കൊച്ചി: സംസ്ഥാനത്ത് സ്വര്‍ണവില വീണ്ടും കുതിച്ച് പവന് 90,000 കടന്ന് പുതിയ സര്‍വകാല റെക്കോഡിലെത്തി. 22 കാരറ്റ് (916) സ്വര്‍ണത്തിന് ബുധനാഴ്ച ഗ്രാമിന് 105 ഉയര്‍ന്ന് 11,290, പവന് 90,320 എന്ന നിരക്കിലാണ് വില്‍പ്പന നടക്കുന്നത്. ചരിത്രത്തില്‍ ഇതാദ്യമായാണ് സ്വര്‍ണവില ഇത്രയും ഉയരുന്നത്.

സെപ്റ്റംബര്‍ 28ന് ഗ്രാമിന് 10,585 ആയിരുന്ന സ്വര്‍ണവില, പത്ത് ദിവസത്തിനിടെ 705 ഉയര്‍ന്ന് 11,290 ആയി. അതായത് പവന് 5,640 രൂപയുടെ വര്‍ധനവാണ് രേഖപ്പെടുത്തിയത്. ഇടയ്ക്കു ചെറിയ തോതില്‍ വില കുറഞ്ഞിരുന്നെങ്കിലും, തുടര്‍ച്ചയായ ആറാം ദിവസവും വില വര്‍ധിച്ചതോടെ പുതിയ റെക്കോര്‍ഡ് നിലവില്‍വന്നു.

18 കാരറ്റ് സ്വര്‍ണം ഗ്രാമിന് 90 കൂടി 9,290, 14 കാരറ്റിന് 7,235, 9 കാരറ്റിന് 4,685 എന്ന നിരക്കിലാണ് ഇന്ന് വില്‍പ്പന. വെള്ളി ഗ്രാമിന് 2 കൂടി 163 ആയി.

അന്താരാഷ്ട്ര വിപണിയിലും സ്വര്‍ണവില ഉയരുകയാണ്. ഔണ്‍സിന് 4,015 ഡോളര്‍ എന്ന നിരക്കില്‍ ചരിത്രത്തിലെ ഏറ്റവും ഉയര്‍ന്ന വിലയാണ് ഇപ്പോഴുള്ളത്. 2008-ല്‍ 1000 ഡോളറും, 2011-ല്‍ 2000 ഡോളറും, 2021-ല്‍ 3000 ഡോളറും മറികടന്നതിന് ശേഷം, ഇപ്പോള്‍ 4000 ഡോളര്‍ എന്ന നാഴികക്കല്ല് പിന്നിട്ടിരിക്കുകയാണ്.

ഡോളറിനെതിരെ രൂപയുടെ വിനിമയ നിരക്ക് 88.75 ആയതോടെ സംസ്ഥാനത്ത് ഏറ്റവും കുറഞ്ഞ പണിക്കൂലിയില്‍ പോലും ഒരു പവന്‍ സ്വര്‍ണം വാങ്ങാന്‍ ലക്ഷം രൂപയോടടുത്ത ചെലവ് വരുന്ന സാഹചര്യമാണിപ്പോള്‍.

മാര്‍ക്കറ്റ് വിദഗ്ധര്‍ മുന്നറിയിപ്പ് നല്‍കുന്നത്, സ്വര്‍ണത്തെ സുരക്ഷിത നിക്ഷേപമെന്ന് കാണുന്നവരുടെ എണ്ണം കൂടുന്നതിനാല്‍ അടുത്ത ദിവസങ്ങളിലും വില കൂടാനാണ് സാധ്യത.