Connect with us

columns

ജോഡോ യാത്ര മലപ്പുറം തൊടുമ്പോള്‍

ബ്രിട്ടീഷ് വിരുദ്ധ പോരാട്ടത്തിന്റെ രണസ്മരണകള്‍ തുടിച്ചുനില്‍ക്കുന്ന മലപ്പുറം മണ്ണില്‍ ചവിട്ടിയുള്ള രാഹുല്‍ഗാന്ധിയുടെ യാത്രക്ക് രാഷ്ട്രീയവും ചരിത്രപരവും സാംസ്‌കാരികവുമായ മാനങ്ങളേറെയുണ്ട്.

Published

on

പി. അബ്ദുല്‍ ഹമീദ് എം.എല്‍.എ

മതേതര ഭാരതത്തിന്റെ പ്രാര്‍ഥനയും പിന്തുണയുമായി രാഹുല്‍ ഗാന്ധി ചുവട്‌വെക്കുകയാണ്. വെറുപ്പിന്റെയും വിദ്വേഷത്തിന്റെയും ഛിദ്രശക്തികളില്‍നിന്ന് നാടിനെ മോചിപ്പിക്കാനുള്ള പ്രയാണമാണിത്. രണ്ട് നൂറ്റാണ്ട് നീണ്ട ബ്രിട്ടീഷ് വാഴ്ചയില്‍നിന്ന് സ്വാതന്ത്ര്യവും അനന്തരം അഭിമാനകരമായ വളര്‍ച്ചയും നേട്ടങ്ങളും സമ്മാനിച്ച കുടുംബത്തിന്റെ പിന്മുറക്കാരന്‍ എന്ന നിലയില്‍ രാഹുല്‍ ഏറ്റെടുത്ത ദൗത്യം ലക്ഷ്യം കാണാതിരിക്കില്ല. ജോഡോ യാത്ര ഇന്ന് മലപ്പുറത്തിന്റെ മണ്ണിലേക്ക് പ്രവേശിക്കുകയാണ്.

ബ്രിട്ടീഷ് വിരുദ്ധ പോരാട്ടത്തിന്റെ രണസ്മരണകള്‍ തുടിച്ചുനില്‍ക്കുന്ന മലപ്പുറം മണ്ണില്‍ ചവിട്ടിയുള്ള രാഹുല്‍ഗാന്ധിയുടെ യാത്രക്ക് രാഷ്ട്രീയവും ചരിത്രപരവും സാംസ്‌കാരികവുമായ മാനങ്ങളേറെയുണ്ട്. ഇന്ത്യനധിനിവേശക്കാലത്ത് ബ്രിട്ടന്‍ നേരിട്ട അതിശക്തമായ ചെറുത്തു നില്‍പെന്ന് ചരിത്രംകുറിച്ചുവെച്ച 1921 ലെ പോരാട്ടത്തിന്റെ ഓര്‍മകള്‍ ജ്വലിക്കുന്ന ഭൂമിയാണ് മലപ്പുറം. മമ്പുറം തങ്ങള്‍, ഉമര്‍ ഖാസി, ആലി മുസ്‌ല്യാര്‍, വാരിയംകുന്നത്ത് കുഞ്ഞഹമ്മദ് ഹാജി എം.പി നാരായണമേനോന്‍, കട്ടിലശേരി മുഹമ്മദ് മുസ്‌ല്യാര്‍ തുടങ്ങി എത്രയോ ധീരന്‍മാരായ രാജ്യസ്‌നേഹികളുടെ വീര്യ കൃത്യങ്ങള്‍ സദാസ്മരിക്കപ്പെടുന്ന ദേശമാണിത്. ഐ.സി.എച്ച്.ആറിന്റെ കാര്‍മികത്വത്തില്‍ സംഘ്പരിവാര്‍ ഭരണകൂടം പുതുതായി രചിച്ച രക്തസാക്ഷി നാമ കോശത്തില്‍ ഉള്‍പ്പെടാതെപോയ അസംഖ്യം ധീര ദേശാഭിമാനികളുടെ ഇതിഹാസ സമാനമായ പോരാട്ടവീര്യത്തിന്റെ കഥ പറയുന്ന നാട്. പിറന്ന നാടിന് വേണ്ടി ജീവത്യാഗം ചെയ്തവരുടെ ഓര്‍മകള്‍ രാഹുല്‍ഗാന്ധിയുടെ ഓരോ ചുവടുവെപ്പിനും കരുത്തേകും. ജോഡോ യാത്രയുടെ സന്ദേശത്തെ മലപ്പുറം ഏറ്റെടുക്കുന്നത് അത്തരം ഓര്‍മകളുടെ കടലിരമ്പത്തിലായിരിക്കും. ഭരണകൂടത്തിന്റെ രക്തസാക്ഷിപ്പട്ടികയില്‍ ഇടം ലഭിക്കാതെപോയ മലബാര്‍ സമര പോരാളികളുടെ മഹത്വത്തിന്റെ മാറ്റ് വര്‍ധിച്ചിരിക്കുകയാണ്. സ്വന്തം കാല്‍ പാദങ്ങളൂന്നാന്‍ മണ്ണിലൊത്തിരി ഇടംപോലും നിങ്ങള്‍ക്ക് നിഷേധിക്കുകയാണെന്ന് പ്രഖ്യാപിക്കുന്ന ഫാഷിസ്റ്റ് ഭരണകൂടം ചുട്ടെടുക്കുന്ന പൗരത്വ നിയമ ഭേദഗതിക്കെതിരായ പ്രക്ഷോഭത്തിന്റെ സിരാ കേന്ദ്രം കൂടിയാണ് മലപ്പുറം.

മതേതര ബോധത്തെയും ആധുനിക രാഷ്ട്ര മൂല്യങ്ങളെയും പ്രാണനെപ്പോലെ പ്രണയിക്കാന്‍ മലപ്പുറത്തിന് ലഭിച്ചൊരു ശിക്ഷണമുണ്ട്. ദുരിതവും മാരക രോഗങ്ങളും ദാരിദ്ര്യവും ചവിട്ടിമെതിച്ച നിരാലംബരായ ഒരു ജനതയെ ഏറ്റവും സംസ്‌കൃതരായ ഒരു മാതൃകാസമൂഹമായി പരിവര്‍ത്തിപ്പിച്ച മഹത്തായൊരു രാഷ്ട്രീയ ദര്‍ശനമായിരുന്നു ഇന്ത്യന്‍ യൂണിയന്‍ മുസ്‌ലിംലീഗ്. ന്യൂനപക്ഷ രാഷ്ട്രീയത്തിന്റെ സര്‍ഗാത്മകമായ ആവിഷ്‌കാരത്തില്‍ വിശ്വാസമര്‍പ്പിച്ച പൂര്‍വിക നേതാക്കളുടെയും തന്റെ മുന്‍ഗാമികളുടെയും വഴിയേയാണ് മലപ്പുറത്തിന്റെ ഹരിത വീഥികളില്‍ രാഹുല്‍ഗാന്ധിയുടെ ത്രിദിന പ്രയാണം നടക്കുന്നത്. മതേതര ജനാധിപത്യ ആശയങ്ങളാല്‍ ബന്ധിതമായ സൗഹൃദവും ഇണക്കവുമാണ് മുസ്‌ലിംലീഗും കോണ്‍ഗ്രസും എല്ലാ കാലത്തും നിലനിര്‍ത്തിയിട്ടുള്ളത്. ന്യൂനപക്ഷ ജനതയുടെമേല്‍ പരിഷ്‌ക്കാരങ്ങളുടെ പേരില്‍ നടക്കുന്ന കൊടിയ ധ്വംസനത്തിനെതിരായ കോണ്‍ഗ്രസ് പാര്‍ട്ടിയുടെ അമരക്കാരന്റെ ചുവടിന് കരുത്തേകാന്‍ മലപ്പുറത്തിന്റെ ധാര്‍മിക പിന്തുണയാണ് പ്രയാണവീഥിയില്‍ ഏറ്റുവാങ്ങാന്‍ പോകുന്നത്.

