Connect with us

Views

ജസീറ തകര്‍ത്തു, റയല്‍ വിറച്ചു

Published

on

 

അലി കാഷിഫി എന്ന അത്യുഗ്രന്‍ ഗോള്‍ക്കീപ്പര്‍. ആദ്യ 20 മിനുട്ടിനിടെ പതിനൊന്ന് കിടിലന്‍ സേവുകള്‍. ലോകതാരം കൃസ്റ്റ്യാനോ റൊണാള്‍ഡോ നാല് വട്ടം അരിശത്തില്‍ ഗോള്‍ പോസ്റ്റില്‍ കൈ കൊണ്ടിടിച്ചു. സിദാന്‍ അവിശ്വസനീയതയോടെ പലവട്ടം തലയില്‍ കൈവെച്ചു. കൈവിട്ടുപോവുമോ കാര്യങ്ങളെന്ന ആശങ്കയില്‍ റയല്‍ മാഡ്രിഡ് ക്യാമ്പ്.
കാഷിഫിയും റയല്‍ മുന്‍നിരക്കാരും തമ്മിലുള്ള കൂട്ടപ്പോരില്‍ അല്‍ജസീറ പോസ്റ്റില്‍ കയറാന്‍ മടിച്ച് പന്തും… നാല്‍പ്പത്തിയൊന്നാം മിനുട്ടില്‍ ആദ്യമായി പന്ത് റയല്‍ ഗോള്‍ക്കീപ്പര്‍ കീലര്‍ നവാസിലേക്ക് വരുന്നു. അതാവട്ടെ ഞെട്ടിപ്പിക്കുന്ന ഗോള്‍….! ഒന്നാം പകുതിക്ക് പിരിയുമ്പോള്‍ ലോക ചാമ്പ്യന്‍മാരായ റയല്‍ ഒരു ഗോളിന് പിന്നില്‍. അവിശ്വസനീയം. രണ്ടാം പകുതി തുടങ്ങിയതും വീണ്ടും റയല്‍ വലയില്‍ പന്ത്…! സ്റ്റേഡിയം പൊട്ടിത്തെറിച്ചു. ബാന്‍ഡ്‌മേളങ്ങള്‍ ഉച്ചത്തിലായി… സിദാന്‍ തല താഴ്ത്തുന്നു. സ്‌റ്റേഡിയം സ്‌കോര്‍ കാര്‍ഡില്‍ 2-0 എന്ന് തെളിയുന്നു.
പക്ഷേ ലൈന്‍ റഫറി സംശയം പ്രകടിപ്പിച്ചപ്പോള്‍ ബ്രസീലുകാരനായ റഫറി സാന്‍ഡ്രോ റിച്ചി സ്വന്തം ഇയര്‍ ഫോണിലൂടെ പോര്‍ച്ചുഗീസുകാരനായ വീഡിയോ അസിസ്റ്റന്‍ഡ് റഫറി അര്‍തര്‍ ഡയസിന് നിര്‍ദ്ദേശം നല്‍കുന്നു. പന്ത് വലയിലാക്കിയ ജസീറ മുന്‍നിരക്കാരന്‍ മുബാറക് ബോസുഫ ഓഫ്‌സൈഡാണെന്ന് വീഡിയോ റഫറി വിധിക്കുന്നു…. ആശ്വാസത്തില്‍ റയല്‍ ക്യാമ്പ്. അതിനിടെ ജസീറ കാവല്‍ക്കാരന്‍ അലി കാഷിഫി പരുക്കുമായി മടങ്ങുന്നു. റയല്‍ തല ഉയര്‍ത്തുന്നു. പകരക്കാരനായ ഗോള്‍ക്കീപ്പര്‍ ഖാലിദ് സീനാനിയെ നിശ്ചലനാക്കി 53-ാം മിനുട്ടില്‍ തട്ടുതകര്‍പ്പന്‍ കൃസ്റ്റ്യാനോ ഗോള്‍. റയല്‍ ക്യാമ്പില്‍ അത് വെളിച്ചമായി. പത്ത് തവണ തുറന്ന അവസരങ്ങള്‍ തുലച്ച കരീം ബെന്‍സേമയെ മാറ്റി വെയില്‍സിന്റെ സൂപ്പര്‍ താരം ഗാരത് ബെയ്ല്‍ കയ്യടികളുടെ അകമ്പടിയില്‍ മൈതാനത്തേക്ക്. ആദ്യ മിനുട്ടില്‍ തന്നെ മാര്‍സിലോ നല്‍കിയ പാസില്‍ സുന്ദരമായ ഗോള്‍.
