സോള്‍: ഉത്തര കൊറിയന്‍ നേതാവ് കിം ജോങ് ഉന്‍ കോമയില്‍ ആണെന്നും, അതല്ല മരിച്ചതാണെന്നുമുള്ള ഊഹാപോഹങ്ങള്‍ പ്രചരിക്കുന്നതിനിടെ അദ്ദേഹം യോഗത്തില്‍ പങ്കെടുക്കുന്ന ചിത്രം പുറത്തുവിട്ട് കൊറിയന്‍ വാര്‍ത്താ ഏജന്‍സി. കൊറിയന്‍ വര്‍ക്കേഴ്‌സ് പാര്‍ട്ടിയുടെ ഒരു ഉന്നതതല യോഗത്തില്‍ പങ്കെടുക്കുന്ന കിം ജോങിന്റെ ചിത്രമാണ് ഇപ്പോള്‍ പുറത്തുവന്നിരിക്കുന്നത്.

രാജ്യത്ത് കൊവിഡിനെ പ്രതിരോധിക്കുന്നത് സംബന്ധിച്ച ജാഗ്രതാ നിര്‍ദേശങ്ങളും മുന്നറിയിപ്പുകളും നല്‍കി യോഗത്തിലിരിക്കുന്ന പ്രസിഡന്റിനെയാണ് മാധ്യമങ്ങള്‍ അവതരിപ്പിച്ചിരിക്കുന്നത്. ഭരണഭാരം കുറയ്ക്കാന്‍ സഹോദരി കിം യോ ജോങ്ങിന് ചില അധികാരങ്ങള്‍ നല്‍കിയിട്ടുണ്ടെന്ന വാര്‍ത്തകള്‍ നേരത്തെ പുറത്ത് വന്നിരുന്നു. ഇതിന് പിന്നാലെയാണ് ഊഹാപോഹങ്ങള്‍ കനത്തത്. ഇതിനിടിയിലാണ് യോഗത്തില്‍ പങ്കെടുക്കുന്ന ആരോഗ്യവാനായ കിമ്മിന്റെ ചിത്രം പുറത്തുവന്നിരിക്കുന്നത്. വെളുത്ത സ്യൂട്ട് ധരിച്ച കിം യോഗത്തെ അഭിസംബോധന ചെയ്യുന്നത് ചിത്രങ്ങളില്‍ കാണാം.

പൊതുവേദികളില്‍ ഏറെക്കാലമായി കാണാത്തതിനെ തുടര്‍ന്ന് കിം ജോങ് ഉന്‍ രോഗബാധിതനാണെന്ന് ഏപ്രിലില്‍ റിപ്പോര്‍ട്ടുകളുണ്ടായിരുന്നു. കിം ഹൃദയശസ്ത്രക്രിയയ്ക്ക് വിധേയനായതായും വാര്‍ത്തകള്‍ വന്നു. മേയ് രണ്ടിന് പ്യോങ് യാങ്ങില്‍ ഒരു രാസവസ്തുനിര്‍മാണശാല അദ്ദേഹം ഉദ്ഘാടനം ചെയ്യുന്ന ചിത്രം ഉത്തരകൊറിയന്‍ വാര്‍ത്താ ഏജന്‍സിയായ കെസിഎന്‍എ പുറത്തുവിട്ടിരുന്നു. രാജ്യത്തെ ഭക്ഷ്യക്ഷാമം കുറയ്ക്കാന്‍ വളര്‍ത്തുപട്ടികളെ ഇറച്ചിക്കായി നല്‍കണമെന്ന് കിം ഉത്തരവിട്ടതായി കഴിഞ്ഞ ദിവസങ്ങളില്‍ വാര്‍ത്ത വന്നിരുന്നു.