ന്യൂഡല്‍ഹി: നൂറ്റാണ്ടിലെ ഏറ്റവും ദൈര്‍ഘ്യമേറിയ പൂര്‍ണ ചന്ദ്രഗ്രഹണം ഈ മാസം 27ന് ദൃശ്യമാവും. ചന്ദ്രഗ്രഹണം ഒരു മണിക്കൂര്‍ 43 മിനിട്ട് നീണ്ടുനില്‍ക്കും. 27ന് ഭൂമി സൂര്യനും ചൊവ്വക്കും ഇടയിലെത്തുമ്പോഴാണ് ഗ്രഹണം നടക്കുക. ഭൂമിയോട് അടുത്തെത്തുന്ന ചൊവ്വ സാധാരണയില്‍ കവിഞ്ഞ പ്രകാശത്തോടെ ജൂലൈ അവസാനം വരെ പുലര്‍വേളകളില്‍ ദൃശ്യമാകും. 27-28 ന് ഭൂമിയുടെ അടുത്തെത്തുന്ന ചൊവ്വയെ വളരെ എളുപ്പത്തില്‍ നഗ്നനേത്രങ്ങള്‍ കൊണ്ട് കാണാന്‍ സാധിക്കും.

ചൊവ്വ ഭൂമിയുടെ ഏറ്റവും അടുത്തെത്തുന്നത് ഈ മാസം 31 നായിരിക്കും. ശരാശരി രണ്ട് വര്‍ഷവും രണ്ട് മാസത്തെയും ഇടവേളയിലാണ് ചൊവ്വ ഭൂമിയുടെ എതിര്‍ദിശയില്‍ ഏറ്റവും അടുത്തെത്തുന്നത്. 2003 ആഗസ്തിലാണ് ചൊവ്വയും ഭൂമിയും ഇതിന് മുമ്പ് ഏറ്റവും അടുത്തെത്തിയത്. അന്നത്തേക്കാള്‍ കൂടുതല്‍ പ്രകാശത്തില്‍ 31 ന് ചൊവ്വയെ കാണാനാകും. 27 ന് ഇന്ത്യന്‍ സ്റ്റാന്‍ഡേര്‍ഡ് സമയം 11 മണി 54 മിനിട്ടിന് ഭാഗിക ചന്ദ്രഗ്രഹണം ആരംഭിക്കും. ഭൂമിയുടെ നിഴല്‍ ക്രമേണ ചന്ദ്രനെ മൂടുന്നതോടെ പൂര്‍ണ്ണ ഗ്രഹണം 28 പുലര്‍ച്ചെ ഒരു മണിക്ക് തുടങ്ങും. തുടര്‍ന്ന് രണ്ട് മണി 43 മിനിട്ട് വരെ സമ്പൂര്‍ണ്ണ ചന്ദ്രഗ്രഹണം നീണ്ട് നില്‍ക്കും. ഭൂമിയുടെ നിഴലില്‍ നിന്ന് ചന്ദ്രന്‍ ക്രമേണ പുറത്ത് വരുന്നതോടെ, 28 ന് പുലര്‍ച്ചെ മൂന്ന് മണി 49 മിനിട്ട് ന് ഗ്രഹണം അവസാനിക്കും.ഈ ഗ്രഹണത്തില്‍ ചന്ദ്രന്‍ അതിന്റെ ഭ്രമണപഥത്തില്‍ ഭൂമിയില്‍ നിന്ന് ഏറ്റവും അകലെ കുറഞ്ഞ വേഗതയിലായിരിക്കും സഞ്ചരിക്കുക. ഇതാണ് നൂറ്റാണ്ടിലെ ഏറ്റവും വലിയ പൂര്‍ണ്ണ ചന്ദ്രഗ്രഹണമാക്കി മാറ്റുന്നത്.

ഇതിന് മുമ്പ് ഇത്തരത്തില്‍ ദീര്‍ഘനേരത്തെ പൂര്‍ണ്ണ ചന്ദ്രഗ്രഹണങ്ങള്‍ നടന്നിട്ടുള്ളത് 2000 ജൂലൈ 16 നും (ഒരു മണിക്കൂര്‍ 46 മിനിട്ട്) 2016 ജൂണ്‍ 15 നുമാണ് (ഒരു മണിക്കൂര്‍ 43 മിനിട്ട്). ഗ്രഹണം മുഴുവനായും രാജ്യത്തിന്റെ എല്ലാ ഭാഗത്തും ദൃശ്യമായിരിക്കും. ഓസ്‌ട്രേലിയ, ഏഷ്യ, വടക്കന്‍ ഭാഗങ്ങള്‍ ഒഴികെയുള്ള റഷ്യ, ആഫ്രിക്ക, യൂറോപ്പ്, തെക്കേ അമേരിക്കയുടെ കിഴക്കന്‍ ഭാഗങ്ങള്‍ അന്റാര്‍ട്ടിക്ക എന്നിവിടങ്ങളിലും ഗ്രഹണം ദൃശ്യമാകും.