റയലിന് ലീഡ്… ശേഷിക്കുന്ന സമയത്ത് കണ്ടത് റയലിന്റെ മാച്ച് പ്രാക്ടീസ്… 93 മിനുട്ട് പിന്നിട്ട് റഫറി സാന്‍ഡ്രോ റിച്ചി ലോംഗ് വിസിലൂതുമ്പോള്‍ ആശ്വാസത്തോടെ റയല്‍ ക്യമ്പ്… അന്ധാളിപ്പോടെ അല്‍ജസീറ ക്യാമ്പും സ്‌റ്റേഡിയവും….സംഭവബഹുലമായിരുന്നു റയലിന്റെ 2-1 ജയം. സ്പാനിഷ് ലാലീഗ കിരീടവും യുവേഫ ചാമ്പ്യന്‍സ് ലീഗ് കിരീടവും സ്വന്തമാക്കിയ സംഘം ഇത്തരത്തില്‍ കളിച്ചാല്‍ ഇത്തവണ ഒരു കിരീടവും അവര്‍ക്ക് ലഭിക്കില്ല എന്നതിന്റെ ശക്തമായ തെളിവായിരുന്നു സായിദ് സ്‌പോര്‍ട്‌സ് സിറ്റി സ്‌റ്റേഡിയത്തിലെ അവരുടെ പ്രകടനം. നാണക്കേടിന്റെ തിരുമുറ്റത്തായിരുന്നു പലപ്പോഴും ടീം. കാസിമിറോ നയിച്ച പ്രതിരോധത്തിലെ രജതരേഖ പതിനെട്ടുകാരനായ പുത്തന്‍ താരം അഷ്‌റഫ് ഹക്കീമി മാത്രം. വിംഗുകളിലൂടെ കുതികുതിക്കുന്ന ഈ ചെറുപ്പക്കാരന്‍ നല്‍കിയ ഊര്‍ജ്ജമില്ലായിരുന്നെങ്കില്‍ താളമില്ലാത്ത മധ്യനിരയുടെ കഥയും കഴിയുമായിരുന്നു. കളിയിലെ കേമനായി തെരഞ്ഞെടുക്കപ്പെട്ട ലുക്കാ മോഡ്രിച്ച് മാത്രമാണ് മല്‍സരത്തെ ഗൗരവത്തില്‍ കണ്ടത്. ബാലന്‍ഡിയോര്‍ ജേതാവ് റൊണാള്‍ഡോയെ ജസീറയുടെ രണ്ടും മൂന്നും പേര്‍ ചേര്‍ന്ന് മാര്‍ക്ക് ചെയ്തപ്പോള്‍ കരീം ബെന്‍സേമയെന്ന ഫ്രഞ്ചുകാരന്‍ വേഗതയില്‍ ശക്തനായി, ഫീനിഷിംഗില്‍ വട്ടപ്പൂജ്വുവുമായി.
രണ്ട് പകുതികളിലായി ഗോള്‍ക്കീപ്പറെ മാത്രം മുന്നില്‍ നിര്‍ത്തി ബെന്‍സീമയുടെ പലഷോട്ടുകളും പുറത്തായി. രണ്ട് തവണ ക്രോസ് ബാറും വില്ലനായി. പകരമിറങ്ങിയ ബെയിലാവട്ടെ പത്ത് മിനുട്ടിനിടെ ഒരു ഗോളും, ഒരു അക്രോബാറ്റിക് ഷോട്ടുമായി കാണികളെ കയ്യിലെടുക്കുകയും ചെയ്തു. പോരാട്ടത്തിലെ ഹീറോ യു.എ.ഇ ദേശീയ ടീമിന്റെ ഗോള്‍ക്കീപ്പറായ കാഷിഫി തന്നെയായിരുന്നു.
ആദ്യ മിനുട്ട് മുതല്‍ ടീമിന്റെ കപ്പിത്താന്‍ കൂടിയായ കാഷിഫിക്ക് പിടിപ്പത് ജോലിയായിരുന്നു. കൃസ്റ്റ്യാനോയും നാച്ചോയും ബെന്‍സേമയും മാറി മാറി കയറി വന്നപ്പോള്‍ പന്ത് ജസീറ ബോക്‌സില്‍ തന്നെയായിരുന്നു. ഇരുപത്തിമൂന്നാം മിനുട്ടില്‍ ബെന്‍സേമയുടെ ഹെഡര്‍ പോസ്റ്റില്‍ കയറിയിരുന്നു. പക്ഷേ റഫറി അനുവദിച്ചില്ല. പിറകെ നാച്ചോയുടെ ക്രോസിന് തല വെച്ച് കാസിമിറോ കാഷിഫിയെ പരാജിതനാക്കി. പക്ഷേ ജസീറ താരങ്ങള്‍ ഫൗളിന് പരാതിപ്പെട്ടപ്പോള്‍ റഫറി വീഡിയോ റഫറലിലേക്കു പോയി.
