ഹൈദരാബാദ്: കേരളത്തില്‍ നിന്നുള്ള മെഡിക്കല്‍ വിദ്യാര്‍ത്ഥികള്‍ സഞ്ചരിച്ച ബസ് തെലങ്കാനയില്‍ അപകടത്തില്‍പ്പെട്ടു. രണ്ടു പേര്‍ മരിച്ചു. മഹ്ബൂബ് നഗറിനു സമീപം ബസ് ലോറിക്ക് പിന്നിലിടിച്ചാണ് ദുരന്തമുണ്ടായത്. സംഭവത്തില്‍ ബസ് ഡ്രൈവറും ക്ലീനറും മരിച്ചു. 20-ലേറെ പേര്‍ക്ക് പരിക്കേറ്റു.

പെരിന്തല്‍മണ്ണ അല്‍ഷിഫ ഫാര്‍മസ്യൂട്ടിക്കല്‍ കോളേജില്‍ നിന്നുള്ള 28 വിദ്യാര്‍ത്ഥികളും മൂന്ന് അധ്യാപകരുമാണ് അപകടത്തില്‍പ്പെട്ട ബസ്സിലുണ്ടായിരുന്നത്. ഹൈദരാബാദിന് 85 കിലോമീറ്റര്‍ അകലെ ജദ്ചര്‍ല മണ്ഡലിലെ മചാറം ഹൈവേയില്‍ വെച്ച് ലോറിക്ക് പിന്നില്‍ ഇടിക്കുകയായിരുന്നു.

റോഡ് മുറിച്ചു കടക്കുകയായിരുന്ന ഒരു സ്ത്രീയെ രക്ഷിക്കാന്‍ ബസ് ഡ്രൈവര്‍ ശ്രമിക്കവെയാണ് ലോറിക്ക് പിന്നിലിടിച്ചത് എന്നാണ് സൂചന. പരിക്കേറ്റവരെ സമീപത്തുള്ള ആസ്പത്രിയില്‍ പ്രവേശിപ്പിച്ചു.