ഇന്ത്യന്‍ ബഹുസ്വരതയുടെ മുഴുവന്‍ സൗന്ദര്യവും നിറകതിര്‍ ചാര്‍ത്തുന്ന ജില്ലയാണ് മലപ്പുറം. മത ജാതി ഭേദങ്ങള്‍ക്കപ്പുറം മനുഷ്യനെ ഒന്നായി കാണുന്ന നാട്. മാനവിക മൂല്യങ്ങളാല്‍ ഉള്‍ച്ചേര്‍ക്കലിന്റെ സന്ദേശം മുഴങ്ങിക്കേട്ട പ്രദേശം. ശാന്തിയുടെയും സമാധാനത്തിന്റെയും സ്‌നേഹഗീതങ്ങളാല്‍ വെറുപ്പും ഹിംസയും അലിഞ്ഞില്ലാതായതാണ് മലപ്പുറത്തിന്റെ പാരമ്പര്യം. കേരളത്തിലെ പത്താമത്തെ ജില്ലയായി 1969ല്‍ പിറന്നു വീണപ്പോള്‍ മലപ്പുറത്തിനെതിരായി വര്‍ഗീയ വിധ്വംസക ശക്തികള്‍ ഉയര്‍ത്തിവിട്ട വിഷലിപ്തമായ പ്രചാരണ കോലാഹലങ്ങളെ സ്‌നേഹംകൊണ്ട് തോല്‍പിച്ച അനുഭവമുള്ള ജില്ല. തെന്നിന്ത്യയിലെ ക്ഷേത്ര നഗരിയെന്ന് വിശേഷിപ്പിക്കാവുന്ന അങ്ങാടിപ്പുറത്തുണ്ട് ക്ഷേത്രവും മസ്ജിദും തൊട്ടുരുമ്മി നില്‍ക്കുന്ന സൗഹാര്‍ദ്ദത്തിന്റെ കണ്‍കുളിര്‍ക്കുന്ന ദൃശ്യം. മൈത്രിയുടെ ഉജ്വലമായ മാതൃകകളും സ്മരണകളും ഇമ്പമുള്ള ഗീതമായി രാഹുലിന്റെ പദനിസ്വനത്തിലുണ്ടാകും.

ബ്രിട്ടീഷ് ഭരണത്തിന്റെ തടവറയില്‍ രക്തസാക്ഷിയായ ധീര ദേശാഭിമാനി പാണക്കാട് സയ്യിദ് ഹുസൈന്‍ ആറ്റക്കോയ തങ്ങള്‍, മഹാമനീഷികളായ പി.എം.എസ്.എ പൂക്കോയ തങ്ങള്‍, സയ്യിദ് മുഹമ്മദലി ശിഹാബ് തങ്ങള്‍, സയ്യിദ് ഹൈദരലി ശിഹാബ് തങ്ങള്‍ എന്നിവരുടെ കര്‍മഭൂമിയിലേക്കാണ് ഇന്ത്യയുടെ വീണ്ടെടുപ്പിനായുള്ള രാഹുല്‍ഗാന്ധിയുടെ ജോഡോ യാത്ര കടന്നുവരുന്നത്. മലപ്പുറത്തിന്റെ യാത്രാവീഥിയിലുടനീളം പാണക്കാട് സയ്യിദ് പരമ്പര കാഴ്ചവെച്ച സാഹോദര്യത്തിന്റെ പറഞ്ഞാല്‍ തീരാത്ത പെരുമകള്‍ രാഹുല്‍ഗാന്ധിക്ക് മുന്നോട്ട് ഗമിക്കാനുള്ള കരുത്തും പ്രചോദനവുമാകും. വിനയം ലാളിത്യം ശാന്തത സ്‌നേഹം എന്നിവയാല്‍ ഒരു ജനസമൂഹത്തിന്റെ മാനസാന്തരങ്ങളില്‍ പടര്‍ന്നുകയറിയ വികാരമാണ് പാണക്കാട് സയ്യിദ് വംശം. അണമുറിയാത്ത ആ പ്രവാഹത്തിന്റെ തീരത്ത് ആത്മസംയമനത്തോടെ കഴിയുന്ന ഒരു ജനസഞ്ചയമാണ് രാഹുല്‍ഗാന്ധിക്കൊപ്പം അണിചേരാന്‍ കാത്തിരിക്കുന്നത്. ആത്മീയപ്രഭ ചൊരിയുന്ന പണ്ഡിതരുടെയും സ്ഥാപനങ്ങളുടെയും സാന്നിധ്യമേറെയുണ്ട് വഴിത്താരയില്‍. പതിനായിരക്കണക്കിന് പണ്ഡിതരെ പ്രബോധനരംഗത്ത് സമര്‍പ്പിച്ച തെന്നിന്ത്യയിലെ അത്യുന്നത മത കലാലയമായ പട്ടിക്കാട് ജാമിഅ നൂരിയ്യ അറബിക്കോളജ് വഴിയാണ് ജോഡോ കടന്നുപോകുന്നത്. മതേതര നായകന് മഹാ പണ്ഡിതന്‍മാരായ അധ്യാപകരുടെയും നൂറ് കണക്കിന് വിദ്യാര്‍ഥികളുടെയും അനുഗ്രഹാശിസ്സുകള്‍ ഏറ്റുവാങ്ങാനാകും. മതമൗലികവാദത്തെയും തീവ്രവാദ ചിന്തകളെയും വര്‍ഗീയതയെയും പടിയടച്ച് അകറ്റിനിര്‍ത്തിയ മലപ്പുറത്തിന്റെ മഹാമാതൃകയാകട്ടെ രാഹുലിന്റെ ഭാരതമെന്നാണ് ഈ നാടിന്റെ പ്രാര്‍ഥനയും അഭ്യര്‍ഥനയും.

സാഹിത്യ സാംസ്‌കാരിക ചക്രവാളത്തിലും ചെറുതല്ല മലപ്പുറത്തിന്റെ സ്ഥാനം. ഭാഷാ പിതാവ് തുഞ്ചത്ത് എഴുത്തഛന്റെ മണ്ണ്. വള്ളത്തോള്‍, കുട്ടികൃഷ്ണമാരാര്‍, ഇടശ്ശേരി, മേല്‍പത്തൂര്‍, തത്വചിന്താപരമായ വരികളാല്‍ പച്ച മലയാളത്തിന്റെ സൗന്ദര്യം അനാവരണം ചെയ്ത പൂന്താനം, ചെറുകാടും നന്തനാരും ഉറൂബും തൊട്ട് എത്രയോ പ്രതിഭകള്‍ ജീവിതത്തിന്റെ ഉദാത്തമായ ഭാവത്തെ തൂലികത്തുമ്പാല്‍ ധന്യമാക്കിയ സഹിഷ്ണുതയുടെ തീര്‍ഥ തീരത്തേക്കാണ് ജോഡോ ചുവട് വെക്കുന്നത്.

കായിക പാരമ്പര്യത്തിലും മലപ്പുറത്തിന് ദേശാന്തര ഖ്യാതികള്‍ ഒട്ടേറെയുണ്ട്. ഫുട്‌ബോളിന്റെ ഈറ്റില്ലമായാണ് ലോകത്ത് മലപ്പുറം അറിയപ്പെടുന്നത്. സാഹോദര്യത്തിന്റെ ഉത്സവ മേളങ്ങളാണ് നൂറ് കണക്കിന് ഫുട്‌ബോള്‍ ടൂര്‍ണമെന്റുകള്‍. കളിക്കളത്തില്‍ നിന്നുയരുന്ന ഒരുമയുടെ സന്ദേശം തന്നെയാണ് ജോഡോ യാത്ര പറയുന്നതും.

വിദ്യാഭ്യാസ വൈജ്ഞാനിക രംഗത്ത് മലപ്പുറം നടത്തിയ മുന്നേറ്റം ന്യൂനപക്ഷങ്ങളുടെ ജനസംഖ്യാ സാന്ദ്രത ഏറെയുള്ള ഇതര ഇന്ത്യന്‍ പ്രദേശങ്ങള്‍ക്കാകെ മാതൃകയാണ്. കലാപത്തിന്റെ കാര്‍മേഘ പാളികള്‍ പെയ്തിറങ്ങാത്ത ശാന്തതയില്‍ ഒരു സമൂഹത്തിന്റെ വളര്‍ച്ചയിലേക്കുള്ള ജൈത്രയാത്ര വിസ്മയാവഹമാണ്. രാഹുല്‍ ഗാന്ധിയുടെ പ്രസംഗം ക്ഷണനേരം കൊണ്ട് മലയാളീകരിച്ച് സദസ്സിനെ കോരിത്തരിപ്പിച്ച കരുവാരക്കുണ്ടിലെ പെണ്‍കുട്ടി ഒരു പ്രതീകമാണ്. ജോഡോയുടെ പ്രയാണത്തിന് പ്രചോദനമേകുന്ന ആവേശമായി മലപ്പുറത്തെ മുന്നേറ്റം മാറുമെന്ന പ്രത്യാശയോടെയാണ് ഈ മതേതര ഭൂമിക ജോഡോ യാത്രയെ വരവേല്‍ക്കുന്നത്.

