ചെന്നൈ: തമിഴ് സിനിമയുടെ തലൈവര് രജനീകാന്ത് ഇന്ന് 75-ാം പിറന്നാള് ആഘോഷിക്കുന്നു. 50 വര്ഷം മുമ്പ് പുതുമുഖനായെത്തി തമിഴ് സിനിമയുടെ മുഖമായി മാറിയ താരം, പിന്നീട് ആരാധകരുടെ മനസ്സിലെ സൂപ്പര് സ്റ്റാറും തമിഴ്നാടിന്റെ തലൈവറുമായി ഉയര്ന്നു. ഡിസംബര് 12ന് പിറന്നാള് ആഘോഷിക്കുന്ന രജനീകാന്തിനെ ലോകമെമ്പാടുമുള്ള ആരാധകര് ആശംസകളാല് മൂടുകയാണ്.
തമിഴ്നാട്ടില് ഏറ്റവും വലിയ ആരാധക ശക്തിയുള്ള താരങ്ങളില് മുന്പന്തിയിലുള്ള രജനീകാന്തിന് മുഖ്യമന്ത്രി എം. കെ. സ്റ്റാലിന് അടക്കമുള്ള പ്രമുഖര് ആശംസ അറിയിച്ചു. എന്നാല് സോഷ്യല് മീഡിയയില് ഏറ്റവും കൂടുതല് ശ്രദ്ധ നേടിയത് നടന് ധനുഷിന്റെ കുറിപ്പാണ്. ”ജന്മദിനാശംസകള് തലൈവ” എന്ന കുറിപ്പോടെയാണ് ധനുഷ് ആശംസ അറിയിച്ചു. രജനിയുടെ ഏറ്റവും വലിയ ആരാധകനാണ് താനെന്നും അദ്ദേഹം പലവട്ടം പറഞ്ഞിട്ടുണ്ട്. രജനീകാന്തിന്റെ മകള് സൗന്ദര്യയുടെ മുന് ഭര്ത്താവുമാണ് ധനുഷ്.
പിറന്നാള് ആഘോഷങ്ങളുടെ ഭാഗമായി രജനീകാന്തിന്റെ സൂപ്പര്ഹിറ്റ് ചിത്രം പടയപ്പ റീ-റിലീസ് ചെയ്യുമെന്ന് സൗന്ദര്യ രജനീകാന്ത് സോഷ്യല് മീഡിയയില് അറിയിച്ചു. ”നമ്മുടെ തലൈവറിന്റെ അതുല്യമായ ആധിപത്യത്തിന്റെ 50 വര്ഷങ്ങള്… ലോകം തലൈവറെ ആഘോഷിക്കുമ്പോള് പടയപ്പ എന്ന പ്രതിഭാസത്തെ വീണ്ടും പ്രേക്ഷകര്ക്ക് മുന്നിലെത്തിക്കുന്നത് അഭിമാനമാണ്,” എന്നാണ് സൗന്ദര്യയുടെ കുറിപ്പ്.