ഗോള്‍ അംഗീരിച്ചില്ല. പിറകെയായിരുന്നു ബ്രസീലുകാരനായ റൊമാരിഞ്ഞോയുടെ ഗോള്‍ വന്നതും റയല്‍ ഞെട്ടിയതും. അത് വരെയും സ്വന്തം ഗോള്‍മുഖം വിട്ട് മല്‍സരം ആസ്വദിക്കുകയായിരുന്നു കീലര്‍ നവാസ്. പെട്ടെന്നുള്ള പ്രത്യാക്രമണത്തില്‍ റയല്‍ ഡിഫന്‍സും വിറച്ചു. രണ്ട് പേരെ മറികടന്നുള്ള ബ്രസീലുകാരന്റെ ഷോട്ട് വലയില്‍ കയറി. ഞെട്ടിത്തരിച്ചു സ്‌റ്റേഡിയം. ആഹ്ലാദം അല്‍പ്പമധികം ദീര്‍ഘിച്ചു. ഒന്നാം പകുതിയില്‍ ജസീറക്ക് ലീഡ്,1-0…!രണ്ടാം പകുതി ആരംഭിച്ചതും അവിശ്വസനീയതയുടെ ആരവം… സ്‌റ്റേഡിയത്തിലെ 36,650 പേരും ഇരിപ്പിടത്തില്‍ നിന്നും എഴുന്നേറ്റു. ഈ കാണുന്നത് സത്യമാണോ… വീണ്ടും കീലര്‍ നവാസ് പരാജിതനായിരിക്കുന്നു. പ്രത്യാക്രമണത്തിനിടെ മുബാറക് ബോസുഫ ഓഫ്‌സൈഡായിരുന്നുവെന്നോ എന്നറിയാന്‍ വീണ്ടും വീഡിയോ ആശ്രയം… റഫറിയുടെ സംശയം സത്യമായിരുന്നു. റയല്‍ നെടുവീര്‍പ്പിട്ടു. കാലിലെ വേദനയില്‍ കാശിഫി തൊട്ടുപിറകെ മടങ്ങി. ആ പിന്‍മാറ്റമായിരുന്നു റയലിന്റെ പ്രതീക്ഷ.
പിറകെ സ്വതസിദ്ധമായ ക്ലീന്‍ ഷോട്ട് റൊണാള്‍ഡോ ഗോള്‍. സമനിലക്ക് ശേഷവും കളി ജസീറ ഹാഫില്‍ തന്നെ. ഒറ്റപ്പെട്ട് നടക്കുന്ന പ്രത്യാക്രമണത്തില്‍ മാത്രമായിരുന്നു ആതിഥേയര്‍. മാര്‍ക്കോ അസന്‍സിയോ എന്ന സ്പാനിഷ് യുവതാരം നാച്ചോക്ക് പകരം വരുന്നു. റയല്‍ നീക്കങ്ങള്‍ക്ക് വേഗത കൈവരുന്നു. ബെന്‍സേമയെ തിരിച്ചുവിളിച്ച് പകരം ഗാരത്ത് ബെയിലിനെയും സിസു ഇറക്കുന്നു.
പിറകെ വിജയ ഗോള്‍… പിറകെ ലോംഗ് വിസിലും. ഇത്രയും അദ്ധ്വാനം റയല്‍ പ്രതീക്ഷിച്ചിരുന്നില്ല. അനായാസം ജയിക്കാമെന്ന് കരുതിയ പോരാട്ടം ആവേശകരമാക്കിയ ജസീറക്ക് നിലക്കാത്ത കൈയ്യടികള്‍. നാളെയാണ് കലാശം. റയലിന്റെ പ്രതിയോഗികള്‍ ബ്രസീലുകാരായ ഗുമിറസ്. കപ്പ് നിലനിര്‍ത്താനായാല്‍ ഫിഫ ക്ലബ് ലോകകപ്പ് നിലനിര്‍ത്തുന്ന ആദ്യ യൂറോപ്യന്‍ ക്ലബ് എന്ന ബഹുമതി റയലിന് നേടാം. പക്ഷേ ഈ ഫോമില്‍ അത് എളുപ്പമല്ല.

