കണ്ണൂർ എ.ഡി.എം നവീൻ ബാബു ആത്മഹത്യ ചെയ്ത സംഭവം ഞെട്ടിക്കുന്നതാണെന്നും ജില്ലാ പഞ്ചായത്ത് പ്രസിഡന്റ് പി.പി ദിവ്യക്കെതിരെ ആത്മഹത്യാ പ്രേരണക്ക് കേസെടുക്കണമെന്നും മുസ്ലിംലീഗ് സംസ്ഥാന ജനറൽ സെക്രട്ടറി അഡ്വ. പി.എം.എ സലാം. ആത്മഹത്യ ചെയ്ത എ.ഡി.എമ്മിനെക്കുറിച്ച് ഡിപ്പാർട്‌മെന്റിനോ വകുപ്പ് മന്ത്രിക്കോ പൊതുജനത്തിനോ യാതൊരു പരാതിയുമില്ല. സി.പി.എം നേതാക്കളുടെ മനുഷ്യത്വ രഹിതമായ ഇടപെടൽ കാരണം ഉദ്യോഗസ്ഥർക്ക് ജീവിക്കാൻ പറ്റാത്ത സാഹചര്യമാണ് നാട്ടിലുള്ളത്. ഇതിനെതിരെ ശക്തമായ ജനകീയ പ്രതിഷേധമുണ്ടാകും. എ.ഡി.എമ്മിന്റെ മരണത്തിന് കാരണക്കാരായ ആരൊക്കെയുണ്ടോ അവർക്കെല്ലാം എതിരെ അന്വേഷണവും ശക്തമായ നടപടിയും വേണം.- പി.എം.എ സലാം പറഞ്ഞു.

അധികാരത്തിലെത്തിയാൽ സി.പി.എം നേതാക്കൾക്ക് പൊതുവെ ഉള്ള ധാർഷ്ട്യം തന്നെയാണ് എ.ഡി.എമ്മിന്റെ കാര്യത്തിലും സംഭവിച്ചത്. തന്നെ ക്ഷണിക്കാത്ത യാത്രയയപ്പ് യോഗത്തിലേക്ക് കയറിച്ചെന്ന് എ.ഡി.എമ്മിനെ അധിക്ഷേപിച്ച ദിവ്യ ചെയ്തത് മാപ്പർഹിക്കാത്ത തെറ്റാണ്. യാതൊരു തെളിവുമില്ലാതെ ഒരു ഉദ്യോഗസ്ഥനെ കൈക്കൂലിക്കാരൻ എന്ന് വിശേഷിപ്പിച്ചാൽ സത്യസന്ധമായി പ്രവർത്തിച്ച ഒരു ഉദ്യോഗസ്ഥന് അത് സഹിക്കാൻ കഴിയണമെന്നില്ല. പൊതുമധ്യത്തിൽ അപമാനിതനായതിന്റെ മനോവേദനയിലാണ് അദ്ദേഹം ആത്മഹത്യ ചെയ്തത്. അതുകൊണ്ട് തന്നെ ഈ ആത്മഹത്യയുടെ ഉത്തരവാദിത്തം ദിവ്യക്കുണ്ട്. ജില്ലാ പഞ്ചായത്ത് പ്രസിഡന്റ് പദവിയിൽ ഒരു നിമിഷം പോലും ഇരിക്കാനുള്ള യോഗ്യത ദിവ്യക്കില്ലെന്നും പി.എം.എ സലാം പറഞ്ഞു.

അർഹതപ്പെട്ട കേന്ദ്ര സഹായം നേടിയെടുക്കാൻ കഴിയാത്ത സംസ്ഥാന സർക്കാരിനെതിരെ ആഞ്ഞടിച്ച് നിയമസഭയിൽ പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി. യു.ഡി.എഫ് ഭരിക്കുമ്പോൾ കേന്ദ്രത്തിൽ ആര് ഭരിക്കുകയാണെങ്കിലംു മന്ത്രിമാർ ഡൽഹിയിൽ പോയി ആവശ്യങ്ങൾ നേടിയെടുത്തിരുന്നു. കേരളത്തോട് അവഗണന കാണിക്കാൻ അന്ന് കേന്ദ്രം ധൈര്യപ്പെട്ടിരുന്നില്ല. പ്രതിപക്ഷം സഹകരിച്ചത് കൊണ്ട് കാര്യമില്ല, അർഹതപ്പെട്ടത് വാങ്ങിയെടുക്കാൻ നിങ്ങൾക്ക് ത്രാണിയില്ല.- അദ്ദേഹം പറഞ്ഞു.