Continue Reading
Advertisement
Click to comment

Leave a Reply

Your email address will not be published. Required fields are marked *

columns

വിദ്യാഭ്യാസ പരിഷ്‌കരണത്തിന്റെ പിന്നാമ്പുറം

ഇനി പാഠ്യപദ്ധതി ചട്ടക്കൂടുമായും മറ്റും ബന്ധപ്പെട്ടു നടന്നു കൊണ്ടിരിക്കുന്ന ജനകീയ ചര്‍ച്ചകളുടെ രീതി ശ്രദ്ധിക്കുക. കേരളപാഠ്യപദ്ധതി ചട്ടക്കൂടിന്റെ കോപ്പി സ്‌കൂളുകളില്‍ ചര്‍ച്ചയില്‍ പങ്കെടുക്കുന്നവരുടെ കൈകളില്‍ വാട്‌സ് ആപ്പ് മുഖേനയോ മറ്റോ എത്തിക്കുന്നു. അവിടെ നടക്കുന്ന ഗ്രൂപ്പ് ചര്‍ച്ചകളില്‍ പങ്കെടുക്കുന്നവരാവട്ടെ, വിരലിലെണ്ണാവുന്ന രക്ഷിതാക്കളും അധ്യാപകരും മാത്രം. അധ്യാപകര്‍ തന്നെ പുതിയ സമീപനം വേണ്ടത്രെ ഉള്‍കൊള്ളാത്തവരാണെന്നതാണ് അനുഭവം. ചുരുക്കത്തില്‍ സാമൂഹിക ചര്‍ച്ചകള്‍ എന്ന പേരില്‍ ഇപ്പോള്‍ നടന്നുകൊണ്ടിരിക്കുന്നത് വെറും പ്രഹസനമാണ്.

Published

on

റസാഖ് ആദൃശ്ശേരി

കേരളത്തിലെ മത സാമൂഹിക രംഗത്ത് വന്‍ പ്രത്യാഘാതങ്ങള്‍ സൃഷ്ടിക്കുന്ന പരാമര്‍ശങ്ങളാണ് സംസ്ഥാന വിദ്യാഭ്യാസ ഗവേഷണ പരിശീലന സമിതി പുറത്തിറക്കിയ കേരള പാഠ്യപദ്ധതി ചട്ടക്കൂടിലുള്ളത്. ഇതിന്റെ കരട് സ്‌കൂളുകളിലും മറ്റും പൊതു ചര്‍ച്ചക്ക് വിധേയമാക്കിയെങ്കിലും തീരുമാനമാകുന്നതിനു മുമ്പ് തന്നെ ഇതിലെ പല നിര്‍ദേശങ്ങളും ഇടതുപക്ഷ സര്‍ക്കാര്‍ വിദ്യാലയങ്ങളില്‍ നടപ്പാക്കിത്തുടങ്ങിയിട്ടുണ്ട്. കലാലയങ്ങളില്‍ ജെന്‍ഡര്‍ ക്ലബുകള്‍ നടപ്പാക്കാനുള്ള നിര്‍ദ്ദേശം നല്‍കിയത് ഇതിനുള്ള ഉദാഹരണമാണ്. സ്‌കൂളുകളിലും കോളജുകളിലും ‘ലിംഗസമത്വത്തില്‍ അധിഷ്ഠിതമായ ഒരു സമൂഹത്തെ വാര്‍ത്തെടുക്കുക, ലിംഗഭേദമില്ലാതെ വിദ്യാര്‍ത്ഥികള്‍ക്ക് പഠനം, വിനോദം, സ്‌പോര്‍ട്‌സ്, കല, സാഹിത്യം തുടങ്ങിയ മേഖലകളില്‍ തുല്യ പങ്കാളിത്തം ഉറപ്പാക്കുക എന്നിവയാണ് ജെന്‍ഡര്‍ ക്ലബുകളുടെ ലക്ഷ്യമായി പറയുന്നത്. നവംബര്‍ 30 വരെ പരിഷ്‌കരിച്ച കരട് രേഖയെ കുറിച്ച് ജനകീയ ചര്‍ച്ച നടത്തി നിര്‍ദേശങ്ങള്‍ സമര്‍പ്പിക്കാന്‍ സര്‍ക്കാര്‍ തന്നെ സമയം നല്‍കിയിരിക്കെ, ഇതിനു മുമ്പ് തന്നെ പിന്‍വാതില്‍ വഴി നിര്‍ദേശങ്ങള്‍ നടപ്പാക്കുന്നതില്‍ നിന്നും സര്‍ക്കാരിന്റെ ഒളിയജണ്ടകള്‍ വ്യക്തമാണ്.

വിദ്യാഭ്യാസ പരിഷ്‌ക്കരണങ്ങള്‍ ലോകമെങ്ങും ഒട്ടനവധി രാജ്യങ്ങളില്‍ നടക്കുന്ന കാര്യമാണ്. 1990 നു ശേഷമാണ് ഇന്ത്യയില്‍ ഇതിനു തുടക്കം കുറിച്ചത്. അതുവരെ നാം തുടര്‍ന്നു വന്നിരുന്ന സാമ്രാജ്യത്വ വിരുദ്ധ വിദേശനയം ഉപേക്ഷിച്ചു ആഗോളവല്‍ക്കരണ ശക്തികള്‍ക്കായി ഇന്ത്യയുടെ കവാടങ്ങള്‍ തുറന്നു വെച്ചതിനു ശേഷമായിരുന്നു അത്. അമേരിക്കയടക്കമുള്ള ലോകത്തിലെ കുത്തക സാമ്പത്തിക ശക്തികള്‍ ലാഭമുണ്ടാക്കാനും തങ്ങളുടെ വികലമായ ചിന്താധാരകള്‍ നടപ്പിലാക്കാനും വിദ്യാഭ്യാസത്തെ ഉപാധിയാക്കാന്‍ തുടങ്ങിയതോടെ ഈ രംഗത്ത് മൂല്യശോഷണം ആരംഭിക്കുകയായിരുന്നു. തങ്ങളുടെ ഇച്ഛകള്‍ക്കനുകൂലമായ രീതിയില്‍ ലോക ജനതയുടെ ജീവിതത്തെ മാറ്റിപ്പണിയാന്‍ വിവിധ പരിപാടികളാണ് അവര്‍ ആവിഷ്‌കരിച്ചത്. ഇതിനുള്ള എല്ലാ സാമ്പത്തിക സാങ്കേതിക സഹായങ്ങളും നല്‍കാന്‍ ലോകബാങ്ക് തയ്യാറാവുകയും ചെയ്തു. അതോടു കൂടി വിദ്യാഭ്യാസ പരിഷ്‌ക്കരണ പദ്ധതികള്‍ക്ക് വേഗം കൂടി.

ഇന്ത്യയില്‍ പാഠ്യപദ്ധതി പരിഷ്‌കാരങ്ങള്‍ക്ക് തുടക്കമിട്ടത് ബി.ജെ.പി സര്‍ക്കാരായിരുന്നു. ‘ദേശീയപാഠ്യപദ്ധതി ചട്ടക്കൂട് 2000’ എന്ന പേരില്‍ പുറത്തിറക്കിയ രേഖയില്‍ ‘സാമൂഹിക ജഞാനനിര്‍മ്മിതി വാദം’ അടിസ്ഥാന സമീപനമായി ഉയര്‍ത്തിയെങ്കിലും, കാവി വല്‍ക്കരണത്തിനു അവര്‍ പ്രത്യേകം ഊന്നല്‍ നല്‍കി. അടുത്ത തിരഞ്ഞെടുപ്പില്‍ യു.പി.എ സര്‍ക്കാര്‍ അധികാരത്തില്‍ വന്നത്‌കൊണ്ട് അത് നടപ്പിലാക്കാന്‍ ബി.ജെ.പിക്ക് സാധിച്ചില്ല. നരേന്ദ്ര മോദി സര്‍ക്കാര്‍ അധികാരത്തില്‍ വന്നതോടെ ആ ശ്രമങ്ങള്‍ക്ക് വീണ്ടും വേഗതയേറി. വിദ്യാഭ്യാസ മേഖലയെ അധീനതയിലാക്കുന്നതോടെ, അഥവാ കുട്ടികളെ ചെറുപ്പത്തില്‍ തന്നെ പിടിക്കുന്നതിലൂടെ തലമുറകളെ വരുതിയിലാക്കാമെന്ന അധികാര വിദ്യാഭ്യാസതന്ത്രം ബുദ്ധിപൂര്‍വ്വം സംഘ്പരിവാര്‍ നടപ്പിലാക്കി കൊണ്ടിരിക്കുകയാണ്. ബി.ജെ.പി ഭരിക്കുന്ന സംസ്ഥാനങ്ങളില്‍ കാവിയുടെ പ്രത്യയശാസ്ത്രം അതിവിദഗ്ധമായി പാഠപുസ്തകങ്ങളില്‍ കുത്തിനിറച്ചു പിഞ്ചുമനസ്സുകളെ ഹൈന്ദവല്‍ക്കരിക്കാനുള്ള ശ്രമം ആര്‍.എസ്.എസ് തുടങ്ങിയിട്ട് എത്രയോ വര്‍ഷങ്ങളായി. ഭാരതീയ പാരമ്പര്യമെന്ന പേരില്‍ തികച്ചും ഹൈന്ദവമായ ജീവിതരീതി പിന്തുടരാന്‍ വിദ്യാര്‍ത്ഥികളെ നിര്‍ബന്ധിതരാക്കുകയാണ് ഇതിലൂടെ. തങ്ങളുടെ രീതിശാസ്ത്രം ഒഴിച്ച് മറ്റെല്ലാം ഭാരതീയ സംസ്‌കാരത്തിനു വിരുദ്ധവും അതിനാല്‍ വര്‍ജ്യവുമാണെന്നു കുട്ടികളെ പഠിപ്പിക്കുകയും ചെയ്യുന്നതിനു പിന്നില്‍ കൃത്യമായ താല്‍പര്യങ്ങളുണ്ട്. ആര്‍.എസ്.എസിനു വിധേയമാകുന്ന ഒരു സമൂഹ സൃഷ്ടിയും കാവി രാഷ്ട്രീയത്തിന് മാത്രം നിലനില്‍പ്പുള്ള ഒരു വോട്ടു ബാങ്ക് സൃഷ്ടിക്കപ്പെടുകയും ചെയ്യുകയാണ് ഇതിനു പിന്നിലെ ലക്ഷ്യം.

