുന്ന പ്രണയം മറക്കാന്‍ സാധിക്കുമോ? പഴയ കാലങ്ങളിലെ സംഘ്ബ്രിട്ടീഷ് ‘ഷൂ കഥകളെ’ മൂടിവെക്കാന്‍ സാധിക്കുമോ?

ഗോധ്ര സംഭവത്തെ തുടര്‍ന്ന് ഗുജറാത്തിലെ വിവിധ പ്രദേശങ്ങളില്‍ മുസ്‌ലിം ജനവിഭാഗങ്ങളെ പ്രത്യേകം ലക്ഷ്യമാക്കിക്കൊണ്ടാണ് പൊലീസ് പ്രവര്‍ത്തിച്ചത്. ഇത് കേവലം ആരോപണങ്ങളല്ല, ഹ്യൂമന്‍ വാച്ച് പോലുള്ള മനുഷ്യാവകാശ സംഘടനകളാണ് ഈ യാഥാര്‍ഥ്യം ലോകത്തോട് വിളിച്ചുപറഞ്ഞത്. ഗുജറാത്തിലെ ന്യൂനപക്ഷ സമുദായത്തില്‍പെട്ട സ്ത്രീകളുടെ മേല്‍ ഭീകരമായ ലൈംഗികാതിക്രമങ്ങള്‍ നടന്നു എന്ന് റിപ്പോര്‍ട്ട് ചെയ്തത് യു.കെ, ഫ്രാന്‍സ്, ജര്‍മ്മനി, ശ്രീലങ്ക എന്നിവിടങ്ങളില്‍നിന്നുള്ള വനിതാ അന്താരാഷ്ട്ര വിദഗ്ധര്‍ ചേര്‍ന്ന് രൂപീകരിച്ച ‘അന്താരാഷ്ട്ര വസ്തുതാന്വേഷണ സമിതി’യാണ്. നൂറു കണക്കിന് പെണ്‍കുട്ടികളെ ബലാല്‍സംഗം ചെയ്ത് ചുട്ടുകരിക്കുകയും കുട്ടികളെ പെട്രോള്‍ കുടിപ്പിച്ച് തീവെക്കുകയും ചെയ്ത സംഭവങ്ങള്‍ അരങ്ങേറി. വീടുകളില്‍ വെള്ളം കയറ്റി വൈദ്യുതാഘാതം ഏല്‍പ്പിച്ച് കൊലപ്പെടുത്തിയ സംഭവങ്ങളും റിപ്പോര്‍ട്ട് ചെയ്തു. നരോദപാട്യയില്‍ അടക്കമുള്ള ഗുജറാത്തിലെ നിരവധി കുഴിമാടങ്ങള്‍ ഗുജറാത്ത് കലാപത്തിന്റെ അവശേഷിക്കുന്ന അടയാളങ്ങളാണ്. കൂട്ടക്കൊല റിപ്പോര്‍ട്ട് ചെയ്യാനെത്തിയ ധാരാളം മാധ്യമപ്രവര്‍ത്തകര്‍ ആക്രമണങ്ങള്‍ക്ക് വിധേയരായി.