Continue Reading
Advertisement
Click to comment

Leave a Reply

Your email address will not be published. Required fields are marked *

kerala

വീണ്ടും ഉയര്‍ന്ന് സ്വര്‍ണവില; പവന് 160 രൂപ വര്‍ധിച്ചു

ഇന്ന് 53,120 രൂപയാണ് ഒരു പവന്‍ സ്വര്‍ണത്തിന്റെ വില.

Published

on

സംസ്ഥാനത്ത് വീണ്ടും സ്വര്‍ണവില വീണ്ടും കൂടി. പവന് 160 രൂപ വര്‍ധിച്ചതോടെ സ്വര്‍ണവില 53000 കടന്നു. ഇന്ന് 53,120 രൂപയാണ് ഒരു പവന്‍ സ്വര്‍ണത്തിന്റെ വില. ഗ്രാമിന് 20 രൂപയാണ് വര്‍ധിച്ചത്. 6640 രൂപയാണ് ഒരു ഗ്രാം സ്വര്‍ണത്തിന്റെ വില.

കഴിഞ്ഞ മാസം 20ന് 55,120 രൂപയായി ഉയര്‍ന്ന് സ്വര്‍ണവില പുതിയ ഉയരം കുറിച്ചിരുന്നു. തുടര്‍ന്ന് നാലുദിവസത്തിനിടെ പവന് രണ്ടായിരം രൂപ കുറഞ്ഞ ശേഷം ഏറിയും കുറഞ്ഞും നില്‍ക്കുകയാണ് സ്വര്‍ണവില. ഓഹരി വിപണിയിലെയും അന്താരാഷ്ട്ര വിപണിയിലെയും ചലനങ്ങളാണ് സ്വര്‍ണവിലയില്‍ പ്രതിഫലിക്കുന്നത്.

Continue Reading

kerala

സംസ്ഥാനത്ത് പച്ചക്കറിക്കും മീനിനും തീവില

കടുത്ത ചൂടും സമയം തെറ്റിയുള്ള മഴയും കാരണം തമിഴ്നാട്ടില്‍ നിന്നുള്ള വരവ് കുറഞ്ഞതാണ് പച്ചക്കറിയുടെ വില ഉയരാന്‍ കാരണമെന്ന് കച്ചവടക്കാര്‍ പറയുന്നു.

Published

on

കുടുംബ ബജറ്റിനെ താളംതെറ്റിച്ച് സംസ്ഥാനത്ത് പച്ചക്കറിയുടെയും മീനിന്റെയും വില കുതിക്കുന്നു. കടുത്ത ചൂടും സമയം തെറ്റിയുള്ള മഴയും കാരണം തമിഴ്നാട്ടില്‍ നിന്നുള്ള വരവ് കുറഞ്ഞതാണ് പച്ചക്കറിയുടെ വില ഉയരാന്‍ കാരണമെന്ന് കച്ചവടക്കാര്‍ പറയുന്നു. ട്രോളിങ് നിരോധനം കാരണം മത്സ്യലഭ്യത കുറഞ്ഞതാണ് മീനിന്റെ വില വര്‍ധിക്കാന്‍ കാരണം.

