ദുബൈ: അന്താരാഷ്ട്ര ടി20 ക്രിക്കറ്റില് 100 വിക്കറ്റ് നേടുന്ന ആദ്യ ഇന്ത്യന് താരമെന്ന നേട്ടം മീഡിയം പേസര് അര്ഷ്ദീപ് സിങ് സ്വന്തമാക്കി. ഏഷ്യാ കപ്പിലെ ഒമാനെതിരായ മത്സരത്തിലാണ് അദ്ദേഹം ഈ നേട്ടത്തിലെത്തിയത്. നാല് ഓവറില് 37 റണ്സ് വഴങ്ങി, ഒമാന്റെ വിനായക് ശുക്ലയെ പുറത്താക്കിയാണ് അര്ഷ്ദീപ് 100-ാം വിക്കറ്റ് നേടിയത്.
64 മത്സരങ്ങളില് നിന്നാണ് അര്ഷ്ദീപ് നൂറ് വിക്കറ്റ് നേടിയത്. ഏറ്റവും വേഗത്തില് 100 ടി20 വിക്കറ്റിലെത്തിയ നാലാമത്തെ താരമാണ് അദ്ദേഹം. പട്ടികയില് മുന്നില് നില്ക്കുന്നത് 53 മത്സരങ്ങളില് നിന്നാണ് ഈ നേട്ടത്തിലെത്തിയ അഫ്ഗാന് സ്പിന്നര് റാഷിദ് ഖാനാണ്. നേപ്പാളിന്റെ സന്ദീപ് ലമിച്ചെയ്ന് (54), ശ്രീലങ്കയുടെ വാനിന്ദു ഹസരങ്ക (63) എന്നിവരാണ് തുടര്ന്നുള്ളവര്.
അതേസമയം, ഏഷ്യാ കപ്പിലെ ഗ്രൂപ്പ് സ്റ്റേജിലെ അവസാന മത്സരത്തില് ഇന്ത്യ 21 റണ്സിന് ഒമാനെ പരാജയപ്പെടുത്തി. ആദ്യം ബാറ്റ് ചെയ്ത ഇന്ത്യ എട്ട് വിക്കറ്റ് നഷ്ടത്തില് 188 റണ്സ് നേടി. മലയാളി താരം സഞ്ജു സാംസണ് 45 പന്തില് 56 റണ്സുമായി ഇന്ത്യയുടെ ടോപ് സ്കോറര് ആയിരുന്നു. അഭിഷേക് ശര്മ്മ (38), തിലക് വര്മ (29), അക്സര് പട്ടേല് (26) എന്നിവരും സംഭാവന ചെയ്തു.
മറുപടി ബാറ്റിംഗില് ഒമാന്റെ മുന്നിര ഇന്ത്യയെ കടുത്ത സമ്മര്ദ്ദത്തിലാക്കി. ജതിന്ദര് സിങ് (32), ആമിര് ഖലീം (64), ഹമ്മാദ് മിര്സ (51) എന്നിവര് തിളങ്ങിയെങ്കിലും, 149 റണ്സിലെത്തിയപ്പോള് മുതല് തുടര്ച്ചയായി വിക്കറ്റുകള് നഷ്ടമായതോടെ ഒമാന്റെ പ്രതീക്ഷ തകര്ന്നു. 167 റണ്സില് നാലു വിക്കറ്റ് നഷ്ടപ്പെട്ടാണ് ഒമാന് നിലകൊണ്ടത്.
മൂന്ന് മത്സരങ്ങളിലും ജയിച്ച് ഇന്ത്യ സൂപ്പര് ഫോറിലേക്ക് മുന്നേറി. സൂപ്പര് ഫോറിലെ ആദ്യ മത്സരത്തില് ഞായറാഴ്ച ഇന്ത്യ പാകിസ്താനെ നേരിടും. തുടര്ന്ന് 24ന് ബംഗ്ലാദേശിനെയും 26ന് ശ്രീലങ്കയെയും ഇന്ത്യ നേരിടും. ഫൈനല് 28ന് നടക്കും.