ബി.ജെ.പി സര്‍ക്കാരുകള്‍ വിദ്യാര്‍ത്ഥികളുടെ കുട്ടിക്കാലം എന്ന വൈവിധ്യം നിറഞ്ഞ വിജ്ഞാനവഴികളെ കാവിയുടെ ഏകത്വത്തിലേക്ക്, ഹിന്ദുത്വത്തിന്റെ ഏകശിലാത്മകതയിലേക്ക് നയിക്കുമ്പോള്‍ കേരളം ഭരിക്കുന്ന മാര്‍ക്‌സിസ്റ്റ് സര്‍ക്കാര്‍ മതവിശ്വാസം നിരാകരിക്കുന്ന, ദൈവത്തെ നിഷേധിക്കുന്ന, യുക്തിവാദത്തിന്റെ പ്രചാരകരാകുന്ന ഒരു തലമുറയെ സൃഷ്ടിച്ച് കമ്യൂണിസ്റ്റ് ആശയങ്ങള്‍ക്ക് വളക്കൂറുള്ള നിലം ഒരുക്കാനാണ് ശ്രമിക്കുന്നത്. മാതൃഭാഷാ പഠനത്തിന്റെ പേരില്‍ അറബി, ഉറുദു ഭാഷകളെ തമസ്‌കരിക്കാനുള്ള നീക്കവും സ്‌കൂള്‍ സമയം നേരത്തെയാക്കാനുള്ള നിര്‍ദേശവും എല്ലാം ഇതിന്റെ ഭാഗമാണ്. ശാസ്ത്രസാഹിത്യ പരിഷത്തിന്റെ കാഴ്ചപ്പാടുകളായിരുന്നു ഇടതുപക്ഷ സര്‍ക്കാരുകള്‍ വേദവാക്യമായി പരിഗണിച്ചിരുന്നത്. അവ മതസമൂഹങ്ങളുടെ വിശ്വാസങ്ങളും വീക്ഷണങ്ങളുമായി പല തലങ്ങളിലും ഏറ്റുമുട്ടുന്നവയായിരുന്നു. സി.പി.എം സര്‍ക്കാരുകള്‍ കൊണ്ടുവന്ന പല പാഠ്യപദ്ധതി ചട്ടക്കൂടുകളും നിരീശ്വരവാദ പാഠ്യപദ്ധതികളായത് അങ്ങനെയാണ്.

ഇതില്‍ നിന്നും വ്യത്യസ്ഥമല്ല പിണറായി സര്‍ക്കാറിന്റെ പുതിയ വിദ്യാഭ്യാസനയവും. വിദ്യാലയങ്ങളെ ജെന്‍ഡര്‍ പൊളിറ്റിക്‌സിന്റെ പരീക്ഷണശാലയാക്കാനാണ് ശ്രമം. ‘ലിംഗസമത്വം’ എന്നതാണ് അവര്‍ക്കേറ്റവും ഇഷ്ടപ്പെട്ട വാക്ക്. പ്രതിഷേധങ്ങള്‍ക്കിടയില്‍ ലിംഗസമത്വം നീക്കം ചെയ്ത് ലിംഗനീതി എന്ന പദം ഉള്‍പ്പെടുത്തുമെന്നു ഉറപ്പു നല്‍കിയ മുഖ്യമന്ത്രി ഇപ്പോള്‍ അത് മറന്ന മട്ടാണ്. സമൂഹത്തില്‍ നടമാടുന്ന എല്ലാ വിവേചനങ്ങള്‍ക്കും കാരണം ആണ്‍പെണ്‍ വ്യത്യാസമാണത്രെ! അവര്‍ക്കിടയില്‍ സമത്വം ഉണ്ടാകുന്നതോടെ എല്ലാ പ്രശ്‌നങ്ങളും പരിഹരിക്കപെടുമെന്നാണ് അവര്‍ ഉദ്‌ഘോഷിച്ചു കൊണ്ടിരിക്കുന്നത്. ‘ലിംഗനീതി, ലിംഗസമത്വം, ലിംഗാവബോധം എന്നിവ ഉണ്ടാകാനാവശ്യമായ അംശങ്ങള്‍ പാഠ്യപദ്ധതിയില്‍ വന്‍തോതില്‍ ഉണ്ടാകേണ്ടതുണ്ട്’ എന്നു കേരള പാഠ്യപദ്ധതി ചട്ടക്കൂടുകള്‍ സമൂഹചര്‍ച്ച എന്ന കുറിപ്പിന്റെ ആമുഖത്തില്‍ തന്നെ എഴുതി വെച്ചിരിക്കുന്നു. (2022 പാഠ്യപദ്ധതി ചട്ടക്കൂട്, പേജ് 9 )

എന്നാല്‍ സ്ത്രീ, പുരുഷന്‍ എന്ന സങ്കല്പം തന്നെ ഇല്ലാതാക്കി ലിംഗരാഹിത്യ ബോധം വളര്‍ത്തിയെടുത്ത് ലൈംഗിക അരാജകത്വത്തിലേക്ക് ഒരു സമൂഹത്തെ തള്ളിവിടുകയാണ് ഇതിനു പിന്നിലെ യഥാര്‍ത്ഥ ലക്ഷ്യം. മദ്യവും മയക്കുമരുന്നും സുലഭമാക്കി ചിന്താശേഷിയും പ്രതികരണ ശേഷിയും നഷ്ടപ്പെട്ട ഒരു തലമുറയെ വളര്‍ത്തിയെടുക്കുകയാണ് അവരുടെ ലക്ഷ്യം. കേരളത്തിലെ കോളേജ് ക്യാമ്പസുകളില്‍ എസ്.എഫ്.ഐ ഉയര്‍ത്തിയ മുദ്രാവാക്യങ്ങളും അവര്‍ പ്രദര്‍ശിപ്പിച്ച ഫ്‌ളക്‌സ് ബോര്‍ഡുകളും ഇതിന്റെ തെളിവുകളാണ്. മതത്തിന്റെ അതിര്‍വരമ്പുകളില്‍ നിന്നും വിശ്വാസികളെ പുറത്തു ചാടിക്കാന്‍ ഇതിലൂടെ സാധിക്കുമെന്നു ഇടതു ബുദ്ധിജീവികളില്‍ നിന്നും വിപ്ലവ വിദ്യാര്‍ത്ഥി സംഘടനക്ക് ഉപദേശം കിട്ടിയിട്ടുണ്ടാവാം. ഇരിപ്പിടം, ടോയ്‌ലറ്റുകള്‍, സ്‌പോര്‍ട്‌സ്, കലോല്‍സവങ്ങള്‍, വസ്ത്രങ്ങള്‍ എന്നിവയിലൊന്നും ആണ്‍ പെണ്‍ വ്യത്യാസം ഉണ്ടാകരുതെന്നു നിഷ്‌കര്‍ഷിക്കുന്നതിലൂടെ ആണ്‍ പെണ്‍ സ്വത്വബോധം തകര്‍ക്കുകയാണ് ലക്ഷ്യം. അതിലൂടെ നമ്മുടെ സാമൂഹിക ഘടനക്ക് മാരകമായ പരിക്കേല്‍ക്കുക തന്നെ ചെയ്യും.