തക്കാളിയുടെ ചില്ലറവില കിലോഗ്രാമിന് നൂറ് രൂപയായിരിക്കുകയാണ്. കറികളില്‍ മലയാളികള്‍ പ്രധാനമായി ഉപയോഗിക്കുന്ന മുരിങ്ങക്കായയുടെ വില റോക്കറ്റ് പോലെയാണ് കുതിക്കുന്നത്. കിലോഗ്രാമിന് 200 രൂപ വരെയാണ് വില വര്‍ധിച്ചത്. ബീന്‍സ് 140, ഇഞ്ചി 200, കാരറ്റ് 120 എന്നിങ്ങനെയാണ് മറ്റു പച്ചക്കറികളുടെ ഉയര്‍ന്ന വില. തമിഴ്നാട്ടില്‍ നിന്നുള്ള വരവ് കുറഞ്ഞതോടെ ലഭ്യതയില്‍ ഇടിവ് ഉണ്ടായതാണ് വില ഉയരാന്‍ കാരണം.

പച്ചക്കറിയുടെ വില ഉയര്‍ന്നതോടെ മീന്‍ വാങ്ങി കറിവെയ്ക്കാം എന്ന് കരുതി മാര്‍ക്കറ്റില്‍ പോയാലും കണക്കുകൂട്ടലുകള്‍ തെറ്റും. ജനപ്രിയ മീനായ ചാളയ്ക്ക് കിലോഗ്രാമിന് 300 മുതല്‍ 400 രൂപ വരെയാണ് വില. സാധാരണ നൂറ് രൂപയോടടുപ്പിച്ചാണ് ഇതിന്റെ വില വരാറ്. 52 ദിവസത്തെ ട്രോളിങ് നിരോധനമാണ് മീന്‍ വില കുതിച്ച് ഉയരാന്‍ കാരണം. ആവശ്യം നേരിടാന്‍ തൂത്തുക്കുടിയില്‍ നിന്നും മറ്റും മീന്‍ എത്തിക്കാനാണ് മത്സ്യക്കച്ചവടക്കാര്‍ ശ്രമിക്കുന്നത്.

Continue Reading

Books

വായന ദിന സന്ദേശവുമായി സയ്യിദ് സാദിഖലി ശിഹാബ് തങ്ങള്‍

വായനയുടെ നേട്ടങ്ങളും വായന സംസ്‌കാരം സമൂഹത്തില്‍ ചെലുത്തുന്ന സ്വാധീനത്തെയും കുറിച്ച് പറഞ്ഞ് തുടങ്ങിയ ഫേസ്ബുക്ക് കുറിപ്പ് പുസ്തകങ്ങളെ ഉറ്റ ചങ്ങാതിമാരാക്കി മാറ്റണമെന്ന് പറഞ്ഞാണ് അവസാനിക്കുന്നത്.

Published

on

വായന ദിനത്തില്‍ സമൂഹമാധ്യമത്തില്‍ വായന സന്ദേശം പങ്കുവെച്ച് മുസ്‌ലിം ലീഗ് സംസ്ഥാന പ്രസിഡന്റ് സയ്യിദ് സാദിഖലി ശിഹാബ് തങ്ങള്‍. വായനയുടെ നേട്ടങ്ങളും വായന സംസ്‌കാരം സമൂഹത്തില്‍ ചെലുത്തുന്ന സ്വാധീനത്തെയും കുറിച്ച് പറഞ്ഞ് തുടങ്ങിയ ഫേസ്ബുക്ക് കുറിപ്പ് പുസ്തകങ്ങളെ ഉറ്റ ചങ്ങാതിമാരാക്കി മാറ്റണമെന്ന് പറഞ്ഞാണ് അവസാനിക്കുന്നത്.

വിവിധ മതവിശ്വാസികളും മതരഹിതരും രാഷ്ട്രീയപരമായി വ്യത്യസ്ത ചേരികളില്‍ നിലയുറപ്പിച്ചവരുമായ വ്യക്തികള്‍ക്ക് ഒന്നിച്ചിരിക്കാന്‍ കഴിയുന്ന മതേതര തുരുത്തുകളാണ് നമ്മുടെ വായനശാലകളെന്ന് പോസ്റ്റില്‍ പറയുന്നു.