വയനാട് ഉരുൾപൊട്ടലിൽ സർക്കാർ നിഷ്‌ക്രിയമായത് കൊണ്ടാണ് കേന്ദ്രം ഒന്നും തരാതിരുന്നത്. ന്യായമായ ഏത് ആവശ്യത്തിനും പ്രതിപക്ഷം പിന്തുണ നൽകും. പക്ഷേ, കേരളത്തിന്റെ കെടുകാര്യസ്ഥത കൊണ്ടാണ് കേന്ദ്രം സഹായിക്കാത്തത്. ജലജീവൻ മിഷൻ നിശ്ചലമായതിന് കാരണം കേന്ദ്ര ഫണ്ട് കിട്ടാത്തതല്ല, സംസ്ഥാന ഫണ്ട് കൊടുക്കാത്തത് കൊണ്ടാണ്. ആരോഗ്യ മേഖലയിലും ഈ പ്രശ്‌നങ്ങളുണ്ട്. കേരളത്തിന്റെ സഹകരണമില്ലാത്തത് കൊണ്ട് ഒരുപാട് പദ്ധതികൾ നിശ്ചലമായി കിടക്കുകയാണ്. പണമില്ലാതെ പലതരത്തിലുള്ള സാമൂഹ്യ സുരക്ഷാ പദ്ധതികൾ മുടങ്ങിക്കിടക്കുകയാണെന്നും കുഞ്ഞാലിക്കുട്ടി പറഞ്ഞു.

കാഴ്ച പരിമിതിയുള്ള വ്യക്തികള്‍ക്കുള്ള ഉപകരണമെന്ന നിലയില്‍ വെളുത്ത ചൂരലിന്റെ പ്രാധാന്യം തിരിച്ചറിയുന്നതിനായി എല്ലാ വര്‍ഷവും ഒക്ടോബര്‍ 15 ലോക വൈറ്റ് കെയിന്‍ ദിനമായി ആചരിക്കുന്നു. ഇത്തരം ചൂരല്‍ അവരുടെ ചുറ്റുപാടുകളില്‍ സുരക്ഷിതമായും സ്വതന്ത്രമായും നാവിഗേറ്റ് ചെയ്യാന്‍ സഹായിക്കുന്നു. എന്നാല്‍ ഈ ഉപകരണത്തിന്റെ ഉപയോഗത്തിനപ്പുറം, കാല്‍നട സുരക്ഷയെക്കുറിച്ചും കാഴ്ച പരിമിതിയുള്ളവരുടെ അവകാശങ്ങളെക്കുറിച്ചും പൊതുജന അവബോധം വളര്‍ത്തുക എന്നതാണ് ഈ ദിവസം ലക്ഷ്യമിടുന്നത്. ഇത്തരം ആളുകള്‍ നേരിടുന്ന വെല്ലുവിളികളെക്കുറിച്ച് സമൂഹത്തെ ബോധവത്കരിക്കാന്‍ ഈ ദിവസം അവസരമൊരുക്കുന്നു.

1960-കളില്‍ നാഷണല്‍ ഫെഡറേഷന്‍ ഓഫ് ദി ബ്ലൈന്‍ഡ് കാഴ്ച പരിമിതിയുള്ളവരുടെ അവകാശങ്ങള്‍ക്കും സ്വാതന്ത്ര്യത്തിനും വേണ്ടി വാദിക്കാനുള്ള ശ്രമങ്ങള്‍ക്ക് നേതൃത്വം നല്‍കിയിരുന്നു. ഇതിന്റെ അടിസ്ഥാനത്തില്‍ ആഗോള വൈറ്റ് കെയിന്‍ സേഫ്റ്റി ഡേ എന്നറിയപ്പെടുന്ന വൈറ്റ് കെയിന്‍ സേഫ്റ്റി ഡേ സ്ഥാപിക്കുന്നതിനുള്ള സംയുക്ത പ്രമേയം യുണൈറ്റഡ് സ്റ്റേറ്റ്‌സ് കോണ്‍ഗ്രസില്‍ പാസാക്കാന്‍ നാഷണല്‍ ഫെഡറേഷന്‍ ഓഫ് ദി ബ്ലൈന്‍ഡ് മുതിര്‍ന്നു.

1964-ല്‍ പ്രസിഡന്റ് ലിന്‍ഡന്‍ ബി. ജോണ്‍സണാണ് ഈ ദിനം ആദ്യമായി ആഘോഷിക്കുന്നത്.