മുംബൈ: പരിസ്ഥിതി സംരക്ഷണത്തിന്റെ ഭാഗമായി ഗോ ഗ്രീന്‍ എന്ന പേരില്‍ പദ്ധതി നടപ്പാക്കാന്‍ ടാറ്റാ മോട്ടോഴ്‌സ്. ഇതിന്റെ ഭാഗമായി സന്നദ്ധ സംഘടനയുമായി സഹകരിച്ച് മരം നടീലിനുള്ള ബൃഹദ് പദ്ധതി കമ്പനി തയ്യാറാക്കി. ഒരു വാഹനം വില്‍ക്കുകയോ അംഗീകൃത സര്‍വീസ് കേന്ദ്രത്തില്‍ സര്‍വീസ് നടത്തുകയോ ചെയ്താല്‍ ഒരു മരം നടുന്നതാണ് പദ്ധതി.

കമ്പനിയാണ് ചെടി പരിപാലിക്കുക. ജിയോടാഗ് വഴി മരം നട്ട സ്ഥലവുമായി ഉപഭോക്താവിനെ ബന്ധിപ്പിക്കുമെന്നും മരത്തിന്റെ തല്‍സ്ഥിതി അതുവഴി വീക്ഷിക്കാമെന്നും കമ്പനി വ്യക്തമാക്കി.

രാജ്യത്തെ പത്തു സംസ്ഥാനങ്ങളിലാണ് ഇത്തരത്തില്‍ മരംനടീല്‍ ഉണ്ടാകുക. ഫലവൃക്ഷങ്ങളും ഔഷധ സസ്യങ്ങളും ഇതിന്റെ ഭാഗമായി നട്ടുപിടിപ്പിക്കും. പരിസ്ഥിതി സുസ്ഥിരത ടാറ്റ മോട്ടോഴ്‌സിന്റെ അടിസ്ഥാന ലക്ഷ്യങ്ങളില്‍ ഒന്നാണെന്ന് സെയില്‍സ് മാര്‍ക്കറ്റിങ് വിഭാഗം വൈസ് പ്രസിഡണ്ട് രാജേഷ് കൗള്‍ പറഞ്ഞു.