ഫേസ്ബുക്ക്‌ പോസ്റ്റിന്റെ പൂര്‍ണ്ണരൂപം

ജീവിത യാത്രയില്‍ ഇരുട്ടകറ്റാന്‍ നമ്മെ സഹായിക്കുന്ന ഊന്നുവടികളാണ് പുസ്തകങ്ങള്‍. ലോകത്തിന്റെ ചിന്താഗതികള്‍ മാറ്റിമറിച്ചതില്‍ പുസ്തകങ്ങള്‍ക്ക് വലിയ പങ്കുണ്ട്. ചിരിപ്പിക്കാനും ചിന്തിപ്പിക്കാനും കരയിപ്പിക്കാനും കര്‍മോത്സകരാകാനുമുള്ള കരുത്തും ഉത്തമഗ്രന്ഥങ്ങള്‍ക്കുണ്ട്.

മണ്‍മറഞ്ഞ എഴുത്തുകാരും ദാര്‍ശനികരുമായ മഹാപ്രതിഭകളുടെ ചിന്തകളും സ്വപ്നങ്ങളും എന്താണെന്നറിയാന്‍ വായന മാത്രമാണ് കരണീയം.

മരണ ശേഷം ഒരാളെ ഓര്‍ക്കാന്‍ ഒന്നുകില്‍ പുസ്തകം രചിക്കണം, അല്ലെങ്കില്‍ മറ്റുള്ളവര്‍ക്ക് എഴുതാന്‍ പാകത്തില്‍ ജീവിക്കണം എന്ന സന്ദേശവും കൂടിയാണ് ഗ്രന്ഥങ്ങള്‍ നമ്മോട് ആവശ്യപ്പെടുന്നത്.

വായനശാലകള്‍ സര്‍വകലാശാലകള്‍ക്ക് തുല്യം എന്നാണ് തോമസ് കാര്‍ലൈന്‍ അഭിപ്രായപെട്ടത്. ലോകത്ത് വായനശാലകളുടെ കണക്കെടുപ്പില്‍ കേരളം ഏറെ മുന്‍പന്തിയിലാണ്. നാടാകെ ഗ്രന്ഥശാലകള്‍ സ്ഥാപിക്കാനും വായനയുടെ സംസ്‌കാരം പകരാനും ഓടി നടന്ന പി.എന്‍. പണിക്കരുടെ സേവനങ്ങള്‍ അവിസ്മരണീയമാണ്.

വിവിധ മതവിശ്വാസികളും മതരഹിതരും രാഷ്ട്രീയപരമായി വ്യത്യസ്ത ചേരികളില്‍ നിലയുറപ്പിച്ചവരുമായ വ്യക്തികള്‍ക്ക് ഒന്നിച്ചിരിക്കാന്‍ കഴിയുന്ന മതേതര തുരുത്തുകളാണ് നമ്മുടെ വായനശാലകള്‍.

ശ്വാസം നിലച്ചുപോകാതെ വയനാശാലകളെ പരിപോഷിപ്പിക്കേണ്ടത് പൊതു അജണ്ടയായി മാറണം. ലൈബ്രേറിയന്മാരുടെ തസ്തിക നികത്താന്‍ കഴിയാത്തതിനാല്‍ സ്‌കൂളുകളിലെ പുസ്തകങ്ങളില്‍ പൊടിപിടിക്കുമോ എന്ന ആശങ്ക നിലവിലുള്ളതായി മാധ്യമങ്ങള്‍ റിപ്പോര്‍ട്ട് ചെയ്തത് ഗൗരവതരമാണ്.

വായന മരിക്കുന്നില്ല മറിച്ച് കടം കൊടുക്കേണ്ടി വരുമോയെന്നും മോഷണം പോകുമോ എന്നുമുള്ള ആശങ്കകള്‍ ഇല്ലാതെയും ഭാരം ചുമക്കേണ്ടതില്ല എന്ന സൗകര്യം ഉള്ളതിനാലും ഇ ബുക്കുകളിലേക്കുള്ള ഗതിമാറ്റമാണ് നടക്കുന്നത്.

അണയാ വിളക്കുകളായ പുസ്തകങ്ങളെ

ഉറ്റ ചങ്ങാതിമാരാക്കി മാറ്റാം.

 

Continue Reading

Trending