ലിംഗത്വം, സ്വവര്‍ഗലൈംഗികത (ഹോമിയോ സെക്ഷ്വാലിറ്റി), പുരുഷ സ്വവര്‍ഗപ്രേമി (ഗേ) , സ്ത്രീ സ്വവര്‍ഗപ്രേമി (ലെസ്ബിയന്‍), ട്രാന്‍സ്‌ജെന്‍ഡര്‍, മിശ്ര ലിംഗര്‍, നിര്‍ലൈംഗികര്‍ തുടങ്ങിയ പദാവലികളെയും വിഭാഗങ്ങളെയും പരിചയപ്പെടുത്തികൊണ്ടു തദ്ദേശസ്വയംഭരണ സ്ഥാപനങ്ങള്‍ക്കായി ഇറക്കിയ കൈപുസ്തകവും, കുടുംബശ്രീയുടെ നേതൃത്വത്തില്‍ ആരംഭിച്ച ജെന്‍ഡര്‍ റിസോഴ്‌സ് സെന്ററുകള്‍ക്ക് നല്‍കിയ പരിശീലന സഹായിയും ഈ ലക്ഷ്യത്തോടെ തന്നെയാണ്. വിവാഹം, കുടുംബം, സ്ത്രീ ജീവിതം എന്നിവയെ പ്രശ്‌നവല്‍ക്കരിച്ചുകൊണ്ട്, ഈ സംവിധാനങ്ങള്‍ തകരുന്നതിലൂടെ മാത്രമെ സ്ത്രീ സമൂഹത്തിനു അന്തസ്സും പുരോഗതിയും ഉണ്ടാവുകയുള്ളുവെന്നാണ് പുസ്തകം പറയുന്നത്. നേരിട്ടു ഇത്തരം കാര്യങ്ങള്‍ പറയുന്നതിനു പകരം ഓരോ പഠിതാവിന്റെയും മനസ്സില്‍ ഈ ചിന്താഗതി ബോധപൂര്‍വ്വം സൃഷ്ടിക്കുകയാണ് ചെയ്യുന്നത്. 2021ല്‍ കുടുംബശ്രീ പുറത്തിറക്കിയ ‘ആരോഗ്യകരമായ ബന്ധങ്ങള്‍ ‘ എന്ന പഠന സഹായിയിലും ഇത് തന്നെയാണ് പ്രതിപാദിക്കുന്നത്. ‘ജെന്‍ഡര്‍ സാമുഹികവല്‍ക്കരണം’ എന്ന മൂന്നാം അധ്യായത്തില്‍, ജെന്‍ഡര്‍ അന്യായമാണെന്നും ഇത് എങ്ങനെ നിര്‍മ്മിക്കപ്പെട്ടുവെന്നും അറിഞ്ഞും അറിയാതെയും നമ്മള്‍ എങ്ങനെയാണ് ഈ പ്രക്രിയയുടെ ഭാഗമായതെന്നു ചിന്തിക്കണമെന്നും അഭിപ്രായപ്പെടുന്നു. വിവാഹവും കുടുംബവും സ്ത്രീയുടെ സ്വാതന്ത്രത്തിനും നീതിക്കും തടസ്സമാണെന്നു ഇതിലെ ഓരോ വരികള്‍ക്കിടയിലും നമുക്ക് വായിക്കാവുന്നതാണ്.

ഈ രീതിയില്‍ വിദ്യാഭ്യാസ സ്ഥാപനങ്ങള്‍, തദ്ദേശ സ്വയംഭരണ സ്ഥാപനങ്ങള്‍, കുടുംബശ്രീ തുടങ്ങിയവയിലൂടെ കേരളീയ സമൂഹത്തിന്റെ കുടുംബ സദാചാര ബോധങ്ങളെ അട്ടിമറിക്കാന്‍ ഇടതു സര്‍ക്കാര്‍ ശ്രമിക്കുകയാണ്. പുരോഗമന നാട്യങ്ങളാണ് അവരെ ഇതിനു പ്രേരിപ്പിക്കുന്നത്. ലിംഗരാഹിത്യമുള്ള ഒരു തലമുറയെ വളര്‍ത്തി കൊണ്ടു വന്നാല്‍ വിവേചനങ്ങള്‍ക്ക് പരിഹാരമാകുമെന്നാണ് അവരുടെ വിശ്വാസം. ലിബറല്‍, നാസ്തിക ബോധങ്ങള്‍ ബഹുഭൂരിപക്ഷം ജനങ്ങളുടെയും മൂല്യങ്ങളെ മാനിക്കാതെ, എതിര്‍പ്പുകളെ വകവെക്കാതെ , ധാര്‍ഷ്ട്യത്തോടെ നടപ്പാക്കാനുള്ള നീക്കമാണിത്.

ഇനി പാഠ്യപദ്ധതി ചട്ടക്കൂടുമായും മറ്റും ബന്ധപ്പെട്ടു നടന്നു കൊണ്ടിരിക്കുന്ന ജനകീയ ചര്‍ച്ചകളുടെ രീതി ശ്രദ്ധിക്കുക. കേരളപാഠ്യപദ്ധതി ചട്ടക്കൂടിന്റെ കോപ്പി സ്‌കൂളുകളില്‍ ചര്‍ച്ചയില്‍ പങ്കെടുക്കുന്നവരുടെ കൈകളില്‍ വാട്‌സ് ആപ്പ് മുഖേനയോ മറ്റോ എത്തിക്കുന്നു. അവിടെ നടക്കുന്ന ഗ്രൂപ്പ് ചര്‍ച്ചകളില്‍ പങ്കെടുക്കുന്നവരാവട്ടെ, വിരലിലെണ്ണാവുന്ന രക്ഷിതാക്കളും അധ്യാപകരും മാത്രം. അധ്യാപകര്‍ തന്നെ പുതിയ സമീപനം വേണ്ടത്രെ ഉള്‍കൊള്ളാത്തവരാണെന്നതാണ് അനുഭവം. ചുരുക്കത്തില്‍ സാമൂഹിക ചര്‍ച്ചകള്‍ എന്ന പേരില്‍ ഇപ്പോള്‍ നടന്നുകൊണ്ടിരിക്കുന്നത് വെറും പ്രഹസനമാണ്.

Continue Reading

columns

അരങ്ങൊഴിയുന്നോ ഗുണമേന്മാ വിദ്യാഭ്യാസം

ഇന്നത്തെ അവസ്ഥ എന്താണെന്നോ? ഇവിടുത്തെ മിക്ക ശാസ്ത്ര സാങ്കേതിക സര്‍വകലാശാലകളിലും ആയിരക്കണക്കിന് സീറ്റുകള്‍ ഒഴിഞ്ഞു കിടക്കുന്നതായാണ് അനുദിനം വാര്‍ത്തകള്‍ വന്നു കൊണ്ടിരിക്കുന്നത്. കേരളത്തില്‍ നിന്നും ഈ രാജ്യങ്ങളിലേക്കെല്ലാം പഠനാര്‍ത്ഥികളുടെ കുത്തൊഴുക്കാണ്.

Published

on

പ്രൊഫ. പി.കെ.കെ തങ്ങള്‍

അനുകൂലവും പ്രതികൂലവുമായ പ്രാപഞ്ചികവും പദാര്‍ത്ഥപരവുമായ അറിവ് നേടുന്ന പ്രക്രിയയെയാണ് നവലോകം വിദ്യാഭ്യാസമെന്ന സാങ്കേതിക പ്രയോഗം കൊണ്ട് അര്‍ത്ഥമാക്കുന്നത്. മാതാവിന്റെ ഗര്‍ഭാശയം തൊട്ട് ജനനത്തോടൊപ്പവും അതിനുശേഷമുള്ള തുടര്‍ച്ചയായ ജീവിത വളര്‍ച്ചയിലെ അനുനിമിഷ പ്രയാണങ്ങളിലുമെല്ലാം മനുഷ്യന് അറിവ് നേടാനുള്ള അവസരങ്ങളാണ് പ്രകൃത്യാ നിക്ഷിപ്തമായിട്ടുള്ളത്. സഹവാസത്തിലൂടെ ആദ്യസഹവാസം മാതാവും പിതാവും പിന്നെ അന്തരീക്ഷവും കുഞ്ഞില്‍ പകര്‍ന്നുകിട്ടുന്നതെന്തും അനുകൂലമോ പ്രതികൂലമോ ആയ അറിവുകളാണ്. അവിടുന്ന് മുന്നോട്ട്, മുന്‍കാലങ്ങളിലാണെങ്കില്‍ ഗുരുകുലത്തില്‍ നിന്നോ വ്യക്തിഗത ഗുരുക്കന്മാരില്‍ നിന്നോ അറിവ് നേടുന്ന രീതിയായിരുന്നു നിലനിന്നിരുന്നത്. എന്നാല്‍ ഇവയേതും കൂട്ടിയോചിപ്പിച്ചുകൊണ്ടുള്ള വിദ്യാഭ്യാസമെന്ന സാങ്കേതിക പേരിലുള്ള അഭിനവ രീതി മനുഷ്യവംശത്തിന്റെ മൊത്തത്തിലുള്ള അഭ്യുന്നതിയെ ലക്ഷ്യമാക്കി പില്‍ക്കാലത്ത് സംവിധാനിക്കപ്പെട്ടിട്ടുള്ളതും ഇന്നും തുടര്‍ന്നുപോരുന്നതുമാണ്. ഉപര്യുക്ത രീതികളിലേതൊന്നിന്റെയും ലക്ഷ്യം മനുഷ്യനില്‍ അറിവെന്ന സത്ത സന്നിവേശിപ്പിക്കുകയെന്നത് മാത്രമാണ്; അറിവുമാത്രമല്ല അതിനോടൊപ്പം പ്രായോഗികതയും. അറിവിന് പ്രാമുഖ്യം കല്പിക്കാത്ത ഒരു സമൂഹവും കടന്നുപോയിട്ടില്ല. ആനുപാതികമായിരിക്കാമെന്ന് മാത്രം. അന്ധകാരയുഗമെന്ന് വിശേഷിപ്പിക്കപ്പെട്ട കാലത്ത് പോലും അക്ഷരവും അറിവും രൂഢമൂലമായിരുന്നുവെന്നതിന്റെ ഇന്നും നിലനില്‍ക്കുന്ന തെളിവുകളല്ലേ അന്ധകാരയുഗത്തിലെ സപ്തമഹാകാവ്യങ്ങള്‍! വിജ്ഞാനമെന്നത് ഒരു തുടര്‍ച്ചയാണ്. അത് കൊണ്ടായിരിക്കുമല്ലോ, ഫലിതോക്തിയെങ്കിലും ‘കുഞ്ഞിന്റച്ഛന്‍ വിദ്വാനെങ്കില്‍; കുഞ്ഞിനെ വിദ്യപഠിപ്പിക്കേണ്ട’യെന്ന ചൊല്ലുപോലും നിലനിന്നുപോരുന്നത്. അറിവ് അങ്ങേയറ്റം ആദരിക്കപ്പെടുന്നതും പ്രചരിക്കപ്പെടുന്നതുമായ പ്രപഞ്ചത്തിലെ ഏറ്റവും മൂല്യവത്തായ നിധിയാണെന്നതില്‍ ആര്‍ക്കാണ് സംശയം?

