എസ്.എഫ്.ഐ നേതൃത്വം തുടര്‍ച്ചയായി വിവാദങ്ങള്‍ സൃഷ്ടിച്ച് സര്‍ക്കാരിനെ പ്രതിരോധത്തിലാക്കുന്ന സാഹചര്യത്തില്‍ സംഘടനയില്‍ ശക്തമായി ഇടപെടാന്‍ പാര്‍ട്ടി തീരുമാനം. സംസ്ഥാന സെക്രട്ടറിയേറ്റ് യോഗങ്ങളിലെ ചര്‍ച്ചകളുടെ അടിസ്ഥാനത്തില്‍, എസ്.എഫ്.ഐ ശക്തമായി നിയന്ത്രിക്കാന്‍ ജില്ലാ കമ്മിറ്റികള്‍ക്ക് പാര്‍ട്ടി നിര്‍ദേശം നല്‍കി. എസ്.എഫ്.ഐയില്‍ അഴിച്ചുപണിക്കും സാധ്യതയുണ്ട്.
എസ്.എഫ്.ഐയില്‍ പ്രാദേശിക തലത്തില്‍ നടക്കുന്ന സംഭവങ്ങളിലെ പാര്‍ട്ടി യഥാസമയം ഇടപെടല്‍ നടത്തണമെന്നാണ് സംസ്ഥാന സെക്രട്ടറിയേറ്റ് നിര്‍ദേശം. തിരുത്തപ്പെടേണ്ട കാര്യങ്ങളുണ്ടെങ്കില്‍ തിരുത്തണം. നിയമവിരുദ്ധ കാര്യങ്ങള്‍ക്ക് പിന്തുണ നല്‍കുന്ന സാഹചര്യം ഉണ്ടാകരുത്. ഓരോ ജില്ലയിലെയും വിദ്യാര്‍ഥി സംഘടനാ വിഷയങ്ങള്‍ സംസ്ഥാന നേതൃത്വത്തെ കൃത്യമായി അറിയിക്കണം. നേതാക്കളുടെ പ്രവര്‍ത്തനത്തെ കൃത്യമായി വിലയിരുത്തണം . വിദ്യാര്‍ഥികളെ സംഘടനയിലേക്ക് ആകര്‍ഷിക്കാന്‍ കഴിയുന്ന തരത്തില്‍ പ്രവര്‍ത്തനം മെച്ചപ്പെടുത്തണമെന്നും നിര്‍ദേശമുണ്ട്.