സൈബര്‍ ഇടങ്ങളില്‍ സിപിഎം നടത്തുന്ന ആക്രമണം അതിരു കടന്നിരിക്കുകയാണെന്ന് മുന്‍ പ്രതിപക്ഷ നേതാവ് രമേശ് ചെന്നിത്തല. സിപിഎമ്മിന്റെ മുതിര്‍ന്ന നേതാക്കളും അവരുടെ അണികള്‍ക്ക് പ്രചോദനം നല്‍കുന്ന രീതിയില്‍ അസഭ്യം വിളമ്പുകയാണ്, സിപിഎം ഭരണ പരാജയങ്ങളെ വിമര്‍ശിക്കുന്ന ആരെയും കടന്നാക്രമിച്ച് അവരുടെ വായ മൂടി കെട്ടുക എന്നതാണ് ഈ സൈബര്‍ സഖാക്കളുടെ പ്രധാന ലക്ഷ്യമെന്ന് അദ്ദേഹം പറഞ്ഞു.

പ്രത്യേകിച്ചും കോണ്‍ഗ്രസ് പാര്‍ട്ടിയിലെ വനിതാ നേതാക്കളോട് ഇവര്‍ പ്രതികരിക്കുന്നത് ഒട്ടും നിലവാരമില്ലാത്ത രീതിയില്‍ ആണ്. പ്രതികരണങ്ങള്‍ തികച്ചും സ്ത്രീ വിരുദ്ധതയാണ്. സോണിയാ ഗാന്ധി മുതല്‍ അരിത ബാബു വരെ ഇവരില്‍നിന്നും ഏറ്റുവാങ്ങേണ്ടി വരുന്ന അധിക്ഷേപങ്ങള്‍ സിപിഎമ്മിലെ വനിതാ നേതാക്കള്‍ കാണുന്നുണ്ടാവും.ഇക്കാര്യത്തില്‍ സൈബര്‍ സഖാക്കള്‍ മാത്രമല്ല അവര്‍ക്കൊപ്പം അവരുടെ പങ്കാളികളായ സംഘപരിവാര്‍ അക്കൗണ്ടുകളും ഉണ്ട്. ഭീഷണിപ്പെടുത്തുന്നതും അസഭ്യം പറയുന്നതിലും സിപിഎം സൈബര്‍ അണികള്‍ക്കൊപ്പം സംഘപരിവാര്‍ സൈബര്‍ അണികളും ഒട്ടും മോശമല്ലാതെ പ്രവര്‍ത്തിക്കുന്നതെന്ന് അദ്ദേഹം കൂട്ടിചേര്‍ത്തു.

അതേസമയം, ഇവര്‍ രണ്ടു പേരില്‍ നിന്നും ഒരേ പോലെ അക്രമണം നേരിടേണ്ടി വന്ന ഒരു വ്യക്തിയാണെന്നും സംസ്ഥാന സര്‍ക്കാരിന്റെ അഴിമതികള്‍ പുറത്തു കൊണ്ടുവന്നതിന്റെ പേരിലും മോദി സര്‍ക്കാരിന്റെ ഫാസിസ്റ്റ് നടപടികളെ ചോദ്യം ചെയ്തതിന്റെ പേരിലും അതിരുകടന്ന ആക്രമണങ്ങള്‍ എനിക്ക് നേരിടേണ്ടി വന്നിട്ടുണ്ടെന്നും രമേശ് വ്യക്തമാക്കി.

എന്നാല്‍ എന്നെ വേദനിപ്പിച്ച മറ്റൊരു സംഭവം റഫീഖ് അഹമ്മദിനെതിരെ സിപിഎം സൈബര്‍ പോരാളികള്‍ അഴിച്ചുവിട്ട ആക്രമണമാണ്. കെ റെയില്‍ പദ്ധതിക്കെതിരെ റഫീഖ് അഹമ്മദ് തന്റെ നിലപാട് അറിയിച്ചതാണ് ഇതിന് കാരണം.
വളരെ സംഘടിതമായും യാന്ത്രികമായും ഇവര്‍ നടത്തുന്ന ഈ സൈബര്‍ ആക്രമണങ്ങള്‍ യാദൃശ്ചികമല്ല. എകെജി സെന്ററില്‍ നിന്നും വരുന്ന നിര്‍ദ്ദേശമനുസരിച്ച് വളരെ ആസൂത്രണമായി നടക്കുന്ന ഒരു അക്രമമാണിത്, ഈ ഒളിപ്പോര് നടത്തുന്ന മുഖവും അന്തസ്സും ഇല്ലാത്ത ഈ അണികളെ നേരിട്ട് തിരിച്ചറിയുവാന്‍ കഴിയില്ലെങ്കിലും ഇവര്‍ പ്രതിനിധീകരിക്കുന്ന പാര്‍ട്ടിയുടെ യഥാര്‍ത്ഥ മുഖച്ഛായ ജനം ഇതുവഴി തിരിച്ചറിയുകയാണെന്ന് രമേശ് കൂട്ടിചേര്‍ത്തു.