മാനവികത, ധാര്‍മികത എന്നിവക്ക് പ്രാമുഖ്യം നല്‍കിക്കൊണ്ടുള്ള വിദ്യാഭ്യാസ രീതിയായിരുന്നു മുന്‍തലമുറകള്‍ അനുവര്‍ത്തിച്ചുകൊണ്ടിരുന്നത്. തലമുറകളെ വാര്‍ത്തെടുക്കേണ്ടത് അറിവെന്ന പോഷണം നല്‍കിക്കൊണ്ടായിരിക്കണം. ഏറെക്കുറെ മുന്‍കാലങ്ങളില്‍ അപ്രകാരം തന്നെ ആയിരുന്നു താനും. എന്നാല്‍ കാല പ്രയാണത്തില്‍ കാഴ്ചപ്പാടുകളിലും സമീപനങ്ങളിലും വ്യതിയാനങ്ങള്‍ നേരിട്ടുകൊണ്ടിരുന്നു. മൂല്യാധിഷ്ഠിതക്കു പകരം പണാധിഷ്ഠിത കാഴ്ചപ്പാടിലേക്ക് സമൂഹം ക്രമേണ കൂടു മാറി. ഇന്ന് തുടരുന്നതും അങ്ങനെത്തന്നെ. മൂല്യങ്ങളെ ബഹുഭൂരിഭാഗങ്ങളും അവജ്ഞയോടെ മാത്രം നോക്കിക്കാണുന്നു. എന്തിനേറെ പറയണം, നമ്മുടെ വിദ്യാഭ്യാസ സമ്പ്രദായത്തിലെ അടിസ്ഥാന ശിലകളായ അധ്യാപനം, പഠനം, പരീക്ഷ, ജയം, തോല്‍വി എന്നിവയോടുള്ള സമീപനം തന്നെനോക്കുക. തൊട്ടു മുമ്പ് കഴിഞ്ഞ അര നൂറ്റാണ്ടിന്റെ രീതികള്‍ പരിശോധിച്ചാല്‍ അത് ബോധ്യപ്പെടുന്നതേയുള്ളൂ. നമ്മുടെ വിദ്യാലയങ്ങളില്‍ നേരത്തെ നിലനിന്നിരുന്ന വ്യവസ്ഥകളനുസരിച്ച് നിശ്ചയിക്കപ്പെട്ടിട്ടുള്ള പാഠ്യപദ്ധതിപ്രകാരം എല്ലാ വിഷയങ്ങളിലും നിശ്ചിത ശതമാനം മാര്‍ക്കുവാങ്ങുന്നവര്‍ക്കേ മേല്‍ഘട്ടത്തിലേക്ക് പഠനാനുമതി നല്‍കിയിരുന്നുള്ളൂ. എന്നാല്‍ ഒരു പരിഷ്‌ക്കാരത്തിന്റെ പേരില്‍ വിഷയങ്ങള്‍ ഗ്രൂപ്പുകളാക്കിത്തിരിച്ച് ഗ്രൂപ്പ് വിജയപരാജയങ്ങള്‍ മാനദണ്ഡങ്ങളാക്കി മാറ്റി. അതും പിന്നിട്ട് ഗ്രൂപ്പില്‍പെട്ട ഏതെങ്കിലും ഒരു വിഷയത്തില്‍ പത്ത് ശതമാനം മാര്‍ക്ക് മാത്രമാണ് കിട്ടിയതെങ്കില്‍ പോലും ഗ്രൂപ്പ് മഹിമയുടെ പേരില്‍ ക്ലാസ് കയറ്റം കൊടുക്കാമെന്നാക്കി. ഇവിടെയെല്ലാം നാം മനസ്സിലാക്കേണ്ടത് ഇത്തരം രീതികള്‍ കാരണം നിലവാരപ്രകാരം അര്‍ഹരല്ലാത്തവര്‍ മേല്‍ ഘട്ടങ്ങളിലേക്കെത്തിച്ചേരുന്നു എന്നതാണ്. അങ്ങിനെ ഘട്ടം ഘട്ടമായി അവര്‍ കടമ്പകള്‍ മറികടന്ന് ‘യോഗ്യത’ നേടിയവരുടെ കൂട്ടത്തിലേക്കെത്തിച്ചേരുന്നു. പൊതുനിലവാരത്തില്‍ വെള്ളംചേര്‍ക്കുന്ന എളുപ്പവഴിയാണിതെന്നാര്‍ക്കാണ് മനസ്സിലാവാത്തത്? ചുരുക്കത്തില്‍, വര്‍ഷങ്ങളെണ്ണിത്തീര്‍ത്താല്‍ കോഴ്‌സെന്ന കടമ്പ കഴിഞ്ഞു! യോഗ്യതയുടെ ആഴമോ പരപ്പോ ഉത്തരവാദപ്പെട്ടവര്‍ ഗൗനിക്കുന്നോ? പരിക്കേല്‍ക്കുന്നത് വിദ്യാഭ്യാസ സമ്പ്രദായത്തിനും.

നമ്മുടെ, നിലവിലെ വിദ്യാഭ്യാസ മേഖല നയിക്കുന്നവര്‍ കണ്ണും മനവും തുറന്ന് ഉള്‍ക്കൊള്ളേണ്ടുന്ന ചില യാഥാര്‍ഥ്യങ്ങളുണ്ട്. കേരളം സാക്ഷരതാ രംഗത്ത് മുന്‍പന്തിയിലാണെന്നതു ന്യായീകരിച്ചാല്‍ തന്നെ തലയെണ്ണി അക്ഷരം തിരിയുമെന്ന് പ്രഖ്യാപിക്കുന്നതിലെന്താണ് പ്രയോജനം? അക്ഷര പരിചയത്തെ കുറച്ചു കാണുന്നില്ല. പക്ഷെ സാക്ഷരത എന്നതുകൊണ്ട് ആശയപരമായി നേടേണ്ടത് നേടുന്നുണ്ടോ? കേരളത്തിലെ പത്താം ക്ലാസ് പഠിച്ചവനും മറ്റു സംസ്ഥാനങ്ങളിലെ പത്താം ക്ലാസ് പഠിച്ചവനും തമ്മില്‍ വല്ല പൊരുത്തവുമുണ്ടോ? വിദ്യാലയ ജീവിത കാലഘട്ടത്തില്‍ കുട്ടികള്‍ക്ക് കിട്ടേണ്ടുന്ന വ്യക്തിവികാസം ഉള്‍പ്പെടെയുള്ള മാനസിക മുന്നേറ്റം അവരില്‍ സാധിതമാകുന്നുണ്ടോ? തള്ളിവിടുന്നതിലും കടത്തിവിടുന്നതിലും മാത്രമല്ലേ സംവിധാനത്തിന്റെ ശുഷ്‌ക്കാന്തി? സ്‌കൂള്‍ പൊതുവിദ്യാലയ സംവിധാനത്തില്‍ സൗജന്യ വിദ്യാഭ്യാസമാണെന്നതിന്റെ പേരില്‍ ഭാവിതലമുറയെ കുരുതികൊടുക്കുന്ന വിധമല്ലേ വിദ്യാഭ്യാസ ഗുണനിലവാരത്തിന്റെ അവസ്ഥ. ‘വെറുതെ കിട്ടുന്നതല്ലേ അത്രയൊക്കെ മതി’ എന്നതാണോ ഭരണകൂടത്തിന്റെ നിലപാട്. കേരളത്തില്‍ അടിസ്ഥാന വിദ്യാഭ്യാസം നേടിയ കുട്ടികള്‍ ഇന്നത്തെ അവസ്ഥയില്‍ സംഭ്രാന്തരാണ്. എന്തുകൊണ്ടെന്നാല്‍ അഖിലേന്ത്യാ നിലവാരത്തിലേക്കുള്ള ഒന്നും അവരുടെ കൈകളിലില്ല. അഖിലേന്ത്യാതലത്തിലുള്ള വിദ്യാഭ്യാസരംഗത്തോ മറ്റു ഉന്നത വിദ്യഭ്യാസ തൊഴില്‍ മേഖലകളിലോ ഉന്നത പഠനത്തിനോ ജോലിക്കോ ശ്രമിക്കുന്നവര്‍ ഇതര സംസ്ഥാന അപേക്ഷകരുടെ മുന്നില്‍ നിഷ്പ്രഭരായി പോകുന്നു. കാരണമായി ഒരു വസ്തുത തറപ്പിച്ചു പറയട്ടെ, ഇവിടെ വിദ്യാഭ്യാസ നിലവാരം അളക്കുന്നത് തീര്‍ത്തും ശതമാനക്കണക്കില്‍ മാത്രമാണെങ്കില്‍ മറ്റെവിടെയും, ഇന്ത്യയിലും വിദേശങ്ങളിലും, ഗുണനിലവാരത്തെ ആശ്രയിച്ചാണ് ഉന്നത പഠന രംഗത്തും തൊഴില്‍ രംഗത്തും പരിഗണന. ടീനേജുകാരെയും യുവാക്കളെയും വഞ്ചിക്കുന്നതിലാണ് ഉത്തരവാദപ്പെട്ടവരുടെ നിലപാടുകള്‍ കൊണ്ടുചെന്നെത്തിക്കുന്നത്. പഠന നിലവാരം അഥവാ ഗുണമേന്മ പഠിതാക്കളുടെ വ്യക്തി വികാസ മുറകള്‍ എന്നിവയില്‍ വിദ്യാഭ്യാസ സംവിധാനം വീഴ്ച വരുത്തുന്നത് തീര്‍ത്തും കുറ്റകരമാണ്.

