അഹമ്മദാബാദ് വിമാനദുരന്തവുമായി ബന്ധപ്പെട്ട് അന്വേഷണ പുരോഗതി ചര്ച്ച ചെയ്യാന് യു.എസില് അടുത്തയാഴ്ച സംയുക്ത യോഗം ചേരും. അന്വേഷണത്തിന് നേതൃത്വം നല്കുന്ന എയര്ക്രാഫ്റ്റ് ആക്സിഡന്റ് ഇന്വെസ്റ്റിഗേഷന് ബ്യൂറോ (എ.എ.ഐ.ബി) സംഘത്തിന് പുറമെ, യു.എസ് നാഷണല് ട്രാന്സ്പോര്ട്ടേഷന് സേഫ്റ്റി ബോര്ഡും (എന്.ടി.എസ്.ബി), ബോയിങ്ങുമടക്കമുള്ളവര് യോഗത്തില് പങ്കെടുക്കും.
വാഷിങ്ടണിലെ ആസ്ഥാനത്താണ് യോഗം നടക്കുക. യോഗത്തില് അപകടവുമായി ബന്ധപ്പെട്ട് എന്.ടി.എസ്.ബി ഇതുവരെ ശേഖരിച്ച വിവരങ്ങള് അന്വേഷണ സംഘത്തിന് പരിശോധിക്കാനാവും. കോക്പിറ്റ് വോയ്സ് റെക്കോര്ഡറില് നിന്നും ഫ്ലൈറ്റ് ഡാറ്റ റെക്കോര്ഡറില് നിന്നും ശേഖരിച്ച വിവരങ്ങളുടെ വിശകലനം അന്വേഷണസംഘം യോഗത്തില് അവതരിപ്പിച്ചേക്കും.
അഹമ്മദാബാദ് വിമാനത്താവളത്തില് നിന്ന് പറന്നുയര്ന്നതിന് പിന്നാലെ, വിമാനത്തിന്റെ ഇന്ധന നിയന്ത്രണ സ്വിച്ചുകള് ഓഫ് ചെയ്തിരുന്നതായാണ് പ്രാഥമിക വിലയിരുത്തല്. ഇതേത്തുടര്ന്ന് എഞ്ചിനുകളുടെ പ്രവര്ത്തനം നിലച്ചു. 10 സെക്കന്റുകള്ക്ക് പിന്നാലെ, സ്വിച്ചുകള് ഓണ് ചെയ്തെങ്കിലും വിമാനത്തിന്റെ നിയന്ത്രണം നഷ്ടമായിരുന്നുവെന്നും കണ്ടെത്തലുകളുണ്ടായിരുന്നു.
ഇന്ധന സ്വിച്ചുകള് എന്തിനാണ് ഓഫ് ചെയ്തതെന്ന് ഒരു പൈലറ്റ് ചോദിക്കുന്നതും മറ്റേ പൈലറ്റ് അത് നിഷേധിക്കുന്നതുമായ ശബ്ദരേഖ കോക്പിറ്റ് വോയ്സ് റെക്കോര്ഡറില് നിന്ന് വീണ്ടെടുത്തിട്ടുണ്ട്. ഇതടക്കം രേഖകളും ഇതര സാങ്കേതിക വിവരങ്ങളും പരിശോധിച്ചുവരികയാണ്.