വയനാട് കാക്കവയല്‍ സ്വദേശിയായ 17 കാരിയായ വിഷ്ണുപ്രിയയെ കാണാതായതായി ബന്ധുക്കള്‍ പരാതി നല്‍കി. മീനങ്ങാടി കാക്കവയല്‍ തൊഴുത്തും പറമ്പില്‍ ശിവജിയുടെയും ബിന്ദുവിന്റെയും മകളാണ് വിഷ്ണുപ്രിയ. സംഭവത്തില്‍ ചോറ്റാനിക്കര പൊലീസ് അന്വേഷണം ആരംഭിച്ചു.
28ന് എറണാകുളത്ത് അമ്മ വീട്ടില്‍ പോയ വിഷ്ണുപ്രിയ 31 ന് എറണാകുളത്ത് നിന്ന് കോഴിക്കോടിന് ട്രെയിന്‍ കയറിയിരുന്നു. 4.30ന് കോഴിക്കോട് കെഎസ്ആര്‍ടിസി സ്റ്റാന്‍ഡില്‍ വിഷ്ണുപ്രിയയെ കണ്ടതായി സഹപാഠി കുടുംബത്തെ അറിയിക്കുകയും ചെയ്തു. ഇതിന് ശേഷം വിഷ്ണുപ്രിയ എവിടെയെന്ന് മാത്രം ആര്‍ക്കും അറിവില്ല. കുടുംബത്തേയോ കുട്ടുകാരേയോ ബന്ധപ്പെട്ടിട്ടുമില്ല.
കാണാതായി ഒരു ദിവസം കഴിഞ്ഞിട്ടും വിഷ്ണുപ്രിയയെക്കുറിച്ച് ഒരു വിവരവുമില്ലാതായതോടെയാണ് അച്ഛന്‍ ശിവജി തന്റെ മകളെ കാണാനില്ലെന്ന് കാണിച്ച ഫേയ്‌സ്ബുക്കില്‍ കുറിപ്പിട്ടത്.
പോസ്റ്റ് വൈറലായതോടെ നിരവധി പേര്‍ വിളിച്ച് കാര്യങ്ങള്‍ അന്വേഷിക്കുന്നുണ്ടെങ്കിലും വിഷ്ണുപ്രിയയെക്കുറിച്ച് മാത്രം വിവരമൊന്നും ലഭിച്ചില്ല. നിലവില്‍ മീനങ്ങാടി പൊലീസില്‍ കുടുംബം പരാതി നല്‍കിയിട്ടുണ്ട്.