ഉന്നത വിദ്യാഭ്യാസരംഗത്ത് വിശേഷിച്ചും ശാസ്ത്രസാങ്കേതിക പഠന മേഖലകളില്‍ ഒരു പ്രവേശനത്തിനായി പരിശ്രമിച്ചു പരാജയപ്പെട്ടവരും, അല്ലെങ്കില്‍ അതിനു തക്ക മികവില്ലാത്തവരുമായിരുന്നു, മുന്‍കാലങ്ങളിലെല്ലാം യു.കെയിലും യു.എസ്.എയിലും മറ്റും ഉന്നത പഠനത്തിനായി പോകാറുണ്ടായിരുന്നത്. എന്നാല്‍ ഇന്നത്തെ അവസ്ഥ എന്താണെന്നോ? ഇവിടുത്തെ മിക്ക ശാസ്ത്ര സാങ്കേതിക സര്‍വകലാശാലകളിലും ആയിരക്കണക്കിന് സീറ്റുകള്‍ ഒഴിഞ്ഞു കിടക്കുന്നതായാണ് അനുദിനം വാര്‍ത്തകള്‍ വന്നു കൊണ്ടിരിക്കുന്നത്. കേരളത്തില്‍ നിന്നും ഈ രാജ്യങ്ങളിലേക്കെല്ലാം പഠനാര്‍ത്ഥികളുടെ കുത്തൊഴുക്കാണ്. ബാങ്കുകളില്‍ നിന്നും കടമെടുത്തും, അല്ലാത്ത വിധത്തിലും പണം കണ്ടെത്തി അവര്‍ കേരളം വിടുകയാണ്. പഠനത്തോടൊപ്പം തൊഴില്‍ ചെയ്ത് ജീവസന്ധാരണത്തിനുള്ള വഴികണ്ടെത്താനും അവിടങ്ങളിലെല്ലാം അവസരങ്ങളുമുണ്ട്. ഇതില്‍ അടങ്ങിയിരിക്കുന്ന ഒരു യാഥാര്‍ഥ്യം കൂടിയുണ്ട്, അതായത് മാനുഷികത, ലോക മാനവികത. നമ്മുടെ ഭരണകൂടത്തിന് ഉദ്‌ഘോഷണം എന്ന ഉപാധിയല്ലാതെ പ്രായോഗികത എന്നൊരു കാഴ്ചപ്പാടുണ്ടോ? അധികാരത്വരയില്‍ കണ്ണ് മഞ്ഞളിച്ചതിനാല്‍ നമ്മുടെ അധികാരികള്‍ക്കിതൊന്നും കാണാനാവുന്നില്ല. ദൂരക്കാഴ്ചയും പ്രായോഗികതയുമില്ലാത്തവര്‍ അധികാരം കൈയാളിയാല്‍ വന്നുചേരുന്ന ദുരന്തമാണിത്. ആകയാല്‍ ഉത്തരവാദപ്പെട്ടവര്‍ നമ്മുടെ പൊതുവിദ്യാഭ്യാസവും ഉന്നത വിദ്യഭ്യാസവും സര്‍വത്ര സ്വീകാര്യമായ ഉന്നത നിലവാരത്തിലേക്ക് മുന്‍കാലങ്ങളിലെ പോലെ ഉയര്‍ത്തിക്കൊണ്ടു വരേണ്ടതാണ്. ഗുണമേന്മാ വിദ്യാഭ്യാസത്തിന്റെ ‘ഹബ്ബാ’യി കേരളത്തെ വീണ്ടും മാറ്റിയെടുക്കാന്‍ ദിശാബോധമുള്ളവര്‍ മുന്നോട്ടുവരുമെന്നാശിക്കുന്നു.

Continue Reading

columns

ഈ ക്രൂരതക്ക് അറുതിയില്ലേ-എഡിറ്റോറിയല്‍

ഇസ്രാഈല്‍ പട്ടാളക്കാരുടെ തോക്കിനിരയായി മരിച്ചു വീഴുന്ന ഫലസ്തീനികളുടെ എണ്ണം നാള്‍ക്കുനാള്‍ വര്‍ദ്ധിക്കുകയാണ്. അധിനിവേശ വെസ്റ്റ്ബാങ്കിലും സമീപ പ്രദേശങ്ങളിലുമായി ഒരാളെങ്കിലും അരുംകൊല ചെയ്യപ്പെടാത്ത ദിവസം ഇല്ലെന്നായിരിക്കുന്നു.

Published

on

ഇസ്രാഈല്‍ പട്ടാളക്കാരുടെ തോക്കിനിരയായി മരിച്ചു വീഴുന്ന ഫലസ്തീനികളുടെ എണ്ണം നാള്‍ക്കുനാള്‍ വര്‍ദ്ധിക്കുകയാണ്. അധിനിവേശ വെസ്റ്റ്ബാങ്കിലും സമീപ പ്രദേശങ്ങളിലുമായി ഒരാളെങ്കിലും അരുംകൊല ചെയ്യപ്പെടാത്ത ദിവസം ഇല്ലെന്നായിരിക്കുന്നു. ചോര പുരണ്ട ഫലസ്തീന്‍ വാര്‍ത്തകള്‍ ഓരോന്നും ക്രൂരതയുടെ കഥ പറയുന്നവയാണ്. ഭൂമി വെട്ടിപ്പിടിക്കുന്നതോടൊപ്പം ഒരു ജനതയെ ഇഞ്ചിഞ്ചായി ഉന്മൂലനം ചെയ്ത് അധിനിവേശത്തിനുള്ള മാര്‍ഗ തടസ്സം ഒഴിവാക്കാനുള്ള ശ്രമത്തിലാണ് സയണിസ്റ്റ് ഭരണകൂടം. പശ്ചിമേഷ്യയുടെ ചരിത്രത്തിലെ ഏറെ രക്തപങ്കിലമായ വര്‍ഷങ്ങളിലൊന്നാണ് കടന്നുപോകുന്നത്. യു.എന്‍ കണക്കു പ്രകാരം ഈ വര്‍ഷം 50 കുട്ടികളടക്കം 200ലേറെ പേര്‍ ഫലസ്തീനില്‍ കൊല്ലപ്പെട്ടുകഴിഞ്ഞു. ഇവരെല്ലാവരും കുട്ടികളോ കൗമാരക്കാരോ യുവാക്കളോ ആണെന്നതാണ് ശ്രദ്ധേയമായ വസ്തുത. പ്രായം അമ്പതു കടന്നവര്‍ വളരെ ചുരുക്കം. അധിനിവേശത്തിന്റെ ഏറ്റവും ഭീകരമായ പരീക്ഷണങ്ങളാണ് ഫലസ്തീനുമേല്‍ ഇസ്രാഈല്‍ നടത്തിക്കൊണ്ടിരിക്കുന്നത്. കുഞ്ഞുങ്ങളെയും യുവാക്കളെയും കൊന്നുതള്ളി ഒരു ജനതയെ ഒന്നടങ്കം അതി വിദഗ്ധമായി തുടച്ചുനീക്കുകയാണ്. പിന്തുടര്‍ച്ച അവകാശപ്പെടാന്‍ ഒരു കുഞ്ഞു പോലും ഫലസ്തീനില്‍ അവശേഷിക്കരുതെന്ന നിര്‍ബന്ധ ബുദ്ധിയോടെയാണ് ഇസ്രാഈല്‍ മുന്നോട്ടുപോകുന്നത്.