ഇന്ത്യയിലെ അറിയപ്പെടുന്ന നിയമപണ്ഡിതരും മനുഷ്യാവകാശപ്രവര്‍ത്തകരുമായിരുന്ന വി.ആര്‍ കൃഷ്ണയ്യര്‍, പി.ബി സാവന്ത് തുടങ്ങിയവര്‍ നേതൃത്വം നല്‍കിയിരുന്ന ‘കണ്‍സേണ്‍ഡ് സിറ്റിസണ്‍ ട്രിബ്യുണല്‍’ (ഇഇഠ), പ്രമുഖ പാരിസ്ഥിതിക പണ്ഡിത വന്ദന ശിവ, പ്രമുഖ മാധ്യമപ്രവര്‍ത്തക ഡിയോണ്‍ ബുന്‍ഷ തുടങ്ങി ഗുജറാത്ത് കൂട്ടക്കൊലയുടെ വസ്തുതകള്‍ അന്വേഷണം നടത്തിയവര്‍ പുറത്തുവിട്ട വിവരങ്ങളില്‍ ചിലത് മാത്രമാണിത്. ചരിത്ര പണ്ഡിതനായ ജ്ഞാനേന്ദ്ര പാണ്ഡെ ഈ ആക്രമണങ്ങളെ ‘കലാപം’ എന്നല്ല വിളിക്കേണ്ടതെന്നും ഭരണകൂട ഭീകരതയെന്നും സംഘടിത രാഷ്ട്രീയ കൂട്ടക്കൊലകള്‍ എന്നുമെല്ലാമാണ് വിശേഷിപ്പിക്കേണ്ടത് എന്നുമാണ് പറഞ്ഞിരുന്നത്. ഇന്ത്യന്‍ രാഷ്ട്രീയത്തെ ശാസ്ത്രീയമായി അപഗ്രഥനം ചെയ്ത പ്രമുഖ അമേരിക്കന്‍ പൊളിറ്റിക്കല്‍ സയന്റ്റിസ്റ്റ് പോള്‍ ബ്രാസ് ഗുജറാത്ത് കൂട്ടക്കൊലയെ വിശേഷിപ്പിച്ചത് മുസ്‌ലിം വിരുദ്ധ വംശഹത്യ എന്നായിരുന്നു. വി.എച്ച്.പിയും ബജ്‌റംഗ്ദളും നടത്തിയ ഗൂഢാലോചനയായിരുന്നു ഗുജറാത്ത് കൂട്ടക്കൊല എന്നാണ് മറ്റൊരു അമേരിക്കന്‍ രാഷ്ട്രീയ മീമാംസകനായ പ്രൊഫ. സ്‌കോട്ട് ഹിബ്ബാര്‍ഡ് വിശേഷിപ്പിച്ചത്. അറിയപ്പെടുന്ന ഇന്ത്യന്‍ സോഷ്യോളജിസ്റ്റ് ദീപാന്ദര്‍ ഗുപ്തയും പൊലീസിന്റെയും ഭരണകൂടത്തിന്റെയും പങ്ക് വിളിച്ചുപറഞ്ഞിട്ടുണ്ട്. ബി.ജെ.പി നേതാക്കള്‍ ആരോപിക്കുന്നത് പോലെ ഇവരാരും നിയോ കൊളോണിയലിസ്റ്റുകള്‍ ആയിരുന്നില്ല. സാധാരണക്കാരായ ആയിരങ്ങളുടെ ജീവനെടുത്ത കൂട്ടക്കൊലയുടെ പിന്നാമ്പുറ കഥകള്‍ ബി.ബി.സി പുറത്തുവിടുമ്പോള്‍ അതിന് നേതൃത്വം കൊടുത്തവര്‍ രാജ്യം ഭരിച്ചുകൊണ്ടിരിക്കുകയാണ്. ഈ കൂട്ടക്കൊലയെക്കുറിച്ചുള്ള ഏതൊരു വാര്‍ത്തയും അവരുടെ നെഞ്ചില്‍ തീകോരിയിടുക സ്വാഭാവികമാണ്. ഇഹ്‌സാന്‍ ജാഫ്‌റി, ബില്‍കീസ് ബാനു, ബെസ്റ്റ് ബേക്കറി തുടങ്ങിയ പേരുകളെല്ലാം അവരുടെ സൈ്വര്യം കെടുത്തിക്കൊണ്ടേയിരിക്കും. ഗുജറാത്തിലെ ന്യൂനപക്ഷങ്ങളെ കൂട്ടക്കുരുതിയിലൂടെ ഇല്ലാതാക്കാന്‍ ശ്രമിച്ചിരുന്നവര്‍ ഇപ്പോള്‍ രാജ്യത്തെ പ്രബല ന്യൂനപക്ഷമായ മുസ്‌ലിംകളുടെ പൗരത്വം തന്നെ ഇല്ലാതാക്കാനുള്ള കഠിന പ്രയത്‌നത്തിലാണ്.

ഗുജറാത്തില്‍ നടത്തിയ വികസനത്തെ ഉയര്‍ത്തിക്കാട്ടി രക്ഷപ്പെടാനാണ് സംഘ്പരിവാര്‍ എക്കാലവും ശ്രമിച്ചുവന്നിട്ടുള്ളത്. എന്നാല്‍ എത്രയെത്ര വികസനമുണ്ടായാലും ഇല്ലെങ്കിലും ഗുജറാത്തില്‍ കൊല്ലപ്പെട്ട ആയിരങ്ങളുടെ ആത്മാക്കള്‍ എക്കാലവും സംഘ്പരിവാറിനെ വേട്ടയാടിക്കൊണ്ടിരിക്കും. മാധ്യമപ്രവര്‍ത്തകര്‍ ഒപ്പിയെടുത്ത ചിത്രങ്ങളും ചാനലുകള്‍ രേഖപ്പെടുത്തിവെച്ച ദൃശ്യങ്ങളും കൂട്ടക്കൊലയുടെ സാക്ഷികളായി എക്കാലവും ലോകത്തിന് മുമ്പില്‍ അവതരിച്ചു കൊണ്ടേയിരിക്കും. ബി.ബി.സിയുടെ ഡോക്യുമെന്ററി ബ്ലോക്ക് ചെയ്തതുകൊണ്ട് മാത്രം ഗുജറാത്തില്‍ നടന്ന സംഭവങ്ങളുടെ യാഥാര്‍ഥ്യം ലോകം മനസ്സിലാക്കാതെ പോവുമെന്ന് സംഘ്പരിവാര്‍ ധരിക്കുന്നുവെങ്കില്‍ അത് കേവലം മിഥ്യാധാരണ മാത്രമാണ്.

Continue Reading

Trending