1967 മുതല്‍ ഫലസ്തീന്റെ ഭൂപ്രദേശങ്ങളെ ഇസ്രാഈല്‍ വിഴുങ്ങിക്കൊണ്ടിരിക്കുകയാണ്. അന്താരാഷ്ട്ര നിയമത്തിന് എതിരാണെന്ന പൂര്‍ണ ബോധ്യമുണ്ടായിട്ടും അധിനിവേശത്തില്‍നിന്ന് ഒരു തരി പോലും പിന്മാറാന്‍ അവര്‍ തയാറായിട്ടില്ല. ഫലസ്തീനികള്‍ക്ക് സ്വന്തമായി ഒരു ചാണ്‍ ഭൂമി പോലും ഇല്ലാതായിക്കൊണ്ടിരിക്കുന്നു. കുടിയൊഴിപ്പിക്കപ്പെടുന്ന കുടുംബങ്ങളുടെ എണ്ണം കൂടുകയാണ്. പകരം ഇസ്രാഈല്‍ കുടിയേറ്റക്കാര്‍ ഇടംനേടുന്നു. കുടിയൊഴിഞ്ഞു പോകാന്‍ വിസമ്മതിക്കുന്നവരുടെ വീടുകള്‍ ബുള്‍ഡോസര്‍ ഉപയോഗിച്ച് ഇടിച്ചുനിരത്തപ്പെടുന്നത് നിത്യക്കാഴ്ചകളാണ്. അധിനിവേശ വെസ്റ്റ്ബാങ്കിന്റെ 18 ശതമാനവും സൈനിക പരിശീലന കേന്ദ്രമായാണ് ഇസ്രാഈല്‍ പ്രഖ്യാപിച്ചിരിക്കുന്നത്. ഇവിടെയുള്ള ആറായിരത്തിലേറെ ഫലസ്തീനികളെ അനധികൃത താമസക്കാരായി പ്രഖ്യാപിച്ചു കഴിഞ്ഞു. സൈനിക കേന്ദ്രമെന്ന നിലയില്‍ വെടിവെപ്പിന് സാധ്യത ഏറെയുണ്ടെന്നും അതുകൊണ്ട് എത്രയും പെട്ടെന്ന് കുടിയൊഴിയണമെന്നുമാണ് ഇസ്രാഈലിന്റെ ഭീഷണി. വെസ്റ്റ് ബാങ്കിന് സമീപം ജെനിന്‍ അഭയാര്‍ത്ഥി ക്യാമ്പില്‍ ഇസ്രാഈല്‍ നരനായാട്ട് തുടരുകയാണ്. ജെനിനിലും സമീപ പ്രദേശങ്ങളിലും ഫലസ്തീന്‍ കുടുംബങ്ങള്‍ സ്വസ്ഥമായി ഉറങ്ങിയിട്ട് മാസങ്ങളായി. ഇവിടെ ഇസ്രാഈല്‍ പട്ടാളക്കാര്‍ നിരങ്ങുകയാണ്. അര്‍ദ്ധരാത്രിക്കു ശേഷം ഭീകരാന്തരീക്ഷം സൃഷ്ടിച്ചാണ് പട്ടാളക്കാരുടെ കടന്നുവരവ്. വീടുകളില്‍ ഇരച്ചുകയറി സ്ത്രീകളെയും കുട്ടികളെയും മര്‍ദ്ദിക്കുന്നത് അവര്‍ ക്രൂര വിനോദമാക്കി മാറ്റിയിട്ടുണ്ട്. 10 വയസ്സിന് മുകളിലുള്ളവരെ തിരഞ്ഞുപിടിച്ച് വെടിവെച്ചു കൊല്ലുന്നതോടൊപ്പം അറസ്റ്റെന്ന പേരില്‍ ആളുകളെ തട്ടിക്കൊണ്ടുപോകുകയും ചെയ്യുന്നു. എന്തിനും ഏതിനും തങ്ങള്‍ക്ക് അധികാരമുണ്ടെന്ന ഭാവത്തിലാണ് ഇസ്രാഈല്‍ സേന ഫലസ്തീന്‍ മണ്ണില്‍ ഭീകര താണ്ഡവമാടുന്നത്. ഫലസ്തീനില്‍ ഇസ്രാഈലിന്റെ തോക്കിനിരയാകാന്‍ പ്രത്യേകിച്ചൊരു കാരണവും വേണ്ട. കണ്ണില്‍ കണ്ടവരെ മുഴുവന്‍ കൊന്നു തള്ളാന്‍ ഇസ്രാഈല്‍ ഭരണകൂടം സൈന്യത്തിന് അധികാരം നല്‍കിയിട്ടുണ്ട്. സ്ത്രീകളും കുട്ടികളുമടക്കം നൂറുകണക്കിന് ആളുകളാണ് ഇതിനകം പിടഞ്ഞു മരിച്ചത്.

കഴിഞ്ഞ ദിവസം മഹ്മൂദ് അല്‍ സഅദിയെന്ന പതിനെട്ടുകാരനായ ഹൈസ്‌കൂള്‍ വിദ്യാര്‍ത്ഥി കൊല്ലപ്പെട്ടത് സ്‌കൂളിലേക്കുള്ള വഴിയിലായിരുന്നു. ജെനിന്‍ അഭയാര്‍ത്ഥി ക്യാമ്പിലെ വീട്ടില്‍നിന്ന് ഇറങ്ങിയ അവന്‍ മാര്‍ഗമധ്യേ ഇസ്രാഈല്‍ പട്ടാളക്കാരുടെ കവചിത വാഹനം കണ്ടു. മുന്നോട്ടു പോകുന്നത് അപകടമാണെന്ന് തോന്നി വീട്ടിലേക്ക് മടങ്ങുന്നതിനിടെയാണ് മഹ്മൂദിന്റെ വയറിന് വെടിയേറ്റത്. തനിക്ക് വെടിയേറ്റതായി അവന്‍ വിളിച്ചുപറഞ്ഞു. പക്ഷെ, മഹ്മൂദ് തങ്ങളെ കബളിപ്പിക്കുകയാണെന്നാണ് അവര്‍ വിചാരിച്ചത്. രക്തം ചീറ്റിയൊഴുകുന്ന വയറുമായി അവന്‍ സുഹൃത്തുക്കളുടെ അടുത്തെത്താന്‍ കുറുച്ചുദൂരം ഓടിനോക്കി. വഴിയില്‍ തളര്‍ന്നു വീണ അവനെ സുഹൃത്തുക്കള്‍ തൊട്ടടുത്തു ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. രാവിലെ സ്‌കൂളിലേക്ക് പുറപ്പെട്ട മഹ്മൂദിന്റെ ചേതനയറ്റ ശരീരമാണ് മണിക്കൂറുകള്‍ക്കുശേഷം വീട്ടില്‍ തിരിച്ചുകയറിയത്്. ഇത് ഒറ്റപ്പെട്ട സംഭവമല്ല. ഓരോ ദിവസവും ഫലസ്തീനില്‍ ഇസ്രാഈല്‍ നടത്തുന്ന ഭീകര കൊലപാതകങ്ങളില്‍ ഒന്നു മാത്രമാണിത്. അല്‍ജസീറയുടെ അമേരിക്കന്‍ വംശജയായ മാധ്യമപ്രവര്‍ത്തക ഷിറീന്‍ അബൂ അക്‌ലയെ ഇസ്രാഈല്‍ സേന കൊലപ്പെടുത്തിയ അതേ സ്ഥലത്തായിരുന്നു മഹ്മൂദും വെടിയേറ്റു വീണത്. അന്താരാഷ്ട്ര സമൂഹത്തിന്റെ കണ്‍മുന്നില്‍ ഇത്രയേറെ ഭീകരമായി വേട്ടയാടപ്പെടുന്ന മറ്റൊരു ജനത ലോകത്തില്ല. ഒറ്റപ്പെട്ട ശബ്ദങ്ങള്‍ക്കപ്പുറം അവര്‍ക്ക് ആശ്വാസം പകരാന്‍ ഒരാളും മുന്നോട്ടുവരുന്നില്ല. ഇരയോടൊപ്പം ഓടുകയും മറുവശത്ത് വേട്ടക്കാരനോടൊപ്പം വേട്ടയാടുകയും ചെയ്യുന്ന നിലപാടാണ് അന്താരാഷ്ട്ര സമൂഹത്തിന്റേത്. ഇസ്രാഈല്‍ നടത്തുന്ന മനുഷ്യാവകാശ ധ്വംസനങ്ങളെ പച്ചയായി ന്യായീകരിക്കാന്‍ അമേരിക്കയുള്‍പ്പെടെയുള്ള ശക്തികള്‍ക്ക് ഒട്ടും ലജ്ജയില്ല. വംശീയ ഉന്മൂലനത്തിന്റെ ശവപ്പറമ്പായി ഫലസ്തീന്‍ മാറുമ്പോള്‍ ലോകത്തിന്റെ മൗനം ഇസ്രാഈലിനെ കൂടുതല്‍ രക്തദാഹിയാക്കുകയാണ്.

Continue Reading

Trending